১৮. অট্ঠাৰসমৱগ্গো

(১৭৯) ৩. কৰুণাকথা

৮০৭. নত্থি বুদ্ধস্স ভগৱতো কৰুণাতি? আমন্তা. নত্থি বুদ্ধস্স ভগৱতো মেত্তাতি? ন হেৱং ৱত্তব্বে…পে… নত্থি বুদ্ধস্স ভগৱতো কৰুণাতি? আমন্তা. নত্থি বুদ্ধস্স ভগৱতো মুদিতা…পে… উপেক্খাতি? ন হেৱং ৱত্তব্বে…পে….

অত্থি বুদ্ধস্স ভগৱতো মেত্তাতি? আমন্তা. অত্থি বুদ্ধস্স ভগৱতো কৰুণাতি? ন হেৱং ৱত্তব্বে…পে… অত্থি বুদ্ধস্স ভগৱতো মুদিতা…পে… উপেক্খাতি? আমন্তা. অত্থি বুদ্ধস্স ভগৱতো কৰুণাতি? ন হেৱং ৱত্তব্বে…পে….

নত্থি বুদ্ধস্স ভগৱতো কৰুণাতি? আমন্তা. ভগৱা অকাৰুণিকোতি? ন হেৱং ৱত্তব্বে…পে… ননু ভগৱা কাৰুণিকো লোকহিতো লোকানুকম্পকো লোকত্থচৰোতি? আমন্তা. হঞ্চি ভগৱা কাৰুণিকো লোকহিতো লোকানুকম্পকো লোকত্থচৰো, নো চ ৱত ৰে ৱত্তব্বে – ‘‘নত্থি বুদ্ধস্স ভগৱতো কৰুণা’’তি…পে….

নত্থি বুদ্ধস্স ভগৱতো কৰুণাতি? আমন্তা. ননু ভগৱা মহাকৰুণাসমাপত্তিং সমাপজ্জীতি? আমন্তা. হঞ্চি ভগৱা মহাকৰুণাসমাপত্তিং সমাপজ্জি, নো চ ৱত ৰে ৱত্তব্বে – ‘‘নত্থি বুদ্ধস্স ভগৱতো কৰুণা’’তি.

৮০৮. অত্থি বুদ্ধস্স ভগৱতো কৰুণাতি? আমন্তা. ভগৱা সৰাগোতি? ন হেৱং ৱত্তব্বে. তেন হি নত্থি বুদ্ধস্স ভগৱতো কৰুণাতি.

কৰুণাকথা নিট্ঠিতা.