(১৩৩) ৮. অসাতৰাগকথা

৬৭৪. অত্থি অসাতৰাগোতি? আমন্তা. দুক্খাভিনন্দিনো সত্তা, অত্থি কেচি দুক্খং পত্থেন্তি পিহেন্তি এসন্তি গৱেসন্তি পৰিযেসন্তি, দুক্খং অজ্ঝোসায তিট্ঠন্তীতি? ন হেৱং ৱত্তব্বে…পে… ননু সুখাভিনন্দিনো সত্তা, অত্থি কেচি সুখং পত্থেন্তি পিহেন্তি এসন্তি গৱেসন্তি পৰিযেসন্তি, সুখং অজ্ঝোসায তিট্ঠন্তীতি? আমন্তা. হঞ্চি সুখাভিনন্দিনো সত্তা, অত্থি কেচি সুখং পত্থেন্তি পিহেন্তি এসন্তি গৱেসন্তি পৰিযেসন্তি, সুখং অজ্ঝোসায তিট্ঠন্তি, নো চ ৱত ৰে ৱত্তব্বে – ‘‘অত্থি অসাতৰাগো’’তি.

অত্থি অসাতৰাগোতি? আমন্তা. দুক্খায ৱেদনায ৰাগানুসযো অনুসেতি, সুখায ৱেদনায পটিঘানুসযো অনুসেতীতি? ন হেৱং ৱত্তব্বে…পে… ননু সুখায ৱেদনায ৰাগানুসযো অনুসেতি, দুক্খায ৱেদনায পটিঘানুসযো অনুসেতীতি? আমন্তা. হঞ্চি সুখায ৱেদনায ৰাগানুসযো অনুসেতি, দুক্খায ৱেদনায পটিঘানুসযো অনুসেতি, নো চ ৱত ৰে ৱত্তব্বে – ‘‘অত্থি অসাতৰাগো’’তি.

৬৭৫. ন ৱত্তব্বং – ‘‘অত্থি অসাতৰাগো’’তি? আমন্তা. ননু ৱুত্তং ভগৱতা – ‘‘সো এৱং অনুৰোধৱিৰোধং সমাপন্নো যং কিঞ্চি ৱেদনং ৱেদযতি সুখং ৱা দুক্খং ৱা অদুক্খমসুখং ৱা, সো তং ৱেদনং অভিনন্দতি অভিৱদতি অজ্ঝোসায তিট্ঠতী’’তি [ম. নি. ৩.৪০৯ মহাতণ্হাসঙ্খযে]! অত্থেৱ সুত্তন্তোতি? আমন্তা. তেন হি অত্থি অসাতৰাগোতি.

অসাতৰাগকথা নিট্ঠিতা.