১৩. তেৰসমৱগ্গো

(১৩০) ৫. নিৱুতকথা

৬৬৫. নিৱুতো নীৱৰণং জহতীতি? আমন্তা. ৰত্তো ৰাগং জহতি, দুট্ঠো দোসং জহতি, মূড়্হো মোহং জহতি, কিলিট্ঠো কিলেসে জহতীতি? ন হেৱং ৱত্তব্বে…পে… ৰাগেন ৰাগং জহতি, দোসেন দোসং জহতি, মোহেন মোহং জহতি, কিলেসেহি কিলেসে জহতীতি? ন হেৱং ৱত্তব্বে…পে….

ৰাগো চিত্তসম্পযুত্তো, মগ্গো চিত্তসম্পযুত্তোতি? আমন্তা. দ্ৱিন্নং ফস্সানং…পে… দ্ৱিন্নং চিত্তানং সমোধানং হোতীতি? ন হেৱং ৱত্তব্বে…পে… ৰাগো অকুসলো, মগ্গো কুসলোতি? আমন্তা. কুসলাকুসলা সাৱজ্জানৱজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৱং আগচ্ছন্তীতি? ন হেৱং ৱত্তব্বে…পে….

৬৬৬. কুসলাকুসলা সাৱজ্জানৱজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৱং আগচ্ছন্তীতি? আমন্তা. ননু ৱুত্তং ভগৱতা – ‘‘চত্তাৰিমানি, ভিক্খৱে, সুৱিদূৰৱিদূৰানি! কতমানি চত্তাৰি? নভঞ্চ, ভিক্খৱে, পথৱী চ – ইদং পঠমং সুৱিদূৰৱিদূৰং…পে… তস্মা সতং ধম্মো অসব্ভি আৰকা’’তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘কুসলাকুসলা…পে… সম্মুখীভাৱং আগচ্ছন্তী’’তি.

নিৱুতো নীৱৰণং জহতীতি? আমন্তা. ননু ৱুত্তং ভগৱতা – ‘‘সো এৱং সমাহিতে চিত্তে পৰিসুদ্ধে পৰিযোদাতে অনঙ্গণে ৱিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৱানং খযঞাণায চিত্তং অভিনিন্নামেতী’’তি! অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘নিৱুতো নীৱৰণং জহতী’’তি…পে….

৬৬৭. ন ৱত্তব্বং – ‘‘নিৱুতো নীৱৰণং জহতী’’তি? আমন্তা. ননু ৱুত্তং ভগৱতা – ‘‘তস্স এৱং জানতো এৱং পস্সতো কামাসৱাপি চিত্তং ৱিমুচ্চতি…পে… অৱিজ্জাসৱাপি চিত্তং ৱিমুচ্চতী’’তি! অত্থেৱ সুত্তন্তোতি? আমন্তা. তেন হি নিৱুতো নীৱৰণং জহতীতি.

নিৱুতকথা নিট্ঠিতা.