১১. একাদসমৱগ্গো

(১১২) ৭. ইদ্ধিবলকথা

৬২১. ইদ্ধিবলেন সমন্নাগতো কপ্পং তিট্ঠেয্যাতি? আমন্তা. ইদ্ধিমযিকো সো আযু, ইদ্ধিমযিকা সা গতি, ইদ্ধিমযিকো সো অত্তভাৱপ্পটিলাভোতি? ন হেৱং ৱত্তব্বে…পে….

ইদ্ধিবলেন সমন্নাগতো কপ্পং তিট্ঠেয্যাতি? আমন্তা. অতীতং কপ্পং তিট্ঠেয্য, অনাগতং কপ্পং তিট্ঠেয্যাতি? ন হেৱং ৱত্তব্বে…পে… ইদ্ধিবলেন সমন্নাগতো কপ্পং তিট্ঠেয্যাতি? আমন্তা. দ্ৱে কপ্পে তিট্ঠেয্য, তযো কপ্পে তিট্ঠেয্য, চত্তাৰো কপ্পে তিট্ঠেয্যাতি? ন হেৱং ৱত্তব্বে…পে… ইদ্ধিবলেন সমন্নাগতো কপ্পং তিট্ঠেয্যাতি? আমন্তা. সতি জীৱিতে জীৱিতাৱসেসে তিট্ঠেয্য, অসতি জীৱিতে জীৱিতাৱসেসে তিট্ঠেয্যাতি? সতি জীৱিতে জীৱিতাৱসেসে তিট্ঠেয্যাতি. হঞ্চি সতি জীৱিতে জীৱিতাৱসেসে তিট্ঠেয্য, নো চ ৱত ৰে ৱত্তব্বে – ‘‘ইদ্ধিবলেন সমন্নাগতো কপ্পং তিট্ঠেয্যা’’তি. অসতি জীৱিতে জীৱিতাৱসেসে তিট্ঠেয্যাতি, মতো তিট্ঠেয্য, কালঙ্কতো তিট্ঠেয্যাতি? ন হেৱং ৱত্তব্বে…পে….

৬২২. ইদ্ধিবলেন সমন্নাগতো কপ্পং তিট্ঠেয্যাতি? আমন্তা. উপ্পন্নো ফস্সো মা নিৰুজ্ঝীতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে… উপ্পন্না ৱেদনা…পে… উপ্পন্না সঞ্ঞা …পে… উপ্পন্না চেতনা…পে… উপ্পন্নং চিত্তং… উপ্পন্না সদ্ধা… উপ্পন্নং ৱীৰিযং… উপ্পন্না সতি… উপ্পন্নো সমাধি …পে… উপ্পন্না পঞ্ঞা মা নিৰুজ্ঝীতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে….

ইদ্ধিবলেন সমন্নাগতো কপ্পং তিট্ঠেয্যাতি? আমন্তা. ৰূপং নিচ্চং হোতূতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে… ৱেদনা…পে… সঞ্ঞা… সঙ্খাৰা… ৱিঞ্ঞাণং নিচ্চং হোতূতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে….

ইদ্ধিবলেন সমন্নাগতো কপ্পং তিট্ঠেয্যাতি? আমন্তা. জাতিধম্মা সত্তা মা জাযিংসূতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে… জৰাধম্মা সত্তা মা জীৰিংসূতি…পে… ব্যাধিধম্মা সত্তা মা ব্যাধিযিংসূতি…পে… মৰণধম্মা সত্তা মা মীযিংসূতি লব্ভা ইদ্ধিযা পগ্গহেতুন্তি? ন হেৱং ৱত্তব্বে…পে….

৬২৩. ন ৱত্তব্বং – ‘‘ইদ্ধিবলেন সমন্নাগতো কপ্পং তিট্ঠেয্যা’’তি? আমন্তা. ননু ৱুত্তং ভগৱতা – ‘‘যস্স কস্সচি, আনন্দ, চত্তাৰো ইদ্ধিপাদা ভাৱিতা বহুলীকতা যানীকতা ৱত্থুকতা অনুট্ঠিতা পৰিচিতা সুসমাৰদ্ধা, সো আকঙ্খমানো কপ্পং ৱা তিট্ঠেয্য কপ্পাৱসেসং ৱা’’তি [দী. নি. ২.১৬৬; সং. নি. ৫.৮২২; উদা. ৫১]! অত্থেৱ সুত্তন্তোতি? আমন্তা. তেন হি ইদ্ধিবলেন সমন্নাগতো কপ্পং তিট্ঠেয্যাতি.

৬২৪. ইদ্ধিবলেন সমন্নাগতো কপ্পং তিট্ঠেয্যাতি? আমন্তা. ননু ৱুত্তং ভগৱতা – ‘‘চতুন্নং, ভিক্খৱে, ধম্মানং নত্থি কোচি পাটিভোগো সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং! কতমেসং চতুন্নং? জৰাধম্মো ‘‘মা জীৰী’’তি নত্থি কোচি পাটিভোগো সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং. ব্যাধিধম্মো ‘‘মা ব্যাধিযী’’তি…পে… মৰণধম্মো ‘‘মা মীযী’’তি…পে… যানি খো পন তানি পুব্বে কতানি পাপকানি কম্মানি সংকিলেসিকানি পোনোব্ভৱিকানি [পোনোভৱিকানি (সী. পী.)] সদৰানি [নিস্সাৰানি (সী. পী. ক.), দুক্খুদ্ৰযানি (স্যা.)] দুক্খৱিপাকানি আযতিং জাতিজৰামৰণিযানি তেসং ৱিপাকো ‘‘মা নিব্বত্তী’’তি নত্থি কোচি পাটিভোগো সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং. ইমেসং খো, ভিক্খৱে, চতুন্নং ধম্মানং নত্থি কোচি পাটিভোগো সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মি’’ন্তি [অ. নি. ৪.১৮২]. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘ইদ্ধিবলেন সমন্নাগতো কপ্পং তিট্ঠেয্যা’’তি.

ইদ্ধিবলকথা নিট্ঠিতা.