(১০৫) ১১. অৱিঞ্ঞত্তি দুস্সিল্যন্তিকথা

৬০৩. অৱিঞ্ঞত্তি দুস্সিল্যন্তি? আমন্তা. পাণাতিপাতোতি? ন হেৱং ৱত্তব্বে…পে… অদিন্নাদানন্তি? ন হেৱং ৱত্তব্বে…পে… কামেসুমিচ্ছাচাৰোতি? ন হেৱং ৱত্তব্বে…পে… মুসাৱাদোতি? ন হেৱং ৱত্তব্বে…পে… সুৰামেৰযমজ্জপমাদট্ঠানন্তি? ন হেৱং ৱত্তব্বে…পে….

পাপকম্মং সমাদিযিত্ৱা দানং দদন্তস্স পুঞ্ঞঞ্চ অপুঞ্ঞঞ্চ উভো ৱড্ঢন্তীতি? ন হেৱং ৱত্তব্বে…পে… পুঞ্ঞঞ্চ অপুঞ্ঞঞ্চ উভো ৱড্ঢন্তীতি? আমন্তা. দ্ৱিন্নং ফস্সানং…পে… দ্ৱিন্নং চিত্তানং সমোধানং হোতীতি? ন হেৱং ৱত্তব্বে…পে… দ্ৱিন্নং ফস্সানং…পে… দ্ৱিন্নং চিত্তানং সমোধানং হোতীতি? আমন্তা. কুসলাকুসলা সাৱজ্জানৱজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৱং আগচ্ছন্তীতি? ন হেৱং ৱত্তব্বে…পে….

কুসলাকুসলা সাৱজ্জানৱজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৱং আগচ্ছন্তীতি? আমন্তা. ননু ৱুত্তং ভগৱতা – ‘‘চত্তাৰিমানি, ভিক্খৱে, সুৱিদূৰৱিদূৰানি! কতমানি চত্তাৰি? নভঞ্চ, ভিক্খৱে, পথৱী চ – ইদং পঠমং সুৱিদূৰৱিদূৰং…পে… তস্মা সতং ধম্মো অসব্ভি আৰকা’’তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘কুসলাকুসলা সাৱজ্জানৱজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৱং আগচ্ছন্তী’’তি.

৬০৪. ন ৱত্তব্বং – ‘‘অৱিঞ্ঞত্তি দুস্সিল্য’’ন্তি? আমন্তা. ননু পাপকম্মং সমাদিন্নো আসীতি? আমন্তা. হঞ্চি পাপকম্মং সমাদিন্নো আসি, তেন ৱত ৰে ৱত্তব্বে – ‘‘অৱিঞ্ঞত্তি দুস্সিল্য’’ন্তি.

অৱিঞ্ঞত্তি দুস্সিল্যন্তিকথা নিট্ঠিতা.

দসমৱগ্গো.

তস্সুদ্দানং –

উপপত্তেসিযে পঞ্চক্খন্ধে অনিৰুদ্ধে কিৰিযা পঞ্চক্খন্ধা উপ্পজ্জন্তি, মগ্গসমঙ্গিস্স ৰূপং মগ্গো, পঞ্চৱিঞ্ঞাণসমঙ্গিস্স অত্থি মগ্গভাৱনা, পঞ্চৱিঞ্ঞাণা কুসলাপি অকুসলাপি, পঞ্চৱিঞ্ঞাণা সাভোগা, মগ্গসমঙ্গী দ্ৱীহি সীলেহি সমন্নাগতো, সীলং অচেতসিকং, সীলং ন চিত্তানুপৰিৱত্তি, সমাদানহেতুকং সীলং ৱড্ঢতীতি, ৱিঞ্ঞত্তিসীলং অৱিঞ্ঞত্তি দুস্সিল্যন্তি.

দুতিযো পণ্ণাসকো.

তস্সুদ্দানং –

নিযামসঙ্গহগতানিসংসতা চ নিৰোধোতি [নিযাম সঙ্গহগতানিসংসতা অত্থি পঞ্চৱোকাৰভৱো নিৰোধো মগ্গসমঙ্গিস্স পঞ্চৱোকাৰভৱোতি (সী. স্যা. ক.), নিযাম সঙ্গহ গতানিসংসতা অত্থি পঞ্চৱোকাৰভৱো মগ্গসমঙ্গিস্স নো পঞ্চৱোকাৰভৱো (পী.)].