(৮০) ৮. অৰূপে ৰূপকথা

৫২৪. অত্থি ৰূপং অৰূপেসূতি? আমন্তা. ৰূপভৱো ৰূপগতি ৰূপসত্তাৱাসো ৰূপসংসাৰো ৰূপযোনি ৰূপত্তভাৱপটিলাভোতি? ন হেৱং ৱত্তব্বে…পে… ননু অৰূপভৱো অৰূপগতি অৰূপসত্তাৱাসো অৰূপসংসাৰো অৰূপযোনি অৰূপত্তভাৱপটিলাভোতি? আমন্তা. হঞ্চি অৰূপভৱো…পে… অৰূপত্তভাৱপটিলাভো, নো চ ৱত ৰে ৱত্তব্বে – ‘‘অত্থি ৰূপং অৰূপেসূ’’তি.

অত্থি ৰূপং অৰূপেসূতি? আমন্তা. পঞ্চৱোকাৰভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… ননু চতুৱোকাৰভৱো…পে… অত্তভাৱপটিলাভোতি? আমন্তা. হঞ্চি চতুৱোকাৰভৱো গতি…পে… অত্তভাৱপটিলাভো, নো চ ৱত ৰে ৱত্তব্বে – ‘‘অত্থি ৰূপং অৰূপেসূ’’তি.

৫২৫. অত্থি ৰূপং ৰূপধাতুযা, সো চ ৰূপভৱো ৰূপগতি ৰূপসত্তাৱাসো ৰূপসংসাৰো ৰূপযোনি ৰূপত্তভাৱপটিলাভোতি? আমন্তা. অত্থি ৰূপং অৰূপেসু, সো চ ৰূপভৱো ৰূপগতি…পে… ৰূপত্তভাৱপটিলাভোতি? ন হেৱং ৱত্তব্বে…পে… অত্থি ৰূপং ৰূপধাতুযা, সো চ পঞ্চৱোকাৰভৱো গতি…পে… অত্তভাৱপটিলাভোতি? আমন্তা. অত্থি ৰূপং অৰূপেসু, সো চ পঞ্চৱোকাৰভৱো গতি…পে… অত্তভাৱপটিলাভোতি? ন হেৱং ৱত্তব্বে…পে…. অত্থি ৰূপং অৰূপেসু, সো চ অৰূপভৱো অৰূপগতি অৰূপসত্তাৱাসো অৰূপসংসাৰো অৰূপযোনি অৰূপত্তভাৱপটিলাভোতি? আমন্তা. অত্থি ৰূপং ৰূপধাতুযা [অৰূপধাতুযা (সব্বত্থ)], সো চ অৰূপভৱো অৰূপগতি…পে… অৰূপত্তভাৱপটিলাভোতি? ন হেৱং ৱত্তব্বে…পে… অত্থি ৰূপং অৰূপেসু, সো চ চতুৱোকাৰভৱো গতি…পে… অত্তভাৱপটিলাভোতি? আমন্তা. অত্থি ৰূপং ৰূপধাতুযা [অৰূপধাতুযা (সব্বত্থ)], সো চ চতুৱোকাৰভৱো গতি…পে… অত্তভাৱপটিলাভোতি? ন হেৱং ৱত্তব্বে…পে….

৫২৬. অত্থি ৰূপং অৰূপেসূতি? আমন্তা. ননু ৰূপানং নিস্সৰণং অৰূপং [ইতিৱু. ৭২; অ. নি. ৫.২০০; দী. নি. ৩.৩২১] ৱুত্তং ভগৱতাতি? আমন্তা. হঞ্চি ৰূপানং নিস্সৰণং অৰূপং [ইতিৱু. ৭২; অ. নি. ৫.২০০; দী. নি. ৩.৩২১] ৱুত্তং ভগৱতা, নো চ ৱত ৰে ৱত্তব্বে – ‘‘অত্থি ৰূপং অৰূপেসূ’’তি.

ৰূপানং নিস্সৰণং অৰূপং ৱুত্তং ভগৱতা, অত্থি ৰূপং অৰূপেসূতি? আমন্তা. কামানং নিস্সৰণং নেক্খম্মং ৱুত্তং ভগৱতা, অত্থি নেক্খম্মেসু কামা, অত্থি অনাসৱেসু আসৱা, অত্থি অপৰিযাপন্নেসু পৰিযাপন্নাতি? ন হেৱং ৱত্তব্বে…পে….

অৰূপে ৰূপকথা নিট্ঠিতা.