(৮২) ১০. জীৱিতিন্দ্ৰিযকথা

৫৪০. নত্থি ৰূপজীৱিতিন্দ্ৰিযন্তি? আমন্তা. নত্থি ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনাতি? ন হেৱং ৱত্তব্বে…পে… অত্থি ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনাতি? আমন্তা. হঞ্চি অত্থি ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা, নো চ ৱত ৰে ৱত্তব্বে – ‘‘নত্থি ৰূপজীৱিতিন্দ্ৰিয’’ন্তি.

অত্থি অৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা, অত্থি অৰূপজীৱিতিন্দ্ৰিযন্তি? আমন্তা. অত্থি ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা, অত্থি ৰূপজীৱিতিন্দ্ৰিযন্তি? ন হেৱং ৱত্তব্বে…পে… অত্থি ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা, নত্থি ৰূপজীৱিতিন্দ্ৰিযন্তি? আমন্তা. অত্থি অৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা, নত্থি অৰূপজীৱিতিন্দ্ৰিযন্তি? ন হেৱং ৱত্তব্বে…পে….

অৰূপীনং ধম্মানং আযু অৰূপজীৱিতিন্দ্ৰিযন্তি? আমন্তা. ৰূপীনং ধম্মানং আযু ৰূপজীৱিতিন্দ্ৰিযন্তি? ন হেৱং ৱত্তব্বে…পে… ৰূপীনং ধম্মানং আযু ন ৱত্তব্বং – ‘‘ৰূপজীৱিতিন্দ্ৰিয’’ন্তি? আমন্তা. অৰূপীনং ধম্মানং আযু ন ৱত্তব্বং – ‘‘অৰূপজীৱিতিন্দ্ৰিয’’ন্তি? ন হেৱং ৱত্তব্বে…পে….

৫৪১. ৰূপীনং ধম্মানং আযু অৰূপজীৱিতিন্দ্ৰিযন্তি? আমন্তা. অৰূপীনং ধম্মানং আযু ৰূপজীৱিতিন্দ্ৰিযন্তি? ন হেৱং ৱত্তব্বে…পে….

অৰূপীনং ধম্মানং আযু ন ৱত্তব্বং – ‘‘ৰূপজীৱিতিন্দ্ৰিয’’ন্তি? আমন্তা. ৰূপীনং ধম্মানং আযু ন ৱত্তব্বং – ‘‘অৰূপজীৱিতিন্দ্ৰিয’’ন্তি? ন হেৱং ৱত্তব্বে…পে….

ৰূপীনঞ্চ অৰূপীনঞ্চ ধম্মানং আযু অৰূপজীৱিতিন্দ্ৰিযন্তি? আমন্তা. ৰূপীনঞ্চ অৰূপীনঞ্চ ধম্মানং আযু ৰূপজীৱিতিন্দ্ৰিযন্তি? ন হেৱং ৱত্তব্বে…পে….

ৰূপীনঞ্চ অৰূপীনঞ্চ ধম্মানং আযু ন ৱত্তব্বং – ‘‘ৰূপজীৱিতিন্দ্ৰিয’’ন্তি? আমন্তা. ৰূপীনঞ্চ অৰূপীনঞ্চ ধম্মানং আযু ন ৱত্তব্বং – ‘‘অৰূপজীৱিতিন্দ্ৰিয’’ন্তি? ন হেৱং ৱত্তব্বে…পে… নত্থি ৰূপজীৱিতিন্দ্ৰিযন্তি? আমন্তা. নিৰোধং সমাপন্নস্স নত্থি জীৱিতিন্দ্ৰিযন্তি? ন হেৱং ৱত্তব্বে…পে….

৫৪২. নিৰোধং সমাপন্নস্স অত্থি জীৱিতিন্দ্ৰিযন্তি? আমন্তা. হঞ্চি নিৰোধং সমাপন্নস্স অত্থি জীৱিতিন্দ্ৰিযং, নো চ ৱত ৰে ৱত্তব্বে – ‘‘নত্থি ৰূপজীৱিতিন্দ্ৰিয’’ন্তি.

নিৰোধং সমাপন্নস্স অত্থি জীৱিতিন্দ্ৰিযন্তি? আমন্তা. কতমক্খন্ধপৰিযাপন্নন্তি? সঙ্খাৰক্খন্ধপৰিযাপন্নন্তি. নিৰোধং সমাপন্নস্স অত্থি সঙ্খাৰক্খন্ধোতি? ন হেৱং ৱত্তব্বে…পে….

নিৰোধং সমাপন্নস্স অত্থি সঙ্খাৰক্খন্ধোতি? আমন্তা. নিৰোধং সমাপন্নস্স অত্থি ৱেদনাক্খন্ধো…পে… সঞ্ঞাক্খন্ধো…পে… ৱিঞ্ঞাণক্খন্ধোতি? ন হেৱং ৱত্তব্বে…পে….

নিৰোধং সমাপন্নস্স অত্থি ৱেদনাক্খন্ধো…পে… সঞ্ঞাক্খন্ধো…পে… ৱিঞ্ঞাণক্খন্ধোতি? আমন্তা. ন নিৰোধং সমাপন্নোতি? ন হেৱং ৱত্তব্বে…পে….

৫৪৩. নত্থি ৰূপজীৱিতিন্দ্ৰিযন্তি? আমন্তা. অসঞ্ঞসত্তানং নত্থি জীৱিতিন্দ্ৰিযন্তি? ন হেৱং ৱত্তব্বে…পে….

অসঞ্ঞসত্তানং অত্থি জীৱিতিন্দ্ৰিযন্তি? আমন্তা. হঞ্চি অসঞ্ঞসত্তানং অত্থি জীৱিতিন্দ্ৰিযং, নো চ ৱত ৰে ৱত্তব্বে – ‘‘নত্থি ৰূপজীৱিতিন্দ্ৰিয’’ন্তি. অসঞ্ঞসত্তানং অত্থি জীৱিতিন্দ্ৰিযন্তি? আমন্তা. কতমক্খন্ধপৰিযাপন্নন্তি? সঙ্খাৰক্খন্ধপৰিযাপন্নন্তি. অসঞ্ঞসত্তানং অত্থি সঙ্খাৰক্খন্ধোতি? ন হেৱং ৱত্তব্বে…পে….

অসঞ্ঞসত্তানং অত্থি সঙ্খাৰক্খন্ধোতি? আমন্তা. অসঞ্ঞসত্তানং অত্থি ৱেদনাক্খন্ধো…পে… সঞ্ঞাক্খন্ধো…পে… ৱিঞ্ঞাণক্খন্ধোতি? ন হেৱং ৱত্তব্বে…পে….

অসঞ্ঞসত্তানং অত্থি ৱেদনাক্খন্ধো…পে… সঞ্ঞাক্খন্ধো…পে… ৱিঞ্ঞাণক্খন্ধোতি? আমন্তা. পঞ্চৱোকাৰভৱোতি? ন হেৱং ৱত্তব্বে…পে….

৫৪৪. উপপত্তেসিযেন চিত্তেন সমুট্ঠিতং জীৱিতিন্দ্ৰিযং উপপত্তেসিযে চিত্তে ভিজ্জমানে একদেসং ভিজ্জতীতি? আমন্তা. উপপত্তেসিযেন চিত্তেন সমুট্ঠিতো ফস্সো উপপত্তেসিযে চিত্তে ভিজ্জমানে একদেসো ভিজ্জতীতি? ন হেৱং ৱত্তব্বে…পে….

উপপত্তেসিযেন চিত্তেন সমুট্ঠিতো ফস্সো উপপত্তেসিযে চিত্তে ভিজ্জমানে অনৱসেসো ভিজ্জতীতি? আমন্তা. উপপত্তেসিযেন চিত্তেন সমুট্ঠিতং জীৱিতিন্দ্ৰিযং উপপত্তেসিযে চিত্তে ভিজ্জমানে অনৱসেসং ভিজ্জতীতি? ন হেৱং ৱত্তব্বে…পে….

৫৪৫. দ্ৱে জীৱিতিন্দ্ৰিযানীতি? আমন্তা. দ্ৱীহি জীৱিতেহি জীৱতি, দ্ৱীহি মৰণেহি মীযতীতি? আমন্তা [ন হেৱং ৱত্তব্বে (স্যা. কং. পী.)].

জীৱিতিন্দ্ৰিযকথা নিট্ঠিতা.