(৬৮) ৬. ইতোদিন্নকথা

৪৮৮. ইতো দিন্নেন তত্থ যাপেন্তীতি? আমন্তা. ইতো চীৱৰং দেন্তি তং চীৱৰং তত্থ পৰিভুঞ্জন্তীতি? ন হেৱং ৱত্তব্বে…পে… ইতো পিণ্ডপাতং দেন্তি, ইতো সেনাসনং দেন্তি, ইতো গিলানপচ্চযভেসজ্জপৰিক্খাৰং দেন্তি, ইতো খাদনীযং দেন্তি, ইতো ভোজনীযং দেন্তি, ইতো পানীযং দেন্তি; তং পানীযং তত্থ পৰিভুঞ্জন্তীতি? ন হেৱং ৱত্তব্বে…পে….

ইতো দিন্নেন তত্থ যাপেন্তীতি? আমন্তা. অঞ্ঞো অঞ্ঞস্স কাৰকো পৰকতং সুখদুক্খং অঞ্ঞো কৰোতি, অঞ্ঞো পটিসংৱেদেতীতি? ন হেৱং ৱত্তব্বে…পে….

৪৮৯. ন ৱত্তব্বং – ‘‘ইতো দিন্নেন তত্থ যাপেন্তী’’তি? আমন্তা. ননু পেতা অত্তনো অত্থায দানং দেন্তং অনুমোদেন্তি, চিত্তং পসাদেন্তি, পীতিং উপ্পাদেন্তি, সোমনস্সং পটিলভন্তীতি? আমন্তা. হঞ্চি পেতা অত্তনো অত্থায দানং দেন্তং অনুমোদেন্তি, চিত্তং পসাদেন্তি, পীতিং উপ্পাদেন্তি, সোমনস্সং পটিলভন্তি; তেন ৱত ৰে ৱত্তব্বে – ‘‘ইতো দিন্নেন তত্থ যাপেন্তী’’তি.

৪৯০. ন ৱত্তব্বং – ‘‘ইতো দিন্নেন তত্থ যাপেন্তী’’তি? আমন্তা. ননু ৱুত্তং ভগৱতা –

‘‘উন্নমে উদকং ৱুট্ঠং, যথানিন্নং পৱত্ততি;

এৱমেৱ ইতো দিন্নং, পেতানং উপকপ্পতি.

‘‘যথা ৱাৰিৱহা পূৰা, পৰিপূৰেন্তি সাগৰং;

এৱমেৱ ইতো দিন্নং, পেতানং উপকপ্পতি.

‘‘ন হি তত্থ কসী অত্থি, গোৰক্খেত্থ ন ৱিজ্জতি;

ৱণিজ্জা তাদিসী নত্থি, হিৰঞ্ঞেন কযাকযং [কযক্কযং (সী. পী.)];

ইতো দিন্নেন যাপেন্তি, পেতা কালঙ্কতা তহি’’ন্তি [খু. পা. ৭.৬; পে. ৱ. ১৯].

অত্থেৱ সুত্তন্তোতি? আমন্তা. তেন হি ইতো দিন্নেন তত্থ যাপেন্তীতি.

৪৯১. ন ৱত্তব্বং – ‘‘ইতো দিন্নেন তত্থ যাপেন্তী’’তি? আমন্তা. ননু ৱুত্তং ভগৱতা – ‘‘পঞ্চিমানি, ভিক্খৱে, ঠানানি সম্পস্সন্তা মাতাপিতৰো পুত্তং ইচ্ছন্তি কুলে জাযমানং! কতমানি পঞ্চ? ভটো ৱা নো ভৰিস্সতি, কিচ্চং ৱা নো কৰিস্সতি, কুলৱংসো চিৰং ঠস্সতি, দাযজ্জং পটিপজ্জিস্সতি, অথ ৱা পন পেতানং কালঙ্কতানং দক্খিণং অনুপ্পদস্সতি – ইমানি খো, ভিক্খৱে, পঞ্চ ঠানানি সম্পস্সন্তা মাতাপিতৰো পুত্তং ইচ্ছন্তি কুলে জাযমান’’ন্তি.

‘‘পঞ্চ ঠানানি সম্পস্সং, পুত্তং ইচ্ছন্তি পণ্ডিতা;

ভটো ৱা নো ভৰিস্সতি, কিচ্চং ৱা নো কৰিস্সতি.

‘‘কুলৱংসো চিৰং তিট্ঠে, দাযজ্জং পটিপজ্জতি;

অথ ৱা পন পেতানং, দক্খিণং অনুপ্পদস্সতি.

‘‘ঠানানেতানি সম্পস্সং, পুত্তং ইচ্ছন্তি পণ্ডিতা;

তস্মা সন্তো সপ্পুৰিসা, কতঞ্ঞূ কতৱেদিনো.

‘‘ভৰন্তি মাতাপিতৰো, পুব্বে কতমনুস্সৰং;

কৰোন্তি তেসং কিচ্চানি, যথা তং পুব্বকাৰিনং.

‘‘ওৱাদকাৰী ভটপোসী, কুলৱংসং অহাপযং;

সদ্ধো সীলেন সম্পন্নো, পুত্তো হোতি পসংসিযো’’তি [অ. নি. ৫.৩১].

অত্থেৱ সুত্তন্তোতি? আমন্তা. তেন হি ইতো দিন্নেন তত্থ যাপেন্তীতি.

ইতো দিন্নকথা নিট্ঠিতা.