(৬৩) ১. সঙ্গহিতকথা

৪৭১. নত্থি কেচি ধম্মা কেহিচি ধম্মেহি সঙ্গহিতাতি [সঙ্গহীতাতি (পী.)]? আমন্তা. ননু অত্থি কেচি ধম্মা কেহিচি ধম্মেহি গণনং গচ্ছন্তি উদ্দেসং গচ্ছন্তি পৰিযাপন্নাতি? আমন্তা. হঞ্চি অত্থি কেচি ধম্মা কেহিচি ধম্মেহি গণনং গচ্ছন্তি উদ্দেসং গচ্ছন্তি পৰিযাপন্না, নো চ ৱত ৰে ৱত্তব্বে – ‘‘নত্থি কেচি ধম্মা কেহিচি ধম্মেহি সঙ্গহিতা’’তি.

চক্খাযতনং কতমক্খন্ধগণনং [কতমং খন্ধগণনং (সী. পী. ক.)] গচ্ছতীতি? ৰূপক্খন্ধগণনং গচ্ছতীতি. হঞ্চি চক্খাযতনং ৰূপক্খন্ধগণনং গচ্ছতি, তেন ৱত ৰে ৱত্তব্বে – ‘‘চক্খাযতনং ৰূপক্খন্ধেন সঙ্গহিত’’ন্তি. সোতাযতনং…পে… ঘানাযতনং…পে… জিৱ্হাযতনং…পে… কাযাযতনং কতমক্খন্ধগণনং গচ্ছতীতি? ৰূপক্খন্ধগণনং গচ্ছতীতি. হঞ্চি কাযাযতনং ৰূপক্খন্ধগণনং গচ্ছতি, তেন ৱত ৰে ৱত্তব্বে – ‘‘কাযাযতনং ৰূপক্খন্ধেন সঙ্গহিত’’ন্তি.

ৰূপাযতনং…পে… সদ্দাযতনং…পে… গন্ধাযতনং…পে… ৰসাযতনং…পে… ফোট্ঠব্বাযতনং কতমক্খন্ধগণনং গচ্ছতীতি? ৰূপক্খন্ধগণনং গচ্ছতীতি. হঞ্চি ফোট্ঠব্বাযতনং ৰূপক্খন্ধগণনং গচ্ছতি, তেন ৱত ৰে ৱত্তব্বে – ‘‘ফোট্ঠব্বাযতনং ৰূপক্খন্ধেন সঙ্গহিত’’ন্তি.

সুখা ৱেদনা কতমক্খন্ধগণনং গচ্ছতীতি? ৱেদনাক্খন্ধগণনং গচ্ছতীতি. হঞ্চি সুখা ৱেদনা ৱেদনাক্খন্ধগণনং গচ্ছতি, তেন ৱত ৰে ৱত্তব্বে – ‘‘সুখা ৱেদনা ৱেদনাক্খন্ধেন সঙ্গহিতা’’তি. দুক্খা ৱেদনা…পে… অদুক্খমসুখা ৱেদনা কতমক্খন্ধগণনং গচ্ছতীতি? ৱেদনাক্খন্ধগণনং গচ্ছতীতি. হঞ্চি অদুক্খমসুখা ৱেদনা ৱেদনাক্খন্ধগণনং গচ্ছতি, তেন ৱত ৰে ৱত্তব্বে – ‘‘অদুক্খমসুখা ৱেদনা ৱেদনাক্খন্ধেন সঙ্গহিতা’’তি.

চক্খুসম্ফস্সজা সঞ্ঞা কতমক্খন্ধগণনং গচ্ছতীতি? সঞ্ঞাক্খন্ধগণনং গচ্ছতীতি. হঞ্চি চক্খুসম্ফস্সজা সঞ্ঞা সঞ্ঞাক্খন্ধগণনং গচ্ছতি, তেন ৱত ৰে ৱত্তব্বে – ‘‘চক্খুসম্ফস্সজা সঞ্ঞা সঞ্ঞাক্খন্ধেন সঙ্গহিতা’’তি. সোতসম্ফস্সজা সঞ্ঞা…পে… মনোসম্ফস্সজা সঞ্ঞা কতমক্খন্ধগণনং গচ্ছতীতি? সঞ্ঞাক্খন্ধগণনং গচ্ছতীতি. হঞ্চি মনোসম্ফস্সজা সঞ্ঞা সঞ্ঞাক্খন্ধগণনং গচ্ছতি, তেন ৱত ৰে ৱত্তব্বে – ‘‘মনোসম্ফস্সজা সঞ্ঞা সঞ্ঞাক্খন্ধেন সঙ্গহিতা’’তি.

চক্খুসম্ফস্সজা চেতনা…পে… মনোসম্ফস্সজা চেতনা কতমক্খন্ধগণনং গচ্ছতীতি? সঙ্খাৰক্খন্ধগণনং গচ্ছতীতি. হঞ্চি মনোসম্ফস্সজা চেতনা সঙ্খাৰক্খন্ধগণনং গচ্ছতি, তেন ৱত ৰে ৱত্তব্বে – ‘‘মনোসম্ফস্সজা চেতনা সঙ্খাৰক্খন্ধেন সঙ্গহিতা’’তি.

চক্খুৱিঞ্ঞাণং …পে… মনোৱিঞ্ঞাণং কতমক্খন্ধগণনং গচ্ছতীতি? ৱিঞ্ঞাণক্খন্ধগণনং গচ্ছতীতি. হঞ্চি মনোৱিঞ্ঞাণং ৱিঞ্ঞাণক্খন্ধগণনং গচ্ছতি, তেন ৱত ৰে ৱত্তব্বে – ‘‘মনোৱিঞ্ঞাণং ৱিঞ্ঞাণক্খন্ধেন সঙ্গহিত’’ন্তি.

৪৭২. যথা দামেন ৱা যোত্তেন ৱা দ্ৱে বলিবদ্দা সঙ্গহিতা, সিক্কায পিণ্ডপাতো সঙ্গহিতো, সা গদ্দুলেন সঙ্গহিতো; এৱমেৱ তে ধম্মা তেহি ধম্মেহি সঙ্গহিতাতি [সকৱাদিৱচনং (অট্ঠকথা পস্সিতব্বা)]? হঞ্চি দামেন ৱা যোত্তেন ৱা দ্ৱে বলীবদ্দা সঙ্গহিতা, সিক্কায পিণ্ডপাতো সঙ্গহিতো, সা গদ্দুলেন সঙ্গহিতো, তেন ৱত ৰে ৱত্তব্বে – ‘‘অত্থি কেচি ধম্মা কেহিচি ধম্মেহি সঙ্গহিতা’’তি [সকৱাদিৱচনং (অট্ঠকথা পস্সিতব্বা)].

সঙ্গহিতকথা নিট্ঠিতা.