(৪৪) ২. অসেখঞাণকথা

৪২১. সেখস্স অসেখং ঞাণং অত্থীতি? আমন্তা. সেখো অসেখং ধম্মং জানাতি পস্সতি, দিট্ঠং ৱিদিতং সচ্ছিকতং উপসম্পজ্জ ৱিহৰতি, কাযেন ফুসিত্ৱা ৱিহৰতীতি? ন হেৱং ৱত্তব্বে…পে… ননু সেখো অসেখং ধম্মং ন জানাতি ন পস্সতি, অদিট্ঠং অৱিদিতং অসচ্ছিকতং ন উপসম্পজ্জ ৱিহৰতি, ন কাযেন ফুসিত্ৱা ৱিহৰতীতি? আমন্তা. হঞ্চি সেখো অসেখং ধম্মং ন জানাতি ন পস্সতি, অদিট্ঠং অৱিদিতং অসচ্ছিকতং ন উপসম্পজ্জ ৱিহৰতি, ন কাযেন ফুসিত্ৱা ৱিহৰতি, নো চ ৱত ৰে ৱত্তব্বে – ‘‘সেখস্স অসেখং ঞাণং অত্থী’’তি.

অসেখস্স অসেখং ঞাণং অত্থি, অসেখো অসেখং ধম্মং জানাতি পস্সতি, দিট্ঠং ৱিদিতং সচ্ছিকতং উপসম্পজ্জ ৱিহৰতি, কাযেন ফুসিত্ৱা ৱিহৰতীতি? আমন্তা. সেখস্স অসেখং ঞাণং অত্থি, সেখো অসেখং ধম্মং জানাতি পস্সতি, দিট্ঠং ৱিদিতং সচ্ছিকতং উপসম্পজ্জ ৱিহৰতি, কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

৪২২. সেখস্স অসেখং ঞাণং অত্থি, সেখো অসেখং ধম্মং ন জানাতি ন পস্সতি, অদিট্ঠং অৱিদিতং অসচ্ছিকতং ন উপসম্পজ্জ ৱিহৰতি, ন কাযেন ফুসিত্ৱা ৱিহৰতীতি? আমন্তা. অসেখস্স অসেখং ঞাণং অত্থি, অসেখো অসেখং ধম্মং ন জানাতি ন পস্সতি, অদিট্ঠং অৱিদিতং অসচ্ছিকতং ন উপসম্পজ্জ ৱিহৰতি, ন কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

সেখস্স অসেখং ঞাণং অত্থীতি? আমন্তা. গোত্ৰভুনো পুগ্গলস্স সোতাপত্তিমগ্গে ঞাণং অত্থীতি? ন হেৱং ৱত্তব্বে…পে… সোতাপত্তিফলসচ্ছিকিৰিযায পটিপন্নস্স পুগ্গলস্স সোতাপত্তিফলে ঞাণং অত্থীতি? ন হেৱং ৱত্তব্বে…পে… সকদাগামিফল… অনাগামিফল… অৰহত্তসচ্ছিকিৰিযায পটিপন্নস্স পুগ্গলস্স অৰহত্তে ঞাণং অত্থীতি? ন হেৱং ৱত্তব্বে…পে….

৪২৩. ন ৱত্তব্বং – ‘‘সেখস্স অসেখং ঞাণং অত্থী’’তি? আমন্তা. ননু আযস্মা আনন্দো সেখো – ‘‘ভগৱা উড়াৰো’’তি জানাতি, ‘‘সাৰিপুত্তো থেৰো, মহামোগ্গল্লানো থেৰো উড়াৰো’’তি জানাতীতি? আমন্তা. হঞ্চি আযস্মা আনন্দো সেখো – ‘‘ভগৱা উড়াৰো’’তি জানাতি, ‘‘সাৰিপুত্তো থেৰো, মহামোগ্গল্লানো থেৰো উড়াৰো’’তি জানাতি, তেন ৱত ৰে ৱত্তব্বে – ‘‘সেখস্স অসেখং ঞাণং অত্থী’’তি.

অসেখঞাণকথা নিট্ঠিতা.