৪. চতুত্থৱগ্গো

(৪১) ৯. অপৰাপি সমন্নাগতকথা

৪০৬. অৰহত্তসচ্ছিকিৰিযায পটিপন্নো পুগ্গলো তীহি ফলেহি সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো চতূহি ফস্সেহি চতূহি ৱেদনাহি চতূহি সঞ্ঞাহি চতূহি চেতনাহি চতূহি চিত্তেহি চতূহি সদ্ধাহি চতূহি ৱীৰিযেহি চতূহি সতীহি চতূহি সমাধীহি চতূহি পঞ্ঞাহি সমন্নাগতোতি? ন হেৱং ৱত্তব্বে…পে….

অনাগামিফলসচ্ছিকিৰিযায পটিপন্নো পুগ্গলো দ্ৱীহি ফলেহি সমন্নাগতোতি? আমন্তা. অনাগামিফলসচ্ছিকিৰিযায পটিপন্নো পুগ্গলো তীহি ফস্সেহি তীহি ৱেদনাহি…পে… তীহি পঞ্ঞাহি সমন্নাগতোতি? ন হেৱং ৱত্তব্বে…পে….

সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. সকদাগামিফলসচ্ছিকিৰিযায পটিপন্নো পুগ্গলো দ্ৱীহি ফস্সেহি দ্ৱীহি ৱেদনাহি…পে… দ্ৱীহি পঞ্ঞাহি সমন্নাগতোতি? ন হেৱং ৱত্তব্বে…পে….

অৰহত্তসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো সোতাপন্নো সত্তক্খত্তুপৰমো, কোলঙ্কোলো, একবীজীতি? ন হেৱং ৱত্তব্বে…পে….

অৰহত্তসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো সকদাগামীতি? ন হেৱং ৱত্তব্বে…পে….

অৰহত্তসচ্ছিকিৰিযায পটিপন্নো পুগ্গলো অনাগামিফলেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো অনাগামী অন্তৰাপৰিনিব্বাযী, উপহচ্চপৰিনিব্বাযী, অসঙ্খাৰপৰিনিব্বাযী, সসঙ্খাৰপৰিনিব্বাযী, উদ্ধংসোতো অকনিট্ঠগামীতি? ন হেৱং ৱত্তব্বে…পে….

অনাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সোতাপন্নো সত্তক্খত্তুপৰমো, কোলঙ্কোলো, একবীজীতি? ন হেৱং ৱত্তব্বে…পে….

অনাগামিফলসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সকদাগামীতি? ন হেৱং ৱত্তব্বে…পে….

সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. সকদাগামিফলসচ্ছিকিৰিযায পটিপন্নো পুগ্গলো সোতাপন্নো সত্তক্খত্তুপৰমো, কোলঙ্কোলো, একবীজীতি? ন হেৱং ৱত্তব্বে…পে….

৪০৭. সোতাপত্তিফলেন সমন্নাগতো সোতাপন্নোতি ৱত্তব্বোতি? আমন্তা. অৰহত্তসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. স্ৱেৱ অৰহত্তসচ্ছিকিৰিযায পটিপন্নো পুগ্গলো, সো সোতাপন্নোতি? ন হেৱং ৱত্তব্বে…পে….

সকদাগামিফলেন সমন্নাগতো সকদাগামীতি ৱত্তব্বোতি? আমন্তা. অৰহত্তসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. স্ৱেৱ অৰহত্তসচ্ছিকিৰিযায পটিপন্নো পুগ্গলো, সো সকদাগামীতি? ন হেৱং ৱত্তব্বে…পে….

অনাগামিফলেন সমন্নাগতো অনাগামীতি ৱত্তব্বোতি? আমন্তা. অৰহত্তসচ্ছিকিৰিযায পটিপন্নো পুগ্গলো অনাগামিফলেন সমন্নাগতোতি? আমন্তা. স্ৱেৱ অৰহত্তসচ্ছিকিৰিযায পটিপন্নো পুগ্গলো, সো অনাগামীতি? ন হেৱং ৱত্তব্বে…পে….

সোতাপত্তিফলেন সমন্নাগতো সোতাপন্নোতি ৱত্তব্বোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. স্ৱেৱ অনাগামিফলসচ্ছিকিৰিযায পটিপন্নো পুগ্গলো, সো সোতাপন্নোতি? ন হেৱং ৱত্তব্বে…পে….

সকদাগামিফলেন সমন্নাগতো সকদাগামীতি ৱত্তব্বোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. স্ৱেৱ অনাগামিফলসচ্ছিকিৰিযায পটিপন্নো পুগ্গলো, সো সকদাগামীতি? ন হেৱং ৱত্তব্বে…পে….

সোতাপত্তিফলেন সমন্নাগতো সোতাপন্নোতি ৱত্তব্বোতি? আমন্তা. সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. স্ৱেৱ সকদাগামিফলসচ্ছিকিৰিযায পটিপন্নো পুগ্গলো, সো সোতাপন্নোতি? ন হেৱং ৱত্তব্বে…পে….

৪০৮. অৰহত্তসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. ননু অৰহত্তসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তোতি? আমন্তা. হঞ্চি অৰহত্তসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, নো চ ৱত ৰে ৱত্তব্বে – ‘‘অৰহত্তসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতো’’তি.

অৰহত্তসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, তেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো সোতাপত্তিমগ্গং ৱীতিৱত্তো, সক্কাযদিট্ঠিং ৱিচিকিচ্ছং সীলব্বতপৰামাসং অপাযগমনীযং ৰাগং অপাযগমনীযং দোসং অপাযগমনীযং মোহং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

অৰহত্তসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. ননু অৰহত্তসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তোতি? আমন্তা. হঞ্চি অৰহত্তসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তো, নো চ ৱত ৰে ৱত্তব্বে – ‘‘অৰহত্তসচ্ছিকিৰিযায পটিপন্নো পুগ্গলো সকদাগামিফলেন সমন্নাগতো’’তি.

অৰহত্তসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তো, তেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো সকদাগামিমগ্গং ৱীতিৱত্তো, ওড়াৰিকং কামৰাগং ওড়াৰিকং ব্যাপাদং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

অৰহত্তসচ্ছিকিৰিযায পটিপন্নো পুগ্গলো অনাগামিফলেন সমন্নাগতোতি? আমন্তা. ননু অৰহত্তসচ্ছিকিৰিযায পটিপন্নো পুগ্গলো অনাগামিফলং ৱীতিৱত্তোতি? আমন্তা. হঞ্চি অৰহত্তসচ্ছিকিৰিযায পটিপন্নো পুগ্গলো অনাগামিফলং ৱীতিৱত্তো, নো চ ৱত ৰে ৱত্তব্বে – ‘‘অৰহত্তসচ্ছিকিৰিযায পটিপন্নো পুগ্গলো অনাগামিফলেন সমন্নাগতো’’তি.

অৰহত্তসচ্ছিকিৰিযায পটিপন্নো পুগ্গলো অনাগামিফলং ৱীতিৱত্তো, তেন সমন্নাগতোতি? আমন্তা. অৰহত্তসচ্ছিকিৰিযায পটিপন্নো পুগ্গলো অনাগামিমগ্গং ৱীতিৱত্তো, অণুসহগতং কামৰাগং অণুসহগতং ব্যাপাদং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

৪০৯. অনাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. ননু অনাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তোতি? আমন্তা. হঞ্চি অনাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, নো চ ৱত ৰে ৱত্তব্বে – ‘‘অনাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতো’’তি.

অনাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, তেন সমন্নাগতোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সোতাপত্তিমগ্গং ৱীতিৱত্তো, সক্কাযদিট্ঠিং…পে… অপাযগমনীযং মোহং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

অনাগামিফলসচ্ছিকিৰিযায পটিপন্নো পুগ্গলো সকদাগামিফলেন সমন্নাগতোতি? আমন্তা. ননু অনাগামিফলসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তোতি? আমন্তা. হঞ্চি অনাগামিফলসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তো, নো চ ৱত ৰে ৱত্তব্বে – ‘‘অনাগামিফলসচ্ছিকিৰিযায পটিপন্নো পুগ্গলো সকদাগামিফলেন সমন্নাগতো’’তি.

অনাগামিফলসচ্ছিকিৰিযায পটিপন্নো পুগ্গলো সকদাগামিফলং ৱীতিৱত্তো, তেন সমন্নাগতোতি? আমন্তা. অনাগামিফলসচ্ছিকিৰিযায পটিপন্নো পুগ্গলো সকদাগামিমগ্গং ৱীতিৱত্তো, ওড়াৰিকং কামৰাগং ওড়াৰিকং ব্যাপাদং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

৪১০. সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. ননু সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তোতি? আমন্তা. হঞ্চি সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, নো চ ৱত ৰে ৱত্তব্বে – ‘‘সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতো’’তি.

সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলং ৱীতিৱত্তো, তেন সমন্নাগতোতি? আমন্তা. সকদাগামিফলসচ্ছিকিৰিযায পটিপন্নো পুগ্গলো সোতাপত্তিমগ্গং ৱীতিৱত্তো, সক্কাযদিট্ঠিং…পে… অপাযগমনীযং মোহং ৱীতিৱত্তো, তেন সমন্নাগতোতি? ন হেৱং ৱত্তব্বে…পে….

৪১১. ন ৱত্তব্বং – ‘‘অৰহত্তসচ্ছিকিৰিযায পটিপন্নো পুগ্গলো তীহি ফলেহি সমন্নাগতো’’তি? আমন্তা. ননু অৰহত্তসচ্ছিকিৰিযায পটিপন্নেন পুগ্গলেন তীণি ফলানি পটিলদ্ধানি, তেহি চ অপৰিহীনোতি? আমন্তা. হঞ্চি অৰহত্তসচ্ছিকিৰিযায পটিপন্নেন পুগ্গলেন তীণি ফলানি পটিলদ্ধানি তেহি চ অপৰিহীনো, তেন ৱত ৰে ৱত্তব্বে – ‘‘অৰহত্তসচ্ছিকিৰিযায পটিপন্নো পুগ্গলো তীহি ফলেহি সমন্নাগতো’’তি.

ন ৱত্তব্বং – ‘‘অনাগামিফলসচ্ছিকিৰিযায পটিপন্নো পুগ্গলো দ্ৱীহি ফলেহি সমন্নাগতো’’তি? আমন্তা. ননু অনাগামিফলসচ্ছিকিৰিযায পটিপন্নেন পুগ্গলেন দ্ৱে ফলানি পটিলদ্ধানি, তেহি চ অপৰিহীনোতি? আমন্তা. হঞ্চি অনাগামিফলসচ্ছিকিৰিযায পটিপন্নেন পুগ্গলেন দ্ৱে ফলানি পটিলদ্ধানি তেহি চ অপৰিহীনো, তেন ৱত ৰে ৱত্তব্বে – ‘‘অনাগামিফলসচ্ছিকিৰিযায পটিপন্নো পুগ্গলো দ্ৱীহি ফলেহি সমন্নাগতো’’তি.

ন ৱত্তব্বং – ‘‘সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতো’’তি? আমন্তা. ননু সকদাগামিফলসচ্ছিকিৰিযায পটিপন্নেন পুগ্গলেন সোতাপত্তিফলং পটিলদ্ধং, তেন চ অপৰিহীনোতি? আমন্তা. হঞ্চি সকদাগামিফলসচ্ছিকিৰিযায পটিপন্নেন পুগ্গলেন সোতাপত্তিফলং পটিলদ্ধং তেন চ অপৰিহীনো, তেন ৱত ৰে ৱত্তব্বে – ‘‘সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতো’’তি.

৪১২. অৰহত্তসচ্ছিকিৰিযায পটিপন্নেন পুগ্গলেন তীণি ফলানি পটিলদ্ধানি তেহি চ অপৰিহীনোতি, অৰহত্তসচ্ছিকিৰিযায পটিপন্নো পুগ্গলো তীহি ফলেহি সমন্নাগতোতি? আমন্তা. অৰহত্তসচ্ছিকিৰিযায পটিপন্নেন পুগ্গলেন চত্তাৰো মগ্গা পটিলদ্ধা তেহি চ অপৰিহীনোতি, অৰহত্তসচ্ছিকিৰিযায পটিপন্নো পুগ্গলো চতূহি মগ্গেহি সমন্নাগতোতি? ন হেৱং ৱত্তব্বে…পে….

অনাগামিফলসচ্ছিকিৰিযায পটিপন্নেন পুগ্গলেন দ্ৱে ফলানি পটিলদ্ধানি তেহি চ অপৰিহীনোতি, অনাগামিফলসচ্ছিকিৰিযায পটিপন্নো পুগ্গলো দ্ৱীহি ফলেহি সমন্নাগতোতি? আমন্তা. অনাগামিফলসচ্ছিকিৰিযায পটিপন্নেন পুগ্গলেন তযো মগ্গা পটিলদ্ধা তেহি চ অপৰিহীনোতি, অনাগামিফলসচ্ছিকিৰিযায পটিপন্নো পুগ্গলো তীহি মগ্গেহি সমন্নাগতোতি? ন হেৱং ৱত্তব্বে…পে….

সকদাগামিফলসচ্ছিকিৰিযায পটিপন্নেন পুগ্গলেন সোতাপত্তিফলং পটিলদ্ধং তেন চ অপৰিহীনোতি, সকদাগামিফলসচ্ছিকিৰিযায পটিপন্নো পুগ্গলো সোতাপত্তিফলেন সমন্নাগতোতি? আমন্তা. সকদাগামিফলসচ্ছিকিৰিযায পটিপন্নেন পুগ্গলেন দ্ৱে মগ্গা পটিলদ্ধা তেহি চ অপৰিহীনোতি, সকদাগামিফলসচ্ছিকিৰিযায পটিপন্নো পুগ্গলো দ্ৱীহি মগ্গেহি সমন্নাগতোতি? ন হেৱং ৱত্তব্বে…পে….

অপৰাপি সমন্নাগতকথা নিট্ঠিতা.