(৩৯) ৭. লক্খণকথা

৪০০. লক্খণসমন্নাগতো বোধিসত্তোতি? আমন্তা. পদেসলক্খণেহি সমন্নাগতো পদেসবোধিসত্তোতি? ন হেৱং ৱত্তব্বে…পে….

লক্খণসমন্নাগতো বোধিসত্তোতি? আমন্তা. তিভাগলক্খণেহি সমন্নাগতো তিভাগবোধিসত্তোতি? ন হেৱং ৱত্তব্বে…পে….

লক্খণসমন্নাগতো বোধিসত্তোতি? আমন্তা. উপড্ঢলক্খণেহি সমন্নাগতো উপড্ঢবোধিসত্তোতি? ন হেৱং ৱত্তব্বে…পে….

লক্খণসমন্নাগতো বোধিসত্তোতি? আমন্তা. চক্কৱত্তিসত্তো লক্খণসমন্নাগতো, চক্কৱত্তিসত্তো বোধিসত্তোতি? ন হেৱং ৱত্তব্বে…পে….

চক্কৱত্তিসত্তো লক্খণসমন্নাগতো, চক্কৱত্তিসত্তো বোধিসত্তোতি? আমন্তা. যাদিসো বোধিসত্তস্স পুব্বযোগো পুব্বচৰিযা ধম্মক্খানং ধম্মদেসনা, তাদিসো চক্কৱত্তিসত্তস্স পুব্বযোগো পুব্বচৰিযা ধম্মক্খানং ধম্মদেসনাতি? ন হেৱং ৱত্তব্বে…পে….

৪০১. যথা বোধিসত্তস্স জাযমানস্স দেৱা পঠমং পটিগ্গণ্হন্তি পচ্ছা মনুস্সা [দী. নি. ২.২৭; ম. নি. ৩.২০৫ ৱুত্তং দিস্সায পুচ্ছতি], এৱমেৱং চক্কৱত্তিসত্তস্স জাযমানস্স দেৱা পঠমং পটিগ্গণ্হন্তি পচ্ছা মনুস্সাতি? ন হেৱং ৱত্তব্বে…পে….

যথা বোধিসত্তস্স জাযমানস্স চত্তাৰো নং দেৱপুত্তা পটিগ্গহেত্ৱা মাতু পুৰতো ঠপেন্তি – ‘‘অত্তমনা, দেৱি, হোহি! মহেসক্খো তে পুত্তো উপ্পন্নো’’তি, এৱমেৱং চক্কৱত্তিসত্তস্স জাযমানস্স চত্তাৰো নং দেৱপুত্তা পটিগ্গহেত্ৱা মাতু পুৰতো ঠপেন্তি – ‘‘অত্তমনা, দেৱি, হোহি! মহেসক্খো তে পুত্তো উপ্পন্নো’’তি? ন হেৱং ৱত্তব্বে…পে….

যথা বোধিসত্তস্স জাযমানস্স দ্ৱে উদকস্স ধাৰা অন্তলিক্খা পাতুভৱন্তি – একা সীতস্স, একা উণ্হস্স – যেন বোধিসত্তস্স উদককিচ্চং কৰোন্তি মাতু চ, এৱমেৱং চক্কৱত্তিসত্তস্স জাযমানস্স দ্ৱে উদকস্স ধাৰা অন্তলিক্খা পাতুভৱন্তি – একা সীতস্স, একা উণ্হস্স – যেন চক্কৱত্তিসত্তস্স উদককিচ্চং কৰোন্তি মাতু চাতি? ন হেৱং ৱত্তব্বে…পে….

যথা সম্পতিজাতো বোধিসত্তো সমেহি পাদেহি পতিট্ঠহিত্ৱা উত্তৰেন অভিমুখো সত্তপদৱীতিহাৰেন গচ্ছতি সেতম্হি ছত্তে অনুধাৰিযমানে, সব্বা চ দিসা ৱিলোকেতি, আসভিঞ্চ ৱাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৱো’’তি, এৱমেৱং সম্পতিজাতো চক্কৱত্তিসত্তো সমেহি পাদেহি পতিট্ঠহিত্ৱা উত্তৰেন অভিমুখো সত্তপদৱীতিহাৰেন গচ্ছতি সেতম্হি ছত্তে অনুধাৰিযমানে, সব্বা চ দিসা ৱিলোকেতি, আসভিঞ্চ ৱাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৱো’’তি? ন হেৱং ৱত্তব্বে…পে….

যথা বোধিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৱো হোতি, এৱমেৱং চক্কৱত্তিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৱো হোতীতি? ন হেৱং ৱত্তব্বে…পে….

যথা বোধিসত্তস্স পকতিকাযো সমন্তা ব্যামং ওভাসতি, এৱমেৱং চক্কৱত্তিসত্তস্স পকতিকাযো সমন্তা ব্যামং ওভাসতীতি? ন হেৱং ৱত্তব্বে…পে….

যথা বোধিসত্তো মহাসুপিনং পস্সতি, এৱমেৱং চক্কৱত্তিসত্তো মহাসুপিনং পস্সতীতি? ন হেৱং ৱত্তব্বে…পে….

৪০২. ন ৱত্তব্বং – ‘‘লক্খণসমন্নাগতো বোধিসত্তো’’তি? আমন্তা. ননু ৱুত্তং ভগৱতা – ‘‘দ্ৱত্তিংসিমানি, ভিক্খৱে, মহাপুৰিসস্স মহাপুৰিসলক্খণানি, যেহি সমন্নাগতস্স মহাপুৰিসস্স দ্ৱেৱ গতিযো ভৱন্তি অনঞ্ঞা [ন অঞ্ঞা (ক.)]! সচে অগাৰং অজ্ঝাৱসতি, ৰাজা হোতি চক্কৱত্তী ধম্মিকো ধম্মৰাজা চাতুৰন্তো ৱিজিতাৱী জনপদত্থাৱৰিযপ্পত্তো সত্তৰতনসমন্নাগতো. তস্সিমানি সত্ত ৰতনানি ভৱন্তি, সেয্যথিদং – চক্কৰতনং, হত্থিৰতনং, অস্সৰতনং, মণিৰতনং, ইত্থিৰতনং, গহপতিৰতনং, পৰিণাযকৰতনমেৱ সত্তমং. পৰোসহস্সং খো পনস্স পুত্তা ভৱন্তি সূৰা ৱীৰঙ্গৰূপা পৰসেনপ্পমদ্দনা. সো ইমং পথৱিং সাগৰপৰিযন্তং অদণ্ডেন অসত্থেন ধম্মেন অভিৱিজিয অজ্ঝাৱসতি. সচে খো পন অগাৰস্মা অনগাৰিযং পব্বজতি, অৰহং হোতি সম্মাসম্বুদ্ধো লোকে ৱিৱট্টচ্ছদো’’তি [দী. নি. ৩.২০০]. অত্থেৱ সুত্তন্তোতি? আমন্তা. তেন হি লক্খণসমন্নাগতো বোধিসত্তোতি.

লক্খণকথা নিট্ঠিতা.