(৩৩) ১. গিহিস্স অৰহাতিকথা

৩৮৭. গিহিস্স অৰহাতি? আমন্তা. অত্থি অৰহতো গিহিসংযোজনন্তি? ন হেৱং ৱত্তব্বে…পে… নত্থি অৰহতো গিহিসংযোজনন্তি? আমন্তা. হঞ্চি নত্থি অৰহতো গিহিসংযোজনং, নো চ ৱত ৰে ৱত্তব্বে – ‘‘গিহিস্স অৰহা’’তি.

গিহিস্স অৰহাতি? আমন্তা. ননু অৰহতো গিহিসংযোজনং পহীনং উচ্ছিন্নমূলং তালাৱত্থুকতং অনভাৱঙ্কতং আযতিং অনুপ্পাদধম্মন্তি? আমন্তা. হঞ্চি অৰহতো গিহিসংযোজনং পহীনং উচ্ছিন্নমূলং তালাৱত্থুকতং অনভাৱঙ্কতং আযতিং অনুপ্পাদধম্মং, নো চ ৱত ৰে ৱত্তব্বে – ‘‘গিহিস্স অৰহা’’তি.

গিহিস্স অৰহাতি? আমন্তা. অত্থি কোচি গিহী গিহিসংযোজনং অপ্পহায দিট্ঠেৱ ধম্মে দুক্খস্সন্তকৰোতি [ম. নি. ২.১৮৬]? নত্থি. হঞ্চি নত্থি কোচি গিহী গিহিসংযোজনং অপ্পহায দিট্ঠেৱ ধম্মে দুক্খস্সন্তকৰো, নো চ ৱত ৰে ৱত্তব্বে – ‘‘গিহিস্স অৰহা’’তি.

গিহিস্স অৰহাতি? আমন্তা. ননু ৱচ্ছগোত্তো পৰিব্বাজকো ভগৱন্তং এতদৱোচ – ‘‘অত্থি নু খো, ভো গোতম, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকৰো’’তি? ‘‘নত্থি খো, ৱচ্ছ, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকৰো’’তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘গিহিস্স অৰহা’’তি.

গিহিস্স অৰহাতি? আমন্তা. অৰহা মেথুনং ধম্মং পটিসেৱেয্য, মেথুনং উপ্পাদেয্য, পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্য, অজেড়কং পটিগ্গণ্হেয্য, কুক্কুটসূকৰং পটিগ্গণ্হেয্য, হত্থিগৱস্সৱড়ৱং পটিগ্গণ্হেয্য, তিত্তিৰৱট্টকমোৰকপিঞ্জৰং [… কপিঞ্জলং (স্যা. কং. পী.)] পটিগ্গণ্হেয্য, চিত্তৱণ্ডৱালমোড়িং [পীতৱণ্টৱালমোড়িকং (স্যা. কং. পী.)] ধাৰেয্য, ওদাতানি ৱত্থানি দীঘদসানি ধাৰেয্য, যাৱজীৱং অগাৰিযভূতো অস্সাতি? ন হেৱং ৱত্তব্বে…পে….

ন ৱত্তব্বং – ‘‘গিহিস্স অৰহা’’তি? আমন্তা. ননু যসো কুলপুত্তো, উত্তিযো গহপতি, সেতু মাণৱো, গিহিব্যঞ্জনেন অৰহত্তং পত্তোতি? আমন্তা. হঞ্চি যসো কুলপুত্তো, উত্তিযো গহপতি, সেতু মাণৱো, গিহিব্যঞ্জনেন অৰহত্তং পত্তো, তেন ৱত ৰে ৱত্তব্বে – ‘‘গিহিস্স অৰহা’’তি.

গিহিস্স অৰহাতিকথা নিট্ঠিতা.