৩. ততিযৱগ্গো

(২৭) ৭. দিব্বচক্খুকথা

৩৭৩. মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. মংসচক্খুং দিব্বচক্খুং, দিব্বচক্খুং মংসচক্খুন্তি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. যাদিসং মংসচক্খুং তাদিসং দিব্বচক্খুং, যাদিসং দিব্বচক্খুং তাদিসং মংসচক্খুন্তি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. তঞ্ঞেৱ মংসচক্খুং তং দিব্বচক্খুং, তং দিব্বচক্খুং তং মংসচক্খুন্তি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. যাদিসো মংসচক্খুস্স ৱিসযো আনুভাৱো গোচৰো তাদিসো দিব্বস্স চক্খুস্স ৱিসযো আনুভাৱো গোচৰোতি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. উপাদিণ্ণং [উপাদিন্নং (স্যা. কং.)] হুত্ৱা অনুপাদিণ্ণং হোতীতি? ন হেৱং ৱত্তব্বে…পে….

উপাদিণ্ণং হুত্ৱা অনুপাদিণ্ণং হোতীতি? আমন্তা. কামাৱচৰং হুত্ৱা ৰূপাৱচৰং হোতীতি? ন হেৱং ৱত্তব্বে…পে….

কামাৱচৰং হুত্ৱা ৰূপাৱচৰং হোতীতি? আমন্তা. ৰূপাৱচৰং হুত্ৱা অৰূপাৱচৰং হোতীতি? ন হেৱং ৱত্তব্বে…পে….

ৰূপাৱচৰং হুত্ৱা অৰূপাৱচৰং হোতীতি? আমন্তা. পৰিযাপন্নং হুত্ৱা অপৰিযাপন্নং হোতীতি? ন হেৱং ৱত্তব্বে…পে….

৩৭৪. মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং মংসচক্খুং হোতীতি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং পঞ্ঞাচক্খুং হোতীতি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দিব্বচক্খুং ধম্মুপত্থদ্ধং মংসচক্খুং হোতীতি? ন হেৱং ৱত্তব্বে…পে….

মংসচক্খুং ধম্মুপত্থদ্ধং দিব্বচক্খুং হোতীতি? আমন্তা. দ্ৱেৱ চক্খূনীতি? ন হেৱং ৱত্তব্বে…পে… দ্ৱেৱ চক্খূনীতি? আমন্তা. ননু তীণি চক্খূনি ৱুত্তানি ভগৱতা – মংসচক্খুং, দিব্বচক্খুং, পঞ্ঞাচক্খুন্তি? আমন্তা. হঞ্চি তীণি চক্খূনি ৱুত্তানি ভগৱতা – মংসচক্খুং, দিব্বচক্খুং, পঞ্ঞাচক্খুং, নো চ ৱত ৰে ৱত্তব্বে – ‘‘দ্ৱেৱ চক্খূনী’’তি.

দ্ৱেৱ চক্খূনীতি? আমন্তা. ননু ৱুত্তং ভগৱতা – ‘‘তীণিমানি, ভিক্খৱে, চক্খূনি! কতমানি তীণি? মংসচক্খুং, দিব্বচক্খুং, পঞ্ঞাচক্খুন্তি – ইমানি খো, ভিক্খৱে, তীণি চক্খূনী’’তি.

‘‘মংসচক্খুং দিব্বচক্খুং, পঞ্ঞাচক্খুং অনুত্তৰং;

এতানি তীণি চক্খূনি, অক্খাসি পুৰিসুত্তমো.

‘‘মংসচক্খুস্স উপ্পাদো, মগ্গো দিব্বস্স চক্খুনো;

যদা চ ঞাণং উদপাদি, পঞ্ঞাচক্খুং অনুত্তৰং;

তস্স চক্খুস্স পটিলাভা, সব্বদুক্খা পমুচ্চতী’’তি [ইতিৱু. ৬১ ইতিৱুত্তকে].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘দ্ৱেৱ চক্খূনী’’তি.

দিব্বচক্খুকথা নিট্ঠিতা.