৩. ততিযৱগ্গো

(২৫) ৫. অট্ঠমককথা

৩৬৮. অট্ঠমকস্স পুগ্গলস্স দিট্ঠিপৰিযুট্ঠানং পহীনন্তি? আমন্তা. অট্ঠমকো পুগ্গলো সোতাপন্নো সোতাপত্তিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীনন্তি? আমন্তা. অট্ঠমকো পুগ্গলো সোতাপন্নো সোতাপত্তিফলপ্পত্তো…পে… কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

অট্ঠমকস্স পুগ্গলস্স দিট্ঠিপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স দিট্ঠানুসযো পহীনোতি? ন হেৱং ৱত্তব্বে…পে… অট্ঠমকস্স পুগ্গলস্স দিট্ঠিপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স ৱিচিকিচ্ছানুসযো… সীলব্বতপৰামাসো পহীনোতি? ন হেৱং ৱত্তব্বে…পে….

অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স ৱিচিকিচ্ছানুসযো পহীনোতি? ন হেৱং ৱত্তব্বে…পে… অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স দিট্ঠানুসযো… সীলব্বতপৰামাসো পহীনোতি? ন হেৱং ৱত্তব্বে…পে….

অট্ঠমকস্স পুগ্গলস্স দিট্ঠানুসযো অপ্পহীনোতি? আমন্তা. অট্ঠমকস্স পুগ্গলস্স দিট্ঠিপৰিযুট্ঠানং অপ্পহীনন্তি? ন হেৱং ৱত্তব্বে…পে… অট্ঠমকস্স পুগ্গলস্স দিট্ঠানুসযো অপ্পহীনোতি? আমন্তা. অট্ঠমকস্স পুগ্গলস্স ৱিচিকিচ্ছাপৰিযুট্ঠানং অপ্পহীনন্তি? ন হেৱং ৱত্তব্বে…পে….

অট্ঠমকস্স পুগ্গলস্স ৱিচিকিচ্ছানুসযো… সীলব্বতপৰামাসো অপ্পহীনোতি? আমন্তা. অট্ঠমকস্স পুগ্গলস্স দিট্ঠিপৰিযুট্ঠানং অপ্পহীনন্তি? ন হেৱং ৱত্তব্বে…পে… অট্ঠমকস্স পুগ্গলস্স সীলব্বতপৰামাসো অপ্পহীনোতি? আমন্তা. অট্ঠমকস্স পুগ্গলস্স ৱিচিকিচ্ছাপৰিযুট্ঠানং অপ্পহীনন্তি? ন হেৱং ৱত্তব্বে…পে….

৩৬৯. অট্ঠমকস্স পুগ্গলস্স দিট্ঠিপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স দিট্ঠিপৰিযুট্ঠানপহানায মগ্গো ভাৱিতোতি? ন হেৱং ৱত্তব্বে…পে… অট্ঠমকস্স পুগ্গলস্স দিট্ঠিপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স দিট্ঠিপৰিযুট্ঠানপহানায সতিপট্ঠানা ভাৱিতা…পে… সম্মপ্পধানা…পে… বোজ্ঝঙ্গা ভাৱিতাতি? ন হেৱং ৱত্তব্বে.

অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীনন্তি? আমন্তা. অট্ঠমকস্স পুগ্গলস্স ৱিচিকিচ্ছাপৰিযুট্ঠানপহানায মগ্গো ভাৱিতো…পে… বোজ্ঝঙ্গা ভাৱিতাতি? ন হেৱং ৱত্তব্বে…পে….

অট্ঠমকস্স পুগ্গলস্স দিট্ঠিপৰিযুট্ঠানপহানায মগ্গো অভাৱিতোতি? আমন্তা. অমগ্গেন পহীনং লোকিযেন সাসৱেন…পে… সংকিলেসিযেনাতি? ন হেৱং ৱত্তব্বে…পে… অট্ঠমকস্স পুগ্গলস্স দিট্ঠিপৰিযুট্ঠানপহানায সতিপট্ঠানা…পে… বোজ্ঝঙ্গা অভাৱিতাতি? আমন্তা. অমগ্গেন পহীনং লোকিযেন সাসৱেন…পে… সংকিলেসিযেনাতি? ন হেৱং ৱত্তব্বে…পে….

অট্ঠমকস্স পুগ্গলস্স ৱিচিকিচ্ছাপৰিযুট্ঠানপহানায মগ্গো অভাৱিতো…পে… সতিপট্ঠানা…পে… বোজ্ঝঙ্গা অভাৱিতাতি? আমন্তা. অমগ্গেন পহীনং লোকিযেন সাসৱেন…পে… সংকিলেসিযেনাতি? ন হেৱং ৱত্তব্বে…পে….

৩৭০. ন ৱত্তব্বং – ‘‘অট্ঠমকস্স পুগ্গলস্স দিট্ঠিপৰিযুট্ঠানং পহীন’’ন্তি? আমন্তা. উপ্পজ্জিস্সতীতি? নুপ্পজ্জিস্সতি. হঞ্চি নুপ্পজ্জিস্সতি, তেন ৱত ৰে ৱত্তব্বে – ‘‘অট্ঠমকস্স পুগ্গলস্স দিট্ঠিপৰিযুট্ঠানং পহীন’’ন্তি.

ন ৱত্তব্বং – ‘‘অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীন’’ন্তি? আমন্তা. উপ্পজ্জিস্সতীতি? নুপ্পজ্জিস্সতি. হঞ্চি নুপ্পজ্জিস্সতি, তেন ৱত ৰে ৱত্তব্বে – ‘‘অট্ঠমকস্স পুগ্গলস্স ৱিচিকিচ্ছাপৰিযুট্ঠানং পহীন’’ন্তি.

অট্ঠমকস্স পুগ্গলস্স দিট্ঠিপৰিযুট্ঠানং নুপ্পজ্জিস্সতীতি কত্ৱা পহীনন্তি? আমন্তা. অট্ঠমকস্স পুগ্গলস্স দিট্ঠানুসযো নুপ্পজ্জিস্সতীতি কত্ৱা পহীনোতি? ন হেৱং ৱত্তব্বে…পে….

অট্ঠমকস্স পুগ্গলস্স দিট্ঠিপৰিযুট্ঠানং নুপ্পজ্জিস্সতীতি কত্ৱা পহীনন্তি? আমন্তা. অট্ঠমকস্স পুগ্গলস্স ৱিচিকিচ্ছানুসযো… সীলব্বতপৰামাসো নুপ্পজ্জিস্সতীতি কত্ৱা পহীনোতি? ন হেৱং ৱত্তব্বে…পে….

অট্ঠমকস্স পুগ্গলস্স ৱিচিকিচ্ছাপৰিযুট্ঠানং নুপ্পজ্জিস্সতীতি কত্ৱা পহীনন্তি? আমন্তা. অট্ঠমকস্স পুগ্গলস্স ৱিচিকিচ্ছানুসযো… সীলব্বতপৰামাসো নুপ্পজ্জিস্সতীতি কত্ৱা পহীনোতি? ন হেৱং ৱত্তব্বে…পে….

অট্ঠমকস্স পুগ্গলস্স দিট্ঠিপৰিযুট্ঠানং নুপ্পজ্জিস্সতীতি কত্ৱা পহীনন্তি? আমন্তা. গোত্ৰভুনো পুগ্গলস্স দিট্ঠিপৰিযুট্ঠানং নুপ্পজ্জিস্সতীতি কত্ৱা পহীনন্তি? ন হেৱং ৱত্তব্বে…পে… অট্ঠমকস্স পুগ্গলস্স ৱিচিকিচ্ছাপৰিযুট্ঠানং নুপ্পজ্জিস্সতীতি কত্ৱা পহীনন্তি? আমন্তা. গোত্ৰভুনো পুগ্গলস্স ৱিচিকিচ্ছাপৰিযুট্ঠানং নুপ্পজ্জিস্সতীতি কত্ৱা পহীনন্তি? ন হেৱং ৱত্তব্বে…পে….

অট্ঠমককথা নিট্ঠিতা.