১৯. পটিৱেধানুযোগো

২০১. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু সোতাপন্নো অত্থীতি? আমন্তা. হঞ্চি সোতাপন্নো অত্থি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

২০২. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু সকদাগামী অত্থি…পে… অনাগামী অত্থি… অৰহা অত্থি… উভতোভাগৱিমুত্তো অত্থি… পঞ্ঞাৱিমুত্তো অত্থি… কাযসক্খি [কাযসক্খী (স্যা.)] অত্থি… দিট্ঠিপ্পত্তো অত্থি… সদ্ধাৱিমুত্তো অত্থি… ধম্মানুসাৰী অত্থি… সদ্ধানুসাৰী অত্থীতি? আমন্তা.

হঞ্চি সদ্ধানুসাৰী অত্থি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

২০৩. সোতাপন্নো অত্থীতি কত্ৱা তেন চ কাৰণেন পুগ্গলো উপলব্ভতি সচ্চিকট্ঠপৰমত্থেনাতি? আমন্তা. অত্থি কোচি ন সোতাপন্নো হুত্ৱা সোতাপন্নো হোতীতি? আমন্তা. অত্থি কোচি ন পুগ্গলো হুত্ৱা পুগ্গলো হোতীতি? ন হেৱং ৱত্তব্বে…পে….

২০৪. অত্থি কোচি ন সকদাগামী হুত্ৱা… ন অনাগামী হুত্ৱা… ন অৰহা হুত্ৱা… ন উভতোভাগৱিমুত্তো হুত্ৱা… ন পঞ্ঞাৱিমুত্তো হুত্ৱা… ন কাযসক্খি হুত্ৱা… ন দিট্ঠিপ্পত্তো হুত্ৱা… ন সদ্ধাৱিমুত্তো হুত্ৱা… ন ধম্মানুসাৰী হুত্ৱা… ন সদ্ধানুসাৰী হুত্ৱা সদ্ধানুসাৰী হোতীতি? আমন্তা. অত্থি কোচি ন পুগ্গলো হুত্ৱা পুগ্গলো হোতীতি? ন হেৱং ৱত্তব্বে…পে….

২০৫. সোতাপন্নো অত্থীতি কত্ৱা তেন চ কাৰণেন পুগ্গলো উপলব্ভতি সচ্চিকট্ঠপৰমত্থেনাতি? আমন্তা. অত্থি কোচি সোতাপন্নো হুত্ৱা ন সোতাপন্নো হোতীতি? আমন্তা. অত্থি কোচি পুগ্গলো হুত্ৱা ন পুগ্গলো হোতীতি? ন হেৱং ৱত্তব্বে…পে….

অত্থি কোচি সকদাগামী হুত্ৱা… অনাগামী হুত্ৱা ন অনাগামী হোতীতি? আমন্তা. অত্থি কোচি পুগ্গলো হুত্ৱা ন পুগ্গলো হোতীতি? ন হেৱং ৱত্তব্বে…পে….

পটিৱেধানুযোগো.