১৫-১৮. ঞাতকানুযোগাদি

১৯৭. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু মাতা অত্থীতি? আমন্তা. হঞ্চি মাতা অত্থি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

১৯৮. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু পিতা অত্থি…পে… ভাতা অত্থি… ভগিনী অত্থি… খত্তিযো অত্থি … ব্ৰাহ্মণো অত্থি… ৱেস্সো অত্থি… সুদ্দো অত্থি… গহট্ঠো অত্থি… পব্বজিতো অত্থি… দেৱো অত্থি… মনুস্সো অত্থীতি? আমন্তা. হঞ্চি মনুস্সো অত্থি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

১৯৯. মাতা অত্থীতি কত্ৱা তেন চ কাৰণেন পুগ্গলো উপলব্ভতি সচ্চিকট্ঠপৰমত্থেনাতি? আমন্তা. অত্থি কোচি ন মাতা হুত্ৱা মাতা হোতীতি? আমন্তা. অত্থি কোচি ন পুগ্গলো হুত্ৱা পুগ্গলো হোতীতি? ন হেৱং ৱত্তব্বে…পে… অত্থি কোচি ন পিতা হুত্ৱা…পে… ন ভাতা হুত্ৱা… ন ভগিনী হুত্ৱা… ন খত্তিযো হুত্ৱা… ন ব্ৰাহ্মণো হুত্ৱা… ন ৱেস্সো হুত্ৱা… ন সুদ্দো হুত্ৱা… ন গহট্ঠো হুত্ৱা… ন পব্বজিতো হুত্ৱা… ন দেৱো হুত্ৱা… ন মনুস্সো হুত্ৱা মনুস্সো হোতীতি? আমন্তা. অত্থি কোচি ন পুগ্গলো হুত্ৱা পুগ্গলো হোতীতি? ন হেৱং ৱত্তব্বে…পে….

২০০. মাতা অত্থীতি কত্ৱা তেন চ কাৰণেন পুগ্গলো উপলব্ভতি সচ্চিকট্ঠপৰমত্থেনাতি? আমন্তা. অত্থি কোচি মাতা হুত্ৱা ন মাতা হোতীতি? আমন্তা. অত্থি কোচি পুগ্গলো হুত্ৱা ন পুগ্গলো হোতীতি? ন হেৱং ৱত্তব্বে…পে….

অত্থি কোচি পিতা হুত্ৱা… ভাতা হুত্ৱা… ভগিনী হুত্ৱা… খত্তিযো হুত্ৱা… ব্ৰাহ্মণো হুত্ৱা… ৱেস্সো হুত্ৱা… সুদ্দো হুত্ৱা… গহট্ঠো হুত্ৱা… পব্বজিতো হুত্ৱা… দেৱো হুত্ৱা… মনুস্সো হুত্ৱা ন মনুস্সো হোতীতি? আমন্তা. অত্থি কোচি পুগ্গলো হুত্ৱা ন পুগ্গলো হোতীতি? ন হেৱং ৱত্তব্বে…পে….