১৪. অভিঞ্ঞানুযোগো

১৯৩. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু অত্থি কোচি ইদ্ধিং ৱিকুব্বতীতি? আমন্তা. হঞ্চি অত্থি কোচি ইদ্ধিং ৱিকুব্বতি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

১৯৪. ন ৱত্তব্বং – ‘‘পুগ্গলো উপলব্ভতি সচ্চিকট্ঠপৰমত্থেনা’’তি? আমন্তা. ননু অত্থি কোচি দিব্বায সোতধাতুযা সদ্দং সুণাতি…পে… পৰচিত্তং ৱিজানাতি… পুব্বেনিৱাসং অনুস্সৰতি… দিব্বেন চক্খুনা ৰূপং পস্সতি… আসৱানং খযং সচ্ছিকৰোতীতি? আমন্তা. হঞ্চি অত্থি কোচি আসৱানং খযং সচ্ছিকৰোতি, তেন ৱত ৰে ৱত্তব্বে – ‘‘পুগ্গলো উপলব্ভতি সচ্চিকট্ঠপৰমত্থেনা’’তি.

১৯৫. অত্থি কোচি ইদ্ধিং ৱিকুব্বতীতি কত্ৱা তেন চ কাৰণেন পুগ্গলো উপলব্ভতি সচ্চিকট্ঠপৰমত্থেনাতি? আমন্তা. যো ইদ্ধিং ৱিকুব্বতি, স্ৱেৱ পুগ্গলো? যো ইদ্ধিং ন ৱিকুব্বতি, ন সো পুগ্গলোতি? ন হেৱং ৱত্তব্বে…পে….

১৯৬. যো দিব্বায সোতধাতুযা সদ্দং সুণাতি…পে… যো পৰচিত্তং ৱিজানাতি… যো পুব্বেনিৱাসং অনুস্সৰতি… যো দিব্বেন চক্খুনা ৰূপং পস্সতি… যো আসৱানং খযং সচ্ছিকৰোতি, স্ৱেৱ পুগ্গলো? যো আসৱানং খযং ন সচ্ছিকৰোতি, ন সো পুগ্গলোতি? ন হেৱং ৱত্তব্বে…পে….

অভিঞ্ঞানুযোগো.