১০. পঞ্ঞত্তানুযোগো

৬১. ৰূপধাতুযা ৰূপী পুগ্গলোতি? আমন্তা. কামধাতুযা কামী পুগ্গলোতি? ন হেৱং ৱত্তব্বে…পে….

৬২. ৰূপধাতুযা ৰূপিনো সত্তাতি? আমন্তা. কামধাতুযা কামিনো সত্তাতি? ন হেৱং ৱত্তব্বে…পে….

৬৩. অৰূপধাতুযা অৰূপী পুগ্গলোতি? আমন্তা. কামধাতুযা কামী পুগ্গলোতি? ন হেৱং ৱত্তব্বে…পে….

৬৪. অৰূপধাতুযা অৰূপিনো সত্তাতি? আমন্তা. কামধাতুযা কামিনো সত্তাতি? ন হেৱং ৱত্তব্বে…পে….

৬৫. ৰূপধাতুযা ৰূপী পুগ্গলো অৰূপধাতুযা অৰূপী পুগ্গলো, অত্থি চ কোচি ৰূপধাতুযা চুতো অৰূপধাতুং উপপজ্জতীতি? আমন্তা. ৰূপী পুগ্গলো উপচ্ছিন্নো, অৰূপী পুগ্গলো জাতোতি? ন হেৱং ৱত্তব্বে…পে….

৬৬. ৰূপধাতুযা ৰূপিনো সত্তা অৰূপধাতুযা অৰূপিনো সত্তা, অত্থি চ কোচি ৰূপধাতুযা চুতো অৰূপধাতুং উপপজ্জতীতি? আমন্তা. ৰূপী সত্তো উপচ্ছিন্নো, অৰূপী সত্তো জাতোতি? ন হেৱং ৱত্তব্বে…পে….

৬৭. কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতেতি? আমন্তা. পুগ্গলোতি ৱা জীৱোতি ৱা, জীৱোতি ৱা পুগ্গলোতি ৱা, পুগ্গলং অপ্পিযং কৰিত্ৱা এসেসে একট্ঠে সমে সমভাগে তজ্জাতেতি? আমন্তা. অঞ্ঞো কাযো, অঞ্ঞো পুগ্গলোতি? আমন্তা. অঞ্ঞং জীৱং, অঞ্ঞং সৰীৰন্তি? ন হেৱং ৱত্তব্বে.

আজানাহি নিগ্গহং. হঞ্চি কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, পুগ্গলোতি ৱা জীৱোতি ৱা, জীৱোতি ৱা পুগ্গলোতি ৱা, পুগ্গলং অপ্পিযং কৰিত্ৱা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো; তেন ৱত ৰে ৱত্তব্বে – ‘‘অঞ্ঞং জীৱং অঞ্ঞং সৰীৰ’’ন্তি. যং তত্থ ৱদেসি – ‘‘ৱত্তব্বে খো – ‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, পুগ্গলোতি ৱা জীৱোতি ৱা, জীৱোতি ৱা পুগ্গলোতি ৱা, পুগ্গলং অপ্পিযং কৰিত্ৱা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো,’ নো চ ৱত্তব্বে – ‘অঞ্ঞং জীৱং অঞ্ঞং সৰীৰ’’’ন্তি মিচ্ছা.

নো চে পন ৱত্তব্বে – ‘‘অঞ্ঞং জীৱং অঞ্ঞং সৰীৰ’’ন্তি, নো চ ৱত ৰে ৱত্তব্বে – ‘‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, পুগ্গলোতি ৱা জীৱোতি ৱা, জীৱোতি ৱা পুগ্গলোতি ৱা, পুগ্গলং অপ্পিযং কৰিত্ৱা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো’’তি. যং তত্থ ৱদেসি – ‘‘ৱত্তব্বে খো – ‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, পুগ্গলোতি ৱা জীৱোতি ৱা, জীৱোতি ৱা পুগ্গলোতি ৱা, পুগ্গলং অপ্পিযং কৰিত্ৱা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো’, নো চ ৱত্তব্বে – ‘অঞ্ঞং জীৱং অঞ্ঞং সৰীৰ’’’ন্তি মিচ্ছা…পে….

৬৮. কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতেতি? আমন্তা. ৱুত্তং ভগৱতা – ‘‘অত্থি পুগ্গলো অত্তহিতায পটিপন্নো’’তি? আমন্তা. অঞ্ঞো কাযো অঞ্ঞো পুগ্গলোতি? ন হেৱং ৱত্তব্বে.

আজানাহি পটিকম্মং. হঞ্চি কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, ৱুত্তং ভগৱতা – ‘‘অত্থি পুগ্গলো অত্তহিতায পটিপন্নো,’’ তেন ৱত ৰে ৱত্তব্বে – ‘‘অঞ্ঞো কাযো অঞ্ঞো পুগ্গলো’’তি. যং তত্থ ৱদেসি – ‘‘ৱত্তব্বে খো – ‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, ৱুত্তং ভগৱতা – অত্থি পুগ্গলো অত্তহিতায পটিপন্নো,’ নো চ ৱত্তব্বে – ‘অঞ্ঞো কাযো অঞ্ঞো পুগ্গলো’’’তি মিচ্ছা.

নো চে পন ৱত্তব্বে – ‘‘অঞ্ঞো কাযো অঞ্ঞো পুগ্গলো’’তি, নো চ ৱত ৰে ৱত্তব্বে – ‘‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, ৱুত্তং ভগৱতা – ‘অত্থি পুগ্গলো অত্তহিতায পটিপন্নো’’’তি. যং তত্থ ৱদেসি – ‘‘ৱত্তব্বে খো – ‘কাযোতি ৱা সৰীৰন্তি ৱা, সৰীৰন্তি ৱা কাযোতি ৱা, কাযং অপ্পিযং কৰিত্ৱা এসেসে একট্ঠে সমে সমভাগে তজ্জাতে, ৱুত্তং ভগৱতা – অত্থি পুগ্গলো অত্তহিতায পটিপন্নো,’ নো চ ৱত্তব্বে – ‘অঞ্ঞো কাযো অঞ্ঞো পুগ্গলো’’’তি মিচ্ছা. (সংখিত্তং)

পঞ্ঞত্তানুযোগো.