সুত্তন্তিকদুকনিক্খেপং

১৩০৩. কতমে ধম্মা ৱিজ্জাভাগিনো? ৱিজ্জায সম্পযুত্তকা ধম্মা – ইমে ধম্মা ৱিজ্জাভাগিনো.

১৩০৪. কতমে ধম্মা অৱিজ্জাভাগিনো? অৱিজ্জায সম্পযুত্তকা ধম্মা – ইমে ধম্মা অৱিজ্জাভাগিনো.

১৩০৫. কতমে ধম্মা ৱিজ্জূপমা? হেট্ঠিমেসু তীসু অৰিযমগ্গেসু পঞ্ঞা – ইমে ধম্মা ৱিজ্জূপমা.

১৩০৬. কতমে ধম্মা ৱজিৰূপমা? উপৰিট্ঠিমে অৰহত্তমগ্গে পঞ্ঞা – ইমে ধম্মা ৱজিৰূপমা.

১৩০৭. কতমে ধম্মা বালা? অহিৰীকঞ্চ অনোত্তপ্পঞ্চ – ইমে ধম্মা বালা. সব্বেপি অকুসলা ধম্মা বালা.

১৩০৮. কতমে ধম্মা পণ্ডিতা? হিৰী চ ওত্তপ্পঞ্চ – ইমে ধম্মা পণ্ডিতা. সব্বেপি কুসলা ধম্মা পণ্ডিতা.

১৩০৯. কতমে ধম্মা কণ্হা? অহিৰীকঞ্চ অনোত্তপ্পঞ্চ – ইমে ধম্মা কণ্হা. সব্বেপি অকুসলা ধম্মা কণ্হা.

১৩১০. কতমে ধম্মা সুক্কা? হিৰী চ ওত্তপ্পঞ্চ – ইমে ধম্মা সুক্কা? সব্বেপি কুসলা ধম্মা সুক্কা.

১৩১১. কতমে ধম্মা তপনীযা? কাযদুচ্চৰিতং, ৱচীদুচ্চৰিতং, মনোদুচ্চৰিতং – ইমে ধম্মা তপনীযা. সব্বেপি অকুসলা ধম্মা তপনীযা.

১৩১২. কতমে ধম্মা অতপনীযা? কাযসুচৰিতং, ৱচীসুচৰিতং, মনোসুচৰিতং – ইমে ধম্মা অতপনীযা. সব্বেপি কুসলা ধম্মা অতপনীযা.

১৩১৩. কতমে ধম্মা অধিৱচনা? যা তেসং তেসং ধম্মানং সঙ্খা সমঞ্ঞা পঞ্ঞত্তি ৱোহাৰো নামং নামকম্মং নামধেয্যং নিৰুত্তি ব্যঞ্জনং অভিলাপো – ইমে ধম্মা অধিৱচনা. সব্বেৱ ধম্মা অধিৱচনপথা.

১৩১৪. কতমে ধম্মা নিৰুত্তি? যা তেসং তেসং ধম্মানং সঙ্খা সমঞ্ঞা পঞ্ঞত্তি ৱোহাৰো নামং নামকম্মং নামধেয্যং নিৰুত্তি ব্যঞ্জনং অভিলাপো – ইমে ধম্মা নিৰুত্তি. সব্বেৱ ধম্মা নিৰুত্তিপথা.

১৩১৫. কতমে ধম্মা পঞ্ঞত্তি? যা তেসং তেসং ধম্মানং সঙ্খা সমঞ্ঞা পঞ্ঞত্তি ৱোহাৰো নামং নামকম্মং নামধেয্যং নিৰুত্তি ব্যঞ্জনং অভিলাপো – ইমে ধম্মা পঞ্ঞত্তি. সব্বেৱ ধম্মা পঞ্ঞত্তিপথা.

১৩১৬. তত্থ কতমং নামং? ৱেদনাক্খন্ধো, সঞ্ঞাক্খন্ধো, সঙ্খাৰক্খন্ধো, ৱিঞ্ঞাণক্খন্ধো, অসঙ্খতা চ ধাতু – ইদং ৱুচ্চতি নামং.

১৩১৭. তত্থ কতমং ৰূপং? চত্তাৰো চ মহাভূতা, চতুন্নঞ্চ মহাভূতানং উপাদায ৰূপং – ইদং ৱুচ্চতি ৰূপং.

১৩১৮. তত্থ কতমা অৱিজ্জা? যং অঞ্ঞাণং অদস্সনং…পে… অৱিজ্জালঙ্গী মোহো অকুসলমূলং – অযং ৱুচ্চতি অৱিজ্জা.

১৩১৯. তত্থ কতমা ভৱতণ্হা? যো ভৱেসু ভৱছন্দো…পে… ভৱজ্ঝোসানং – অযং ৱুচ্চতি ভৱতণ্হা.

১৩২০. তত্থ কতমা ভৱদিট্ঠি? ভৱিস্সতি অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ভৱদিট্ঠি.

১৩২১. তত্থ কতমা ৱিভৱদিট্ঠি? ন ভৱিস্সতি অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ৱিভৱদিট্ঠি.

১৩২২. তত্থ কতমা সস্সতদিট্ঠি? সস্সতো অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি সস্সতদিট্ঠি.

১৩২৩. তত্থ কতমা উচ্ছেদদিট্ঠি? উচ্ছিজ্জিস্সতি অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি উচ্ছেদদিট্ঠি.

১৩২৪. তত্থ কতমা অন্তৱা দিট্ঠি? অন্তৱা অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি অন্তৱা দিট্ঠি.

১৩২৫. তত্থ কতমা অনন্তৱা দিট্ঠি? অনন্তৱা অত্তা চ লোকো চাতি, যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি অনন্তৱা দিট্ঠি.

১৩২৬. তত্থ কতমা পুব্বন্তানুদিট্ঠি? পুব্বন্তং আৰব্ভ যা উপ্পজ্জতি দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি পুব্বন্তানুদিট্ঠি.

১৩২৭. তত্থ কতমা অপৰন্তানুদিট্ঠি? অপৰন্তং আৰব্ভ যা উপ্পজ্জতি দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি অপৰন্তানুদিট্ঠি.

১৩২৮. তত্থ কতমং অহিৰিকং? যং ন হিৰীযতি হিৰিযিতব্বেন, ন হিৰীযতি পাপকানং অকুসলানং ধম্মানং সমাপত্তিযা – ইদং ৱুচ্চতি অহিৰিকং.

১৩২৯. তত্থ কতমং অনোত্তপ্পং? যং ন ওত্তপ্পতি ওত্তপ্পিতব্বেন, ন ওত্তপ্পতি পাপকানং অকুসলানং ধম্মানং সমাপত্তিযা – ইদং ৱুচ্চতি অনোত্তপ্পং.

১৩৩০. তত্থ কতমা হিৰী? যং হিৰীযতি হিৰিযিতব্বেন, হিৰীযতি পাপকানং অকুসলানং ধম্মানং সমাপত্তিযা – অযং ৱুচ্চতি হিৰী.

১৩৩১. তত্থ কতমং ওত্তপ্পং? যং ওত্তপ্পতি ওত্তপ্পিতব্বেন, ওত্তপ্পতি পাপকানং অকুসলানং ধম্মানং সমাপত্তিযা – ইদং ৱুচ্চতি ওত্তপ্পং.

১৩৩২. তত্থ কতমা দোৱচস্সতা? সহধম্মিকে ৱুচ্চমানে দোৱচস্সাযং দোৱচস্সিযং দোৱচস্সতা ৱিপ্পটিকূলগ্গাহিতা ৱিপচ্চনীকসাততা অনাদৰিযং অনাদৰতা অগাৰৱতা অপ্পটিস্সৱতা – অযং ৱুচ্চতি দোৱচস্সতা.

১৩৩৩. তত্থ কতমা পাপমিত্ততা? যে তে পুগ্গলা অস্সদ্ধা দুস্সীলা অপ্পস্সুতা মচ্ছৰিনো দুপ্পঞ্ঞা, যা তেসং সেৱনা নিসেৱনা সংসেৱনা ভজনা সম্ভজনা ভত্তি সম্ভত্তি তংসম্পৱঙ্কতা – অযং ৱুচ্চতি পাপমিত্ততা.

১৩৩৪. তত্থ কতমা সোৱচস্সতা? সহধম্মিকে ৱুচ্চমানে সোৱচস্সাযং সোৱচস্সিযং সোৱচস্সতা অপ্পটিকূলগ্গাহিতা অৱিপচ্চনীকসাততা সগাৰৱতা সাদৰিযং সাদৰতা সপ্পটিস্সৱতা – অযং ৱুচ্চতি সোৱচস্সতা.

১৩৩৫. তত্থ কতমা কল্যাণমিত্ততা? যে তে পুগ্গলা সদ্ধা সীলৱন্তো বহুস্সুতা চাগৱন্তো পঞ্ঞৱন্তো, যা তেসং সেৱনা নিসেৱনা সংসেৱনা ভজনা সম্ভজনা ভত্তি সম্ভত্তি তংসম্পৱঙ্কতা – অযং ৱুচ্চতি কল্যাণমিত্ততা.

১৩৩৬. তত্থ কতমা আপত্তিকুসলতা? পঞ্চপি আপত্তিক্খন্ধা আপত্তিযো, সত্তপি আপত্তিক্খন্ধা আপত্তিযো. যা তাসং আপত্তীনং আপত্তিকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি আপত্তিকুসলতা.

১৩৩৭. তত্থ কতমা আপত্তিৱুট্ঠানকুসলতা? যা তাহি আপত্তীহি ৱুট্ঠানকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি আপত্তিৱুট্ঠানকুসলতা.

১৩৩৮. তত্থ কতমা সমাপত্তিকুসলতা? অত্থি সৱিতক্কসৱিচাৰা সমাপত্তি, অত্থি অৱিতক্কৱিচাৰমত্তা সমাপত্তি, অত্থি অৱিতক্কঅৱিচাৰা সমাপত্তি. যা তাসং সমাপত্তীনং সমাপত্তিকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি সমাপত্তিকুসলতা.

১৩৩৯. তত্থ কতমা সমাপত্তিৱুট্ঠানকুসলতা? যা তাহি সমাপত্তীহি ৱুট্ঠানকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি সমাপত্তিৱুট্ঠানকুসলতা.

১৩৪০. তত্থ কতমা ধাতুকুসলতা? অট্ঠাৰস ধাতুযো চক্খুধাতু ৰূপধাতু চক্খুৱিঞ্ঞাণধাতু, সোতধাতু সদ্দধাতু সোতৱিঞ্ঞাণধাতু, ঘানধাতু গন্ধধাতু ঘানৱিঞ্ঞাণধাতু, জিৱ্হাধাতু ৰসধাতু জিৱ্হাৱিঞ্ঞাণধাতু, কাযধাতু ফোট্ঠব্বধাতু কাযৱিঞ্ঞাণধাতু, মনোধাতু ধম্মধাতু মনোৱিঞ্ঞাণধাতু. যা তাসং ধাতূনং ধাতুকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি ধাতুকুসলতা.

১৩৪১. তত্থ কতমা মনসিকাৰকুসলতা? যা তাসং ধাতূনং মনসিকাৰকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি মনসিকাৰকুসলতা.

১৩৪২. তত্থ কতমা আযতনকুসলতা? দ্ৱাদসাযতনানি – চক্খাযতনং, ৰূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. যা তেসং আযতনানং আযতনকুসলতা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি আযতনকুসলতা.

১৩৪৩. তত্থ কতমা পটিচ্চসমুপ্পাদকুসলতা? অৱিজ্জাপচ্চযা সঙ্খাৰা, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামৰূপং, নামৰূপপচ্চযা সড়াযতনং, সড়াযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং সোকপৰিদেৱদুক্খদোমনস্সুপাযাসা সম্ভৱন্তি; এৱমেতস্স কেৱলস্স দুক্খক্খন্ধস্স সমুদযো হোতীতি. যা তত্থ পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি পটিচ্চসমুপ্পাদকুসলতা.

১৩৪৪. তত্থ কতমা ঠানকুসলতা? যে যে ধম্মা যেসং যেসং ধম্মানং হেতূ পচ্চযা উপ্পাদায [উপাদায (সী. ক.)] তং তং ঠানন্তি, যা তত্থ পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি ঠানকুসলতা.

১৩৪৫. তত্থ কতমা অট্ঠানকুসলতা? যে যে ধম্মা যেসং যেসং ধম্মানং ন হেতূ ন পচ্চযা উপ্পাদায তং তং অট্ঠানন্তি, যা তত্থ পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি অট্ঠানকুসলতা.

১৩৪৬. তত্থ কতমো অজ্জৱো? যা অজ্জৱতা অজিম্হতা অৱঙ্কতা অকুটিলতা – অযং ৱুচ্চতি অজ্জৱো.

১৩৪৭. তত্থ কতমো মদ্দৱো? যা মুদুতা মদ্দৱতা অকক্খড়তা অকথিনতা নীচচিত্ততা – অযং ৱুচ্চতি মদ্দৱো.

১৩৪৮. তত্থ কতমা খন্তি? যা খন্তি খমনতা অধিৱাসনতা অচণ্ডিক্কং অনসুৰোপো অত্তমনতা চিত্তস্স – অযং ৱুচ্চতি খন্তি.

১৩৪৯. তত্থ কতমং সোৰচ্চং? যো কাযিকো অৱীতিক্কমো, ৱাচসিকো অৱীতিক্কমো, কাযিকৱাচসিকো অৱীতিক্কমো – ইদং ৱুচ্চতি সোৰচ্চং. সব্বোপি সীলসংৱৰো সোৰচ্চং.

১৩৫০. তত্থ কতমং সাখল্যং? যা সা ৱাচা অণ্ডকা কক্কসা পৰকটুকা পৰাভিসজ্জনী কোধসামন্তা অসমাধিসংৱত্তনিকা, তথাৰূপিং ৱাচং পহায যা সা ৱাচা নেড়া কণ্ণসুখা পেমনীযা হদযঙ্গমা পোৰী বহুজনকন্তা বহুজনমনাপা তথাৰূপিং ৱাচং ভাসিতা হোতি; যা তত্থ সণ্হৱাচতা সখিলৱাচতা অফৰুসৱাচতা – ইদং ৱুচ্চতি সাখল্যং.

১৩৫১. তত্থ কতমো পটিসন্থাৰো? দ্ৱে পটিসন্থাৰা – আমিসপটিসন্থাৰো চ ধম্মপটিসন্থাৰো চ. ইধেকচ্চো পটিসন্থাৰকো হোতি আমিসপটিসন্থাৰেন ৱা ধম্মপটিসন্থাৰেন ৱা – অযং ৱুচ্চতি পটিসন্থাৰো.

১৩৫২. তত্থ কতমা ইন্দ্ৰিযেসু অগুত্তদ্ৱাৰতা? ইধেকচ্চো চক্খুনা ৰূপং দিস্ৱা নিমিত্তগ্গাহী হোতি অনুব্যঞ্জনগ্গাহী. যত্ৱাধিকৰণমেনং চক্খুন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায ন পটিপজ্জতি, ন ৰক্খতি চক্খুন্দ্ৰিযং, চক্খুন্দ্ৰিযে ন সংৱৰং আপজ্জতি. সোতেন সদ্দং সুত্ৱা…পে… ঘানেন গন্ধং ঘাযিত্ৱা…পে… জিৱ্হায ৰসং সাযিত্ৱা…পে… কাযেন ফোট্ঠব্বং ফুসিত্ৱা…পে… মনসা ধম্মং ৱিঞ্ঞায নিমিত্তগ্গাহী হোতি অনুব্যঞ্জনগ্গাহী. যত্ৱাধিকৰণমেনং মনিন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায ন পটিপজ্জতি, ন ৰক্খতি মনিন্দ্ৰিযং, মনিন্দ্ৰিযে ন সংৱৰং আপজ্জতি. যা ইমেসং ছন্নং ইন্দ্ৰিযানং অগুত্তি অগোপনা অনাৰক্খো অসংৱৰো – অযং ৱুচ্চতি ইন্দ্ৰিযেসু অগুত্তদ্ৱাৰতা.

১৩৫৩. তত্থ কতমা ভোজনে অমত্তঞ্ঞুতা? ইধেকচ্চো অপ্পটিসঙ্খা অযোনিসো আহাৰং আহাৰেতি দৱায মদায মণ্ডনায ৱিভূসনায. যা তত্থ অসন্তুট্ঠিতা অমত্তঞ্ঞুতা অপ্পটিসঙ্খা ভোজনে – অযং ৱুচ্চতি ভোজনে অমত্তঞ্ঞুতা.

১৩৫৪. তত্থ কতমা ইন্দ্ৰিযেসু গুত্তদ্ৱাৰতা? ইধেকচ্চো চক্খুনা ৰূপং দিস্ৱা ন নিমিত্তগ্গাহী হোতি ন অনুব্যঞ্জনগ্গাহী. যত্ৱাধিকৰণমেনং চক্খুন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায পটিপজ্জতি, ৰক্খতি চক্খুন্দ্ৰিযং, চক্খুন্দ্ৰিযে সংৱৰং আপজ্জতি. সোতেন সদ্দং সুত্ৱা…পে… ঘানেন গন্ধং ঘাযিত্ৱা…পে… জিৱ্হায ৰসং সাযিত্ৱা…পে… কাযেন ফোট্ঠব্বং ফুসিত্ৱা…পে… মনসা ধম্মং ৱিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৱাধিকৰণমেনং মনিন্দ্ৰিযং অসংৱুতং ৱিহৰন্তং অভিজ্ঝাদোমনস্সা পাপকা অকুসলা ধম্মা অন্ৱাস্সৱেয্যুং, তস্স সংৱৰায পটিপজ্জতি, ৰক্খতি মনিন্দ্ৰিযং, মনিন্দ্ৰিযে সংৱৰং আপজ্জতি. যা ইমেসং ছন্নং ইন্দ্ৰিযানং গুত্তি গোপনা আৰক্খো সংৱৰো – অযং ৱুচ্চতি ইন্দ্ৰিযেসু গুত্তদ্ৱাৰতা.

১৩৫৫. তত্থ কতমা ভোজনে মত্তঞ্ঞুতা? ইধেকচ্চো পটিসঙ্খা যোনিসো আহাৰং আহাৰেতি – নেৱ দৱায ন মদায ন মণ্ডনায ন ৱিভূসনায যাৱদেৱ ইমস্স কাযস্স ঠিতিযা যাপনায ৱিহিংসূপৰতিযা ব্ৰহ্মচৰিযানুগ্গহায, ইতি পুৰাণঞ্চ ৱেদনং পটিহঙ্খামি, নৱঞ্চ ৱেদনং ন উপ্পাদেস্সামি, যাত্ৰা চ মে ভৱিস্সতি অনৱজ্জতা চ ফাসুৱিহাৰো চাতি. যা তত্থ সন্তুট্ঠিতা মত্তঞ্ঞুতা পটিসঙ্খা ভোজনে – অযং ৱুচ্চতি ভোজনে মত্তঞ্ঞুতা.

১৩৫৬. তত্থ কতমং মুট্ঠসচ্চং? যা অসতি অননুস্সতি অপ্পটিস্সতি অসতি অসৰণতা অধাৰণতা পিলাপনতা সম্মুসনতা – ইদং ৱুচ্চতি মুট্ঠসচ্চং.

১৩৫৭. তত্থ কতমং অসম্পজঞ্ঞং? যং অঞ্ঞাণং অদস্সনং…পে… অৱিজ্জালঙ্গী মোহো অকুসলমূলং – ইদং ৱুচ্চতি অসম্পজঞ্ঞং.

১৩৫৮. তত্থ কতমা সতি? যা সতি অনুস্সতি পটিস্সতি সতি সৰণতা ধাৰণতা অপিলাপনতা অসম্মুসনতা সতি সতিন্দ্ৰিযং সতিবলং সম্মাসতি – অযং ৱুচ্চতি সতি.

১৩৫৯. তত্থ কতমং সম্পজঞ্ঞং? যা পঞ্ঞা পজাননা…পে… অমোহো ধম্মৱিচযো সম্মাদিট্ঠি – ইদং ৱুচ্চতি সম্পজঞ্ঞং.

১৩৬০. তত্থ কতমং পটিসঙ্খানবলং? যা পঞ্ঞা পজাননা…পে… অমোহো ধম্মৱিচযো সম্মাদিট্ঠি – ইদং ৱুচ্চতি পটিসঙ্খানবলং.

১৩৬১. তত্থ কতমং ভাৱনাবলং? যা কুসলানং ধম্মানং আসেৱনা ভাৱনা বহুলীকম্মং – ইদং ৱুচ্চতি ভাৱনাবলং. সত্তপি বোজ্ঝঙ্গা ভাৱনাবলং.

১৩৬২. তত্থ কতমো সমথো? যা চিত্তস্স ঠিতি…পে… সম্মাসমাধি – অযং ৱুচ্চতি সমথো.

১৩৬৩. তত্থ কতমা ৱিপস্সনা? যা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি ৱিপস্সনা.

১৩৬৪. তত্থ কতমং সমথনিমিত্তং? যা চিত্তস্স ঠিতি…পে… সম্মাসমাধি – ইদং ৱুচ্চতি সমথনিমিত্তং.

১৩৬৫. তত্থ কতমং পগ্গাহনিমিত্তং? যো চেতসিকো ৱীৰিযাৰম্ভো…পে… সম্মাৱাযামো – ইদং ৱুচ্চতি পগ্গাহনিমিত্তং.

১৩৬৬. তত্থ কতমো পগ্গাহো? যো চেতসিকো ৱীৰিযাৰম্ভো…পে… সম্মাৱাযামো – অযং ৱুচ্চতি পগ্গাহো.

১৩৬৭. তত্থ কতমো অৱিক্খেপো? যা চিত্তস্স ঠিতি…পে… সম্মাসমাধি – অযং ৱুচ্চতি অৱিক্খেপো.

১৩৬৮. তত্থ কতমা সীলৱিপত্তি? যো কাযিকো ৱীতিক্কমো, ৱাচসিকো ৱীতিক্কমো, কাযিকৱাচসিকো ৱীতিক্কমো – অযং ৱুচ্চতি সীলৱিপত্তি. সব্বম্পি দুস্সিল্যং সীলৱিপত্তি.

১৩৬৯. তত্থ কতমা দিট্ঠিৱিপত্তি? নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৱিপাকো, নত্থি অযং লোকো, নত্থি পৰো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্ৰাহ্মণা সম্মগ্গতা সম্মাপটিপন্না যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তীতিः যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি দিট্ঠিৱিপত্তি. সব্বাপি মিচ্ছাদিট্ঠি দিট্ঠিৱিপত্তি.

১৩৭০. তত্থ কতমা সীলসম্পদা? যো কাযিকো অৱীতিক্কমো, ৱাচসিকো অৱীতিক্কমো, কাযিকৱাচসিকো অৱীতিক্কমো – অযং ৱুচ্চতি সীলসম্পদা. সব্বোপি সীলসংৱৰো সীলসম্পদা.

১৩৭১. তত্থ কতমা দিট্ঠিসম্পদা? অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৱিপাকো, অত্থি অযং লোকো, অত্থি পৰো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্ৰাহ্মণা সম্মগ্গতা সম্মাপটিপন্না যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তীতিः যা এৱৰূপা পঞ্ঞা পজাননা…পে… অমোহো ধম্মৱিচযো সম্মাদিট্ঠি – অযং ৱুচ্চতি দিট্ঠিসম্পদা. সব্বাপি সম্মাদিট্ঠি দিট্ঠিসম্পদা.

১৩৭২. তত্থ কতমা সীলৱিসুদ্ধি? যো কাযিকো অৱীতিক্কমো, ৱাচসিকো অৱীতিক্কমো, কাযিকৱাচসিকো অৱীতিক্কমো – অযং ৱুচ্চতি সীলৱিসুদ্ধি. সব্বোপি সীলসংৱৰো সীলৱিসুদ্ধি.

১৩৭৩. তত্থ কতমা দিট্ঠিৱিসুদ্ধি? কম্মস্সকতঞাণং সচ্চানুলোমিকঞাণং মগ্গসমঙ্গিস্স ঞাণং ফলসমঙ্গিস্স ঞাণং.

১৩৭৪. দিট্ঠিৱিসুদ্ধি খো পনাতি – যা পঞ্ঞা পজাননা…পে… অমোহো ধম্মৱিচযো সম্মাদিট্ঠি.

১৩৭৫. যথাদিট্ঠিস্স চ পধানন্তি – যো চেতসিকো ৱীৰিযাৰম্ভো…পে… সম্মাৱাযামো.

১৩৭৬. সংৱেগোতি – জাতিভযং জৰাভযং ব্যাধিভযং মৰণভযং. সংৱেজনিযং [সংৱেজনীযং (সী.)] ঠানন্তি – জাতি জৰা ব্যাধি মৰণং.

১৩৭৭. সংৱিগ্গস্স চ যোনিসো পধানন্তি – ইধ ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি, উপ্পন্নানং পাপকানং অকুসলানং ধম্মানং পহানায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি, অনুপ্পন্নানং কুসলানং ধম্মানং উপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি, উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি.

১৩৭৮. অসন্তুট্ঠিতা চ কুসলেসু ধম্মেসূতি – যা কুসলানং ধম্মানং ভাৱনায অসন্তুট্ঠস্স ভিয্যোকম্যতা.

১৩৭৯. অপ্পটিৱানিতা চ পধানস্মিন্তি – যা কুসলানং ধম্মানং ভাৱনায সক্কচ্চকিৰিযতা সাতচ্চকিৰিযতা অট্ঠিতকিৰিযতা অনোলীনৱুত্তিতা অনিক্খিত্তছন্দতা অনিক্খিত্তধুৰতা আসেৱনা ভাৱনা বহুলীকম্মং.

১৩৮০. ৱিজ্জাতি – তিস্সো ৱিজ্জা – পুব্বেনিৱাসানুস্সতি ঞাণং ৱিজ্জা, সত্তানং চুতূপপাতে ঞাণং ৱিজ্জা, আসৱানং খযে ঞাণং ৱিজ্জা.

১৩৮১. ৱিমুত্তীতি – দ্ৱে ৱিমুত্তিযো – চিত্তস্স [চিত্তস্স চ (সী. স্যা.)] অধিমুত্তি, নিব্বানঞ্চ.

১৩৮২. খযে ঞাণন্তি – মগ্গসমঙ্গিস্স ঞাণং.

১৩৮৩. অনুপ্পাদে ঞাণন্তি – ফলসমঙ্গিস্স ঞাণং.

নিক্খেপকণ্ডং নিট্ঠিতং.