৪. সীলানুস্সতিকথাৱণ্ণনা

১৫৮. অহো ৱত সীলানি অখণ্ডানি, অহো ৱত অচ্ছিদ্দানীতি এৱং সব্বত্থ যোজেতব্বং. অহো ৱতাতি চ সম্ভাৱনে নিপাতো. তেনাহ ‘‘অখণ্ডতাদিগুণৱসেনা’’তি. অখণ্ডভাৱাদিসম্পত্তিৱসেনাতি অত্থো. পৰস্স সীলানি অনুস্সৰিযমানানি পিযমনাপভাৱাৱহনেন কেৱলং মেত্তায পদট্ঠানং হোন্তি, ন ৱিসুং কম্মট্ঠানন্তি আহ ‘‘অত্তনো সীলানি অনুস্সৰিতব্বানী’’তি. চাগাদীসুপি এসেৱ নযো.

যেসন্তি সীলাদীনং. পটিপাটিযা সমাদানে সমাদানক্কমেন, একজ্ঝং সমাদানে উদ্দেসক্কমেন সীলানং আদিঅন্তং ৱেদিতব্বং. পৰিযন্তে ছিন্নসাটকো ৱিযাতি ৱত্থন্তে, দসন্তে ৱা ছিন্নৱত্থং ৱিয, ৱিসদিসূদাহৰণং চেতং. এৱং সেসানিপি উদাহৰণানি. ৱিনিৱেধৱসেন ছিন্নসাটকো ৱিনিৱিদ্ধসাটকো. ৱিসভাগৱণ্ণেন গাৱী ৱিযাতি সম্বন্ধো. সবলৰহিতানি ৱা অসবলানি. তথা অকম্মাসানি. সত্তৱিধমেথুনসংযোগো হেট্ঠা সীলকথাযং ৱুত্তো এৱ. কোধূপনাহাদীহীতি আদি-সদ্দেন মক্খপড়াসইস্সামচ্ছৰিযমাযাসাঠেয্যমানাতিমানাদযো গহিতা. তানিযেৱ অখণ্ডাদিগুণানি সীলানি. সীলস্স তণ্হাদাসব্যতো মোচনং ৱিৱট্টূপনিস্সযভাৱাপাদনং. ততো এৱ তংসমঙ্গীপুগ্গলো সেৰী সযংৱসী ভুজিস্সো নাম হোতি. তেনাহ ‘‘ভুজিস্সভাৱকৰণেন ভুজিস্সানী’’তি. ‘‘ইমিনাহং সীলেন দেৱো ৱা ভৱেয্যং দেৱঞ্ঞতৰো ৱা, তত্থ নিচ্চো ধুৱো সস্সতো’’তি, ‘‘সীলেন সুদ্ধী’’তি চ এৱমাদিনা তণ্হাদিট্ঠীহি অপৰামট্ঠত্তা অযং তে সীলেসু দোসোতি চতূসু ৱিপত্তীসু যায কাযচি ৱিপত্তিযা দস্সনেন পৰামট্ঠুং অনুদ্ধংসেতুং. সমাধিসংৱত্তনপ্পযোজনানি সমাধিসংৱত্তনিকানি.

১৫৯. সিক্খায সগাৰৱোতি সীলধনং নিস্সায পটিলদ্ধসমাদানত্তা সাতিসযং সিক্খায সগাৰৱো সপ্পতিস্সো হোতি. সভাগৱুত্তীতি সম্পন্নসীলেহি সভাগৱুত্তিকো, তায এৱ ৱা সিক্খায সভাগৱুত্তি. যো হি সিক্খাগাৰৱৰহিতো, সো তায ৱিসভাগৱুত্তি নাম হোতি ৱিলোমনতো. যথা পৰেহি সদ্ধিং অত্তনো ছিদ্দং ন হোতি, এৱং ধম্মামিসেহি পটিসন্থৰণং পটিসন্থাৰো. সিক্খায সগাৰৱত্তা এৱ তত্থ অপ্পমত্তো হোতি. অত্তানুৱাদভযং পৰানুৱাদভযং দণ্ডভযং দুগ্গতিভযন্তি এৱমাদীনি ভযানি ইমস্স দূৰসমুস্সাৰিতানীতি আহ ‘‘অত্তানুৱাদাদিভযৱিৰহিতো’’তি. সেসং সুৱিঞ্ঞেয্যমেৱ.