৬. পত্তপিণ্ডিকঙ্গকথাৱণ্ণনা

২৯. অপ্পটিকূলং কত্ৱা ভুঞ্জিতুং ৱট্টতি পটিকূলস্স ভুত্তস্স অগণ্হনম্পি সিযাতি অধিপ্পাযো. পমাণযুত্তমেৱ গণ্হিতব্বন্তি ‘‘একভাজনমেৱ গণ্হামী’’তি বহুং গহেত্ৱা ন ছড্ডেতব্বং. নানাৰসতণ্হাৱিনোদনন্তি নানাৰসভোজনে তণ্হায ৱিনোদনং. অত্ৰ অত্ৰ নানাভাজনে ঠিতে নানাৰসে ইচ্ছা এতস্সাতি অত্ৰিচ্ছো, তস্স ভাৱো অত্ৰিচ্ছতা, তস্সা অত্ৰিচ্ছতায পহানং. আহাৰে পযোজনমত্তদস্সিতাতি অসম্ভিন্ননানাৰসে গেধং অকত্ৱা আহাৰে সত্থাৰা অনুঞ্ঞাতপযোজনমত্তদস্সিতা. ৱিসুং ৱিসুং ভাজনেসু ঠিতানি ব্যঞ্জনানি গণ্হতো তত্থ তত্থ সাভোগতায সিযা ৱিক্খিত্তভোজিতা, ন তথা ইমস্স একপত্তগতসঞ্ঞিনোতি ৱুত্তং ‘‘অৱিক্খিত্তভোজিতা’’তি. ওক্খিত্তলোচনোতি পত্তসঞ্ঞিতায হেট্ঠাখিত্তচক্খু. পৰিভুঞ্জেয্যাতি পৰিভুঞ্জিতুং সক্কুণেয্য.

ইতি পত্তপিণ্ডিকঙ্গকথাৱণ্ণনা.