৪. সপদানচাৰিকঙ্গকথাৱণ্ণনা

২৭. ইমিনাতি সপদানচাৰিকেন. কালতৰন্তি কালস্সেৱ. অফাসুকট্ঠানন্তি সপৰিস্সযাদিৱসেন দুপ্পৱেসনট্ঠানং. পুৰতোতি ৱীথিযং গচ্ছন্তস্স পুৰতো ঘৰং অপৱিট্ঠস্সেৱ. পত্তৱিস্সট্ঠট্ঠানন্তি পেসকাৰৱীথিযং পেসকাৰভাৱং নিম্মিনিত্ৱা ঠিতস্স সক্কস্স ঘৰদ্ৱাৰে পত্তৱিস্সট্ঠট্ঠানং. উক্কট্ঠপিণ্ডপাতিকো তং দিৱসং ন ভিক্খং আগমযমানো নিসীদতি, তস্মা তং অনুলোমেতি. কত্থচিপি কুলে নিবদ্ধং উপসঙ্কমনাভাৱতো পৰিচযাভাৱেন কুলেসু নিচ্চনৱকতা. সব্বত্থ অলগ্গমানসতায চ সোম্মভাৱেন চ চন্দূপমতা. কুলেসু পৰিগ্গহচিত্তাভাৱেন তত্থ মচ্ছেৰপ্পহানং. হিতেসিতায ৱিভাগাভাৱতো সমানুকম্পিতা. কুলানং সঙ্গণ্হনসংসট্ঠতাদযো কুলূপকাদীনৱা. অৱ্হানানভিনন্দনাতি নিমন্তনৱসেন অৱ্হানস্স অসম্পটিচ্ছনা. অভিহাৰেনাতি ভিক্খাভিহাৰেন. সেৰিচাৰন্তি যথাৰুচি ৱিচৰণং.

ইতি সপদানচাৰিকঙ্গকথাৱণ্ণনা.