৬. দেৱতানুস্সতিকথা

১৬২. দেৱতানুস্সতিং ভাৱেতুকামেন পন অৰিযমগ্গৱসেন সমুদাগতেহি সদ্ধাদীহি গুণেহি সমন্নাগতেন ভৱিতব্বং. ততো ৰহোগতেন পটিসল্লীনেন ‘‘সন্তি দেৱা চাতুমহাৰাজিকা, সন্তি দেৱা তাৱতিংসা, যামা, তুসিতা, নিম্মানৰতিনো, পৰনিম্মিতৱসৱত্তিনো, সন্তি দেৱা ব্ৰহ্মকাযিকা, সন্তি দেৱা ততুত্তৰি, যথাৰূপায সদ্ধায সমন্নাগতা তা দেৱতা ইতো চুতা তত্থ উপপন্না, ময্হম্পি তথাৰূপা সদ্ধা সংৱিজ্জতি. যথাৰূপেন সীলেন. যথাৰূপেন সুতেন. যথাৰূপেন চাগেন. যথাৰূপায পঞ্ঞায সমন্নাগতা তা দেৱতা ইতো চুতা তত্থ উপপন্না, ময্হম্পি তথাৰূপা পঞ্ঞা সংৱিজ্জতী’’তি (অ. নি. ৬.১০) এৱং দেৱতা সক্খিট্ঠানে ঠপেত্ৱা অত্তনো সদ্ধাদিগুণা অনুস্সৰিতব্বা.

সুত্তে পন যস্মিং মহানাম সমযে অৰিযসাৱকো অত্তনো চ তাসঞ্চ দেৱতানং সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সৰতি, নেৱস্স তস্মিং সমযে ৰাগপৰিযুট্ঠিতং চিত্তং হোতীতি ৱুত্তং. কিঞ্চাপি ৱুত্তং, অথ খো তং সক্খিট্ঠানে ঠপেতব্বদেৱতানং অত্তনো সদ্ধাদীহি সমানগুণদীপনত্থং ৱুত্তন্তি ৱেদিতব্বং. অট্ঠকথাযঞ্হি দেৱতা সক্খিট্ঠানে ঠপেত্ৱা অত্তনো গুণে অনুস্সৰতীতি দড়্হং কত্ৱা ৱুত্তং.

১৬৩. তস্মা পুব্বভাগে দেৱতানং গুণে অনুস্সৰিত্ৱা অপৰভাগে অত্তনো সংৱিজ্জমানে সদ্ধাদিগুণে অনুস্সৰতো চস্স নেৱ তস্মিং সমযে ৰাগপৰিযুট্ঠিতং চিত্তং হোতি. ন দোস…পে… ন মোহপৰিযুট্ঠিতং চিত্তং হোতি, উজুগতমেৱস্স তস্মিং সমযে চিত্তং হোতি দেৱতা আৰব্ভাতি (অ. নি. ৬.১০) পুৰিমনযেনেৱ ৱিক্খম্ভিতনীৱৰণস্স একক্খণে ঝানঙ্গানি উপ্পজ্জন্তি. সদ্ধাদিগুণানং পন গম্ভীৰতায নানপ্পকাৰগুণানুস্সৰণাধিমুত্ততায ৱা অপ্পনং অপ্পত্ৱা উপচাৰপ্পত্তমেৱ ঝানং হোতি. তদেতং দেৱতানং গুণসদিসসদ্ধাদিগুণানুস্সৰণৱসেন দেৱতানুস্সতিচ্চেৱ সঙ্খং গচ্ছতি.

ইমঞ্চ পন দেৱতানুস্সতিং অনুযুত্তো ভিক্খু দেৱতানং পিযো হোতি মনাপো, ভিয্যোসো মত্তায সদ্ধাদিৱেপুল্লং অধিগচ্ছতি, পীতিপামোজ্জবহুলো ৱিহৰতি. উত্তৰি অপ্পটিৱিজ্ঝন্তো পন সুগতিপৰাযনো হোতি.

তস্মা হৱে অপ্পমাদং, কযিৰাথ সুমেধসো;

এৱং মহানুভাৱায, দেৱতানুস্সতিযা সদাতি.

ইদং দেৱতানুস্সতিযং ৱিত্থাৰকথামুখং.

পকিণ্ণককথা

১৬৪. যং পন এতাসং ৱিত্থাৰদেসনাযং ‘‘উজুগতমেৱস্স তস্মিং সমযে চিত্তং হোতি তথাগতং আৰব্ভা’’তিআদীনি ৱত্ৱা ‘‘উজুগতচিত্তো খো পন, মহানাম, অৰিযসাৱকো লভতি অত্থৱেদং, লভতি ধম্মৱেদং, লভতি ধম্মূপসংহিতং পামোজ্জং, পমুদিতস্স পীতি জাযতী’’তি (অ. নি. ৬.১০) ৱুত্তং, তত্থ ইতিপি সো ভগৱাতিআদীনং অত্থং নিস্সায উপ্পন্নং তুট্ঠিং সন্ধায লভতি অত্থৱেদন্তি ৱুত্তং. পাড়িং নিস্সায উপ্পন্নং তুট্ঠিং সন্ধায লভতি ধম্মৱেদং. উভযৱসেন লভতি ধম্মূপসংহিতং পামোজ্জন্তি ৱুত্তন্তি ৱেদিতব্বং.

যঞ্চ দেৱতানুস্সতিযং দেৱতা আৰব্ভাতি ৱুত্তং, তং পুব্বভাগে দেৱতা আৰব্ভ পৱত্তচিত্তৱসেন দেৱতাগুণসদিসে ৱা দেৱতাভাৱনিপ্ফাদকে গুণে আৰব্ভ পৱত্তচিত্তৱসেন ৱুত্তন্তি ৱেদিতব্বং.

১৬৫. ইমা পন ছ অনুস্সতিযো অৰিযসাৱকানঞ্ঞেৱ ইজ্ঝন্তি. তেসং হি বুদ্ধধম্মসঙ্ঘগুণা পাকটা হোন্তি. তে চ অখণ্ডতাদিগুণেহি সীলেহি, ৱিগতমলমচ্ছেৰেন চাগেন, মহানুভাৱানং দেৱতানং গুণসদিসেহি সদ্ধাদিগুণেহি সমন্নাগতা. মহানামসুত্তে (অ. নি. ৬.১০) চ সোতাপন্নস্স নিস্সযৱিহাৰং পুট্ঠেন ভগৱতা সোতাপন্নস্স নিস্সযৱিহাৰদস্সনত্থমেৱ এতা ৱিত্থাৰতো কথিতা.

গেধসুত্তেপি ‘‘ইধ, ভিক্খৱে, অৰিযসাৱকো তথাগতং অনুস্সৰতি, ইতিপি সো ভগৱা…পে… উজুগতমেৱস্স তস্মিং সমযে চিত্তং হোতি নিক্খন্তং মুত্তং ৱুট্ঠিতং গেধম্হা. গেধোতি খো, ভিক্খৱে, পঞ্চন্নেতং কামগুণানমধিৱচনং. ইদম্পি খো, ভিক্খৱে, আৰম্মণং কৰিত্ৱা এৱমিধেকচ্চে সত্তা ৱিসুজ্ঝন্তী’’তি (অ. নি. ৬.২৫) এৱং অৰিযসাৱকস্স অনুস্সতিৱসেন চিত্তং ৱিসোধেত্ৱা উত্তৰি পৰমত্থৱিসুদ্ধিঅধিগমত্থায কথিতা.

আযস্মতা মহাকচ্চানেন দেসিতে সম্বাধোকাসসুত্তেপি ‘‘অচ্ছৰিযং, আৱুসো, অব্ভুতং, আৱুসো, যাৱঞ্চিদং তেন ভগৱতা জানতা পস্সতা অৰহতা সম্মাসম্বুদ্ধেন সম্বাধে ওকাসাধিগমো অনুবুদ্ধো সত্তানং ৱিসুদ্ধিযা…পে… নিব্বানস্স সচ্ছিকিৰিযায যদিদং ছ অনুস্সতিট্ঠানানি. কতমানি ছ? ইধাৱুসো, অৰিযসাৱকো তথাগতং অনুস্সৰতি…পে… এৱমিধেকচ্চে সত্তা ৱিসুদ্ধিধম্মা ভৱন্তী’’তি (অ. নি. ৬.২৬) এৱং অৰিযসাৱকস্সেৱ পৰমত্থৱিসুদ্ধিধম্মতায ওকাসাধিগমৱসেন কথিতা.

উপোসথসুত্তেপি ‘‘কথঞ্চ, ৱিসাখে, অৰিযূপোসথো হোতি? উপক্কিলিট্ঠস্স, ৱিসাখে, চিত্তস্স উপক্কমেন পৰিযোদপনা হোতি. কথঞ্চ, ৱিসাখে, উপক্কিলিট্ঠস্স চিত্তস্স উপক্কমেন পৰিযোদপনা হোতি? ইধ, ৱিসাখে, অৰিযসাৱকো তথাগতং অনুস্সৰতী’’তি (অ. নি. ৩.৭১) এৱং অৰিযসাৱকস্সেৱ উপোসথং উপৱসতো চিত্তৱিসোধনকম্মট্ঠানৱসেন উপোসথস্স মহপ্ফলভাৱদস্সনত্থং কথিতা.

একাদসনিপাতেপি ‘‘সদ্ধো খো, মহানাম, আৰাধকো হোতি, নো অস্সদ্ধো. আৰদ্ধৱীৰিযো, উপট্ঠিতসতি, সমাহিতো, পঞ্ঞৱা, মহানাম, আৰাধকো হোতি, নো দুপ্পঞ্ঞো. ইমেসু খো ত্ৱং, মহানাম, পঞ্চসু ধম্মেসু পতিট্ঠায ছ ধম্মে উত্তৰি ভাৱেয্যাসি. ইধ ত্ৱং, মহানাম, তথাগতং অনুস্সৰেয্যাসি ইতিপি সো ভগৱা’’তি (অ. নি. ১১.১১) এৱং অৰিযসাৱকস্সেৱ ‘‘তেসং নো, ভন্তে, নানাৱিহাৰেন ৱিহৰতং কেনস্স ৱিহাৰেন ৱিহৰিতব্ব’’ন্তি পুচ্ছতো ৱিহাৰদস্সনত্থং কথিতা.

১৬৬. এৱং সন্তেপি পৰিসুদ্ধসীলাদিগুণসমন্নাগতেন পুথুজ্জনেনাপি মনসি কাতব্বা. অনুস্সৱৱসেনাপি হি বুদ্ধাদীনং গুণে অনুস্সৰতো চিত্তং পসীদতিযেৱ. যস্সানুভাৱেন নীৱৰণানি ৱিক্খম্ভেত্ৱা উড়াৰপামোজ্জো ৱিপস্সনং আৰভিত্ৱা অৰহত্তংযেৱ সচ্ছিকৰেয্য কটঅন্ধকাৰৱাসী ফুস্সদেৱত্থেৰো ৱিয.

সো কিৰাযস্মা মাৰেন নিম্মিতং বুদ্ধৰূপং দিস্ৱা ‘‘অযং তাৱ সৰাগদোসমোহো এৱং সোভতি, কথং নু খো ভগৱা ন সোভতি, সো হি সব্বসো ৱীতৰাগদোসমোহো’’তি বুদ্ধাৰম্মণং পীতিং পটিলভিত্ৱা ৱিপস্সনং ৱড্ঢেত্ৱা অৰহত্তং পাপুণীতি.

ইতি সাধুজনপামোজ্জত্থায কতে ৱিসুদ্ধিমগ্গে

সমাধিভাৱনাধিকাৰে

ছঅনুস্সতিনিদ্দেসো নাম

সত্তমো পৰিচ্ছেদো.