৪. সীলানুস্সতিকথা

১৫৮. সীলানুস্সতিং ভাৱেতুকামেন পন ৰহোগতেন পটিসল্লীনেন ‘‘অহো ৱত মে সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৱিঞ্ঞুপ্পসত্থানি অপৰামট্ঠানি সমাধিসংৱত্তনিকানী’’তি (অ. নি. ৬.১০) এৱং অখণ্ডতাদিগুণৱসেন অত্তনো সীলানি অনুস্সৰিতব্বানি. তানি চ গহট্ঠেন গহট্ঠসীলানি, পব্বজিতেন পব্বজিতসীলানি.

গহট্ঠসীলানি ৱা হোন্তু পব্বজিতসীলানি ৱা, যেসং আদিম্হি ৱা অন্তে ৱা একম্পি ন ভিন্নং, তানি পৰিযন্তে ছিন্নসাটকো ৱিয ন খণ্ডানীতি অখণ্ডানি. যেসং ৱেমজ্ঝে একম্পি ন ভিন্নং, তানি মজ্ঝে ৱিনিৱিদ্ধসাটকো ৱিয ন ছিদ্দানীতি অচ্ছিদ্দানি. যেসং পটিপাটিযা দ্ৱে ৱা তীণি ৱা ন ভিন্নানি, তানি পিট্ঠিযা ৱা কুচ্ছিযা ৱা উট্ঠিতেন দীঘৱট্টাদিসণ্ঠানেন ৱিসভাগৱণ্ণেন কাড়ৰত্তাদীনং অঞ্ঞতৰসৰীৰৱণ্ণা গাৱী ৱিয ন সবলানীতি অসবলানি. যানি অন্তৰন্তৰা ন ভিন্নানি, তানি ৱিসভাগবিন্দুৱিচিত্ৰা গাৱী ৱিয ন কম্মাসানীতি অকম্মাসানি. অৱিসেসেন ৱা সব্বানিপি সত্তৱিধেন মেথুনসংযোগেন কোধুপনাহাদীহি চ পাপধম্মেহি অনুপহতত্তা অখণ্ডানি অচ্ছিদ্দানি অসবলানি অকম্মাসানি. তানিযেৱ তণ্হাদাসব্যতো মোচেত্ৱা ভুজিস্সভাৱকৰণেন ভুজিস্সানি. বুদ্ধাদীহি ৱিঞ্ঞূহি পসত্থত্তা ৱিঞ্ঞুপ্পসত্থানি. তণ্হাদিট্ঠীহি অপৰামট্ঠতায কেনচি ৱা অযং তে সীলেসু দোসোতি এৱং পৰামট্ঠুং অসক্কুণেয্যতায অপৰামট্ঠানি. উপচাৰসমাধিং অপ্পনাসমাধিং ৱা, অথ ৱা পন মগ্গসমাধিং ফলসমাধিঞ্চাপি সংৱত্তেন্তীতি সমাধিসংৱত্তনিকানি.

১৫৯. এৱং অখণ্ডতাদিগুণৱসেন অত্তনো সীলানি অনুস্সৰতো নেৱস্স তস্মিং সমযে ৰাগপৰিযুট্ঠিতং চিত্তং হোতি. ন দোস…পে… ন মোহপৰিযুট্ঠিতং চিত্তং হোতি. উজুগতমেৱস্স তস্মিং সমযে চিত্তং হোতি, সীলং আৰব্ভাতি পুৰিমনযেনেৱ ৱিক্খম্ভিতনীৱৰণস্স একক্খণে ঝানঙ্গানি উপ্পজ্জন্তি. সীলগুণানং পন গম্ভীৰতায নানপ্পকাৰগুণানুস্সৰণাধিমুত্ততায ৱা অপ্পনং অপ্পত্ৱা উপচাৰপ্পত্তমেৱ ঝানং হোতি. তদেতং সীলগুণানুস্সৰণৱসেন উপ্পন্নত্তা সীলানুস্সতিচ্চেৱ সঙ্খং গচ্ছতি.

ইমঞ্চ পন সীলানুস্সতিং অনুযুত্তো ভিক্খু সিক্খায সগাৰৱো হোতি সভাগৱুত্তি, পটিসন্থাৰে অপ্পমত্তো, অত্তানুৱাদাদিভযৱিৰহিতো, অণুমত্তেসু ৱজ্জেসু ভযদস্সাৱী, সদ্ধাদিৱেপুল্লং অধিগচ্ছতি, পীতিপামোজ্জবহুলো হোতি. উত্তৰি অপ্পটিৱিজ্ঝন্তো পন সুগতিপৰাযনো হোতি.

তস্মা হৱে অপ্পমাদং, কযিৰাথ সুমেধসো;

এৱং মহানুভাৱায, সীলানুস্সতিযা সদাতি.

ইদং সীলানুস্সতিযং ৱিত্থাৰকথামুখং.