৫. সেসকসিণনিদ্দেসো

আপোকসিণকথা

৯১. ইদানি পথৱীকসিণানন্তৰে আপোকসিণে ৱিত্থাৰকথা হোতি. যথেৱ হি পথৱীকসিণং, এৱং আপোকসিণম্পি ভাৱেতুকামেন সুখনিসিন্নেন আপস্মিং নিমিত্তং গণ্হিতব্বং, কতে ৱা অকতে ৱাতি সব্বং ৱিত্থাৰেতব্বং. যথা চ ইধ, এৱং সব্বত্থ. ইতো পৰঞ্হি এত্তকম্পি অৱত্ৱা ৱিসেসমত্তমেৱ ৱক্খাম.

ইধাপি পুব্বেকতাধিকাৰস্স পুঞ্ঞৱতো অকতে আপস্মিং পোক্খৰণিযা ৱা তড়াকে ৱা লোণিযং ৱা সমুদ্দে ৱা নিমিত্তং উপ্পজ্জতি চূড়সিৱত্থেৰস্স ৱিয. তস্স কিৰাযস্মতো লাভসক্কাৰং পহায ৱিৱিত্তৱাসং ৱসিস্সামীতি মহাতিত্থে নাৱমাৰূহিত্ৱা জম্বুদীপং গচ্ছতো অন্তৰা মহাসমুদ্দং ওলোকযতো তপ্পটিভাগং কসিণনিমিত্তং উদপাদি.

অকতাধিকাৰেন চত্তাৰো কসিণদোসে পৰিহৰন্তেন নীলপীতলোহিতোদাতৱণ্ণানমঞ্ঞতৰৱণ্ণং আপং অগহেত্ৱা যং পন ভূমিং অসম্পত্তমেৱ আকাসে সুদ্ধৱত্থেন গহিতং উদকং, অঞ্ঞং ৱা তথাৰূপং ৱিপ্পসন্নং অনাৱিলং, তেন পত্তং ৱা কুণ্ডিকং ৱা সমতিত্তিকং পূৰেত্ৱা ৱিহাৰপচ্চন্তে ৱুত্তপ্পকাৰে পটিচ্ছন্নে ওকাসে ঠপেত্ৱা সুখনিসিন্নেন ন ৱণ্ণো পচ্চৱেক্খিতব্বো. ন লক্খণং মনসি কাতব্বং. নিস্সযসৱণ্ণমেৱ কত্ৱা উস্সদৱসেন পণ্ণত্তিধম্মে চিত্তং ঠপেত্ৱা অম্বু, উদকং, ৱাৰি, সলিলন্তিআদীসু আপোনামেসু পাকটনামৱসেনেৱ ‘‘আপো আপো’’তি ভাৱেতব্বং.

তস্সেৱং ভাৱযতো অনুক্কমেন ৱুত্তনযেনেৱ নিমিত্তদ্ৱযং উপ্পজ্জতি. ইধ পন উগ্গহনিমিত্তং চলমানং ৱিয উপট্ঠাতি, সচে ফেণপুপ্ফুড়কমিস্সং উদকং হোতি, তাদিসমেৱ উপট্ঠাতি, কসিণদোসো পঞ্ঞাযতি. পটিভাগনিমিত্তং পন নিপ্পৰিপ্ফন্দং আকাসে ঠপিতমণিতালৱণ্টং ৱিয মণিমযাদাসমণ্ডলমিৱ চ হুত্ৱা উপট্ঠাতি. সো তস্স সহ উপট্ঠানেনেৱ উপচাৰজ্ঝানং, ৱুত্তনযেনেৱ চতুক্কপঞ্চকজ্ঝানানি চ পাপুণাতীতি. আপোকসিণং.

তেজোকসিণকথা

৯২. তেজোকসিণং ভাৱেতুকামেনাপি তেজস্মিং নিমিত্তং গণ্হিতব্বং. তত্থ কতাধিকাৰস্স পুঞ্ঞৱতো অকতে নিমিত্তং গণ্হন্তস্স দীপসিখায ৱা উদ্ধনে ৱা পত্তপচনট্ঠানে ৱা দৱদাহে ৱা যত্থ কত্থচি অগ্গিজালং ওলোকেন্তস্স নিমিত্তং উপ্পজ্জতি চিত্তগুত্তত্থেৰস্স ৱিয. তস্স হাযস্মতো ধম্মস্সৱনদিৱসে উপোসথাগাৰং পৱিট্ঠস্স দীপসিখং ওলোকেন্তস্সেৱ নিমিত্তং উপ্পজ্জি.

ইতৰেন পন কাতব্বং. তত্ৰিদং কৰণৱিধানং, সিনিদ্ধানি সাৰদাৰূনি ফালেত্ৱা সুক্খাপেত্ৱা ঘটিকং ঘটিকং কত্ৱা পতিৰূপং ৰুক্খমূলং ৱা মণ্ডপং ৱা গন্ত্ৱা পত্তপচনাকাৰেন ৰাসিং কত্ৱা আলিম্পেত্ৱা কটসাৰকে ৱা চম্মে ৱা পটে ৱা ৱিদত্থিচতুৰঙ্গুলপ্পমাণং ছিদ্দং কাতব্বং. তং পুৰতো ঠপেত্ৱা ৱুত্তনযেনেৱ নিসীদিত্ৱা হেট্ঠা তিণকট্ঠং ৱা উপৰি ধূমসিখং ৱা অমনসিকৰিত্ৱা ৱেমজ্ঝে ঘনজালায নিমিত্তং গণ্হিতব্বং, নীলন্তি ৱা পীতন্তি ৱাতিআদিৱসেন ৱণ্ণো ন পচ্চৱেক্খিতব্বো, উণ্হত্তৱসেন লক্খণং ন মনসি কাতব্বং. নিস্সযসৱণ্ণমেৱ কত্ৱা উস্সদৱসেন পণ্ণত্তিধম্মে চিত্তং ঠপেত্ৱা পাৱকো, কণ্হৱত্তনী, জাতৱেদো, হুতাসনোতিআদীসু অগ্গিনামেসু পাকটনামৱসেনেৱ ‘‘তেজো তেজো’’তি ভাৱেতব্বং.

তস্সেৱং ভাৱযতো অনুক্কমেন ৱুত্তনযেনেৱ নিমিত্তদ্ৱযং উপ্পজ্জতি. তত্থ উগ্গহনিমিত্তং জালং ছিজ্জিত্ৱা ছিজ্জিত্ৱা পতনসদিসং হুত্ৱা উপট্ঠাতি. অকতে গণ্হন্তস্স পন কসিণদোসো পঞ্ঞাযতি, অলাতখণ্ডং ৱা অঙ্গাৰপিণ্ডো ৱা ছাৰিকা ৱা ধূমো ৱা উপট্ঠাতি. পটিভাগনিমিত্তং নিচ্চলং আকাসে ঠপিতৰত্তকম্বলক্খণ্ডং ৱিয সুৱণ্ণতালৱণ্টং ৱিয কঞ্চনত্থম্ভো ৱিয চ উপট্ঠাতি. সো তস্স সহ উপট্ঠানেনেৱ উপচাৰজ্ঝানং, ৱুত্তনযেনেৱ চতুক্কপঞ্চকজ্ঝানানি চ পাপুণাতীতি. তেজোকসিণং.

ৱাযোকসিণকথা

৯৩. ৱাযোকসিণং ভাৱেতুকামেনাপি ৱাযুস্মিং নিমিত্তং গণ্হিতব্বং. তঞ্চ খো দিট্ঠৱসেন ৱা ফুট্ঠৱসেন ৱা. ৱুত্তঞ্হেতং অট্ঠকথাসু ‘‘ৱাযোকসিণং উগ্গণ্হন্তো ৱাযুস্মিং নিমিত্তং গণ্হাতি, উচ্ছগ্গং ৱা এৰিতং সমেৰিতং উপলক্খেতি, ৱেড়গ্গং ৱা…পে… ৰুক্খগ্গং ৱা কেসগ্গং ৱা এৰিতং সমেৰিতং উপলক্খেতি, কাযস্মিং ৱা ফুট্ঠং উপলক্খেতী’’তি. তস্মা সমসীসট্ঠিতং ঘনপত্তং উচ্ছুং ৱা ৱেড়ুং ৱা ৰুক্খং ৱা চতুৰঙ্গুলপ্পমাণং ঘনকেসস্স পুৰিসস্স সীসং ৱা ৱাতেন পহৰিযমানং দিস্ৱা ‘‘অযং ৱাতো এতস্মিং ঠানে পহৰতী’’তি সতিং ঠপেত্ৱা, যং ৱা পনস্স ৱাতপানন্তৰিকায ৱা ভিত্তিছিদ্দেন ৱা পৱিসিত্ৱা ৱাতো কাযপ্পদেসং পহৰতি, তত্থ সতিং ঠপেত্ৱা ৱাতমালুতঅনিলাদীসু ৱাযুনামেসু পাকটনামৱসেনেৱ ‘‘ৱাতো ৱাতো’’তি ভাৱেতব্বং. ইধ উগ্গহনিমিত্তৱড্ঢনতো ওতাৰিতমত্তস্স পাযাসস্স উসুমৱট্টিসদিসং চলং হুত্ৱা উপট্ঠাতি. পটিভাগনিমিত্তং সন্নিসিন্নং হোতি নিচ্চলং. সেসং ৱুত্তনযেনেৱ ৱেদিতব্বন্তি. ৱাযোকসিণং.

নীলকসিণকথা

৯৪. তদনন্তৰং পন নীলকসিণং উগ্গণ্হন্তো নীলকস্মিং নিমিত্তং গণ্হাতি পুপ্ফস্মিং ৱা ৱত্থস্মিং ৱা ৱণ্ণধাতুযা ৱাতি ৱচনতো কতাধিকাৰস্স পুঞ্ঞৱতো তাৱ তথাৰূপং মালাগচ্ছং ৱা পূজাঠানেসু পুপ্ফসন্থৰং ৱা নীলৱত্থমণীনং ৱা অঞ্ঞতৰং দিস্ৱাৱ নিমিত্তং উপ্পজ্জতি. ইতৰেন নীলুপ্পলগিৰিকণ্ণিকাদীনি পুপ্ফানি গহেত্ৱা যথা কেসৰং ৱা ৱণ্টং ৱা ন পঞ্ঞাযতি, এৱং চঙ্গোটকং ৱা কৰণ্ডপটলং ৱা পত্তেহিযেৱ সমতিত্তিকং পূৰেত্ৱা সন্থৰিতব্বং. নীলৱণ্ণেন ৱা ৱত্থেন ভণ্ডিকং বন্ধিত্ৱা পূৰেতব্বং. মুখৱট্টিযং ৱা অস্স ভেৰিতলমিৱ বন্ধিতব্বং. কংসনীলপলাসনীলঅঞ্জননীলানং ৱা অঞ্ঞতৰেন ধাতুনা পথৱীকসিণে ৱুত্তনযেন সংহাৰিমং ৱা ভিত্তিযংযেৱ ৱা কসিণমণ্ডলং কত্ৱা ৱিসভাগৱণ্ণেন পৰিচ্ছিন্দিতব্বং. ততো পথৱীকসিণে ৱুত্তনযেন ‘‘নীলং নীল’’ন্তি মনসিকাৰো পৱত্তেতব্বো. ইধাপি উগ্গহনিমিত্তে কসিণদোসো পঞ্ঞাযতি, কেসৰদণ্ডকপত্তন্তৰিকাদীনি উপট্ঠহন্তি. পটিভাগনিমিত্তং কসিণমণ্ডলতো মুঞ্চিত্ৱা আকাসে মণিতালৱণ্টসদিসং উপট্ঠাতি. সেসং ৱুত্তনযেনেৱ ৱেদিতব্বন্তি. নীলকসিণং.

পীতকসিণকথা

৯৫. পীতকসিণেপি এসেৱ নযো. ৱুত্তঞ্হেতং পীতকসিণং উগ্গণ্হন্তো পীতকস্মিং নিমিত্তং গণ্হাতি পুপ্ফস্মিং ৱা ৱত্থস্মিং ৱা ৱণ্ণধাতুযা ৱাতি. তস্মা ইধাপি কতাধিকাৰস্স পুঞ্ঞৱতো তথাৰূপং মালাগচ্ছং ৱা পুপ্ফসন্থৰং ৱা পীতৱত্থধাতূনং ৱা অঞ্ঞতৰং দিস্ৱাৱ নিমিত্তং উপ্পজ্জতি চিত্তগুত্তত্থেৰস্স ৱিয. তস্স কিৰাযস্মতো চিত্তলপব্বতে পত্তঙ্গপুপ্ফেহি কতং আসনপূজং পস্সতো সহ দস্সনেনেৱ আসনপ্পমাণং নিমিত্তং উদপাদি. ইতৰেন কণিকাৰপুপ্ফাদিনা ৱা পীতৱত্থেন ৱা ধাতুনা ৱা নীলকসিণে ৱুত্তনযেনেৱ কসিণং কত্ৱা ‘‘পীতকং পীতক’’ন্তি মনসিকাৰো পৱত্তেতব্বো. সেসং তাদিসমেৱাতি. পীতকসিণং.

লোহিতকসিণকথা

৯৬. লোহিতকসিণেপি এসেৱ নযো. ৱুত্তঞ্হেতং লোহিতকসিণং উগ্গণ্হন্তো লোহিতকস্মিং নিমিত্তং গণ্হাতি পুপ্ফস্মিং ৱা ৱত্থস্মিং ৱা ৱণ্ণধাতুযা ৱাতি. তস্মা ইধাপি কতাধিকাৰস্স পুঞ্ঞৱতো তথাৰূপং বন্ধুজীৱকাদিমালাগচ্ছং ৱা পুপ্ফসন্থৰং ৱা লোহিতকৱত্থমণিধাতূনং ৱা অঞ্ঞতৰং দিস্ৱাৱ নিমিত্তং উপ্পজ্জতি. ইতৰেন জযসুমনবন্ধুজীৱকৰত্তকোৰণ্ডকাদিপুপ্ফেহি ৱা ৰত্তৱত্থেন ৱা ধাতুনা ৱা নীলকসিণে ৱুত্তনযেনেৱ কসিণং কত্ৱা ‘‘লোহিতকং লোহিতক’’ন্তি মনসিকাৰো পৱত্তেতব্বো. সেসং তাদিসমেৱাতি. লোহিতকসিণং.

ওদাতকসিণকথা

৯৭. ওদাতকসিণেপি ওদাতকসিণং উগ্গণ্হন্তো ওদাতস্মিং নিমিত্তং গণ্হাতি পুপ্ফস্মিং ৱা ৱত্থস্মিং ৱা ৱণ্ণধাতুযা ৱাতি ৱচনতো কতাধিকাৰস্স তাৱ পুঞ্ঞৱতো তথাৰূপং মালাগচ্ছং ৱা ৱস্সিকসুমনাদিপুপ্ফসন্থৰং ৱা কুমুদপদুমৰাসিং ৱা ওদাতৱত্থধাতূনং ৱা অঞ্ঞতৰং দিস্ৱাৱ নিমিত্তং উপ্পজ্জতি, তিপুমণ্ডলৰজতমণ্ডলচন্দমণ্ডলেসুপি উপ্পজ্জতিযেৱ. ইতৰেন ৱুত্তপ্পকাৰেহি ওদাতপুপ্ফেহি ৱা ওদাতৱত্থেন ৱা ধাতুনা ৱা নীলকসিণে ৱুত্তনযেনেৱ কসিণং কত্ৱা ‘‘ওদাতং ওদাত’’ন্তি মনসিকাৰো পৱত্তেতব্বো. সেসং তাদিসমেৱাতি. ওদাতকসিণং.

আলোককসিণকথা

৯৮. আলোককসিণে পন আলোককসিণং উগ্গণ্হন্তো আলোকস্মিং নিমিত্তং গণ্হাতি ভিত্তিছিদ্দে ৱা তাড়চ্ছিদ্দে ৱা ৱাতপানন্তৰিকায ৱাতি ৱচনতো কতাধিকাৰস্স তাৱ পুঞ্ঞৱতো যং ভিত্তিছিদ্দাদীনং অঞ্ঞতৰেন সূৰিযালোকো ৱা চন্দালোকো ৱা পৱিসিত্ৱা ভিত্তিযং ৱা ভূমিযং ৱা মণ্ডলং সমুট্ঠাপেতি, ঘনপণ্ণৰুক্খসাখন্তৰেন ৱা ঘনসাখামণ্ডপন্তৰেন ৱা নিক্খমিত্ৱা ভূমিযমেৱ মণ্ডলং সমুট্ঠাপেতি, তং দিস্ৱাৱ নিমিত্তং উপ্পজ্জতি. ইতৰেনাপি তদেৱ ৱুত্তপ্পকাৰমোভাসমণ্ডলং ‘‘ওভাসো ওভাসো’’তি ৱা ‘‘আলোকো আলোকো’’তি ৱা ভাৱেতব্বং. তথা অসক্কোন্তেন ঘটে দীপং জালেত্ৱা ঘটমুখং পিদহিত্ৱা ঘটে ছিদ্দং কত্ৱা ভিত্তিমুখং ঠপেতব্বং. তেন ছিদ্দেন দীপালোকো নিক্খমিত্ৱা ভিত্তিযং মণ্ডলং কৰোতি, তং আলোকো আলোকোতি ভাৱেতব্বং. ইদমিতৰেহি চিৰট্ঠিতিকং হোতি. ইধ উগ্গহনিমিত্তং ভিত্তিযং ৱা ভূমিযং ৱা উট্ঠিতমণ্ডলসদিসমেৱ হোতি. পটিভাগনিমিত্তং ঘনৱিপ্পসন্নআলোকপুঞ্জসদিসং. সেসং তাদিসমেৱাতি. আলোককসিণং.

পৰিচ্ছিন্নাকাসকসিণকথা

৯৯. পৰিচ্ছিন্নাকাসকসিণেপি আকাসকসিণং উগ্গণ্হন্তো আকাসস্মিং নিমিত্তং গণ্হাতি ভিত্তিছিদ্দে ৱা তাড়চ্ছিদ্দে ৱা ৱাতপানন্তৰিকায ৱাতি ৱচনতো কতাধিকাৰস্স তাৱ পুঞ্ঞৱতো ভিত্তিছিদ্দাদীসু অঞ্ঞতৰং দিস্ৱাৱ নিমিত্তং উপ্পজ্জতি. ইতৰেন সুচ্ছন্নমণ্ডপে ৱা চম্মকটসাৰকাদীনং ৱা অঞ্ঞতৰস্মিং ৱিদত্থিচতুৰঙ্গুলপ্পমাণং ছিদ্দং কত্ৱা তদেৱ ৱা ভিত্তিছিদ্দাদিভেদং ছিদ্দং ‘‘আকাসো আকাসো’’তি ভাৱেতব্বং. ইধ উগ্গহনিমিত্তং সদ্ধিং ভিত্তিপৰিযন্তাদীহি ছিদ্দসদিসমেৱ হোতি, ৱড্ঢিযমানম্পি ন ৱড্ঢতি. পটিভাগনিমিত্তমাকাসমণ্ডলমেৱ হুত্ৱা উপট্ঠাতি, ৱড্ঢিযমানঞ্চ ৱড্ঢতি. সেসং পথৱীকসিণে ৱুত্তনযেনেৱ ৱেদিতব্বন্তি. পৰিচ্ছিন্নাকাসকসিণং.

ইতি কসিণানি দসবলো,

দস যানি অৱোচ সব্বধম্মদসো;

ৰূপাৱচৰম্হি চতুক্কপঞ্চকজ্ঝানহেতূনি.

এৱং তানি চ তেসঞ্চ,

ভাৱনানযমিমং ৱিদিত্ৱান;

তেস্ৱেৱ অযং ভিয্যো,

পকিণ্ণককথাপি ৱিঞ্ঞেয্যা.

পকিণ্ণককথা

১০০. ইমেসু হি পথৱীকসিণৱসেন একোপি হুত্ৱা বহুধা হোতীতিআদিভাৱো, আকাসে ৱা উদকে ৱা পথৱিং নিম্মিনিত্ৱা পদসা গমনং, ঠাননিসজ্জাদিকপ্পনং ৱা, পৰিত্তঅপ্পমাণনযেন অভিভাযতনপটিলাভোতি এৱমাদীনি ইজ্ঝন্তি.

আপোকসিণৱসেন পথৱিযং উম্মুজ্জননিম্মুজ্জনং, উদকৱুট্ঠিসমুপ্পাদনং, নদীসমুদ্দাদিনিম্মানং, পথৱীপব্বতপাসাদাদীনং কম্পনন্তি এৱমাদীনি ইজ্ঝন্তি.

তেজোকসিণৱসেন ধূমাযনা, পজ্জলনা, অঙ্গাৰৱুট্ঠিসমুপ্পাদনং, তেজসা তেজোপৰিযাদানং, যদেৱ সো ইচ্ছতি তস্স ডহনসমত্থতা, দিব্বেন চক্খুনা ৰূপদস্সনত্থায আলোককৰণং, পৰিনিব্বানসমযে তেজোধাতুযা সৰীৰজ্ঝাপনন্তি এৱমাদীনি ইজ্ঝন্তি.

ৱাযোকসিণৱসেন ৱাযুগতিগমনং, ৱাতৱুট্ঠিসমুপ্পাদনন্তি এৱমাদীনি ইজ্ঝন্তি.

নীলকসিণৱসেন নীলৰূপনিম্মানং, অন্ধকাৰকৰণং, সুৱণ্ণদুব্বণ্ণনযেন অভিভাযতনপটিলাভো, সুভৱিমোক্খাধিগমোতি এৱমাদীনি ইজ্ঝন্তি.

পীতকসিণৱসেন পীতকৰূপনিম্মানং, সুৱণ্ণন্তি অধিমুচ্চনা, ৱুত্তনযেনেৱ অভিভাযতনপটিলাভো, সুভৱিমোক্খাধিগমো চাতি এৱমাদীনি ইজ্ঝন্তি.

লোহিতকসিণৱসেন লোহিতকৰূপনিম্মানং, ৱুত্তনযেনেৱ অভিভাযতনপটিলাভো, সুভৱিমোক্খাধিগমোতি এৱমাদীনি ইজ্ঝন্তি.

ওদাতকসিণৱসেন ওদাতৰূপনিম্মানং, থিনমিদ্ধস্স দূৰভাৱকৰণং, অন্ধকাৰৱিধমনং, দিব্বেন চক্খুনা ৰূপদস্সনত্থায আলোককৰণন্তি এৱমাদীনি ইজ্ঝন্তি.

আলোককসিণৱসেন সপ্পভাৰূপনিম্মানং, থিনমিদ্ধস্স দূৰভাৱকৰণং, অন্ধকাৰৱিধমনং, দিব্বেন চক্খুনা ৰূপদস্সনত্থং আলোককৰণন্তি এৱমাদীনি ইজ্ঝন্তি.

আকাসকসিণৱসেন পটিচ্ছন্নানং ৱিৱটকৰণং, অন্তোপথৱীপব্বতাদীসুপি আকাসং নিম্মিনিত্ৱা ইৰিযাপথকপ্পনং, তিৰোকুড্ডাদীসু অসজ্জমানগমনন্তি এৱমাদীনি ইজ্ঝন্তি.

সব্বানেৱ উদ্ধং অধো তিৰিযং অদ্ৱযং অপ্পমাণন্তি ইমং পভেদং লভন্তি. ৱুত্তঞ্হেতং ‘‘পথৱীকসিণমেকো সঞ্জানাতি. উদ্ধমধোতিৰিযং অদ্ৱযমপ্পমাণ’’ন্তিআদি.

তত্থ উদ্ধন্তি উপৰিগগনতলাভিমুখং. অধোতি হেট্ঠাভূমিতলাভিমুখং. তিৰিযন্তি খেত্তমণ্ডলমিৱ সমন্তা পৰিচ্ছিন্দিতং. একচ্চো হি উদ্ধমেৱ কসিণং ৱড্ঢেতি, একচ্চো অধো, একচ্চো সমন্ততো. তেন তেন ৱা কাৰণেন এৱং পসাৰেতি. আলোকমিৱ দিব্বচক্খুনা ৰূপদস্সনকামো. তেন ৱুত্তং উদ্ধমধোতিৰিযন্তি. অদ্ৱযন্তি ইদং পন একস্স অঞ্ঞভাৱানুপগমনত্থং ৱুত্তং. যথা হি উদকং পৱিট্ঠস্স সব্বদিসাসু উদকমেৱ হোতি, ন অঞ্ঞং, এৱমেৱ পথৱীকসিণং পথৱীকসিণমেৱ হোতি, নত্থি তস্স অঞ্ঞো কসিণসম্ভেদোতি. এসেৱ নযো সব্বত্থ. অপ্পমাণন্তি ইদং তস্স ফৰণঅপ্পমাণৱসেন ৱুত্তং. তঞ্হি চেতসা ফৰন্তো সকলমেৱ ফৰতি. ন অযমস্স আদি ইদং মজ্ঝন্তি পমাণং গণ্হাতীতি.

১০১. যে চ তে সত্তা কম্মাৱৰণেন ৱা সমন্নাগতা কিলেসাৱৰণেন ৱা সমন্নাগতা ৱিপাকাৱৰণেন ৱা সমন্নাগতা অসদ্ধা অচ্ছন্দিকা দুপ্পঞ্ঞা অভব্বা নিযামং ওক্কমিতুং কুসলেসু ধম্মেসু সম্মত্তন্তি ৱুত্তা, তেসমেকস্সাপেককসিণেপি ভাৱনা ন ইজ্ঝতি. তত্থ কম্মাৱৰণেন সমন্নাগতাতি আনন্তৰিযকম্মসমঙ্গিনো. কিলেসাৱৰণেন সমন্নাগতাতি নিযতমিচ্ছাদিট্ঠিকা চেৱ উভতোব্যঞ্জনকপণ্ডকা চ. ৱিপাকাৱৰণেন সমন্নাগতাতি অহেতুকদ্ৱিহেতুকপটিসন্ধিকা. অসদ্ধাতি বুদ্ধাদীসু সদ্ধাৱিৰহিতা. অচ্ছন্দিকাতি অপচ্চনীকপটিপদাযং ছন্দৱিৰহিতা. দুপ্পঞ্ঞাতি লোকিযলোকুত্তৰসম্মাদিট্ঠিযা ৱিৰহিতা. অভব্বা নিযামং ওক্কমিতুং কুসলেসু ধম্মেসু সম্মত্তন্তি কুসলেসু ধম্মেসু নিযামসঙ্খাতং সম্মত্তসঙ্খাতঞ্চ অৰিযমগ্গং ওক্কমিতুং অভব্বাতি অত্থো. ন কেৱলঞ্চ কসিণেযেৱ, অঞ্ঞেসুপি কম্মট্ঠানেসু এতেসমেকস্সপি ভাৱনা ন ইজ্ঝতি. তস্মা ৱিগতৱিপাকাৱৰণেনপি কুলপুত্তেন কম্মাৱৰণঞ্চ কিলেসাৱৰণঞ্চ আৰকা পৰিৱজ্জেত্ৱা সদ্ধম্মস্সৱনসপ্পুৰিসূপনিস্সযাদীহি সদ্ধঞ্চ ছন্দঞ্চ পঞ্ঞঞ্চ ৱড্ঢেত্ৱা কম্মট্ঠানানুযোগে যোগো কৰণীযোতি.

ইতি সাধুজনপামোজ্জত্থায কতে ৱিসুদ্ধিমগ্গে

সমাধিভাৱনাধিকাৰে

সেসকসিণনিদ্দেসো নাম

পঞ্চমো পৰিচ্ছেদো.