৪. সপদানচাৰিকঙ্গকথা

২৭. সপদানচাৰিকঙ্গম্পি ‘‘লোলুপ্পচাৰং পটিক্খিপামি, সপদানচাৰিকঙ্গং সমাদিযামী’’তি ইমেসং অঞ্ঞতৰৱচনেন সমাদিন্নং হোতি.

তেন পন সপদানচাৰিকেন গামদ্ৱাৰে ঠত্ৱা পৰিস্সযাভাৱো সল্লক্খেতব্বো. যস্সা ৰচ্ছায ৱা গামে ৱা পৰিস্সযো হোতি, তং পহায অঞ্ঞত্থ চৰিতুং ৱট্টতি. যস্মিং ঘৰদ্ৱাৰে ৱা ৰচ্ছায ৱা গামে ৱা কিঞ্চি ন লভতি, অগামসঞ্ঞং কত্ৱা গন্তব্বং. যত্থ কিঞ্চি লভতি, তং পহায গন্তুং ন ৱট্টতি. ইমিনা চ ভিক্খুনা কালতৰং পৱিসিতব্বং, এৱঞ্হি অফাসুকট্ঠানং পহায অঞ্ঞত্থ গন্তুং সক্খিস্সতি. সচে পনস্স ৱিহাৰে দানং দেন্তা অন্তৰামগ্গে ৱা আগচ্ছন্তা মনুস্সা পত্তং গহেত্ৱা পিণ্ডপাতং দেন্তি ৱট্টতি. ইমিনা চ মগ্গং গচ্ছন্তেনাপি ভিক্খাচাৰৱেলাযং সম্পত্তগামং অনতিক্কমিত্ৱা চৰিতব্বমেৱ. তত্থ অলভিত্ৱা ৱা থোকং লভিত্ৱা ৱা গামপটিপাটিযা চৰিতব্বন্তি ইদমস্স ৱিধানং.

পভেদতো পন অযম্পি তিৱিধো হোতি. তত্থ উক্কট্ঠো পুৰতো আহটভিক্খম্পি পচ্ছতো আহটভিক্খম্পি পটিক্কমনং আহৰিত্ৱা দিয্যমানম্পি ন গণ্হতি, পত্তদ্ৱাৰে পন পত্তং ৱিস্সজ্জেতি. ইমস্মিঞ্হি ধুতঙ্গে মহাকস্সপত্থেৰেন সদিসো নাম নত্থি. তস্সপি পত্তৱিস্সট্ঠট্ঠানমেৱ পঞ্ঞাযতি. মজ্ঝিমো পুৰতো ৱা পচ্ছতো ৱা আহটম্পি পটিক্কমনং আহটম্পি গণ্হতি, পত্তদ্ৱাৰেপি পত্তং ৱিস্সজ্জেতি, ন পন ভিক্খং আগমযমানো নিসীদতি. এৱং সো উক্কট্ঠপিণ্ডপাতিকস্স অনুলোমেতি. মুদুকো তং দিৱসং নিসীদিত্ৱা আগমেতি.

ইমেসং পন তিণ্ণম্পি লোলুপ্পচাৰে উপ্পন্নমত্তে ধুতঙ্গং ভিজ্জতি. অযমেত্থ ভেদো.

অযং পনানিসংসো, কুলেসু নিচ্চনৱকতা, চন্দূপমতা, কুলমচ্ছেৰপ্পহানং, সমানুকম্পিতা, কুলূপকাদীনৱাভাৱো, অৱ্হানানভিনন্দনা, অভিহাৰেন অনত্থিকতা, অপ্পিচ্ছতাদীনং অনুলোমৱুত্তিতাতি.

চন্দূপমো নিচ্চনৱো কুলেসু,

অমচ্ছৰী সব্বসমানুকম্পো;

কুলূপকাদীনৱৱিপ্পমুত্তো,

হোতীধ ভিক্খু সপদানচাৰী.

লোলুপ্পচাৰঞ্চ পহায তস্মা,

ওক্খিত্তচক্খু যুগমত্তদস্সী;

আকঙ্খমানো ভুৱি সেৰিচাৰং,

চৰেয্য ধীৰো সপদানচাৰন্তি.

অযং সপদানচাৰিকঙ্গে সমাদানৱিধানপ্পভেদভেদানিসংসৱণ্ণনা.