সূৰস্সতীনীতি

দুতিযো ভাগো

১. ধনস্স দুব্বিধং কিচ্চং,

পাপেতি উণ্ণতং ধনিং;

অধনিং ওণতং লোকে,

সঞ্চিনে তেন তং ধনং.

২. ৱট্টতে সততং সীঘং,

কালচক্কং অৱাৰিতং;

তেন ঘটী দিনং মাসো,

ৱস্সো ভৱত্য চীৰতো.

৩. সত্তুনা ন হি সন্ধেয্য,

একদা সো ভযং কৰো;

সুতত্তমপি পানীযং,

সমযতে নু পাৱকং.

৪. ৱিজহং পকতিং যো হি,

ৱিকতিং পুন গচ্ছতি;

সভাৱেন আকাৰেন,

ৱিপ্পল্লাসং স গচ্ছতি;

সংসুমাৰ গতা গোধা,

যথা থী পুমৱেসিকা.

৫. পক্খং লদ্ধান উড্ডেন্তি,

উপচিকা হি ৱম্মিকা;

নিক্খন্তা মৰণং যন্তি,

উপ্পতা নিপ্পতং গতা.

৬. সব্বংপিযস্স দজ্জেয্য,

নিস্সেসং পিযমানসং;

সদ্ধাচিত্তং তু নো ৱিঞ্ঞূ,

সদ্ধাযিকো পক্খলিতো.

৭. সক্কোতি লঙ্ঘিতুং ব্যামং,

মহুস্সাহেন যো হি সো;

তদড্ঢং অনুস্সাহেন,

নোস্সাহো তেসু থোমিতো;

মহুস্সাহো দুক্খো লোকে,

অনুস্সাহো সদা সুখো.

৮. দুক্খমং অক্খমন্তো যো,

পিট্ঠিকাৰীচ দুক্কৰং,

কদা লভেয্য সো লোকে,

সুখমং সুকৰং মুধা;

পচ্চক্খঞ্হি সো কৰেয্য,

দুক্খমঞ্চাপি দুক্কৰং.

৯. অনগ্ঘো মনুস্সো লোকে,

তোসনাপোসনাদিনা;

তেন সো মহগ্ঘং কম্মং,

কৰে লোকহিতাযুতং.

১০. ৱাতেন নপ্পভিজ্জন্তি,

নিন্না ৱেড়ূ কসা নড়া;

যথাৱাতং নগচ্ছন্তি,

তথা চৰে জনে কদা.

১১. পুৰতো চ পচ্ছতো চে,

নিস্সযো নত্থি পস্সতো;

অধিকং ৱীৰিযং হোতি,

অত্তনাথো তদা ভৱে.

১২. খণং আখুবিলং সীহো,

পাসাণসকলাকুলং;

পপ্পোতি নখভঙ্গংৱা,

ফলংৱা মূসিকো ভৱে.

১৩. মগ্গমুড়্হা জনা অন্ধা,

অমগ্গা মগ্গসঞ্ঞিনো;

তথেৱ দুপ্পঞ্ঞা মুড়্হা,

তথত্থং নাৱ বুজ্ঝৰে.

১৪. পিযৰূপং ৱীৰৰূপং,

দুৱিধা ৰূপসম্পদা,

নাৰিং ইচ্ছে পিযৰূপিং,

পুৰিসং ৱীৰৰূপকং.

১৫. পজ্জলন্তি হি খজ্জোতা,

পক্খচালনকম্মুনা;

কুসিতা সুপিতা নেতে,

তথা জনাপি কম্মিকা.

১৬. কুম্মসঙ্কোচমোপম্য,

নিগ্গহমপি সংখমে;

পত্তকালে তু নীতিঞ্ঞো,

কণ্হসপ্পোৱ উট্ঠহে.

১৭. ভক্খসেসং নখাদন্তি,

সীহা উন্নতচেতসা;

পৰংপি নপণামেন্তি,

ৱুদ্ধিকামা তথা চৰে.

১৮. ন ৱ ৱস্সো সমুপ্পন্নো,

খীণো পুৰাণহাযনো;

নৱৱস্সে নৱা মেত্তা,

ভাৱিতব্বা হিতেসিনা.

১৯. সন্তাপযন্তি কমযাপ্যভুজং ন ৰোগা,

দুম্মন্তিনং কমুপযন্তি ন নীতিদোসা;

কং স্ৰী ন মানযতি কং ন চ হন্তি মচ্চু,

কং থীকতা ন ৱিসযা পৰিপীড়যন্তি.

(ৱসন্ততিলকাগাথা.)

২০. (ক) ব্যামমত্তেন দণ্ডেন,

যোলুম্ব্য উদকং মিনে;

অগম্ভীৰং গম্ভীৰংৱা,

অগাধে মঞ্ঞি গম্ভীৰং.

(খ)

তথা মন্দো সঞ্ঞাণেন,

অগাধে মঞ্ঞি পণ্ডিতং;

সমাসমং ন জানাতি,

বহ্ৱপ্পং তিক্খমন্দতং.

২১. দুট্ঠকম্মে সঙ্গমন্তি,

ছেককম্মে চ নো ইধ;

মচ্চুং ৱহন্তি সীসেন,

তে মুড়্হা মুড়্হসঙ্গমা.

২২. দুৱিধো সঙ্গমো লোকে,

উজুকো কুটিলো ভৱে;

উজুকোৱ পসংসেয্যো,

নোহ্যঞ্ঞো সাজসঙ্গমো.

তে ইমিনা উপাযেন সমগ্গা সম্মোদমানা মহা ভিত্তিপিট্ঠিকায ৱসন্তি. (মহোসধজাতক অট্ঠকথা)

২৩. যূথিকা পুপ্ফতে নোহি,

সিঞ্চিতাপি পুনপ্পুনং;

পুপ্ফতে সম্পত্তে কালে,

এৱং ধাৰেথ ৱীৰিযং.

২৪. ধনুচ্চযো ধনক্খেপো,

দুৱিধা হি ধনাকতি;

ধনুচ্চযে নযো অত্থি,

ধনক্খেপম্হি নো ইধ.

২৫. অমাতা পিতৰসং ৱড্ঢং,

জূতকাৰঞ্চ চঞ্চলং;

নালপেয্য ৱিসেসঞ্ঞূ,

যদিচ্ছে সিদ্ধি মত্তনো.

হলিদ্দিৰাগং কপিচিত্তং,

পুৰিসং ৰাগৱিৰাগিনং;

এদিসং তাত মাসেৱি,

নিম্মনুস্সংপি চে সিযা.

২৬. গুণা গুণঞ্ঞূসু গুণা ভৱন্তি,

তে নিগ্গুণং পত্ৱা ভৱন্তি দোসা;

আসাদ্যতোযা পভৱন্তি নজ্জো,

সমুদ্ৰমাসজ্জ ভৱন্ত্যপেয্যা.

(উপজাতিগাথা)

২৭. সিলাৰূপং নিম্মিনন্তি,

কোট্টেত্ৱান পুনপ্পুনং;

কোট্টকোৱ তথা বালা,

সাধুং ওৱজ্জ নিম্মিতা.