২. দোসপৰিহাৰাৱবোধ-দুতিযপৰিচ্ছেদ

৬৮. কদাচি কৱিকোসল্লা, ৱিৰোধো সকলো প্য’যং;

দোসসঙ্খ্য মতিক্কম্ম, গুণৱীথিং ৱিগাহতে.

৬৯. তেন ৱুত্তৱিৰোধান, মৱিৰোধো যথা সিযা;

তথা দোসপৰিহাৰা, ৱবোধো দানি নীযতে.

তত্থ ৱিৰুদ্ধত্থন্তৰস্স পৰিহাৰো যথা

৭০. ৱিন্দন্তং পাকসালীনং, সালীনং দস্সনা সুখং;

তং কথং নাম মেঘো’যং, ৱিসদো সুখযে জনং?

যথা ৱা

৭১. ৱিনাযকোপি নাগো সি, গোতমোপি মহামতি;

পণীতোপি ৰসা’পেতো, চিত্তা মে সামি তে গতি.

অঝ’ত্থস্স যথা

৭২. কথং তাদিগুণাভাৱে, লোকং তোসেতি দুজ্জনো?

ওভাসিতাসেসদিসো, খজ্জোতো নাম কিং ভৱে?

৭৩. পহেলিকায [পহেড়িকায (ক.)] মাৰুড়্হা, ন হি দুট্ঠা কিলিট্ঠতা;

পিযা সুখা’লিঙ্গিতং ক, মালিঙ্গতি নু নো ইতি.

৭৪. যমকে নো পযোজেয্য, কিলিট্ঠপদ মিচ্ছিতে;

ততো যমক মঞ্ঞং তু, সব্ব মেতংমযং ৱিয.

দেসৱিৰোধিনো যথা

৭৫. বোধিসত্তপ্পভাৱেন, থলেপি জলজান্য’হুং;

নুদন্তানি’ৱ সুচিৰা, ৱাসক্লেসং তহিং জলে.

কালৱিৰোধিনো যথা

৭৬. মহানুভাৱ পিসুনো, মুনিনো মন্দ মাৰুতো;

সব্বোতুকমযং ৱাযি, ধুনন্তো কুসুমং সমং.

কলাৱিৰোধিনো যথা

৭৭. নিমুগ্গমানসো বুদ্ধ, গুণে পঞ্চসিখস্সপি;

তন্তিস্সৰ ৱিৰোধো সো, ন সম্পীণেতি কং জনং?

লোকৱিৰোধিনো যথা

৭৮. গণযে চক্কৱাড়ং সো, চন্দনাযপি সীতলং;

সম্বোধি সত্ত হদযো, পদিত্ত’ঙ্গাৰপূৰিতং.

ঞাযৱিৰোধিনো যথা

৭৯. পৰিচ্চত্তভৱোপি ত্ৱ, মুপনীতভৱো অসি;

অচিন্ত্যগুণসাৰায, নমো তে মুনিপুঙ্গৱ.

আগমৱিৰোধিনো যথা

৮০. নেৱা’লপতি কেনা’পি, ৱচীৱিঞ্ঞত্তিতো যতি;

সম্পজানমুসাৱাদা, ফুসেয্যা’পত্তিদুক্কটং.

নেয্যস্স যথা

৮১. মৰীচিচন্দনা’লেপ, লাভা সীতমৰীচিনো;

ইমা সব্বাপি ধৱলা, দিসা ৰোচন্তি নিব্ভৰং.

যথা ৱা

৮২. মনোনুৰঞ্জনো মাৰ, ঙ্গনাসিঙ্গাৰৱিব্ভমো;

জিনেনা’সমনুঞ্ঞাতো, মাৰস্স হদযা’নলো.

ৱিসেসনাপেক্খস্স যথা

৮৩. অপযাতা’পৰাধম্পি, অযং ৱেৰী জনং জনো;

কোধপাটলভূতেন, ভিয্যো পস্সতি চক্খুনা.

হীনত্থস্স যথা

৮৪. অপ্পকানম্পি পাপানং, পভাৱং নাসযে বুধো;

অপি নিপ্পভাতা’নীত, খজ্জোতো হোতি ভাণুমা.

অনত্থস্স যথা

৮৫. ন পাদপূৰণত্থায, পদং যোজেয্য কত্থচি,

যথা ৱন্দে মুনিন্দস্স, পাদপঙ্কেৰুহং ৱৰং.

৮৬. ভযকোধপসংসাদি, ৱিসেসো তাদিসো যদি;

ৱত্তুং কামীযতে দোসো, ন তত্থে’কত্থতাকতো.

যথা

৮৭. সপ্পো সপ্পো! অযং হন্দ, নিৱত্ততু ভৱং ততো,

যদি জীৱিতুকামো’সি, কথং ত মুপসপ্পসি?

ভগ্গৰীতিনো যথা

৮৮. যোকোচি ৰূপা’তিসযো, কন্তি কাপি মনোহৰা;

ৱিলাসা’তিসযো কোপি,

অহো! বুদ্ধমহো’দযো.

৮৯. অব্যামোহকৰং বন্ধং, অব্যাকিণ্ণং মনোহৰং;

অদূৰপদ ৱিন্যাসং, পসংসন্তি কৱিস্সৰা.

যথা

৯০. নীলুপ্পলা’ভং নযনং, বন্ধুকৰুচিৰো’ধৰো;

নাসা হেম’ঙ্কুসো তেন, জিনো’যং পিযদস্সনো.

৯১. সমতিক্কন্ত গাম্মত্তং, কন্ত ৱাচা’ভিসঙ্খতং;

বন্ধনং ৰসহেতুত্তা, গাম্মত্তং অতিৱত্ততি.

যথা

৯২. দুনোতি কামচণ্ডালো, সো মং সদয নিদ্দযো;

ঈদিসং ব্যসনা’পন্নং, সুখীপি কি মুপেক্খসে?

৯৩. যতিহীনপৰিহাৰো, ন পুনে’দানি নীযতে;

যতো ন সৱনু’ব্বেগং, হেট্ঠা যেসং ৱিচাৰিতং.

কমচ্চুতস্স যথা

৯৪. উদাৰচৰিতো’সি ত্ৱং, তেনে’ৱা’ৰাধনা ত্ৱযি;

দেসং ৱা দেহি গামং ৱা, খেত্তং ৱা মম সোভনং.

অতিৱুত্তস্স যথা

৯৫. মুনিন্দচন্দসম্ভূত, যসোৰাসিমৰীচিনং;

সকলোপ্য’য মাকাসো, না’ৱকাসো ৱিজম্ভনে.

৯৬. ৱাক্যং ব্যাপন্নচিত্তানং, অপেতত্থং অনিন্দিতং;

তেনু’ম্মত্তাদিকানং তং, ৱচনা’ঞ্ঞত্ৰ দুস্সতি.

যথা

৯৭. সমুদ্দো পীযতে সো’য, মহ’মজ্জ জৰাতুৰো;

ইমে গজ্জন্তি জীমূতা, সক্কস্সে’ৰাৱণো পিযো.

৯৮. সুখুমালা’ৱিৰোধিত্ত, দিত্তভাৱপ্পভাৱিতং;

বন্ধনং বন্ধফৰুস, দোসং সংদূসযেয্য তং.

যথা

৯৯. পস্সন্তা ৰূপৱিভৱং, সুণন্তা মধুৰং গিৰং;

চৰন্তি সাধূ সম্বুদ্ধ, কালে কেড়িপৰম্মুখা.

অপক্কমস্স যথা

১০০. ভাৱনা, দান, সীলানি, সম্মা সম্পাদিতানি’হ;

নিব্বান, ভোগ, সগ্গাদি, সাধনানি ন সংসযো.

১০১. উদ্দিট্ঠৱিসযো কোচি, ৱিসেসো তাদিসো যদি;

অনু’দ্দিট্ঠেসু নেৱ’ত্থি, দোসো কমৱিলঙ্ঘনে.

যথা

১০২. কুসলা’কুসলং অব্যা, কত’মিচ্চেসু পচ্ছিমং;

অব্যাকতং পাকদং ন, পাকদং পঠমদ্ৱযং.

১০৩. সগুণানা’ৱিকৰণে, কাৰণে সতি তাদিসে;

ওচিত্যহীনতা’পত্তি, নত্থি ভূতত্থসংসিনো.

১০৪. ওচিত্যং নাম ৱিঞ্ঞেয্যং, লোকে ৱিখ্যাত মাদৰা;

তত্থো’পদেসপভৱা, সুজনা কৱিপুঙ্গৱা.

১০৫. ৱিঞ্ঞাতোচিত্যৱিভৱো, চিত্যহীনং পৰিহৰে;

ততো’চিত্যস্স সম্পোসে,

ৰসপোসো সিযা কতে.

যথা

১০৬. যো মাৰসেন মাসন্ন, মাসন্নৱিজযু’স্সৱো;

তিণাযপি ন মঞ্ঞিত্থ, সো ৱো দেতু জযং জিনো.

১০৭. আৰদ্ধকত্তুকম্মাদি, কমা’তিক্কমলঙ্ঘনে;

ভগ্গৰীতিৱিৰোধো’যং, গতিং ন ক্ৱা’পি ৱিন্দতি.

যথা

১০৮. সুজন’ঞ্ঞান মিত্থীনং, ৱিস্সাসো নো’পপজ্জতে;

ৱিসস্স সিঙ্গিনো ৰোগ, নদীৰাজকুলস্স চ.

যথা

১০৯. ভেসজ্জে ৱিহিতে সুদ্ধ, বুদ্ধাদিৰতনত্তযে;

পসাদ মাচৰে নিচ্চং, সজ্জনে সগুণেপি চ.

সসংসযস্স যথা

১১০. মুনিন্দচন্দিমা’লোক, ৰস লোল ৱিলোচনো;

জনো’ৱক্কন্তপন্থো’ৱ, ৰংসিদস্সনপীণিতো.

১১১. সংসযাযে’ৱ যংকিঞ্চি, যদি কীড়াদিহেতুনা;

পযুজ্জতে ন দোসো’ৱ, সসংসযসমপ্পিতো.

যথা

১১২. যাতে দুতিযং নিলযং, গৰুম্হি সকগেহতো;

পাপুণেয্যাম নিযতং, সুখ’মজ্ঝযনা’দিনা.

১১৩. সুভগা ভগিনী সা’যং, এতস্সি’চ্চেৱমাদিকং;

ন ‘গাম্ম’মিতি নিদ্দিট্ঠং, কৱীহি সকলেহিপি.

১১৪. দুট্ঠা’লঙ্কাৰৱিগমে, সোভনা’লঙ্কতিক্কমো;

অলঙ্কাৰপৰিচ্ছেদে, আৱিভাৱং গমিস্সতি.

১১৫. দোসে পৰীহৰিতু মেস ৱৰো’পদেসো,

সত্থন্তৰানুসৰণেন কতো মযেৱং;

ৱিঞ্ঞাযি’মং গৰুৱৰান’ধিক’প্পসাদা,

দোসে পৰং পৰিহৰেয্য যসোভিলাসী.

ইতি সঙ্ঘৰক্খিতমহাসামিৱিৰচিতে সুবোধালঙ্কাৰে

দোসপৰিহাৰাৱবোধো নাম

দুতিযো পৰিচ্ছেদো.