৬. অপৰন্তৰট্ঠসাসনৱংসকথামগ্গো

৬. ইদানি পন মৰম্মমণ্ডলে অপৰন্তৰট্ঠে সাসনৱংসং ৱক্খামি. অম্হাকঞ্হি মৰম্মৰট্ঠে সুপ্পাদকতিত্থে ৱাণিজগামে ৱসন্তে চূড়পুণ্ণ মহাপুণ্ণেদ্ৱে ভাতিকে পটিচ্চ ভগৱতো ধৰমানস্সেৱ অতিৰেকৱীসতিৱস্সকালতো পভুতি সাসনং পতিট্ঠাসি. ন পন তাৱ ব্যাপেত্ৱা পতিট্ঠাসি. তেনেৱ পুন সাসনস্স পতিট্ঠাপনত্থায মহামোগ্গলিপুত্ততিস্সত্থেৰো যোনকধম্মৰক্খিতত্থেৰং পেসেসীতি.

ভগৱা পন লোহিতচন্দনৱিহাৰং পটিগ্গহেত্ৱা সত্তসত্তাহানি নিসীদিত্ৱা সমাগতানং দেৱমনুস্সানং ধম্মৰসং অদাসি. সত্তাহেসু চ একস্মিং অহু চতুৰাসীতিপাণসহস্সানং ধম্মাভিসমযো অহোসি. পঞ্চসতমত্তেহি চ পাসাদেহি আগচ্ছন্তো অন্তৰামগ্গে সচ্চবন্ধপব্বতে নিসিন্নস্স সচ্চবন্ধস্স নাম ইসিনো ধম্মং দেসেত্ৱা ছহি অভিঞ্ঞাহি সদ্ধিং অৰহত্তং পাপেসি. ৱাণিজগামে চ ইসিদিন্নসেট্ঠি আদীনম্পি ধম্মৰসং পাযেসি. ইচ্চেৱং সচ্চবন্ধইসিদিন্নমহাপুণ্ণাদযো পটিচ্চ অম্হাকং মৰম্মমণ্ডলে সাসনং পতিট্ঠাসি.

ইদং মৰম্মমণ্ডলে অপৰন্তৰট্ঠে পঠমং সাসনস্স

পতিট্ঠানং.

ভগৱতো পৰিনিব্বুততো পঞ্চতিংসাধিকে দ্ৱিৱস্সসতে সম্পত্তে ততিযসঙ্গীতিং সঙ্গাযিত্ৱা অৱসানে মহামোগ্গলিপুত্ততিস্সত্থেৰো অত্তনো সদ্ধিৱিহাৰিকং যোনকধম্মৰক্খিতত্থেৰং সদ্ধিং চতূহি ভিক্খূহি অপৰন্তৰট্ঠং পেসেসি. অপৰন্তৰট্ঠঞ্চ নাম অম্হাকং মৰম্মমণ্ডলে সুনাপৰন্তৰট্ঠমেৱ. তমত্থং পন হেট্ঠা অৱোচুম্হা.

যোনকধম্মৰক্খিতত্থেৰোপি অপৰন্তৰট্ঠং আগন্ত্ৱা অগ্গিক্খন্ধোপমসুত্তেন ৰট্ঠৱাসীনং পসাদেসি. সত্ততিমত্তানং পাণসহস্সানং ধম্মৰসং পাযেসি. ৰট্ঠৱাসিনো চ বহৱো সাসনে পব্বজিংসু. ৰাজকুলতোপি সহস্সমত্তা পব্বজিংসু. ইত্থীনং পন অতিৰেকসট্ঠিসহস্সমত্তা পব্বজিংসু. তঞ্চ ন অগ্গিক্খন্ধোপমসুত্তন্তং সুত্ৱা পব্বজন্তীনং ইত্থীনং ৱসেন ৱুত্তং, অথ খো আদিতো পট্ঠায যাৱচিৰকালা সাসনং পসীদিত্ৱা পব্বজন্তীনং ইত্থীনং ৱসেন ৱুত্তন্তি দট্ঠব্বং. কস্মাতি চে, ইত্থীনং ভিক্খুনীনং সন্তিকেযেৱ পব্বজিতুং যুত্তত্তা যোনকধম্মৰক্খিতত্থেৰেন চ সদ্ধিং ভিক্খুনীনং অনাগতত্তা. এৱং চিৰকালং অতিক্কমিত্ৱা পচ্ছা ভিক্খুনিযো আগন্ত্ৱা তাসং সন্তিকে পব্বজিতানং ৱসেন ৱুত্তন্তি দট্ঠব্বং. সীহড়দীপে অনুড়াদেৱিযো পব্বজিতকালে মহামহিন্দত্থেৰস্স সঙ্ঘমিত্তাথেৰিযা পক্কোসনতা ইধ ঞাপকাতি. এৱং যোনকধম্মৰক্খিতত্থেৰং পটিচ্চ অপৰন্তৰট্ঠে সত্তানং বহুপকাৰো অহোসি. তেনেৱট্ঠকথাযং–

অপৰন্তং ৱিগাহিত্ৱা, যোনকো ধম্মৰক্খিতো;

অগ্গিক্খন্ধূপমেনেত্থ, পসাদেসি জনে বহূতি.

তত্থাযং অধিপ্পায ৱিসেসো গহেতব্বো. কথং. অগ্গিক্খন্ধোপমসুত্তন্তং নাম ভিক্খূনং পটিপত্তিৱসেন ৱুত্তং, তং ভিক্খূনংযেৱ দেসেতুং ৱট্টতি, থেৰোপি তত্থ তং দেসেসি, তস্মা পুণ্ণসচ্চবন্ধাদযো পটিচ্চ ভগৱতো ধৰমানস্স ৱীসতিৱস্সকালেযেৱ সাসনং অপৰন্তৰট্ঠে পতিট্ঠহিত্ৱা কস্মিঞ্চি কস্মিঞ্চি ঠানে ভিক্খূনং সংৱিজ্জমানত্তা তেসং ভিক্খূনং সঙ্গহেত্ৱা দেসেতুং পচ্ছা আগতানঞ্চ ভিক্খূনং পৰিসুদ্ধাচাৰতং ৱিঞ্ঞাপেতুং অগ্গিক্খন্ধোপমসুত্তং থেৰো দেসেসীতি. এৱঞ্চ সতি অৰিমদ্দননগৰে সমণকুত্তকানং সংৱিজ্জমানভাৱং ৱক্খমানেন ৱচনেন সমেতি.

ইদং মৰম্মমণ্ডলে অপৰন্তৰট্ঠে দুতিযং

সাসনস্স পতিট্ঠানং.

যস্মা পন বুদ্ধে, ভগৱা পুণ্ণত্থেৰস্স যাচনমাৰব্ভ অপৰন্তৰট্ঠং আগন্ত্ৱা ৱাণিজে হি কাৰিতে চন্দনৱিহাৰে ৱসিত্ৱা একস্মিং সমযে আনন্দেন পচ্ছাসমণেন তম্বদীপৰট্ঠম্পি দেসচাৰিকং আহিণ্ডি. আহিণ্ডিত্ৱা অৰিমদ্দননগৰট্ঠানসমীপং পত্ৱা পব্বতমুদ্ধনি ঠত্ৱা অনাগতে খো আনন্দ ইমস্মিং পদেসে সম্মুতি নাম ৰাজা অৰিমদ্দনং নাম নগৰং মাপেস্সতি, তস্মিঞ্চ নগৰে মম সাসনং ৱিৰূড়ং হুত্ৱা পতিট্ঠহিস্সতীতি ব্যাকাসি. অযমত্থো পোৰাণৱেদপাত্থকেসু ৱুত্তো.

যোনকধম্মৰক্খিতত্থেৰো চ অপৰন্তৰট্ঠং আগন্ত্ৱা তম্বদীপৰট্ঠম্পি আহিণ্ডিত্ৱা তম্বদীপৰট্ঠৱাসীনম্পি ধম্মৰসং পাযেসিযেৱ. অযমত্থো খত্তিযকুলতো এৱ পুৰিসসহস্সানি পব্বজিংসূতি অট্ঠকথাযং ৱুত্তত্তা ৱিঞ্ঞাযতি. তদা হি অপৰন্তৰট্ঠে খত্তিযো নত্থি, তম্বদীপৰট্ঠিন্দোযেৱ তং অনুসাসেত্ৱা অতি ৱসতি, খত্তিযে চ আসন্তে কুতো খত্তিযকুলানি ভৱিস্সন্তি, তেনেৱ তম্বদীপৰট্ঠতো পুৰিসসহস্সানি পব্বজিংসূতি ৱিঞ্ঞাতব্বং. তস্মা তম্বদীপিকসাসনৱংসম্পি ইধ ৱত্তুং যুজ্জতি.

তেনিদানি তম্বদীপিকাসাসনৱংসং পৱক্খামি. অম্হাকঞ্হি মৰম্মমণ্ডলে তম্বদীপৰট্ঠে অৰিমদ্দননগৰে সম্মুতিৰাজা নাম ভূপালো ৰজ্জং কৰেসি. ততো পট্ঠায যাৱ অনুৰুদ্ধৰঞ্ঞা সমথি নামকে দেসে নিসিন্নানং তিংসমত্তানং সমণকুত্তকানং সট্ঠিসহস্সমত্তানং সিস্সানং ওৱাদং দত্ৱা চৰিংসু.

তেসং পন সমণকুত্তকানং অযং ৱাদো,- সচে যো পাণাতিপাতং কৰেয্য, সো ঈদিসং পৰিত্তং ভণন্তো তম্হা পাপকম্মা পৰিমুচ্চেয্য, সচে পন যো মাতাপিতৰং হন্ত্ৱা অনন্তৰিযকম্মতো পৰিমুচ্চিতুকামো ভৱেয্য, ঈদিসং পৰিত্তং ভণেয্য, সচেপি পুত্তধিতানং আৱাহৱিৱাহকম্মং কত্তুকামো ভৱেয্য, আচৰিযানং পঠমং নিয্যাদেত্ৱা আৱাহৱিৱাহকম্মং কাতব্বং, যো ইদং চাৰিত্তং অতিক্কমেয্য, বহু অপুঞ্ঞং পসৱেয্যাতি এৱমাদীহি মিচ্ছাৱাদেহি অত্তনো অত্তনো উপগতানং ওৱাদং অদংসু. তমত্থং সুত্ৱা অনুৰুদ্ধৰাজা পৰিচিতপুঞ্ঞো তেসং ৱাদং ন ৰুচি. অযং তেসং মিচ্ছাৱাদোতি.

তদা চ অৰিমদ্দননগৰে অৰহন্তো নাম থেৰো আগন্ত্ৱা সাসনং পতিট্ঠাপেসি. অযং অৰহন্তত্থেৰস্স অট্ঠুপ্পত্তি,– ৰাজৱংসাগতপৰিত্তনিদানাগতসাসনপ্পৱেণিযাগতৱসেন তিৱিধা হোতি.

তত্থাযং ৰাজৱংসাগতট্ঠুপ্পত্তি,– তদা হি সুনাপৰন্ততম্বদীপৰট্ঠেসু সব্বেন সব্বং সব্বদা থিৰং সাসনং ন তাৱ পতিট্ঠাসি. তেনেৱ ভগৱতো ব্যাকতনিযামেন সাসনং পতিট্ঠাপেস্সামাতি চিন্তেত্ৱা মহাথেৰা সক্কস্স দেৱানমিন্দস্স সন্তিকং গন্ত্ৱা সাসনং অনুগ্গহিতুং সমত্থং পুগ্গলং দেহীতি যাচিংসু. সক্কোচ দেৱানমিন্দো তাৱতিংসভৱনে একং দেৱপুত্তং যাচিত্ৱা একিস্সা ব্ৰাহ্মণিযা কুচ্ছিম্হি পটিসন্ধিং গণ্হাপেসি. দসমাসচ্চযেন ৱিজাযনকালে সীলবুদ্ধি নাম থেৰো অনুৰক্খিত্ৱা ৱযে সম্পত্তে পব্বাজেসি. তীসু পিটকেসু অতিৱিয ছেকো হুত্ৱা অৰহত্তং পাপুণি. অৰহন্তোতি নামেন পাকটো অহোসি.

সোচ থেৰো মৰম্মমণ্ডলে জিনসাসনং ৱিজ্জোতাপেতুং অৰিমদ্দননগৰং আগন্ত্ৱা নগৰতো অৱিদূৰে একস্মিং অৰঞ্ঞে নিসীদি. তদা সক্কো দেৱানমিন্দো একং নেসাদং পলোভেত্ৱা তস্স থেৰং দস্সেসি. অথ নেসাদস্স এতদহোসি,– অযং পন অমনুস্সো যক্খো ভৱেয্য, সচে পন মনুস্সো ভৱেয্য, এৱং সতি মিলক্খুজাতিকো ভৱেয্যাতি. এৱং পন চিন্তেত্ৱা ৰঞ্ঞো দস্সনত্থায নগৰং আনেসি. থেৰো চ অট্ঠপৰিক্খাৰে গহেত্ৱা অনুগচ্ছি. নেসাদা চ থেৰং আনেত্ৱা ৰঞ্ঞো দস্সেসি.

ৰাজা দিস্ৱা সন্তিন্দ্ৰিযো অযং, ন মিলক্খুজাতিকো, ইমস্স অব্ভন্তৰে সাৰধম্মো অত্থি মঞ্ঞেতি লদ্ধসূৰিযোভাসংৱিয পদুমং ফুল্লচিত্তং হুত্ৱা ৱীমংসেতুকামো থেৰং আহ,– অত্তনো সাৰুপ্পং আসনং ঞত্ৱা নিসীদাহীতি.

থেৰো চ ৰাজপল্লঙ্কং আৰুহিত্ৱা নসীদি. ৰাজা চ অযং অগ্গাসনে নিসীদি, অৱস্সং অগ্গপুগ্গলো ভৱেয্যাতি চিন্তেত্ৱা ত্ৱং কস্স ঞাতি, কস্স ভিস্সো, কুতো আগতোসীতি পুচ্ছি. থেৰো চ এৱমাহ,– লোকস্মিং যো নৱগুণসম্পন্নো ভগৱা সম্মাসম্বুদ্ধো, তস্সাহং ঞাতি, সোভগৱাযেৱ মমাচৰিযো, ভিক্খুসঙ্ঘস্স নিসিন্নট্ঠানতো আগতোম্হীতি.

ৰাজা চ সোমনস্সপ্পত্তো হুত্ৱা আহ, তৱ আচৰিযেন দেসিতং ধম্মং একদেসতো দেসেহীতি. অথ যথা সিৰিধম্মাসোকৰঞ্ঞো নিগ্ৰোধসামণেৰেন অপ্পমাদধম্মো দেসিতো, এৱং অপ্পমাদধম্মংযেৱ থেৰো দেসেসি.

ৰাজা চ পুন আহ,– কুহিং দানি সম্মাসম্বুদ্ধো নিসীদতি, তেন পন দেসিতো ধম্মো কতিপ্পমাণো, তস্স সাৱকা পন কতিপ্পমাণা, তুম্হাদিসা অঞ্ঞে অত্থি ৱা মা ৱাতি. ইদানি অম্হাকং আচৰিযো সম্মাসম্বুদ্ধো পৰিনিব্বুতো, ধাতুযোযেৱ ইদানি অত্থি, তেন পন দেসিতো ধম্মো চতুৰাসীতিধম্মক্খন্ধসহস্সপ্পমাণো, সুধম্মপুৰে পিটকত্তযং যুগড়ৱসেন তিংসৱিধা অত্থি, মযা অঞ্ঞো পৰমত্থ সম্মুতিৱসেন দুৱিধোপি সঙ্ঘো অত্থীতি.

তং সুত্ৱা ৰাজা ভিয্যোসোমত্তায পসন্নো হুত্ৱা পুন আৰোচেসি,– মম ভন্তে ইমস্মিং পচ্চক্খে নত্থি তযা অঞ্ঞো নাথো, অজ্জভগ্গে পাণুপেতং মং উপাসকোতি ধাৰেহি, তৱ ওৱাদং অহং সিৰসা পটিগ্গণ্হিস্সামীতি.

ততো পচ্ছা অৰঞ্ঞকঙ্গাৰহে ঠানে ৱিহাৰং কাৰাপেত্ৱা অদাসি. সমণকুত্তকানম্পি ৱাদং ভিন্দি, যথা পন সুৱণ্ণপাতিং লভিত্ৱা সুৱণ্ণভাজনং লভিত্ৱা মত্তিকাভাজনন্তি. সকলেপি চ ৰট্ঠে সমণকুত্তকানং ৱাদং জহাপেসি. তস্মিঞ্চ কালে সমণকুত্তকা হীনলাভা হুত্ৱা থেৰস্স উপনাহং বন্ধিংসু. তে পন সমণকুত্তকা অৰঞ্ঞে নিস্সামিকাৱিয কোলেযকা সুনখা অনাথা হুত্ৱা কাযিকচেতসিকদুক্খং লভিংসু.

ৰাজা চ তমত্থং ঞত্ৱা যথা সমণকুত্তকা নাভিভৱন্তি, তথা আৰক্খং ঠপেসি. তে চ সমণকুত্তকে সেতৱত্থং নিৱাসাপেত্ৱা আৱুধগাহযোধভাৱেন ৰাজকম্মে নিযোজাপেসি. থেৰো চ সাসনে পসন্নে জনে পব্বাজেত্ৱা উপসম্পাদেত্ৱা সাসনং ৱিসোধাপেসি. ৰাজা চ ইমস্মিং ৰট্ঠে পোৰাণিকা ৰাজানো সমণকুত্তকানং ৱাদং গহেত্ৱা ৰজ্জং কাৰেসুং, সচে হি পন তেসং অনত্থকৰজ্জং পুন গণ্হাপেতুং সক্কুণেয্যং, এৱং সতি অহং তেসং অনত্থকৰজ্জং অপনেত্ৱা সাত্থকৰজ্জং গণ্হাপেতুমিচ্ছামীতি অনুসোচীতি.

অযং পন পৰিত্তনিদানাগতট্ঠুপ্পত্তি, –

সীহড়দীপে কিৰ ৱিপ্পৱাসীনগৰে নিসিন্নো একো ভিক্খুউপদ্ৱাৰাৱতীনগৰং গন্ত্ৱা পৰিযত্তিং উগ্গণ্হি. ততো পচ্ছা সুধম্ম পুৰং গন্ত্ৱা পৰিযত্তিং উগ্গণ্হি. তস্মিঞ্চ কালে সিৰিখেত্তনগৰে পাটলিৰুক্খে একো গন্থো অত্থীতি সুত্ৱা সুধম্মপুৰতো সিৰিখেত্তনগৰং অগমাসি. অন্তৰামগ্গে লুদ্ধকো থেৰং পস্সিত্ৱা অযং যক্খোতি মঞ্ঞিত্ৱা গহেত্ৱা অনুৰুদ্ধৰঞ্ঞো দস্সেসি.

তদা ৰাজা থেৰং পুচ্ছি,– কো পন ত্ৱন্তি. অহং মহাৰাজ গোভমস্স সাৱকোতি. পুন ৰাজা পুচ্ছি,–তিণ্ণং পন ৰতনানং কীদিসোতি. থেৰো আহ,– মহোসধপণ্ডিতোৱিয মহাৰাজ বুদ্ধো দট্ঠব্বো, উমঙ্গোৱিয ধম্মো, ৱিদেহসেনা ৱিয সঙ্ঘোতি. এৱং উপমাহি পকাসিতো ৰাজা পুন পুচ্ছি,–কিং নুখো ইমে গোতমস্স সাৱকাতি. ন খো মহাৰাজ ইমে গোতমস্স সাৱকা, ইমে পন অম্হেহি ৱিসভাগা সমণকুত্তকাযে ৱাতি. এৱং ৱুত্তে ততো পট্ঠায তে সমণকুত্তকে ৱিজহি, তিণং ৱিয নাতিমঞ্ঞি. পাটলিৰুক্খসু সিৰতোপি লদ্ধং তেসং গন্থং লদ্ধট্ঠানেযেৱ অগ্গিনা ঝাপেসি. তম্পি ঠানং যাৱজ্জতনা অগ্গিঝাপনথলন্তি পাকটন্তি.

থেৰো চ ৱিমান ৱত্থুং ৰঞ্ঞো দেসেসি. ৰাজা চ পসীদিত্ৱা সিৰিখেত্তনগৰতো অৰিমদ্দননগৰং পচ্চাগমনকালে আনেসি.

ইদং পন পাটলিসুসিৰে লদ্ধগন্থস্স কাৰণং,- তেসঞ্হি সমণকুত্তকানং অব্ভন্তৰে একো উপাযচ্ছেকো সমণকুত্তকো অত্তনো ৱাদানুৰূপং গন্থং কত্ৱা সিৰিখেত্তনগৰে দ্ৱত্তিংসৰতনক্খন্ধস্স পাটলিৰুক্খস্স সুসিৰে পৱেসেত্ৱা পুনপ্পুনং উদকেন তেমেত্ৱা মত্তিকায লিম্পেত্ৱা পুন তচং উপ্পাদেত্ৱা উট্ঠাপেসি. তদা মযং সুপিনে পাটলিৰুক্খে সাৰগন্থো অত্থব্যঞ্জনসম্পন্নো একো অত্থীতিই পস্সামাতি কোলাহলং উপ্পাদেসুং. তং সুত্ৱা ৰাজা সিৰিখেত্তনগৰং গন্ত্ৱা তং পাটলিৰুক্খং ভিন্দিত্ৱা গৱেসেন্তো তং গন্থং লভি. গন্থে পন সকৱাদৱসেন সমণকুত্তকসামঞ্ঞতা ঈদিসাযেৱ, এতে গোতমাসাৱকা হোন্তিই, এতেসংযেৱ আচাৰো সগ্গমগ্গপথভূতোতি এৱমাদীহি কাৰণেহি ৱুত্তং. ৰাজা চ পসীদিত্ৱা সমণকুত্তকানং বহূনি দাতব্বানি অদাসি. ততো পচ্ছা থেৰস্স ধম্মকথং সুত্ৱা তং অগ্গিনা ঝাপেসীতি এৱং সমণকুত্তকানং ৱচনং সুত্ৱা সিৰিখেত্তনগৰং গন্ত্ৱা অৰিমদ্দননগৰং পচ্চাগচ্ছন্তো থেৰং আনেসীতি দট্ঠব্বং. অৰিমদ্দননগৰং সম্পত্তকালে জেতৱনং নাম ৱিহাৰং কাৰাপেত্ৱা অদাসি. থেৰো চ তত্থ সাসানং ৱিসোধেত্ৱা নিসীদি. ৰাজা দেৱসিকং উদকং আনেত্ৱা অগ্গমহেসী পন দেৱসিকংযেৱ পিণ্ডপাতং আনেত্ৱা ভোজেসি. উপ্পন্নকঙ্খা কালেপি তংতংকঙ্খাট্ঠানং পুচ্ছীতি.

অযং পন সাসনপ্পৱেণিযাগতট্ঠুপ্পত্তি,–

সুধম্মপুৰে হি সমাপত্তিলাভী অনোমদস্সী নাম থেৰো সোণুত্তৰত্থেৰানং ৱংসানুৰুক্খণৱসেন সদ্ধিং পঞ্চহি ভিক্খু সতেহি নিসীদি. তস্স পন পধানসিস্সো অধিসীলোনাম, তস্স পধানসিস্সো প্ৰানদস্সী নাম, তস্স পধানসিস্সো কাড়ো নাম, তস্স পধানসিস্সো অৰহন্তো নাম, তস্স পধানসিস্সো অৰিযৱংসো নামাতি.

ইদঞ্চ ৱচনং-কো পনেস উত্তৰাজীৱমহাথেৰোতি. অযঞ্হি থেৰো ৰামঞ্ঞদেসিযপুত্তো অৰিযৱংসত্থেৰস্স সিস্সো. অৰিযৱংসত্থেৰো পন কপ্পুঙ্গনগৰৱাসী মহাকাড়ত্থেৰস্স সিস্সো. সো পন সুধম্মনগৰৱাসিনো প্ৰানদস্সী মহাথেৰস্স সিস্সোতি কল্যাণী সিলালেখনে ৱুত্তৱচনেন ন সমেতি. এৱম্পি সতি যথিচ্ছিত অধিপ্পাযো ন নস্সতীতি দট্ঠব্বং.

এৱং নানাচৰিযানং ৱাদো নানাকাৰেন দিস্সমানোপি অৰহন্তত্থেৰস্স অৰিমদ্দননগৰে সাসনং অনুগ্গহেত্ৱা পতিট্ঠানতাযেৱেত্থ পমাণন্তি কত্ৱা নাৱমঞ্ঞিতব্বো. সব্বেসঞ্হি আচৰিযানং ৱাদেপি অৰহন্তত্থেৰো অৰিমদ্দননগৰং আগন্ত্ৱা সাসনং পতিট্ঠাপেসীতি অত্থো ইচ্ছিতব্বোযেৱাতি.

অৰহন্তত্থেৰো পন মূলনামেন ধম্মদস্সীতি পাকটো সুধম্মপুৰৱাসী সীলবুদ্ধিত্থেৰস্স সিস্সোতি দট্ঠব্বো. সো চ থেৰো পুব্বেৱ পব্বজ্জকালতো চতূসু ৱেদেসু সিক্খিতসিপ্পো. পব্বজিত্ৱা পন সাড়কথং পিটকত্তযং উগ্গণ্হিত্ৱা পাৰং গন্ত্ৱা সব্বত্থ পাকটো. সোক্কতযনগৰং অনেত্ৱা মনুস্সা পূজেন্তি. তত্থ দসৱস্সানি ৱসিত্ৱা পুন সুধম্মপুৰং আগন্ত্ৱা অৰঞ্ঞৱাসং সমাদিযি.

ততো পচ্ছা জিনচক্কে একসট্ঠাধিকে পঞ্চসতে সহস্সেচ সম্পত্তে কলিযুগে একূনাসীতাধিকে তিসতে সম্পত্তে অনুৰুদ্ধৰাজা ৰজ্জং পাপুণি. তদা অৰিমদ্দননগৰে সমণকুত্তকা মযং গোতমসাৱকাতি ৱত্ৱা তিংসতিংসৱগ্গা হুত্ৱা নিসীদিংসু. ৱগ্গৱসেন কিৰ সহস্সমত্তাতি. অনুৰুদ্ধৰাজা চ তেসং সমণকুত্তকানং আগাৰিযাব্ৰহ্মচৰিযাদীনি সুত্ৱা ন পসীদি. এৱম্পি পৱেণিযা আগভত্তা ন পজহি. অৰহন্তং পন থেৰং পস্সিত্ৱা ততো পট্ঠায তেসং সমণকুত্তকানং নিবদ্ধৱত্তানি ভিন্দিত্ৱা সাসনে পসীদি.

ইদং মৰম্মমণ্ডলে তম্বদীপৰট্ঠে অৰিমদ্দননগৰে অৰহন্তং.

নাম থেৰং পটিচ্চ ততিযং সাসনস্স পতিট্ঠানং.

তস্মিঞ্চ কালে অৰহন্তত্থেৰো অনুৰুদ্ধৰাজানং আহ,-তীসু সাসনেসু পৰিযত্তিসাসনে তিট্ঠন্তেযেৱ পটিপত্তি সাসনং তিট্ঠতি, পটিপত্তিসাসনে তিট্ঠন্তেযেৱ পটিৱেধসাসনং তিট্ঠতি, যথা হি গুন্নং সতেপি সহস্সেপি ৱিজ্জমানে পৱেণিপ,লিকায ধেনুযা অসতি সো ৱংসো সাপৱেণী ন ঘড়ীযতিই, এৱমেৱং ধুতঙ্গধৰানং ভিক্খূনং সতেপি সহস্সেপি ৱিজ্জমানে পৰিযত্তিযা অন্তৰহিতায পটিৱেধো নাম ন হোতি, যথা পন নিমিকুম্ভিযো জাননত্থায পাসাণ পিট্ঠে অক্খৰেসু ঠপিতেসু যাৱ অক্খৰানি ধৰন্তি, তাৱ নিধিকুম্ভিযো নট্ঠা নাম ন হোন্তি, এৱমেৱং পৰিযত্তিযা ধৰমানায সাসনং অনন্তৰহিতং নাম হোতি, যথা চ মহতো তড়াকস্স পাড়িযা থিৰায উদকং ন ঠস্সতীতি ন ৱত্তব্বং, উদকে সতি পদুমাদীনি পুপ্ফানি ন পুপ্ফিস্সন্তীতি ন ৱত্তব্বং, এৱমেৱং মহাতড়াকস্স থিৰপাড়িসদিসে তেপিটকে বুদ্ধৱচনে সতি উদকসদিসা পটিপত্তিপূৰকা কুলপুত্তা নত্থীতি ন ৱত্তব্বং, তেসু সতি পদুমাদিপুপ্ফসদিসো পটিৱেধো নত্থীতি ন ৱত্তব্বং, এৱং একন্ততো পৰিযত্তিমেৱ পমাণং, তস্মা অন্তমসো দ্ৱীসু পাতিমোক্খসু ৱত্তমানেসুপি সাসনং অনন্তৰহিতমেৱ, পৰিযত্তিযা অন্তৰহিতায সুপ্পটিপন্নস্সাপি ধম্মাভিসমযো নত্থি, অনন্তৰহিতায এৱ ধম্মাভিসমযো অত্থি, ইদানিপি অম্হাকং পৰিযত্তিসাসনং পৰিপুণ্ণং নত্থি, সৰীৰধাতুযো চ নত্থি, তস্মা যত্থ পৰিযত্তিসাসনং সৰীৰধাতুযো চ অত্থি, তত্থ পণ্ণাকাৰেন সদ্ধিং দূতং পেসেত্ৱা আনেতব্বা, এৱং সতি অম্হাকং ৰট্ঠে জিনসাসনং চিৰকালং পতিট্ঠহিস্সতীতি.

এৱং পন ভন্তে সতি কত্থ যাচিস্সামাতি. সুৱণ্ণভূমিৰট্ঠে মহাৰাজ সুধম্মপুৰে তীহি ৱাৰেহি পিটকত্তযং লিখিত্ৱা ঠপেসি, সৰীৰধাতুযো চ বহূ তত্থ অত্থীতি. ৰাজা এৱং ভন্তেতি পটিগ্গণ্হিত্ৱা বহূ পণ্ণাকাৰে পটিযাদেত্ৱা ৰাজলেখনং লিখিত্ৱা অট্ঠঙ্গসমন্নাগতং একং অমচ্চং দূতং কত্ৱা পেসেসি.

সুধম্মপুৰিন্দো মনোহৰি নাম ৰাজাপি মচ্ছেৰচিত্তো হুত্ৱা তুম্হাদিসানং মিচ্ছাদিট্ঠীনং ঠানে পিটকত্তযং সৰীৰধাতুযো চ পহিণিতুং ন যুত্তা, তিলোকগ্গস্স হি সম্মাসম্বুদ্ধস্স সাসনং সম্মাদিট্ঠীনং ঠানেযেৱ পতিট্ঠহিস্সতি, যথা নাম কেসৰসীহৰাজস্স ৱসা সুৱণ্ণপাতিযংযেৱ, ন মত্তিকাভাজনেতি.

দূতা পচ্চাগন্ত্ৱা অনুৰুদ্ধৰঞ্ঞো তমত্থং আৰোচেসুং. তং সুত্ৱা অনুৰুদ্ধৰাজা কুজ্ঝি, তত্তককপালে পক্খিত্ততিলংৱিয তট তটাযি.

অথ ৰাজা নদীমগ্গেন নাৱানং অসীতিসতসহস্সেহি নাৱিকানং যোধানং অট্ঠকোটীহি সেনং ব্যূহিত্ৱা থলমগ্গেন সদ্ধিং চতূহি মহাযোধনাযকেহি হত্থীনং অসীতি সহস্সেহি অস্সানং নৱুতিইসতসহস্সেহি যোধানং অসীতিকোটিযা সেনং ব্যূহিত্ৱা সযমেৱ যুজ্ঝিতুং সুধম্মপৰং গচ্ছি.

তং সুত্ৱা মনোহৰিৰাজা সীততসিতো হুত্ৱা অত্তনো বহূ যোধে সংৱিদহিত্ৱা সুধম্মপুৰযেৱ পটিসেনং কত্ৱা নিসীদি.

অথ অথব্বণৱেদে আগতপ্পযোগৱসেন পুনপ্পুনং ৱাযমন্তাপি নগৰমূলং উপসঙ্কমিতুং ন সক্কা. তদা ৰাজা ৱেদঞ্ঞুনো পুচ্ছি,–কস্মা পনেত্থ নগৰমূলং উপসঙ্কমিতুং ন সক্কোমাতি. ৱেদঞ্ঞুনো আহংসু,-অথব্বণৱেদৱিধানং মহাৰাজ অত্থি মঞ্ঞেতি. অথ ৰাজা পথৱিযং নিদহিত্ৱা মতকড়েৱৰং উদ্ধৰিত্ৱা মহাসমুদ্দে খিপেসি.

একং কিৰ মনুস্সং হিন্দুকুলং জেঙ্গুনামকং কীটং খাদাপেত্ৱা তং মাৰেত্ৱা হত্থপাদাদীনি অঙ্গপচ্চঙ্গানি গহেত্ৱা ছিন্নছিন্নানি কত্ৱা নগৰস্স সামন্তা পথৱিযং নদহিত্ৱা ঠপেসি. তদা পন নগৰং উপসঙ্কমিতুং সক্কা. নগৰঞ্চ পৱিসিত্ৱা অনুৰুদ্ধৰাজা মনোহৰিৰাজানং জীৱগ্গাহং গণ্হি. সুধম্মপুৰে পোৰাণিকানং ৰাজূনং পৱেণীআগতৱসেন ৰতনমযমঞ্জূসাযং ঠপেত্ৱা পূজিতং সহধাতূহি পিটকত্তযং গহেত্ৱা মনোহৰিৰঞ্ঞো সন্তকানং দ্ৱত্তিংসহত্থীনং পিট্ঠিযং আৰোপেত্ৱা আনেসি.

অৰিমদ্দননগৰং পন পত্ৱা ধাতুযো ৰতনমযমঞ্জূসাযং ঠপেত্ৱা সিৰিসযনগব্ভে ৰতনমঞ্চে সীসোপদেসস্স সমীপে ঠপেসি. পিটকত্তযম্পি ৰতনমযে পাসাদে ঠপেত্ৱা ভিক্খুসঙ্ঘস্স উগ্গহধাৰণাদিঅত্থায নিয্যাদেসি. ততো কিৰ আনীতং পিটকত্তযং উগ্গণ্হন্তানং অৰিযানং সহস্সমত্তং অহোসীতি.

সুধম্মনগৰং ৱিজযিত্ৱা পিটকেন সদ্ধিং ভিক্খুসঙ্ঘং আনেত্ৱা সাসনস্স পতিট্ঠাপনং জিনচক্কে একাধিকে ছসতে ৱস্সসহস্সে কলিযুগে চ সোড়সাধিকে চতুসতে সম্পত্তেতি সিলালেখনেসু ৱুত্তং.

অনুৰুদ্ধৰঞ্ঞো কালে পুঞ্ঞানুভাৱেন তিইণ্ণং ৰতনানং পৰিপুণ্ণত্তা পুণ্ণগামোতি সমঞ্ঞা অহোসি. চিৰকালং অতিক্কন্তে ণ্ণকাৰং লোপৱসেন মকাৰস্স চ নিগ্গহিত ৱসেন পুগমীতি মৰম্মভাসায ৱোহাৰীযতীতি অনাগতৱংসৰাজৱংসেসু ৱুত্তং.

অনুৰুদ্ধৰাজাযেৱ চত্তাৰো মহাযোধে সীহড়দীপং পেসেত্ৱা ততোপি পিটকত্তযং আনেসি. সীহড়দীপতো আনীতপিটকত্তযেন সুধম্মপুৰতো আনীতপিটকত্তযং অঞ্ঞমঞ্ঞং যোজেত্ৱা সংসন্দেত্ৱা অৰহন্তত্থেৰো ৱীমংসেসি. তদা গঙ্গাদকেনৱিয যমুনোদকং অঞ্ঞমঞ্ঞং অনূনং অনধিকং অহোসি. তেহি পিটকেহি অঞ্ঞানিপি ৱড্ঢেত্ৱা তিপিটকগব্ভে ঠপেত্ৱা পূজেসি. তেসু তেসু ঠানেসুপি পতিট্ঠাপেসি.

মনোহৰিৰাজানম্পি ম্ৰঙ্কপা নাম দেসে উপট্ঠাকেহি সহ ঠপেসি. তস্স চ কিৰ ৰঞ্ঞো মুখং ৱিৰৱিত্ৱা কথং সল্লাপেন্তস্স মুখতো ওভাসো পজ্জলিত্ৱা নিক্খমি. সো কদাচি কদাচি অনুৰুদ্ধৰঞ্ঞো সন্তিকং আগন্ত্ৱা গাৰৱৱসেন ৱন্দনাদীনি অকাসি. তদা অনুৰুদ্ধৰঞ্ঞো লোমহংসো উপ্পজ্জি উব্বিগ্গো চ. তস্মা তস্স ৰঞ্ঞো নিত্থেজত্থায বুদ্ধৰূপস্স চেতিযস্স ভত্তং পূজেত্ৱা তং গহেত্ৱা মনোহৰিৰঞ্ঞো ভাজেসি. তদা তস্স তদানুভাৱো অন্তৰধাযি. মনোহৰিৰাজা সংৱেগং আপজ্জিত্ৱা সংসাৰে সংসৰন্তো যাৱ নিব্বানং ন পাপুণামি, তাৱ পৰৱসে নানুৱত্তেয্যন্তি পত্থনং অকাসি. সুধম্মপুৰতো আভতং অত্তনো সন্তকং মনোময মণিং একস্স সেট্ঠিনো সন্তিকে ৱিক্কিণিত্ৱা লদ্ধমূলেন পঞ্চৱাহৰজতেন অভুজিতপল্লঙ্কৱসেন একং মহন্তং বুদ্ধ বিম্বং পৰিনিব্বানাকাৰেন একন্তি দ্ৱে বুদ্ধপ্পটিবিম্বানি কাৰাপেসি. যাৱজ্জতনা তানি সন্তীতি. ইচ্চেৱং অনুৰুদ্ধৰাজা সুধম্মপুৰতো সীহড়দীপতো চ সাসনং আনেত্ৱা অৰিমদ্দননগৰে পতিট্ঠাপেসীতি.

ইদং অম্হাকং মৰম্মমণ্ডলে তম্বদীপৰট্ঠে অৰিমদ্দননগৰে

অনুৰুদ্ধৰাজানং পটিচ্চ চতুত্থং সাসনস্স পতিট্ঠানং.

উত্তৰাজীৱত্থেৰোপি সোণুত্তৰানং ৱংসতো সাসনং গহেত্ৱা সুধম্মপুৰতো অৰিমদ্দননগৰং আগন্ত্ৱা সাসনং পতিট্ঠাপেসি.

ইদং অম্হাকং মৰম্মমণ্ডলে তম্বদীপৰট্ঠে অৰিমদ্দননগৰে উত্তৰাজীৱত্থেৰং পটিচ্চ পঞ্চমং সাসনস্স পতিট্ঠানং.

উত্তৰাজীৱত্থেৰস্স সীহড়দীপং গতকালে তেন সদ্ধিং গতং ছপ্পদং নাম সামণেৰং সীহড়দীপেযেৱ সীহড়দীপিকা পব্বজিংসু. পব্বজিত্ৱা চ ছপ্পদসামণেৰো পৰিযত্তিং উগ্গণ্হিত্ৱা দসৱস্সং তত্থ ৱসিত্ৱা অৰিমদ্দননগৰং পচ্চাগচ্ছি. সিৱলিত্থেৰঞ্চ তামলিন্দত্থেৰঞ্চ আনন্দত্থেৰঞ্চ ৰাহুলত্থে ৰঞ্চ অনেসি. তে পন থেৰা তিপিটকধৰা হোন্তি ব্যত্তা দক্খা চ. অযঞ্চত্থো ৱিত্থাৰেন হেট্ঠা ৱুত্তো.

অৰিমদ্দননগৰং পত্ৱা অৰিমদ্দন ৱাসীহি ভিক্খূহি সদ্ধিং ৱিনযকম্মানি অকত্ৱা পুথু হুত্ৱা নিসীদিংসু. নৰপতিৰাজা চ তেসু থেৰেসু অতিৱিয পসীদি. এৰাৱতীনদিযং উড়ুম্পং বন্ধিত্ৱা তত্থেৱ উপসম্পদকম্মং কাৰাপেসি. চিৰকালং অতিক্কমিত্ৱা সো গণো ৱুড্ঢি হুত্ৱা উপ্পজ্জি.

নৰপতিৰাজা চ তে থেৰে সদ্ধিং সঙ্ঘেন নিমন্তেত্ৱা মহাদানং অদাসি. তদা ছণে আকপ্পসম্পন্নং ৰূপসোভগ্গপ্পক্কং একং নাটকিত্তিং দিস্ৱা ৰাহুলত্থেৰো পটিবদ্ধচিত্তো লেপে লগ্গিতৱানৰোৱিয কদ্দমে লগ্গিতমাতঙ্গোৱিয চ কাম গুণলেপকদ্দমেসু লগ্গিতো সাসনে ৱিৰমিত্ৱা হী নাযাৱত্তীতুং আৰভি. মৰণন্তি কৰোগেন অভিভূতো ৱিয অতেকিচ্ছো হুত্ৱা সেসত্থেৰেসু ওৱাদং দিন্নেসু পিনাদিযি. তদা সেসত্থেৰা তং এৱমাহংসু,-মা ত্ৱং একং তং পটিচ্চ সব্বেপি অম্হে লজ্জাপেতুং ন অৰহসি, মা ইধ হীনাযা ৱত্তেহি, মল্লাৰুদীপং গন্ত্ৱা যথাৰুচিং কৰোহীতি পেসেসুং. ৰাহুলত্থেৰো চ কুসিমতিত্থতো নাৱং আৰুয্হ মল্লাৰুদীপং অগমাসি. মল্লাৰুদীপং পত্তকালে মল্লাৰুৰাজা ৱিনযং জানিতুকামো সহ টীকায খুদ্দসিক্খাপকৰণং তস্স সন্তিকে উগ্গণ্হিত্ৱা একপত্তমত্তং মণিং অদাসি. সোচ তং লভিত্ৱা হীনাযাৱত্তীতি. হোন্তি চেত্থ,-

অতিদূৰেৱ হোতব্বং, ভিক্খুনা নাম ইত্থিভি;

ইত্থিযো নাম ভিক্খূনং, ভৱন্তি ইধ ৱেৰিনো.

তাৱ তিট্ঠন্তু দুপ্পঞ্ঞা, মযং পোৰাণিকাপি চ;

মহাপঞ্ঞা ৱিনাসং, পত্তা হৰিতচাদযো.

তস্মা হি পণ্ডিতো ভিক্খু, অন্তমসোৱ ইত্থিভি;

ৱিস্সাসং ন কৰে লোকে, ৰাগো চ দুপ্পৱাৰিতোতি.

সেসেসু চ থেৰেসু ছপ্পদো নাম থেৰো পঠমং কালঙ্কতো. সিৱলিতামলিন্দানন্দত্থেৰাযেৱ তযো পৰিযত্তিউগ্গহণধাৰণাদিৱসেন সাসনং উপত্থম্ভেত্ৱা অৰিমদ্দননগৰে নিসীদিংসু. একস্মিঞ্চ কালে ৰাজা তেসং তিণ্ণং থেৰানং একেকং হত্থিং অদাসি. সিৱলিতামলিন্দত্থেৰা পটিগ্গহেত্ৱা ৱনে ৱিস্সজ্জাপেসুং. আনন্দত্থেৰো পন কিঞ্চিপুৰনগৰং পহিণিত্ৱা ঞাতকানং দেহীতি কুসিমতিত্থং গন্ত্ৱা নাৱং আৰোপেসি. তং কাৰণং ঞত্ৱা সিৱলিতামলিন্দত্থেৰাতং এৱমাহংসু,– মযং পন আৱুসো হত্থীনং সুখত্থায ৱনে ৱিস্সজ্জেম,ত্ৱং পন অধম্মিকং কৰোসীতি. কিন্নাম ভন্তে ঞাভকানং সঙ্গহো ন ৱট্টতি, ননু ঞাতকানঞ্চ সঙ্গহোতি ভগৱতা ৱুত্তন্তি.

থেৰা আহংসু,-সচে ত্ৱং অম্হাকং ৱচনং নকৰেয্যাসি,ভৱ ইচ্ছানুৰূপং কৰোহি, মযং পন তযা সদ্ধিং সংৱাসং ন কৰিস্সামাতি ৱিসুং নিসীদিংসু.

ততো পট্ঠায দ্ৱে গণা ভিজ্জিংসু. ততো পচ্ছাকালে অতিক্কন্তে তামলিন্দত্থেৰো বহুস্সুতানং ব্যত্তিবলানং সিস্সানং অনুগ্গহত্থায গহট্ঠানং সন্তিকে অযং বহুস্সুতো অযং মহাপঞ্ঞোতি এৱমাদিনা ৱচীৱিঞ্ঞত্তিং সমুট্ঠাপেতি, এৱং কতে কুলপুত্তা সুলভপচ্চযৱসেন সাসনস্স হিতং আৱহিভুংসক্খিস্সন্তীতি কত্ৱা. তং কাৰণং সুত্ৱা সিৱলিত্থেৰো এৱমাহ,- কস্মা ত্ৱং ৱচীৱিঞ্ঞত্তিং সমুট্ঠাপেত্ৱা বুদ্ধপ্পটিকুচ্ছিতং কম্মং কৰোসীতি. ভগৱতা অত্তনো অত্থাযযেৱ ৱচীৱিঞ্ঞত্তিং পটিক্খিত্তা, অহং পন পৰেসংযেৱ অত্থায ৱচীৱিঞ্ঞত্তিংসমুট্ঠাপেমি, নাত্তনো অত্থায, সাসনস্স হি ৱেপুল্লত্থায এৱং ৱচীৱিঞ্ঞত্তিংসমুট্ঠাপেমি. সিৱলিত্থেৰোপি ন ত্ৱং মম ৱচনং কৰোসি, যং যং ত্ৱং ইচ্ছসি, তং তং কৰোহি, অহং পন তযা সদ্ধিং সংৱাসং নকৰিস্সামীতি ৱিসুং হুত্ৱা সদ্ধিং সকপক্খেন নিসীদি. ততো পট্ঠায তযো গণা ভিজ্জিংসু.

এৱং অৰিমদ্দননগৰে অৰহন্তত্থেৰস্স একো ৱংসো, সিৱলিত্থেৰস্স একো, তামলিন্দত্থেৰস্স একো, আনন্দত্থেৰস্স একোতি চত্তাৰো গণা অহেসুং.

তেসু অৰহন্তত্থেৰগণো সুধম্মপুৰতো পঠমং আগতত্তা পুৰিমগণোতি ৱোহাৰিযতি, অঞ্ঞে পন পচ্ছা আগতত্তা পচ্ছাগণাতি.

সিৱলিত্থেৰো অৰিমদ্দননগৰে যাৱীজীৱং সাসনং পগ্গণ্হিত্ৱা কলিযুগে নৱুতাধিকে পঞ্চৱস্সসতে কালে কালমকাসি.

আনন্দত্থেৰো পন অৰিমদ্দননগৰেযেৱ চতুচত্তালীস ৱস্সানি সাসনং পগ্গণ্হিত্ৱা ছনৱুতাধিকে পঞ্চৱস্সসতে কালে কালমকাসি.

তামলিন্দত্থেৰোপি যাৱজীৱং সাসনং পগ্গণ্হিত্ৱা অট্ঠন ৱুতাধিকে পঞ্চৱস্সসতে কালে কালমকাসীতি. অহো সঙ্খাৰসভাৱোতি.

সেয্যথাজগৰস্সেৱ, নাভিযা চক্কমণ্ডলে;

লগ্গো সসো সমিত্ৱাপি, দিসং গচ্ছতি তং মুখং.

তথেৱ সব্বসত্তাপি, মচ্চুচক্কেসু লগ্গিতা;

যাৱজীৱম্পি ধাৱিত্ৱা, মচ্চুমুখং উপাগমুন্তি.

ইচ্চেৱং অৰিমদ্দনপুৰে অৰহন্তেহি চ গন্থকাৰেহি চ পুথুজ্জনেহি জিনসাসনং নভে চন্দোৱিয ৱিজ্জোততি.

তত্থ হি যদা অনুৰুদ্ধৰাজা সুধম্মপুৰতো সাসনং আনেসি, তদা অৰহন্তা ছসতসহস্সমত্তা আগতা, সোতাপন্নসকদাগামিঅনাগামিনো পন গণনপথং ৱীতি ৱত্তাতি.

ছত্তগুহিন্দস্স নাম ৰঞ্ঞো কালেপি হিমৱন্তে গন্ধমাদনপব্বততো অট্ঠ অৰহন্তা পিণ্ডায ৰাজগেহং আগমংসু. ৰাজা চ পত্তং গহেত্ৱা পিণ্ডপাতেন ভোজেত্ৱা ইদানি কুতো আগতত্থাভি পুচ্ছি. হিমৱন্তে মহাৰাজ গন্ধ মাদনপব্বততোতি. অথ ৰাজা অতিপ্পসন্নো হুত্ৱা ইধ তেমাসং ৱস্সং উপগচ্ছথাতি যাচিত্ৱা ৱিহাৰং কাৰাপেত্ৱা অদাসি. তেমাসম্পি অন্তোগেহে নিমন্তেত্ৱা পিণ্ডপাতেন ভোজেসি.

একং সমযং অৰহন্তানং গন্ধমাদনপব্বতে নন্দমূলগুহং ৱিয একং গুহং মাপেত্ৱা দস্সেহীতি যাচি. তে চ অৰহন্তা নন্দমূলগুহংৱিয একং গুহং ইদ্ধিযা মাপেত্ৱা দস্সেসুং. ৰাজা চ তায গুহায সদিসং একং গুহং কাৰাপেসি. নন্দমূলগুহাকাৰেন পন কতত্তা নন্দাতি নামম্পি অকাসি. ইচ্চেৱং ছত্তগুহিন্দস্স ৰঞ্ঞো কালে গন্ধমাদনপব্বতে নন্দমূলগুহতো আগন্ত্ৱা অৰহন্তা সাসনং পতিট্ঠাপেসুং.

অৰহন্তভাৱো চ নামেস যথাভূতং জানিতুং দুক্কৰো, অনুপসম্পন্নানং উত্তৰিমনুস্সধম্মদস্সনস্স পটিক্খিত্তত্তা, অৰহত্তং ৱা পত্ৱাপি ৱাসনায অপ্পজহিতত্তা. অৰহাপি হি সমানো অহং অৰহাতি অনুপসম্পন্নানং কথেতুং ন ৱট্টতি, অৰহত্তং পত্ৱাপি একচ্চো ৱাসনং পজহিতুং ন সক্কা, পিলিন্দৱচ্ছত্থেৰৱত্থুচেত্থ ঞাপকং. এৱং লোকে অৰহন্ত ভাৱো জানিতুং দুক্কৰো. তেনেৱ মহাকস্সপত্থেৰস্স উপট্ঠাকো একো ভিক্খু অত্তনো উপজ্ঝাযস্স মহাকস্সপত্থেৰস্স সন্তিকে ৱসিত্ৱাপি তস্স অৰহন্ত ভাৱং ন জানি.

মহাকস্সপত্থেৰঞ্হি একেন সদ্ধিৱিহাৰিকেন সদ্ধিং অৰঞ্ঞৱিহাৰতো গামং পিণ্ডায চৰন্তং অন্তৰামগ্গে পত্তা দিপৰিক্খাৰে গহেত্ৱা পচ্ছা গচ্ছন্তোযেৱ একোসদ্ধি ৱিহাৰিকো এৱমাহ,–লোকস্মিং ভন্তে অৰহা অৰহাতি পাকটো, সুতমত্তোৱাহং ভৱামি, ন কদাচি দিট্ঠপুব্বোতি. তং সুত্ৱা থেৰো পচ্ছা পৰিৱত্তত্ৱা ওলোকেন্তো পৰিক্খাৰে আৱুসো গহেত্ৱা অৰহন্তস্স পচ্ছাগচ্ছন্তোযেৱ অৰহন্তভাৱং ন জানাতীতি আহাতি.

অৰিমদ্দননগৰেপি সীলবুদ্ধিপোল্লোঙ্কসুমেধত্থেৰাদযোপি অৰহন্তাযেৱ অহেসুং. নৰপতিৰাজা হি খণিত্তি পাদপব্বতং গন্ত্ৱা পচ্চাগমনকালে অন্তৰামগ্গে একিস্সা মাতিকায মণোভাসং দিস্ৱা ইধ পুঞ্ঞং কাৰেতুকামো সক্কো দস্সেতি মঞ্ঞেতি মনসিকৰিত্ৱা চেতিযং কাৰাপেস্সামীতি তত্থ ৰট্ঠৱাসীতি সমং ভূমিভাগং কাৰাপেসি.

অথ একো সীলবুদ্ধি নাম থেৰো এৱমাহ,– পুঞ্ঞং মহাৰাজ কৰিস্সমীতি ইদং ভূমিপৰিকম্মং কাৰাপেসি, এৱং কাৰাপেন্তস্স তে অপুঞ্ঞংযেৱ ভৱতি, নোপুঞ্ঞন্তি ৱত্ৱা বহূ সত্তা মা কিলমন্তূতি মনসিকত্ৱা ৰঞ্ঞো দণ্ডকম্মেন তজ্জনত্থায ৰঞ্ঞা দিন্নং পিণ্ডপাতং নভুঞ্জি. ৰাজা চ সচে ত্ৱং মযা দিন্নং পিণ্ডপাতং অভুঞ্জিতুকামো ভৱেয্যাসি, মম ৱিজিতে ৱসন্তোযেৱ ত্ৱং মম পিণ্ডপাতা ন মুচ্চেয্যাসি, ৰট্ঠৱাসীহিপি দিন্নপিণ্ডপাতো ময্হমেৱ সন্তকো, ননু নাম মম পিণ্ডপাতংযেৱ ত্ৱং ভুঞ্জসীতি আহ.

সীলবুদ্ধিত্থেৰোপি সচে অহং এৱং ভৱেয্যামি, সীহড়দীপং গন্ত্ৱা ৱসিস্সামীতি চিন্তেত্ৱা অৰঞ্ঞে ৱসি.

অথ তমত্থং জানিত্ৱা নগৰদ্ৱাৰে আৰক্খো একো যক্খো ৰঞ্ঞো আগতকালে অভিমুখং ঠিতোৱ ভযানকৰূপং নিসীদি. অথ নানাৱিজ্জাকম্মেহি অপনেন্তোপি ন সক্কা অপনেতুং.

অথ ৰাজা নিমিত্তপাঠকে পক্কোসাপেত্ৱা পুচ্ছি,-কেন কাৰণেন অযং যক্খো ইধ নিসিন্নোতি. ত্ৱং মহাৰাজ সীলবুদ্ধিত্থেৰং অগাৰৱৱসেন পুব্বে কথেসি, যক্খাপি থেৰে অতিৱিয পসন্নাতি অম্হেহি সুতপুব্বা, তং পটিচ্চ যক্খো ভযানকৰূপং দস্সেত্ৱা নিসিন্নো ভৱিস্সতীতি আহ.

ৰাজাপি অমচ্চে আণাপেসি থেৰং পক্কাসথাতি. থেৰো নাগচ্ছি. সীহড়দীপংযেৱ গমিস্সামীতি আৰভি. তমত্থং সুত্ৱা ৰাজা একং চতুৰঙ্গপচ্চযং নাম অমচ্চং পক্কোসাপেত্ৱা ত্ৱং গন্ত্ৱা থেৰং পক্কোসাহীতি পেসেসি. চতুৰঙ্গপচ্চযো চ ছেকতায একং সুৱণ্ণমযং বুদ্ধপ্পটিবিম্বং নাৱায ঠপেত্ৱা মহাসমুদ্দতিত্থং অগমাসি. অথ থেৰং সম্পাপুণিত্ৱা ইদানি ইধ ভগৱা সম্মাসম্বুদ্ধো অগমাসি, সীলবুদ্ধিত্থেৰো ভগৱতো সম্মাসম্বুদ্ধস্স দস্সনত্থায আগচ্ছতূতি দূতং পেসেসি. থেৰোপি ভগৱতো সম্মাসম্বুদ্ধস্স দস্সনত্থায আগচ্ছতূতি ৱচনং পটিক্খিপিতুং বুদ্ধগাৰৱৱসেন অৱিসহতায আগচ্ছীতি.

পোৰাণিকানংৱ থেৰানং, বুদ্ধে সগাৰৱং ইধ;

পণ্ডিতো গাৰৱং বুদ্ধে, কৰে পসন্নচেতসাতি.

নাৱং অভিৰূহিত্ৱা থেৰো ভগৱতো সম্মাসম্বুদ্ধস্স ৱন্দনামানপূজাসক্কাৰদীনি অকাসি. থেৰস্স এৱং ৱন্দনামানপূজাসক্কাৰাদীনি কৰোন্তস্সেৱ ৱেগেন নাৱং আনেত্ৱা গচ্ছি. অথ চতুৰঙ্গপচ্চযো এৱমাহ,– ইদানি ভন্তে তুম্হাকং আচৰিযস্স সম্মাসম্বুদ্ধস্স সাসনং পগ্গণ্হিতুং যুত্তোতি. ৰাজা চ অমচ্চেহি পৰিৱাৰিতো পচ্চুগ্গচ্ছি. নাৱায থেৰস্স হত্থে গহেত্ৱা ৰাজগেহং আনেসি. দ্ৱাৰং পত্তকালে যক্খো পথৱিযং নিসীদিত্ৱা থেৰং ৱন্দি.

ৰাজা ৰাজগেহং পত্ৱা থেৰং নানাভোজনেহি ভোজেসি. এৱঞ্চ অৱোচ,–অজ্জতগ্গে ভন্তে ত্ৱমসি মমাচৰিযো, ভগৱতোৱ ওৱাদং সিৰসা পটিগ্গহেত্ৱা অনুৱত্তিস্সামাতি অত্তনো পঞ্চপুত্তেপি থেৰস্স অদাসি. তে চ পঞ্চকুমাৰা থেৰেন সদ্ধিং অনুৱত্তিংসু. থেৰো তে পক্কোসেত্ৱা ৱিহাৰং অগমাসি. অন্তৰামগ্গে কপ্পিযপথৱিযং পঞ্চ পৰিমণ্ডলাকাৰানি লিখিত্ৱা তেসং ৰাজকুমাৰানং দস্সেত্ৱা নিৱত্তাপেসি. ৰাজকুমাৰা পটিনিৱত্তিত্ৱা তং কাৰণং ৰঞ্ঞো আৰোচেসুং. ৰাজা চ তুম্হাকং পুঞ্ঞং কাৰাপনত্থায দস্সেতীতি ৱত্ৱা তুলাৱসেন তেহি ৰাজকুমাৰেহি সুৱণ্ণং সমং কত্ৱা তেন সুৱণ্ণেন মূলং কত্ৱা ভগৱতো ধৰমানকালে পস্সেনদিকোসলৰঞ্ঞা কাৰাপিতং চন্দনপ্পটিবিম্বংৱিয ৱিসুং ৱিসুং পটিবিম্বং কাৰাপেসি.

তেসং নিধানট্ঠানভূতানি পঞ্চ চেতিযানিপি সক্কো কম্ম ৱিধাযকো হুত্ৱা পতিট্ঠাপেসি. এত্থ চ পুব্বে ৰঞ্ঞা পসীদিত্ৱা থেৰস্স ৰাজকুমাৰা দিন্না, মূলং ৰতনত্তযস্স দত্ৱা পুন ৰাজকুমাৰে ভূজিস্সে কাৰেতুকামতায থেৰো এৱং সঞ্ঞং অদাসীতি দট্ঠব্বং.

সো চ সীলবুদ্ধিত্থেৰো অৰহন্তগণৱংসোতি দট্ঠব্বো.

অৰিমদ্দননগৰেযেৱ নৰপতি ৰঞ্ঞো কালে কস্সপো নাম থেৰো দেসচাৰিকং চৰমানো পোল্লোঙ্কনামকং দেসং, তদৱসৰি. অথ দ্ৱে মহল্লকপোল্লোঙ্কা মনুস্সা থেৰে অতিপ্পসন্নতায দ্ৱে পুত্তে উপট্ঠাকত্থায নিয্যাদেসুং.

পোল্লোঙ্কমনুস্সানং অতিপ্পসন্নতং পটিচ্চ থেৰোপি পোল্লোঙ্কত্থেৰোতি ৱোহাৰিযতি. যদা চ পন সো থেৰো সীহড়দীপং গন্তুকামো অহোসি, তদা সক্কো দেৱানমিন্দো ব্যগ্ঘৰূপং মাপেত্ৱা পিট্ঠিযা যাৱ মহাসমুদ্দতীৰং আনেসি. মহাসমুদ্দতীৰং পন পত্ৱা নাৱং অভিৰূহিত্ৱা ৱাণিজেহি সদ্ধিং তৰি.

মহাসমুদ্দমজ্ঝে পন পত্ৱা সা নাৱা ন গচ্ছি, নিচ্চলাৱ অট্ঠাসি. অথ ৱাণিজা মন্তেসুং,-অম্হাকং নাৱায অলক্খী পাপজনো অত্থি মঞ্ঞেতি. এৱং পন মন্তেত্ৱা সলাকাদানং অকংসু. যাৱ ততিযম্পি থেৰস্সেৱ হত্থে সলাকা পুব্বে কতকম্মৱিপাকৱসেন নিপতি. ইদং পন থেৰস্স পুব্বে কতকম্মং,-থেৰো হি ততো অত্তভাৱতো সত্তমে ভৱে একস্মিং গামে কুলদাৰকো হুত্ৱা কীড়নত্থায একং সুনখং নদিযং ওতাৰেত্ৱা উদকে কীড়মাপেসি. এৱং কীড়মন্তং সুনখং সযমেৱ উৰেন উগ্গহেত্ৱা তীৰং আনেসীতি এৱং পুব্বে কতকম্মৱিপাকৱসেন থেৰস্সেৱ হত্থে সলাকা নিপতি.

তদা ৱাণিজা উদকপিট্ঠে খিপিংসু. অথ সক্কো দেৱানমিন্দো কুম্ভীলৰূপং মাপেত্ৱা পিট্ঠিযং আৰোপেত্ৱা আনেসি. থেৰো যক্খদীপং পত্ৱা অন্ধচক্খুকানং যক্খানং মেত্তানুভাৱেন চক্খুং লভাপেসি. যক্খা চ থেৰস্স গুণং ঞত্ৱা দ্ৱে যক্খভাতিকে অদংসু. থেৰো চ সীহড়দীপং গন্ত্ৱা মহাচেতিযৰূপং লোহপাসাদৰূপং সৰীৰধাতুং মহাবোধিবিজানি চ আনেত্ৱা পচ্চাগমাসীতি.

সুমেধত্থেৰো চ হলঙ্কস্স নাম নগৰস্স দক্খিণদিসাভাগে ম্হত্তিপামে পুৰত্থিমায অনুদিসায দিন্ননামিকে ৱিহাৰে ৱসি. ঠানস্স পন নামৱসেন থেৰস্সোপি দিন্নৱিহাৰো ত্ৱেৱ নামং অহোসি. সোপি থেৰো পংসুকূলিকো লজ্জীপেসলো সিক্খাকামো ঝানলাভী অৰহাযেৱ. সো হি দেৱসিকং দেৱসিকং অট্ঠনৱযোজনপ্পমাণে পাদচেতিযং গন্ত্ৱা ৱন্দি. চেতিযঙ্গণৱত্তঞ্চ অকাসি. ততো আগন্ত্ৱা ম্হত্তিগামে পিণ্ডায চৰি. ইদং থেৰস্স নিবদ্ধৱত্তং.

অপৰানিপি ৱত্থূনি বহূনি সন্তি, সব্বানি পন তানি ৱিত্থাৰেত্ৱা ৱত্তব্বানিপি গন্থপাৰৱভযেন ন ৱক্খাম. সব্বানিপি হি ৱুচ্চমানানি অযং সাসনৱংসপ্পদীপিকা অতিপ্পপঞ্চা ভৱিস্সতি.

সম্মাসম্বুদ্ধস্স হি পৰিনিব্বানতো যাৱজ্জতনা থেৰানং পৰম্পৰৱসেন সঙ্ঘট্টেত্ৱা আনযনমেৱেত্থ অধিপ্পেতং. যথাৱুত্তানি পন ৱত্থূনি অধুনা অভিঞ্ঞালাভীনং পুগ্গলানং অখেত্তভাৱেন পসঙ্গঞাণপ্পটিবাহণত্থং অৰিমদ্দননগৰে চ বহূনং অভিঞ্ঞালাভীনং পুগ্গলানং নিৱাসট্ঠানতা দস্সনত্থং ৱুত্তানি. ৱুত্তঞ্চেতং ভিক্খুনীখন্ধকট্ঠকথাযং,–

পটিসম্ভিদাপত্তেহি ৱস্সসহস্সং সুক্খৱিপস্সকেহি ৱস্সসহস্সং অনাগামীহি ৱস্সসহস্সং সকদাগামীহি ৱস্সসহস্সং সোতাপন্নেহি ৱস্সসহস্সন্তি এৱং পঞ্চৱস্সসহস্সানি পটিৱেধধম্মো ঠস্সতীতি.

দীঘনিকাযট্ঠকথাযং পন সংযুত্তনিকাযট্ঠকথাযঞ্চ পটিসম্ভিদাপত্তেহি ৱস্সসহস্সং ছড়াভিঞ্ঞেহি ৱস্সসহস্সং তেৱিজ্জেহি ৱস্সসহস্সং সুক্খৱিপস্সকেহি ৱস্সসহস্সং পাতিমোক্খেন ৱস্সসহস্সন্তি ৱুত্তং.

অঙ্গুত্তৰনিকাযট্ঠকথাযং পন ৱিভঙ্গকথাযঞ্চ বুদ্ধানং পৰিনিব্বানতো ৱস্সসহস্সমেৱ পটিসম্ভিদা নিব্বত্তেতুং সক্কোন্তি, ততো পৰং ছ অভিঞ্ঞা, ততোপি অসক্কোন্তা তিস্সো ৱিজ্জা নিব্বত্তিংসু. গচ্ছন্তে কালে তাপি নিব্বত্তেতুং অসক্কোন্তা সুক্খৱিপস্সকা হোন্তি. এতেনেৱ নযেন অনাগামিনো সকদাগামিনো সোতাপন্নাতি ৱুত্তং.

এৱং নানানযেহি অট্ঠকথাযপি আগতত্তা অধুনা লোকে অৰিযপুগ্গলা ভৱিতুং ন সক্কাতি ন ৱত্তব্বং. অৰিযানমেৱ খেত্তস্স অধুনাপি সম্ভৱতো, সচে আৰদ্ধৱিপস্সকো ভৱেয্য সো অৰহা ভৱিতুং সক্কাযেৱাতি নিট্ঠমেত্থাৱগন্তব্বং. অট্ঠকথাসু পন নানাভাণকত্থেৰানং নানাৱাদৱসেন ৱুত্তন্তি দট্ঠব্বং. এত্তকেনেৱ পন নানাকাৰেন ৱাদো ভিন্নোপি সাসনং ভিজ্জতিযেৱ. সাসনস্স অভিন্নংযেৱ হি এত্থ পমাণন্তি.

এৱং মৰম্মমণ্ডলে অৰিমদ্দননগৰে অনেকেহি অৰহন্তসতেহি সাসনং ৱিজ্জোততি. ভগৱতো পন পৰিনিব্বানতো তিংসাধিকানং নৱৱস্সসতানং উপৰি পৰম্মৰট্ঠে সেঞিলঞ্ঞিক্ৰোধিনামেন ৰঞ্ঞা সমকালৱসেন সীহড়দীপে ৰজ্জং পত্তস্স মহানামৰঞ্ঞো কালে বুদ্ধঘোসবুদ্ধদত্তত্থেৰেহি পভুতি তেতেমহাথেৰা তেতেগন্থে অকংসু.

ততো পচ্ছা সতিসমাধিপঞ্ঞামন্দৱসেন সুখাৱবোধনত্থং টীকাযো অকংসু. অৰিমদ্দননগৰে জিনচক্কেসত্তনৱুতাধিকে ছসতে সহস্সে চ সম্পত্তে তিণ্ণং পিটকানং মূলভূতেসু সদ্দনযেসু সোতাৰানং ছেকত্থায মহাসমুদ্দেৱিয আনন্দো নাম মহামচ্ছো তীসু পিটকেসু সাট্ঠকথেসু ৱিলোলেত্ৱা অগ্গৱংসো নাম থেৰো সদ্দনীতিপ্পকৰণং অকাসি. অৰিমদ্দননগৰে হি উত্তৰাজীৱত্থেৰাদীনং সীহড়দীপং গমনতো পুব্বেযেৱ তযো মহাথেৰা পৰিযত্তিৱিসাৰদা, মহাঅগ্গপণ্ডিতো, তস্স সদ্ধিৱিহাৰিকো দুতিযঅগ্গপণ্ডিতো, তস্স ভাগিনেয্যো ততিযঅগ্গপণ্ডিতোতি. ততিযঅগ্গপণ্ডিতো পন অগ্গৱংসোতিপি ৱোহাৰিযতি.

তস্মিঞ্চ কালে অৰিমদ্দননগৰৱাসিনো সদ্দকোৱিদা বহৱো সন্তীতি যাৱ লঙ্কাদীপা কিত্তিঘোসো পত্থৰি. তস্মা সীহড়দীপিকা সদ্দকোৱিদা ৱীমংসেতুকামা হুত্ৱা অৰিমদ্দননগৰং আগমংসু. তদা অৰিমদ্দননগৰৱাসিনো ভিক্খূ সদ্দনীতিপ্পকৰণং দস্সেসু.

সীহড়দীপিকা চ তং দিস্ৱা উপধাৰেন্তা সদ্দৱিসযে অযং গন্থোৱিয সীহড়দীপে গন্থো ইত্থি, ইমস্মিং পকৰণে আগতৱিনিচ্ছযম্পি সকলং ন জানিম্হাতি নানাপ্পকাৰেহি থোমেসুন্তি যাৱজ্জভনা কথামগ্গো ন উপচ্ছিন্নোতি.

অৰিমদ্দননগৰে সীহড়দীপং গন্ত্ৱা পচ্চাগতো ছপ্পদো নাম সদ্ধম্মজোতিপালত্থেৰো সদ্দনযে ছেকতায সুত্তনিদ্দেসং অকাসি. পৰমত্থধম্মে চ ছেকতায সঙ্খেপৱণ্ণনং নামচাৰদীপকঞ্চ. ৱিনযে ছেকতায ৱিনযগূড়ত্থদীপনিং সীমালঙ্কাৰঞ্চ অকাসি. অত্তনা কথানং গন্থানং নিগমে সদ্ধম্ম জোতিপালোতি মূলনামেন ৱুত্তং. কুসিমনগৰে পন ছপ্পদ গামে জাতত্তা ঠানস্স নামেন ছপ্পদোতি পাকটো.

কুখননগৰে পন ছপ্পদোতি ৱোহাৰিতোপি একো থেৰো অত্থি. সো অলজ্জী দুস্সীলো. একচ্চে পন নামসামঞ্ঞলেসমত্তেন পত্তলঙ্কং সীলৱন্তং পেসলং সিক্খাকামং ছপ্পদত্থেৰং অলজ্জিদুস্সীলভাৱেন উপৱদন্তি, যথা নাম সামঞ্ঞলেসমত্তেন মল্লপুত্তং আযস্মন্তং দব্বং অসমাচাৰেনাতি.

অৰিমদ্দননগৰযেৱ অলোঙ্গচঞ্ঞিসূনামকস্স ৰঞ্ঞো কালে মহাৱিমলবুদ্ধিত্থেৰো চূড়ৱিমলবুদ্ধিত্থেৰোতি দ্ৱে থেৰা পৰিযত্তিৱিসাৰদা অহেসুং. তেসু মহাৱিমলবুদ্ধিত্থেৰো কচ্চাযনস্স সংৱণ্ণনং ন্যাসগন্থমকাসি.

কেচি পন সীহড়দীপৱাসী ৱিমলবুদ্ধিত্থেৰো তমকাসীতি ৱদন্তি. চূড়ৱিমলবুদ্ধিত্থেৰো পন ৱুত্তোদযস্স পোৰাণটীকমকাসি. ছন্দোসাৰত্থৱিকাসিনিং সদ্ধম্মঞাণত্থেৰো অকাসি. ৱচনত্থজোতিং পন ৱেপুল্লত্থেৰো অকাসি. ন্যাসগন্থস্সপোৰাণটীকং নৰপতিৰঞ্ঞো কালে একো অমচ্চো অকাসি.

সো হি ৰঞ্ঞো একং ওৰোধং পটিচ্চ জাতং একং ধীতৰং দিস্ৱা ৱানৰোৱিয লেপে লগ্গিতো তিস্সং পটিবন্ধচিত্তো হুত্ৱা লগ্গি. তমত্থং জানিত্ৱা ৰাজা এৱমাহ,– সচে এতং ইচ্ছেয্যাসি, একং গন্থং পৰিপুণ্ণৱিনিচ্ছযং গূড়ত্থং কৰোহি, সচে ত্ৱং তাদিসং গন্থং কাতুং সক্কুণেয্যাসি, এতং লভিস্সসীতি. অথ সো ন্যাসস্স সংৱণ্ণনং পোৰাণটীকং অকাসি.

ততো পচ্ছা হীনাযাৱত্তিত্ৱা ধীতৰং দত্ৱা ৰজ্জুগ্গাহামচ্চট্ঠানে ঠপেসি, যং মৰম্মৱোহাৰেন সংপ্যঙ্গইতি ৱুচ্চতি. তেন পন কতত্তা সোপি গন্থো তং নামেন ৱুচ্চতি. কাৰিকং তস্সা চ সংৱণ্ণনং ছত্তগুহিন্দস্স নাম ৰঞ্ঞো কালেধম্মসেনাপতিত্থেৰো অকাসি. তেন কিৰ কাৰপিতে নন্দগুহায সমীপে নন্দৱিহাৰে নিসীদিত্ৱা অকাসি.

তস্মিঞ্চকালে গন্থমাদনপব্বতে নন্দমূলগুহতো অৰহন্তা আগন্ত্ৱা তস্মিং ৱিহাৰে ৱস্সং উপগচ্ছিংসু. তেসং সম্মুখে কতত্তা তে চ গন্থা পণ্ডিতেহি সাৰতো পচ্চেতব্বাতি আচৰিযা ৱদন্তি.

ৱাচ্চৱাচকং পন ধম্মদস্সী নাম সামণেৰো অকাসি.

সদ্দত্থভেদচিন্তং পন অৰিমদ্দননগৰসমীপে ঠিতস্স খণিত্তিপাদপব্বতস্স সমীপে একস্মিং গামে ৱসন্তো সদ্ধম্মসিৰি নাম থেৰো অকাসি. সোযেৱ থেৰো ব্ৰহজং নাম ৱেদসত্থম্পি মৰম্মভাসায পৰিৱত্তেসি.

একক্খৰকোসং পন সদ্ধম্মকিত্তিত্থেৰো অকাসি. সো হি কলিযুগে সত্তাসীতাধিকে অট্ঠসতে সম্পত্তে মিচ্ছা দিট্ঠিকানং জলুমসঞ্ঞিতানং কুলানং ভযেন সকলেপি তম্বদীপৰট্ঠে সাসনোভাসো মিলাযতি. বহূনিপি পোত্থকানি অগ্গিভযেন নস্সেসুং.

তদা তং পৱত্তিং পস্সিত্ৱা সচে পৰিযত্তিধম্মোৱিনস্সেয্য, পটিপত্তিধম্মোপি নস্সিস্সতি, পটিপত্তিধম্মে নস্সন্তে কুতো পটিৱেধধম্মো ভৱিস্সতীতি সংৱেগং অপজ্জিত্ৱা ইমং গন্থং অকাসীতি তট্টিকাযং ৱুত্তং.

মুখমত্তসাৰং সাগৰত্থেৰো অকাসি.

কলিযুগে একাসীতাধিকে পঞ্চসতে সম্পত্তে একং দহৰপুত্তং কালঙ্কতং পটিচ্চ সংৱেগং আপজ্জিত্ৱা পচ্চেকবুদ্ধত্তং পত্থযন্তস্স জেয্যসিঙ্খনামকস্স ৰঞ্ঞো পুত্তো ক্যচ্ৱানামকো ৰাজা ৰজ্জং কাৰেসি. ধম্মৰাজাতিপি নামলঞ্ছং পটিগ্গণ্হি. তীসু পন পিটকেসু যথাভূতং ৱিজানকতায মৰম্মৱোহাৰেন ক্যচ্ৱাতি ৱোহাৰিযতি.

সো চ কিৰ ৰাজা পাড়িঅট্ঠকথাটীকাগন্থন্তৰেসু অতিছেকতায পিটকত্তযে সাকচ্ছমত্তম্পি কাতুং সমত্থো নাম নত্থীতি উগ্গহিততিপিটকো হুত্ৱা ভিক্খুসঙ্ঘম্পি দিৱসে সত্তহি ৱাৰেহি গন্থং ৱাচেতি.

খণিত্তিপাদপব্বতস্স সমীপেপি একং তড়াকং কাৰাপেত্ৱা তত্থ ৰাজাগাৰং কাৰাপেত্ৱা তত্থ নিসীদিত্ৱা গন্থং ৱাচেতি. সব্বানি পন ৰাজূনং কিচ্চানি পুত্তস্সেৱ উপৰাজস্স নিয্যাদেসি. গন্থং উগ্গণ্হন্তানং ওৰোধানমত্থায সঙ্খেপতো সদ্দবিন্দুং নাম পকৰণং পৰমত্থবিন্দুঞ্চ নাম পকৰণং অকাসি. তস্স হি চিত্তং পৰিযত্তিযংযেৱ ৰমতি. অঞ্ঞং পন ৰাজকিচ্চং সুণিতুম্পি ন ইচ্ছি. অনুৰুদ্ধৰাজা অনাগতে অহং ৰাজা ভৱেয্যামি, তদাযেৱ ইমানি তাড়িবীজানি উট্ঠহন্তূতি অধিট্ঠহিত্ৱা ৰোপেসি. তানি তস্স ৰঞ্ঞো কালে উট্ঠহিংসু. তেনেৱ অনুৰুদ্ধৰাজাযেৱাযন্তি ৰট্ঠৱাসিনো সঞ্জানিংসু. সম্মুতিৰাজা হি অনুৰুদ্ধৰাজা ক্যচ্ৱাৰাজাতি ইমে তযো একসন্তানাতি ৱদন্তি.

সো ৰাজা একম্পি চেতিযং অকাসি, ন তং নিট্ঠং অগমাসি, পৰিযত্তিযংযেৱ পৰিচাৰকত্তাতি ৰাজৱংসে আগতং. লোকসম্মুতিৱসেন কক্খড়দিনে ইট্ঠকানি কাৰাপেত্ৱা তস্মিংযেৱ দিনে ভূমিসমং কত্ৱা তস্মিংযেৱ দিনে অঞ্ঞম্পি সব্বং কাৰাপেসি. তেন মৰম্মৱোহাৰেন প্ৰস্সদা চেতিযন্তি যাৱজ্জভনা পাকটং.

তস্স ৰঞ্ঞো একা ধিভা ৱিভত্যত্থং নাম গন্থং অকাসীতি.

পুব্বে কিৰ অৰিমদ্দননগৰে উগ্গহধাৰণাদিৱসেন সাসনং অতিৱিয ৱিৰূড়মাপজ্জি. অৰিমদ্দননগৰেযেৱ হি একো ৱুড্ঢপব্বজিতো ভিক্খু গন্থং লিখিতুং সিলালেখনদণ্ডেন ইচ্ছন্তো ৰাজগেহং পাৱিসি. ৰাজা কেন আগতোসীতি পুচ্ছি. গন্থং লিখিতুং সিলালেখনদণ্ডেন ইচ্ছন্তো আগতো ম্হীতি. এৱং মহল্লকো ত্ৱং গন্থং মহুস্সাহেন পৰিযাপুণন্তোপি গন্থেসু ছেকস্স ওকাসং ন পস্সামি, সচে হিমুসলো অঙ্কুৰং উট্ঠাপেত্ৱা ৰূহেয্য, এৱং সতি ত্ৱং গন্থেসু ছেকতং আপজ্জেয্যাসীতি আহ.

ততো পচ্ছা ৱিহাৰং গন্ত্ৱা দেৱসিকং দেৱসিকং একদন্তকট্ঠপ্পমাণত্তং লেখনং উগ্গহেত্ৱা কচ্চাযনঅভিধম্মেত্থসঙ্গহপ্পকৰণং আদিং কত্ৱা আচৰিযস্স সন্তিকে উগ্গণ্হি. সো অচিৰেনেৱ গন্থেসু ছেকতং পত্ৱা মুসলে জম্বুৰুক্খঙ্কুৰং বন্ধিত্ৱা উস্সাপেত্ৱা ৰাজগেহং পাৱিসি.

অথ তং ৰাজা পুচ্ছি,-কেনআগতোসীতি. অযং মহাৰজ মুসলো অঙ্কুৰং উট্ঠাপেত্ৱা ৰূহতীতি আচিক্খিতুং আগতোম্হীতি ৱুত্তে ৰাজা এতস্স গন্থেসু ছেকতং পত্তোম্হীতি ৱুত্তং হোতীতি জানাসি. তং সচ্চং ৱা অলিকং ৱাতি ৱীমংসনত্থায মহাথেৰানং সন্তিকং পহিণি. মহাথেৰাপি গূড়ট্ঠানং পুচ্ছিংসু. সোপি পুচ্ছিতং পুচ্ছিতং ব্যাকাসি.

অথ সো ভিক্খু মহাথেৰে এৱমাহ,-তুম্হে ভন্তে মং বহূ পুচ্ছথ, অহম্পি তুম্হে পুচ্ছিতুং ইচ্ছামি, ওকাসং দেথাতি যাচিত্ৱা অঞ্ঞসমানচেতসিকন্তি এত্থ অঞ্ঞসদ্দস্স অৱধ্যাপেক্খত্তা অৱধিপদং উদ্ধৰিত্ৱা দস্সেথাতি পুচ্ছি. মহাথেৰাপি পুব্বে অমনসিকতত্তা সীঘং ৱিস্সজ্জিতুং ন সক্খিংসু. ৰাজা তমত্থং সুত্ৱা তুট্ঠচিত্তো হুত্ৱা দিসা পামোক্খনমেন আচৰিযট্ঠানে ঠপেসি. সো পন ভিক্খু অগন্থকাৰকোপি গন্থকাৰকোৱিয পচ্ছিমানং জনতানং দিন্নোপদেসৱসেন উপকাৰং কত্ৱা সাসনে উপ্পজ্জীতি. হোন্তি চেত্থ,–

অহং মহল্লকো হোমি, দুপ্পঞ্ঞো পৰিযত্তিকং;

উগ্গহং মহুস্সাহেন, ন সক্খিস্সামি জানিতুং.

এৱঞ্চ নাতিমঞ্ঞেয্য,

নাপ্পোস্সুক্কতমাপজ্জে;

সদ্ধম্মে ছেককামোৱ,

উস্সাহংৱ কৰে পোসো.

ৱুড্ঢপব্বজিতো ভিক্খু,

মহল্লকোপি দুপ্পঞ্ঞো;

আপজ্জি ছেকতং ধম্মে,

তমপেক্খন্তু সোতাৰোতি.

পুব্বে কিৰ অৰিমদ্দননগৰে মাতুগামাপি গন্থং উগ্গণ্হিংসু. যেভুয্যেন উগ্গহধাৰণাদিৱসেন পৰিযত্তিসাসনং পগ্গহেসুং. মাতুগামা হি অঞ্ঞমঞ্ঞং পস্সন্তা তুম্হে কিত্তকং গন্থং উগ্গণ্হথ, কিত্তকং গন্থং ৱাচুগ্গতং কৰোথাতি পুচ্ছি সুন্তি.

একো কিৰ মাতুগামো একং মাতুগা,মং পুচ্ছি,-ত্ৱং ইদানি কিত্তকং গন্থং ৱাচুগ্গতং কৰোসীতি. অহং পন ইদানি দহৰপুত্তেহি বলিবোধত্তা ব্যাকুলং পত্ৱা বহুং গন্থং ৱাচুগ্গতং কাতুং নসক্কা,সমন্তমহাপট্ঠানে পন কুসলত্তিকমত্তংৱ ৱাচুগ্গতং কৰোমীতি আহাতি.

ইদম্পি অৰিমদ্দননগৰৱাসীনং মাতুগামানম্পি পৰিযত্তুগ্গহণে একং ৱত্থু,–

একং কিৰ ভিক্খুং পিণ্ডায চৰন্তং একা দ্ৱাদসৱস্সিকা দহৰিত্থী পুচ্ছি,-কিন্নামোসি ত্ৱং ভন্তেতি. খেমানামাহন্তি. কথঞ্হি ভন্তে পুমাৱ সমানো ইত্থিলিঙ্গেন নামং অকাসীতি আহ. অথ অন্তোগেহে নিসিন্না মাতা সুত্ৱা ধীতৰং আহ,-ত্ৱং ৰাজাদিগণস্স লক্খণং ন জানাসীতি. আম জানামি, অযং পন খেমসদ্দো ন ৰাজাদিগণপক্খং ভজতীতি. অথ মাতা এৱমাহ,-অযং পন খেমসদ্দো একদেসেনেৱ ৰাজাদিগণপক্খং ভজতীতি.

অযং পনেত্থ ধীতু অধিপ্পাযো,-ন ৰাজাদিসদ্দো কদাচি ৰাজোতি পচ্চত্তৱচনৱসেন ওকাৰন্তো দিস্সতি ৱিনা দেৱৰাজোতিআদিসমাসৱিসযং, খেমসদ্দো পন কত্থচি খেমোতি চ খেমন্তি চ লিঙ্গন্তৰৱসেন ৰূপন্তৰং দিস্সতি, তেনেৱ খেমসদ্দো ন ৰাজাদিগণোতি ৱেদিতব্বোতি.

অযং পন মাতু অধিপ্পাযো,-খেমসদ্দো অভিধেয্যলিঙ্গত্তা তিলিঙ্গকো,যদা পন সঞ্ঞাসদ্দাধিকাৰে পচ্চত্তৱচনৱসেন খেমাতি আকাৰন্তো দিস্সতি, তদা একদেসেন খেমসদ্দো ৰাজাদিগণপক্খং ভজতীতি.

ইদম্পি একং ৱত্থু,–

অৰিমদ্দননগৰে কিৰ একস্স কুটুম্বিকস্স একো পুত্তো দ্ৱে ধীতৰো অহেসুং. একস্মিঞ্চ কালে ঘম্মাভিভূতত্তা গেহস্স উপৰিতলে নহাযিত্ৱা নিসীদি. অথ একা দাসী গেহস্স হেট্ঠা ঠত্ৱা কিঞ্চি কম্মং কৰোন্তী তস্স কুটুম্বিকস্স গুয্হট্ঠানং ওলোকেসি. তমত্থং জানিত্ৱা কুটুম্বিকো সাখং ওলোকেসীতি একং ৱাক্যং বন্ধিত্ৱা পুত্তস্স দস্সেসি,ইমস্স অত্থযোজনং কৰোহীতি. অথ পুত্তো অত্থযোজনং অকাসি,-সাখং ৰুক্খসাখং ওলেকেসি উদিক্খতীতি. অথ পচ্ছা একায ধীতুযা দস্সেসি, ইমস্স অত্থযোজনং কৰোহীতি. সাপি অত্থযোজনং অকাসি,- সা সুনখো খং আকাসং ওলোকেসি উদিক্খতীতি. অথ পচ্ছা একায ধীতুযা দস্সেসি, ইমস্স অত্থ যোজনং কৰোহীতি. সাপি অত্থযোজনং অকাসি,-সা ইত্থী খং অঙ্গজাতং ওলোকেসি মুখং উদ্ধং কত্ৱা ওলোকেসীতি.

ইদম্পি একং ৱত্থু,–