৭. কস্মিৰগন্ধাৰৰট্ঠসাসনৱংসকথামগ্গো

৭. ইদানি যথাৱুত্তমাতিকাৱসেন কস্মীৰৱন্ধাৰৰট্ঠসাসনৱংসকথামগ্গং ৱত্তুং ওকাসো অনুপ্পত্তো, তস্মা তং ৱক্খামি.

ততিযসঙ্গীতাৱসানে হি মহামোগ্গলিপুত্ততিস্সত্থেৰো মজ্ঝন্তি কত্থেৰং কস্মীৰগন্ধাৰৰট্ঠং পেসেসি,-ত্ৱং এতং ৰট্ঠং গন্ত্ৱা এত্থ সাসনং পভিট্ঠাপেহীতি. এত্থ চ কস্মীৰগন্ধাৰৰট্ঠং নাম চীনৰট্ঠসমীপে তিট্ঠতি. তেনেৱ হি অধুনা কস্মীৰগন্ধাৰৰট্ঠৱাসিনো চিনৰট্ঠৱাসিনোচ মনুস্সা অৰৱাড়স্স নাম নাগৰাজস্স উপ্পজ্জনকালতো পট্ঠায যাৱজ্জতনা নাগৰূপং কত্ৱা মানেন্তি পূজেন্তি সক্কৰোন্তি, ৱত্থভাজনাদীসুপি নাগৰূপমেৱ তে যেভুয্যেন কৰোন্তীতি.

সোচ মজ্ঝন্তিকত্থেৰোপি চতূহি ভিক্খূহি সদ্ধিং অত্থ পঞ্চমো হুত্ৱা পাটলিপুত্ততো ৱেহাসং অব্ভুগ্গন্ত্ৱা হিমৱতি অৰৱাড়দহস্স উপৰি ওতৰি. তেন খো পন সমযেন কস্মীৰগন্ধাৰৰট্ঠে সস্সপাকসমযে অৰৱাড়ো নাম নাগৰাজা অৰৱাড়দহে নিসীদিত্ৱা কৰকৱস্সং নাম ৱস্সাপেত্ৱা সস্সং হৰাপেত্ৱা মহাসমুদ্দং পাপেসি. তেৰোচ অৰৱাড়দহস্স উপৰি ওতৰিত্ৱা অৰৱাড়দহপিট্ঠিকং চঙ্কমতিপি তিট্ঠতিপি নিসীদতিপি সেয্যম্পি কপ্পেতি. নাগমাণৱকা তং দিস্ৱা অৰৱাড়স্স নাগৰাজস্স আৰোচেসুং, - মহাৰাজ একো ছিন্নভিন্নপটধৰো ভণ্ডুকাসাৱৱসনো অম্হাকং উদকং দূসেতীতি. তদা পন থেৰো অত্তানংযেৱ নাগানং দস্সেতি. নগৰাজা তাৱদেৱ কোধাভিভূতো নিক্খমিত্ৱা থেৰং দিস্ৱা মক্খং অস্সহমানো অন্তলিক্খে অনেকানি ভিংসনকানি নিম্মিনি. ততো ততো ভুসাৱাতা ৱাযন্তি, ৰুক্খা ছিজ্জন্তি, পব্বতকূটা পতন্তি মেঘাগজ্জন্তি, ৱিজ্জুংলতা নিচ্ছৰন্তি, অসনিযো ফলন্তি, ভিন্নং ৱিয গগনং উদকং পগ্ঘৰতি, ভযানকৰূপা নাগকুমাৰা সন্নিপতন্তি, সযম্পি ধূমাযতি পজ্জলতি, পহৰণৱুট্ঠিযো ৱিস্সজ্জেতি, কো অযংমুণ্ডকো ছিন্নভিন্নপটধৰোতিআদীহি ফৰুসৱচনেহি থেৰং সন্তজ্জেতি, এথ গণ্হথ হনথ নিদ্ধমথ ইমং সমণন্তি নাগবলং আণাপেসি.

থেৰো সব্বং তং ভিংসনকং অত্তনো ইদ্ধিবলেন পটিবাহিত্ৱা নাগৰাজানং আহ,–

সদেৱকোপি চে লোকো, আগন্ত্ৱা তাসযেয্য মং;

ন মে পটিবলো অস্স, জনেতুং ভযভেৰৱং.

সচেপি ত্ৱং মহিং সব্ব, সসমুদ্দং সপব্বতং;

উক্খিপিত্ৱা মহানাগ, খিপেয্যাসি মমূপৰি.

নেৱ মে সক্কুণেয্যাসি, জনেতুং ভযভেৰৱং;

অঞ্ঞদত্থু তৱেৱস্স, ৱিঘাতো উৰগাধিপাতি.

এৱং ৱুত্তে নাগৰাজা ৱিহতানুভাৱো নিপ্ফলৱাযামো দুক্খী দুম্মনো অহোসি.

তং থেৰো তঙ্খণানুৰূপায ধম্মিযা কথায সন্দস্সেত্ৱা সমাদপেত্ৱা সমুত্তেজেত্ৱা সম্পহংসেত্ৱা তীসু সৰণেসু পঞ্চসুচ সীলেসু পতিট্ঠাপেসি সদ্ধিং চতুৰাসীতিযা নাগসহস্সেহি. অঞ্ঞেপি বহূ হিমৱন্তৱাসিনো যক্খাচ গন্ধব্বাচ কুম্ভণ্ডাচ থেৰস্স ধম্মকথং সুত্ৱা সৰণেসুচ সীলেসুচ পতিট্ঠহিংসু. পঞ্চকোপি যক্খো সদ্ধিং ভৰিযায যক্খিনিযা পঞ্চহিচ পুত্তসতেহি পঠমে ফলে পতিট্ঠিতো. অথাযস্মা মজ্ঝন্তি কত্থেৰো সব্বেনাগযক্খৰক্খসে আমন্তেত্ৱা এৱমাহ,-

মাদানি কোধং জনযিত্থ, ইতো উদ্ধং যথা পুৰে;

সস্সঘাতঞ্চ মা কত্থ, সুখকামা হি পাণিনো;

কৰোথ মেত্তং সত্তেসু, ৱসন্তু মনুজা সুখন্তি.

তে সব্বেপি সাধু ভন্তেতি থেৰস্স ৱচনং পটিস্সুণিত্ৱা যথানুসিট্ঠং পটিপজ্জিংসু. তং দিৱসমেৱ নাগৰাজস্স পূজাসমযো হোতি. অথ নাগৰাজা অত্তনো ৰতনমযং পল্লঙ্কং আহৰাপেত্ৱা থেৰস্স পঞ্ঞপেসি. নিসীদি থেৰো পল্লঙ্কে. নাগৰাজাপি থেৰং বীজযমানো সমীপে অট্ঠাসি. তস্মিং খণে কস্মীৰগন্ধাৰৰট্ঠৱাসিনো আগন্ত্ৱা থেৰং দিস্ৱা অম্হাকং নাগৰাজতোপি থেৰো মহিদ্ধিকতৰোতি থেৰমেৱ ৱন্দিত্ৱা নিসিন্না. থেৰো তেসং আসিৱিসোপমসুত্তং কথেসি. সুত্তপৰিযোসানে অসীতিযাপাণসহস্সানং ধম্মাভিসমযো অহোসি. কুলসতসহস্সঞ্চ পব্বজি. ততো পভুতি চ কস্মীৰগন্ধাৰো যাৱজ্জেতনা কাসাৱপজ্জোতা ইসিৱাতপটিৱাতাএৱ.

গন্ত্ৱা কস্মীৰগন্ধাৰং, ইসি মজ্ঝন্তিকো তদা;

দুট্ঠং নাগং পসাদেত্ৱা, মোচেসি বন্ধনা বহূতি.

অধুনা পন কস্মীৰগন্ধাৰৰট্ঠে সাসনস্স অত্থঙ্গতস্সৱিয সূৰিযস্স ওভাসো ন পঞ্ঞাযতি, তস্মা তত্থ সাসনস্স পতিট্ঠানে ৱিত্থাৰেন ৱত্তব্বকিচ্চং নত্থীতি.

ইতি সাসনৱংসে কস্মীৰগন্ধাৰৰট্ঠসাসনৱংসকথামগ্গো

নাম সত্তমো পৰিচ্ছেদো.