নমো তস্স ভগৱতো অৰহতো সম্মাসম্বুদ্ধস্স

সাসনৱংসপ্পদীপিকা

বুদ্ধং সুমালী দ্ৱিপদুত্তমো তমো,

হন্ত্ৱান বোধেসিধ পঙ্কজং কজং;

মগ্গগ্গসেলম্হি সুঞট্ঠিতো ঠিতো,

সো মং চিৰং পাতু সুখং সদা সদা.

সীহড়দ্দীপতোযেৱ,

আগতেহি দিসন্তৰে;

ভিক্খূহি যাচিতো কস্সং,

সাস্নৱংসপ্পদীপিকং.

কামঞ্চ পোৰাণেহি যা,

সাস্নৱংসপ্পদিপিকা;

ৱিত্থাৰ ৱাচনামগ্গা,

ৱিৰচিতা ৱিনিচ্ছযা.

সা পন মৰম্মভাসায,

কতত্তাযেৱ এতেসং;

দীপন্তৰনিৱাসিনং,

ৱহাতি সুট্ঠুনাত্থং.

তস্মা হি মূলভাসায,

কৰিস্সামি অহং হৱে;

সংসন্দিত্ৱান গন্থেহি,

তং সল্লক্খেন্তু সাধৱোতি.

তত্ৰাযংমাতিকা –

১. নৱট্ঠানাগতসাসনৱংসকথামগ্গো,

২. সীহড়দীপিকসাসনৱংসকথামগ্গো,

৩. সুৱণ্ণভূমিসাসনৱংসকথামগ্গো,

৪. যোনকৰট্ঠসাসনৱংসকথামগ্গো,

৫. ৱনৱাসীৰট্ঠসাসনৱংসকথামগ্গো,

৬. অপৰন্তৰট্ঠসাসনৱংসকথামগ্গো,

৭. কস্মীৰগন্ধাৰৰট্ঠসাসনৱংসকথামগ্গো,

৮. মহিংসকৰট্ঠসাসনৱংসকথামগ্গো,

৯. মহাৰট্ঠসাসনৱংসৱথামগ্গো,

১০. চিনৰট্ঠসাসনৱংসকথামগ্গোচাতি.

১. নৱট্ঠানাগতসাসনৱংসকথামগ্গো

১. তত্থ চ নৱট্ঠানাগতসাসনৱংসকথামগ্গো এৱং ৱেদিতব্বো. অম্হাকঞ্হি ভগৱা সম্মাসম্বুদ্ধো ৱেনেয্যানং হিতত্থায হত্থগতং সুখং অনাদিযিত্ৱা দীপঙ্কৰস্স ভগৱতো পাদমূলে ব্যাকৰণং নাম মঞ্জূসক পুপ্ফং পিলন্ধিত্ৱা কপ্পসতসহস্সাধিকানি চত্তাৰি অসখ্যে যানি অনেকাসু জাতীসু অত্তনো খেদং অনপেক্খিত্ৱা সমতিংসপাৰমিযো পূৰেত্ৱা ৱেস্সন্তৰত্তভাৱতো চৱিত্ৱা তুসিতপুৰে দেৱসুখং অনুভৱি.

তদা দেৱেহি উয্যোজিযমানো হুত্ৱা কপিলৱত্থুম্হি হোসমতৰঞ্ঞা পভুতি অসম্ভিন্নাত্তিযৱংসিকস্স সুদ্ধো ধনস্সনাম মহাৰঞ্ঞো অগ্গমহেসিযা অসম্ভিন্নাত্তিযৱং সিকায মাযায কুচ্ছীস্মিং আসাড়িমাসস্স পুণ্ণমিযং গুৰুৱাৰে পটিসন্ধিং গহেত্ৱা অসমাসচ্চযেন ৱেসাখমাসস্স পুণ্ণমিযং সুক্কৱাৰে ৱিজাযিত্ৱা সোড়সৱস্সিককালে ৰজ্জসম্পত্তিং পত্ৱা একূনতিংসৱস্সানি অতিক্কমিত্ৱা মঙ্গলউয্যানং নিক্খমনকালে দেৱেহি দস্সিতানি চত্তাৰি নিমিত্তানি পস্সিত্ৱা সংৱেগং আপজ্জিত্ৱা মহাভিনিক্খমনং নিক্খমিত্ৱা অনোমাযনাম নদিযা তীৰে ভমৰ ৱণ্ণসন্নিভানি কেসানি ছিন্দিত্ৱা দেৱদত্তিযকাসাৱং পটিচ্ছাদেত্ৱা নে ৰঞ্জৰাযনাম নদিযা তীৰে ৱেসাখমাসস্স পুণ্ণমিযং পচ্চূসকালে সুজাতাযনাম সেট্ঠিধীতায দিন্নং পাযাসং একূনপণ্ণাসৱাৰেন পৰিভুঞ্জিত্ৱা পুৰিমিকানং সম্মাসম্বুদ্ধানং ধম্মতায সুৱণ্ণপাতিং নদিযং ওতাৰেত্ৱা মহাবোধিমণ্ডং উপসঙ্কমিত্ৱা অপৰাজিতপল্লঙ্কে নিসীদিত্ৱা অনমতগ্গসং সাৰতো পট্ঠায অত্তানং ছাযা ৱিয অনুযন্তানং অনেকসতকিলেসৱেৰীনং সীসং চতূহি মগ্গসত্থেহি ছিন্দিত্ৱা তিলোকগ্গমহাধম্মৰাজত্তং পত্ৱা পঞ্চতালীসৱস্সানং তেসু তেসু ঠানেসু তেসং তেসং সত্তানং মহাকৰুণাসমাপত্তিজালং পত্থাৰেত্ৱা দেসনাঞাণং ৱিজম্ভেত্ৱা ধম্মং দেসেত্ৱা সাসনং পতিট্ঠাপেসি. পতিট্ঠাপেত্ৱা চ পন অসীতিৱস্সাযুককালে ৱিজ্জোতযিত্ৱা নিব্বাযনপ্প দাপজালং ৱিয অনুপাদিসেসনিব্বানধাতুযা পৰিনিব্বাযি. মচ্চু ধম্মস্স চ নাম তীসু লোকেসু অতিমমাযিতব্বো এস, অতিগৰুকাতব্বো এস, অতিভাযিতব্বো এসাতি ৱিজাননসভাৱো নত্থি. ভগৱন্তংযেৱ তাৱ তিলোকগ্গপুগ্গলং আদায গচ্ছতি, কিংমঙ্গং পন অম্হে যেৱা তেৱা, অহোৱতঅচ্ছৰিযা সঙ্খাৰধম্মোতি. হোন্তি চেত্থ–

মচ্চুধম্মো চ নামেস,

নিল্লজ্জো চ অনোত্তপ্পী;

তিলোকগ্গংৱ আদায,

গচ্ছী পগেৱ অঞ্ঞেসু.

যথা গোঘাতকো চোৰো,

মাৰেতুংযেৱ আৰভি;

গোণং লদ্ধান লোকম্হি,

পযোজনংৱ এত্তকং.

তথেৱ মচ্চুৰাজা চ,

হিন্দগূনং গুণং ইধ;

ন ৱিজানাতি এসো হি,

মাৰেতুংযেৱ আৰভীতি.

সত্তাহপৰিনিব্বুতে চ ভগৱতি আযস্মা মহাকস্সপো তিযড্ঢসতাধিকেহি সহস্সমত্তেহি ভিক্খূহি সদ্ধি পাৱাতো কুসীনাৰাযং আগচ্ছন্তো অন্তৰামগ্গে ভগৱা সম্মাসম্বুদ্ধো পৰিনিব্বুতোতি সুত্ৱা অৱীতসোক ভিক্খূ ৰোদন্তে দিস্ৱা ৱুদ্ধপব্বজিতো সুভদ্দানাম ভিক্খু এৱং ৱদতি– মা আৱুসো পৰিদেৱিত্থ, নত্থেত্থ সোচিতব্বোনামকোচি, পুব্বে মযং ভৱাম সমণেন গে,ভমেন উপদ্দুতা– ইদং কৰোথ ইদং তুম্হাকং কপ্পতি, মা ইদং কৰিত্থ ন ইদং তুম্হাকং কপ্পতীতি, সেয্যথাপি ইণসাধিকেন দাসোতি, ইদানি পন মযং যং যং ইচ্ছাম, তং তং সক্কা কাতুং, যং যং পন ন ইচ্ছাম,তং তং সক্কা অকাতুন্তি. তং সুত্ৱা ঈদিসং পন ৱেৰীপুগ্গলং পটিচ্চ সম্মাসম্বুদ্ধস্স ভগৱতো সাসনং খিপ্পং অন্তৰধাৰেয্য, ইদানি সুৱণ্ণক্খন্ধসদিসো সৰীৰো সংৱিজ্জমানো যেৱ দুক্খেন নিপ্ফাদিতে সাসনে মহাভযং উপ্পজ্জি চ, ঈদিসো পুগ্গলো অঞ্ঞং ঈদিসং পুগ্গলং সহাযং লভিত্ৱা ৱুদ্ধিমাপজ্জন্তো হাপেতুং সক্কুণেয্য মঞ্ঞেতি চিত্তক্খেদং পত্ৱা ধম্মসংৱেগং লভিত্ৱা ইমং ভিক্খুং ইধেৱ সেতৱত্থং নিৱাসাপেত্ৱা সৰীৰে ভস্মেন ৱিকিৰিত্ৱা বহিদ্ধা কৰিস্সামীতি চিন্তেসি.

তদা আযস্মতো মহাকস্সপত্থেৰস্স এতদহোসি,– ইদানি সমণস্স গোতমস্স সৰীৰং সংৱিজ্জমানংযেৱ পৰিসা ৱিৱাদং কৰোন্তীতি মনুস্সা উপৱদিস্সন্তিতি. ততো পচ্ছা ইমং ৱিতক্কং ৱূপসমেত্ৱা খমিত্ৱা সম্মাসম্বুদ্ধো ভগৱা পৰিনিব্বাযমানোপি তেন পন দেসিতো ধম্মো সংৱিজ্জতি, তেন দেসিতস্স ধম্মস্স থিৰং পতিট্ঠাপনত্থায সঙ্গাযিযমানং ঈদিসেহি পুগ্গলেহি সাসনং ন অন্তৰধাযিস্সতি, চিৰং ঠস্সতি যেৱাতি মনসিকৰিত্ৱা ভগৱতো দিন্নপংসু কূলচীৱৰাদিৱসেন ধম্মানুগ্গহং অনুস্সৰিত্ৱা ভগৱতো পৰিনিব্বানতো ততিযে মাসে আসাড়িমাসস্স পুণ্ণমিতো পঞ্চমে দিৱসে ৰাজগহে সত্তপণ্ণিগুহাযং আজাতসত্তুংনাম ৰাজানং নিস্সায পঞ্চহি অৰহন্ত সতেহি সদ্ধিং সত্তমাসেহি পঠমং সঙ্গাযনং অকাসি.

তদা অট্ঠচত্তালীসাধিকসতকলিযুগং অনৱসেসতো অপনেত্ৱা কলিযুগেন সাসনং সমং কত্ৱা ঠপেসি. যদা পন অজাতসত্তু ৰঞ্ঞো ৰজ্জং পত্ৱা অট্ঠৱস্সানি অহেসুং, তদা মৰম্মৰট্ঠে তঙ্কোসঙ্গত্ৱপুৰে জম্বুদীপধজস্সনাম ৰঞ্ঞো ৰজ্জং পত্ৱা অতিৰেকপঞ্চৱস্সানি অহেসুন্তি.

ইমিস্সঞ্চ পঠমসঙ্গীতিযং আযস্মা মহাকস্সপো আযস্মা উপালি আযস্মা আনন্দো আযস্মা অনুৰুদ্ধো চাতি এৱমাদযো পঞ্চসতপ্পমাণা মহাথেৰা পঠমং সঙ্গাযিত্ৱা সাসনং অনুগ্গহেসুং. এৱং সুভদ্দস্স দুট্ঠপব্বজিতস্স দুট্ঠৱচনং সাসনস্স অনুগ্গহে কাৰণংনাম অহোসি. সুভদ্দো চ নাম দুট্ঠপব্বজিতো আতুমানগৰৱাসী অহোসি কপ্পককুলিকো. সো যদা ভগৱা আতুমানগৰং গচ্ছতি, তদা অত্তেনো পুত্তে দ্ৱে সামণেৰে কপ্পককম্মং কাৰাপেত্ৱা লদ্ধেহি তণ্ডুলতেলাদীহি ৱত্থূহি যাগুং পচিত্ৱা সসঙ্ঘস্স বুদ্ধস্স অদাসি. ভগৱা পন তানি অপ্পটিগ্গহেত্ৱা কাৰণং পুচ্ছিত্ৱা ৱিগৰহিত্ৱা অকপ্পিযসমাদানদুক্কটাপত্তিং কপ্পকপুব্বস্স ভিক্খুস্স খুৰধাৰণদুক্কটাপত্তিঞ্চ পঞ্ঞাপেসি. তং কাৰণং পটিচ্চ ৱেৰং বন্ধিত্ৱা সাসনং ৱিদ্ধংসিতুকামতায তত্তকঅযোগুড়ং গিলিত্ৱা উগ্গীৰন্তো ৱিয ঈদিসদুট্ঠৱচনং ৱদীতি.

অজাতসত্তুৰাজা চ তুম্হাকং ধম্মচক্কং হোতু, মম আণাচক্কং পৱত্তিস্সামি, ৱিস্সট্ঠা হুত্ৱা সঙ্গাযন্তূতি অনুগ্গহেসি. তেনেস পঠমং সাসনানুগ্গহো ৰাজাতি ৱেদিতব্বো, মহাকস্সপাদীনঞ্চ অৰহন্তানং পঞ্চসতানং সিসাপৰম্পৰা অনেকা হোন্তি, গণনপথং ৱীতিৱত্তা. যমেত্থ ইতো পৰং ৱত্তব্বং, তং অট্ঠকথাযং ৱুত্তনযেন ৱেদিতব্বং. তে পন মহাথেৰা সঙ্গাযিত্ৱা পৰিনিব্বাযিংসূতি. হোন্তি চেত্থ–

ইদ্ধিমন্তো চ যে থেৰা,

পঠমস্সঙ্গীতিং কত্ৱা;

সাসনং পগ্গহিত্ৱান,

মচ্চূৱসংৱ সম্পত্তা.

কিঞ্চাপি ইদ্ধিযো সন্তি,

তথাপি তা জহিত্ৱান;

নিব্বাযিংসু ৱসং মচ্চু,

পত্ৱা তে ছিন্নপক্খাৱ.

কা কথাৱ চ অম্হাকং,

অম্হাকং গহণে পন;

মচ্চুনো নত্থি সাৰো চ,

এৱং ধাৰেয্য পণ্ডিতোতি.

অযং পঠমসঙ্গীতিকথা সঙ্খেপো.

ততো পৰং ৱস্সসতং তেসং সিস্সপৰম্পৰা সাসনং ধাৰেত্ৱা আগমংসু. অথানুক্কমেন গচ্ছন্তেসু ৰত্তিদিৱেসু ৱস্সসতপৰিনিব্বুতে ভগৱতি ৱেসালিকা ৱজ্জিপুত্তকা ভিক্খূ ৱেসালিযং কপ্পতি সিঙ্গিলোণকপ্পা, কপ্পতি দ্ৱঙ্গুলকপ্পো, কপ্পতি গামন্তৰকপ্পো, কপ্পতি আৱাসকপ্পো, কপ্পতি অনুমতিকপ্পো, কপ্পতি আচিণ্ণকপ্পো, কপ্পতি আমথিতকপ্পো, কপ্পতি জড়োগিং পাতুং, কপ্পতি অদসকং নিসীদনং, কপ্পতি জাতৰূপৰজতন্তি ইমানি দসৱত্থূনি দীপেসুং.

তেসং সুসুনাগপুত্তো কাড়াসোকোনাম ৰাজা পক্খো অহোসি. তেন খো পন সমযেন আযস্মা যসো কাকণ্ডকপুত্তো ৱজ্জীসু চাৰিকং চৰমানো ৱেসালিকা কিৰ ৱজ্জিপুত্তকা ভিক্খূ ৱেসালিযং দসৱত্থূনি দিপেন্তীতি সুত্ৱা ন খো পনেতং প্পতিৰূপং, য্ৱাহং দসবলস্স সাসনৱিপত্তিং সুত্ৱা অপ্পোস্সুক্কো ভৱেয্যং, সন্ধাহং অধম্মৱাদিনো নিগ্গহেত্ৱা ধম্মং দীপেস্সামীতি চিন্তযন্তো যেন ৱেসালী, তদৱসৰি. তদা আযস্মা মহাযসো ৰেৱতসব্বকামিআদীহি সত্তসতেহি অৰহন্তেহি সদ্ধিং সঙ্গাযিস্সামীতি ৱেসালিযং ৱালুকাৰামং আগচ্ছি. ৱজ্জিপুত্তকাচ ভিক্খূ উপাৰম্ভচিত্তা কাড়াসোকংনাম ৰাজানং উপসঙ্কমিত্ৱা মযং খো মহাৰাজ ইমস্মিং মহাৱনাৰামে গন্ধকুটিং ৰক্খিত্ৱা ৱস্সাম, ইদানি মহাৰাজ অধম্মৱাদিনো অঞ্ঞে ভিক্খূ ৱিলুম্পিতুকামা ৱিদ্ধংসিতুকামা আগতাতি আৰোচেসুং. কাড়াসোকো চ মহাৰাজা আগন্তুকানং ভিক্খূনং অপ্পৱিসনত্থায নিৱাৰেথাতি অমচ্চে পেসেসি. অমচ্চাচ নিৱাৰেতুং গচ্ছন্তা দেৱতানং আনুভাৱেন ভিক্খূ ন পস্সন্তি. তদহেৱ চ ৰত্তিভাগে কাড়াসোকমহাৰাজা লোহকুম্ভীনিৰযে পতনাকাৰেন সুপিনং পস্সি. তস্স ৰঞ্ঞো ভগিনি নন্দানাম থেৰী আকাসেন আগচ্ছন্তি ধম্মৱাদিনো মহাথেৰে নিগ্গণ্হিত্ৱা অধম্মৱাদীনং ভিক্খূনং পগ্গহণে দোসবহুলতং পকাসেত্ৱা সাসনস্স পগ্গহণত্থায ওৱাদং অকাসি.

কাড়াসোকৰাজা চ সংৱেগপ্পত্তো হুত্ৱা আযস্মন্তানং মহাযসত্থেৰাদীনং খমাপেত্ৱা অজাতসত্তুৰাজা ৱিয সঙ্গাযনে পগ্গহং অকাসি.

মহাযসত্থেৰাদযো চ কাড়াসোকং ৰাজানং নিস্সায ৱালুকাৰামে ৱজ্জিপুত্তকানং ভিক্খূনং পকাসিতানি অধম্মৱত্থূনি ভিন্দিত্ৱা অট্ঠতি মাসেহি দুতিযসঙ্গাযনং অকংসু.

তদা চ মজ্ঝিমদেসে পাতলিপুত্তনগৰে সুসুনাগৰঞ্ঞো পুত্তভূতস্স কাড়াসোকৰঞ্ঞো অতিসেকং পত্ৱা দসৱস্সানি অহেসুং. পৰম্মৰট্ঠে পন সিৰিখেত্তনগৰে দ্ৱত্তগোঙ্কস্সনাম ৰঞ্ঞো অভিসিত্তকালতো পুৰে একৱস্সং অহোসি. জিনসাসনং পন ৱস্সসতং অহোসি.

ইমিস্সঞ্চ দুতিযসঙ্গীতিযং মহাযস ৰেৱত সব্বকামিপ্পমুখা সত্তসতপ্পমাণা মহাথেৰা দুতিযং সঙ্খাযিত্ৱা দুতিযং সাসনং পগ্গহেসুং.

আযস্মা মহাযসত্থেৰোচনাম পঞ্চহি এতদগ্গড়ানে হি ভগৱতা থোমিতস্স আনন্দত্থেৰস্স সদ্ধিৱিহাৰিকো অহোসি. ৱজ্জিপুত্তকানং ভিক্খূনং অধম্মৱত্থুদীপনং দুতিযসঙ্গীতিযং কাৰণমেৱ. কাড়াসোকৰাজাচ পগেৱ অধম্মৱাদীভিক্খূনং সহাযোপি সমানো পুন ধম্মৱাদিভিক্খূনং সহাযো হুত্ৱা অনুগ্গহং অকাসি. তস্মা দুতিযসাসনপগ্গহো ৰাজাতি ৱেদিতব্বো.

দুতিযসঙ্গীতিযং পন মহাযসত্থেৰ ৰেৱত সব্বকামিপ্পমুখানং সত্তসতানং মহাথেৰানং সিস্সপৰম্পৰা অনেকা হোন্তি, গণনপথং ৱীতিৱত্তা. যমেত্থ ইতো পৰং ৱত্তব্ব, তং অট্ঠকথাযং ৱুত্তনযেন ৱেদিতব্বং. তে পন মহাথেৰা দুতিযং সঙ্গাযিত্ৱা পৰিনিব্বাযিংসূতি. হোন্তি চেত্থ–

বুদ্ধিমন্তো চ যে থেৰা,

দুতিযস্সঙ্গিতিং কত্ৱা;

সাসনং পগ্গহিত্ৱান,

মচ্চূৱসংৱ সম্পত্তা.

ইদ্ধিমন্তোপি যে থেৰা,

মচ্চুনো তাৱ ৱসং গমুং;

কথংযেৱ মযং মুত্তা,

ততো আৰক মুচ্চনাতি;

অযং দুতিযসঙ্গীতিকথাসঙ্খেপো.

ততো পৰং অট্ঠতিংসাধিকানি দ্ৱেৱস্সসতানি সম্মাসব্বুদ্ধস্স ভগৱতো সাসনং নিৰাকুলং অহোসি নিৰব্বুদং. অট্ঠতিংসাধিকে পন দ্ৱিৱস্সসতে সম্পত্তে পাটলিপুত্ত নগৰে সিৰিধম্মাসোকস্সনাম ৰঞ্ঞো কালে নিগ্ৰোধসামণেৰং পটিচ্চ বুদ্ধসাসনে পসীদিত্ৱা ভিক্খুসঙ্ঘস্স লাভসক্কাৰং বাহুল্লং অহোসি. তদা সট্ঠিসহস্সমত্তা তিত্থিযা লাভসক্কাৰং অপেক্খিত্ৱা অপব্বজিতাপি পব্বজিতাৱিয হুত্ৱা উপাসথপৱাৰণাদিকম্মেসু পৱিসন্তি, সেয্যথাপিনাম হংসানং মজ্ঝে বকা, যথা চ গুন্নং মজ্ঝে গৱজা, যথা চ সিন্ধৱানং মজ্ঝে গদ্ৰভাতি.

তদা ভিক্খুসঙ্ঘো ইদানি অপৰিসুদ্ধা পৰিসাতি মনসি কৰিত্ৱা উপোসথং ন অকাসি. সাসনে অব্বুদং হুত্ৱা সত্তৱস্সানি উপোসথপৱাৰণানি ছিজ্জন্তি. সিৰিধম্মাসো কো চ ৰাজা তং সুত্ৱা তং অধিকৰণং ৱূপসমেহি উপোসথং কাৰাপেহীতি একং অমচ্চং পেসেসি. অমচ্চো চ ভিক্খূ উপোসথং অকত্তুকামে কিং কৰিস্সামীতি ৰাজানং পটিপুচ্ছিতুং অৱিসহতায সযং মূড়ো হুত্ৱা অঞ্ঞেন মূড়েন মন্থেত্ৱা সচে ভিক্খুসঙ্ঘো উপোসথং ন কৰেয্য, ভিক্খুসঙ্ঘং ঘাতেতুকামো মহাৰাজাতি সযং মূড়ো হুত্ৱা মূড়স্স সন্তিকা মূড়ৱচনং সুত্ৱা ৱিহাৰং গন্ত্ৱা উপোসথং অকত্তুকামং ভিক্খুসঙ্ঘং ঘাতেসি.

ৰাজা চ তং সুত্ৱা অযং বালো মযা অনাণত্তোৱ হুত্ৱা ঈদিসং লুদ্দকম্মং অকাসি, অহং পাপকম্মতো মুচ্চিস্সামিৱা মাৱাতি দ্ৱড়কজাতো হুত্ৱা মহামোগ্গলিপুত্ত তিস্সত্থেৰং গঙ্গায পতিসোততো আনেত্ৱা তং কাৰণং থেৰং পুচ্ছি. থেৰো চ দীপকতিত্তিৰজাতকেন অচেতনতায পাপকম্মতো মোচেস্সসিতি ৱিস্সজ্জেসি, সত্তাহম্পি তিত্থিযানং ৱাদং সিৰিধম্মাসোকৰঞ্ঞো সিক্খাপেসি, ৱাদেন ৱাদং তুলযিত্ৱা সট্ঠিসহস্সমত্তে তিত্থিযে সাসনবাহিৰং অকাসি. তদা পন উপোসথং অকাসি. ভগৱতা ৱুত্তনিযামেনেৱ কথাৱত্থুঞ্চ ভিক্খুসঙ্ঘমজ্ঝে ব্যাকাসি. অসোকাৰামে চ সহস্সমত্তা মহাথেৰা নৱহি মাসেহি সঙ্গাযিংসুং.

তদা মজ্ঝিমদেসে পাটলিপুত্তনগৰে সিৰিধম্মাসোকৰঞ্ঞো ৰজ্জং পত্ৱা অট্ঠাৰসৱস্সানি অহেসুং. মৰম্মৰট্ঠে পন সিৰিখেত্তনগৰে ৰম্বোঙ্কস্সনাম ৰঞ্ঞো ৰজ্জং পত্ৱা দ্ৱাদস ৱস্সানি অহেসুন্তি.

ইমিস্সঞ্চ ততিযসঙ্গীতিযং মহামোগ্গলিপুত্ততিস্সত্থেৰোনাম দুতিযসঙ্গাযকেহি মহাথেৰেহি ব্ৰহ্মলো কং গন্ত্ৱা সাসনস্স পগ্গহণত্থং তিস্সনাম মহাব্ৰহ্মানং আযাচিত নিযামেন ততো চৱিত্ৱা ইধ মোগ্গলিযানাম ব্ৰাহ্মণিযা কুচ্ছিম্হি নিব্বত্তসত্তো.

লাভসক্কাৰং অপেক্খিত্ৱা সট্ঠিসহস্সমতানং তিত্থিযানং সমণালযং কত্ৱা উপোসথপৱাৰণাদীসু কম্মেসু পৱেসনং পৰিসায অসুদ্ধত্তা সত্তৱস্সানি উপোসথস্স অকৰণঞ্চ সাসনস্স পগ্গহণে কাৰণমেৱ. মহামোগ্গলিপুত্ততিস্স মজ্ঝন্তিক মহাৰেৱপ্পমুখা মহাথেৰা ততিযং সঙ্গাযিত্ৱা ততিযং সাসনং পগ্গহেসুং.

সিৰিধম্মাসোকৰাজা চ তিত্থিযানং ৱাদং সল্লক্খেত্ৱা তিত্থিযে বহিসাসনকৰণাদীহি সাসনস্স পগ্গহো ৰাজাতি ৱেদিতব্বো. মহামোগ্গলিপুত্ততিস্স মজ্ঝিন্তিক মহাৰেৱপ্পমুখানং সহস্সমত্তানং মহাথেৰানং সিস্সপৰম্পৰা অনেকা হোন্তি, গণনপথং ৱীতিৱত্তা. যমেত্থ ইতো পৰং ৱত্তব্বং, তং অট্ঠকথাযং ৱুত্তনযেন ৱেদিতব্বং. তে পন মহাথেৰা ততিযং সঙ্গাযিত্ৱা পৰিনিব্বাযিংসূতি. হোন্তি চেত্থ–

মহিদ্ধিকাপি যে থেৰা,

সঙ্গাযিত্ৱান সাসনে;

মচ্চূৱসংৱ গচ্ছিংসু,

অব্ভগব্ভংৱ ভাকৰো.

যথা এতেচ গচ্ছন্তি,

তথা মযম্পি গচ্ছাম;

কোনাম মচ্চুনা মুচ্চে,

মচ্চূপৰাযনা সত্তা.

তস্মা হি পণ্ডিতো পোসো,

নিব্বানং পন অচ্চুতং;

তস্সেৱ সচ্ছিকত্থায,

পুঞ্ঞং কৰেয্য সব্বদাতি.

অযং ততিযসঙ্গীতিকথাসঙ্খেপো.

ততো পৰং কত্থ সম্মাসম্বুদ্ধস্স ভগৱতো সাসনং সুট্ঠু পতিট্ঠহিস্সতীতি ৱিমংসিত্ৱা মহামোগ্গলিপুত্ততিস্সত্থেৰো পচ্চন্তদেসে জিনসাসনস্স সুপ্পতিট্ঠিযমানভাৱং পস্সিত্ৱা নৱট্ঠানানি জিনসাসনস্স পতিট্ঠাপনত্থায ৱিসুং ৱিসুং মহাথেৰে পেসেসি. সেয্যথিদং. মহামহিন্দত্থেৰং সীহড়দীপং পেসেসি-ত্ৱং এতং দীপং গন্ত্ৱা তত্থ সাসনং পতিট্ঠপেহীতি, সোণত্থেৰং উত্তৰত্থেৰঞ্চসুৱণ্ণভূমিং, মহাৰক্খিতত্থেৰং যোনকলোকং, ৰক্খিতত্থেৰং ৱনৱাসীৰট্ঠং, যোনকধম্মৰক্খিতত্থেৰং অপৰন্তৰট্ঠং, মজ্ঝন্তি কত্থেৰং কস্মীৰগন্ধা ৰৰট্ঠং, মহাৰেৱত্থেৰং মহিংসকমণ্ডলং, মহাধম্মৰক্খিতত্থেৰং মহাৰট্ঠং, মজ্ঝিমত্থেৰং চীনৰট্ঠন্তি. তত্থ চ উপসম্পদপহোনকেন সঙ্ঘেন সদ্ধিং পেসেসি. তে চ মহাথেৰা ৱিসুং ৱিসুং গন্ত্ৱা সাসনং তত্থ তত্থ পতিট্ঠাপেসুং. পতিট্ঠাপেত্ৱা চ তেসু তেসু ঠানেসু ভিক্খূনং কাসাৱপজ্জোতেন ৱিজ্জোতমানা অব্ভহিমধূৰজোৰাহুসঙ্খাতেহি ৱিমত্তো ৱিয নিসানাথো জিনসাসনং অনন্তৰাযং হুত্ৱা পতিট্ঠাসি.

তেসু পন নৱসু ঠানেসু সুৱণ্ণভূমিনাম অধুনা সুধম্মনগৰমেৱ. কস্মা পনেতং ৱিঞ্ঞাযতীতি চে. মগ্গানুমানতো ঠানানুমানতো ৱা. কথং মগ্গানুমানতো. ইতো কিৰ সুৱণ্ণভূমি সত্তমত্তানি যোজনসতানি হোন্তি, একেন ৱাতে ন গচ্ছন্তী নাৱা সত্তহি অহোৰত্তেহি গচ্ছতি, অথেকস্মিং সমযে এৱং গচ্ছন্তি নাৱা সত্তাহম্পি নদিযা ৱট্টমচ্ছ পিট্ঠে নেৱ গতাতি অট্ঠকথাযং ৱুত্তেন সীহড়দীপতো সুৱণ্ণভূমিং গতমগ্গপ্পমাণেন সুখম্মপুৰতো সীহড়দীপং গতমগ্গপ্পমাণং সমেতি. সুধম্মে পুৰতো কিৰ হি হিংসড়দীপং সত্তমত্তানি যোজনসতানি হোন্তি, উজুং ৱাযুআগমনকালে গচ্ছন্তি ৱাযুনাৱা সত্তহি অহোৰত্তেহি সম্পাপুণাতি. এৱংমগ্গানুমানতো ৱিঞ্ঞাযতি.

কথং ঠানানুমানতো. সুৱণ্ণভূমি কিৰ মহাসমুদ্দসমীপে তিট্ঠতি, নানাৱেৰজ্জকানম্পি ৱাণিজানং উপসঙ্কমনট্ঠানভূতং মহাতিত্থং হোতি. তেনেৱ মহাজনককুমাৰাদযো চম্পানগৰাদিতো সংৱোহাৰত্থায নাৱায সুৱণ্ণভূমিং আগমংসূতি. সুধম্মপুৰম্পি অধুনা মহাসমুদ্দসমীপেযেৱ তিট্ঠতি. এৱং ঠানানুমাসতো ৱিঞ্ঞাযতীতি.

অপৰে পন সুৱণ্ণভূমিনাম হৰিভুঞ্জৰট্ঠংযেৱ, তত্থ সু ৱণ্ণস্স বাহুল্লত্তাতি ৱদন্তি. অঞ্ঞে পন সিযামৰট্ঠংযেৱাতি ৱদন্তি. তং সব্বং ৱিমংসিতব্বং.

অপৰন্তং নাম ৱিসুং একৰট্ঠমেৱাতি অপৰে ৱদন্তি. অঞ্ঞে পন অপৰন্তংনাম সুনাপৰন্তৰট্ঠমেৱাতি ৱদন্তি. তং যুত্তমেৱ. কস্মা অপৰন্তং নাম সুনাপৰন্তৰট্ঠমেৱাতি ৱিঞ্ঞাযতীতি চে. অট্ঠকথাসু দ্ৱীহি নামেহি ৱুত্তত্তা. উপৰিপণ্ণাসঅট্ঠকথাযঞ্হি সড়াযতনসংযুত্তট্ঠকথাযঞ্চ অট্ঠকথাচৰিযেহি সুনাপৰন্তৰট্ঠে কোণ্ডধানত্থেৰেন সলাকাদানাধিকাৰে লদ্ধেতদগ্গট্ঠানতং দস্সন্তেহি অপৰন্তৰট্ঠং সুন সদ্দেন যোজেত্ৱা ৱুত্তং. ধম্মপদট্ঠকথাযং পন অঙ্গুত্তৰট্ঠকথাযঞ্চ তমেৱ ৰট্ঠং ৱিনা সুনসদ্দেন ৱুত্তং. সুনসদ্দো চেত্থ পুত্তপৰিযাযো. মন্ধাতুৰঞ্ঞো জেট্ঠপুত্তো চতুদ্দীপৱাসি নো পক্কোসিত্ৱা তেসং ৱিসুং ৱিসুং নিৱাসট্ঠানং নিয্যাদেসি. তত্থ উত্তৰদীপৱাসীনং ঠানং কুৰুৰট্ঠংনাম, পুব্বদীপৱাসীনং পন ৱেদেহৰট্ঠংনাম, পচ্ছিমদীপৱাসীনং অপৰন্তং নাম. ভত্তপচ্ছিমদীপে জাতত্তা তে সুনসদ্দেন ৱুত্তা. তত্ৰ জাতাপি হি তেসং পুত্তাতিৱা সুনাতিৱা ৱুত্তা, যথা ৱজ্জিপুত্তকা ভিক্খূতি. ৱত্তিচ্ছাৱসেন ৱা ৱাচাসিলিট্ঠৱসেন চ ইদমেৱ সুনসদ্দেন ৱিসেসেত্ৱা ৱোহৰন্তীতি দট্ঠব্বং.

যোনকৰট্ঠংনাম যৱনমনুস্সানং নিৱাসট্ঠানমেৱ, যংজঙ্গমঙ্ঘইতি ৱুচ্চতি.

ৱনৱাসীৰট্ঠংনাম সিৰিখেত্তনগৰট্ঠানমো. কেচি পন ৱনৱাসীৰট্ঠংনাম একং ৰট্ঠমেৱ, ন সিৰিখেত্তনগৰট্ঠানন্তি ৱদন্তি. তং ন সুন্দৰং. সিৰিখেত্তনগৰট্ঠানমেৱ হি ৱনৱাসীৰট্ঠং নাম. কস্মা পনেতং ৱিঞ্ঞাযতীতিচে. ইমস্স অম্হাকং ৰঞ্ঞো ভাতিকৰঞ্ঞো কালে সিৰিখেত্তনগৰে গুম্ভেহি পটিচ্ছাদিতে একস্মিং পথৱিপুঞ্জে অন্তো নিম্মুজ্জিত্ৱা ঠিতং পোৰাণিকং একং লোহমযবুদ্ধপটিপিব্বং পটিলভি, তস্স চ পল্লঙ্কে ইদং ৱনৱাসীৰট্ঠৱাসীনং পূজনত্থাযাতিআদিনা পোৰাণলেখনং দিস্সতি, তস্মা যেৱেতং ৱিঞ্ঞাযতীতি.

কস্মীৰগন্ধাৰৰট্ঠংনাম কস্মীৰৰট্ঠং গন্ধাৰৰট্ঠঞ্চ. তানি পন ৰট্ঠানি একাবদ্ধানি হুত্ৱা তিট্ঠন্তি. তেনেৱ মজ্ঝন্তি কত্থেৰং একং দ্ৱীসু ৰট্ঠেসু পেসেসি. জনপদত্তা পন নপুংসকেকত্তং ভৱতি. তদা পন একস্স ৰঞ্ঞো আণায পতিট্ঠানৱিসযত্তা একত্তৱচনেন অট্ঠকথাযং ৱুত্তন্তিপি ৱদন্তি.

মহিংসকমণ্ডলংনাম অন্ধকৰট্ঠং, যং যক্খপুৰৰট্ঠন্তি ৱুচ্চতি.

মহাৰট্ঠংনাম মহানগৰৰট্ঠং. আধুনা হি মহাৰট্ঠমেৱ ন গৰসদ্দেন যোজেত্ৱা মহানগৰৰট্ঠন্তি ৱোহৰন্তীতি. সিযামৰট্ঠন্তিপি ৱদন্তি আচৰিযা.

চিনৰট্ঠংনাম হিমৱন্তেন একাবদ্ধং হুত্ৱা ঠিতং চীনৰট্ঠং যে ৱাতি.

ইদং সাসনস্স নৱসু ঠানেসু ৱিসুং ৱিসুং পতিট্ঠানং.

ইদানি আদিতো পট্ঠায থেৰপৰম্পৰকথা ৱত্তব্বা. সম্মাসম্বুদ্ধস্স হি ভগৱতো সদ্ধিৱিহাৰিকো উপালিত্থে ৰো,তস্স সিস্সো দাসকত্থেৰো, তস্স সিস্সো সোণকত্থেৰো, তস্স সিস্সো সিগ্গৱত্থেৰো চন্দৱজ্জিত্থে ৰো চ, তেসং সিস্সো মোগ্গলিপুত্ততিস্সত্থেৰোতি ইমে পঞ্চমহাথেৰা সাসনৱংসে আদিভূতা আচৰিযপৰম্পৰানাম. তেসঞ্হি সিস্সপৰম্পৰভূতা থেৰপৰম্পৰা যাৱজ্জতনা ন উপচ্ছিন্ধন্তি. আচৰিযপৰম্পৰায চ লজ্জিভিক্খূ যেৱ পৱেসেত্ৱা কথেতব্বা নো অলজ্জিভিক্খূ. অলজ্জীভিক্খূ নাম হি বহুস্সুতাপি সমানা লাভগৰুলোকগৰুআদিহি ধম্মতন্তি নাসেত্ৱা সাসনৱৰে মহাভযং উপ্পাদেন্তীতি. সাসনৰক্খনকম্মংনাম হি লজ্জীনংযেৱ ৱিসযো নো অলজ্জীনং. তেনাহু পোৰাণা থেৰা, অনাগতে সাসনং কো নাম ৰক্খিস্সতীতি অনুপেক্খিত্ৱা অনাগতে সাসনং লজ্জিনো ৰক্খিস্সন্তি, লজ্জিনো ৰক্খিস্সন্তি, লজ্জিনো ৰক্খিস্সন্তীতি তিক্খাত্তুং ৱাচং নিচ্ছাৰেসুং. এৱং মজ্ঝিমদেসেপি অলজ্জীপুগ্গলা বহু সন্তীতি ৱেদিতব্বা.

পৰিনিব্বানতো হি ভগৱতো ৱস্সসতানং উপৰি পুব্বে ৱুত্তনযেনেৱ ৱজ্জিপুত্তকা ভিক্খূ অধম্মৱত্থূনি দীপেত্ৱা পঠমসঙ্গীতিকালে বহিকতেহি পাপভিক্খূহি সদ্ধিং মন্তেত্ৱা সহাযং গৱেসেত্ৱা মহাসঙ্গীতিৱোহাৰেন মহাথেৰা ৱিয সঙ্গীতিং অকংসু. কত্ৱা চ ৱিসুং গণা অহেসুং. অহোৱত ইদং হাসিতব্বকম্মং, সেয্যথাপি নাম জৰসিঙ্গালো চতুপদসামঞ্ঞেন মানং জপ্পেত্ৱা অত্তানং সীহং ৱিয মঞ্ঞিত্ৱা সীহো ৱিয সীহনাদং নদীতি. তে পাৱচনং যথা ভূতং অজানিত্ৱা সদ্দচ্ছাযামত্তেন যথাভূতং অত্থং নাম সিংসু. কিঞ্চি পাৱচনম্পী অপনেসুং. তঞ্চ সকগণেযেৱ হোতি, ন ধম্মৱাদীগণে. ধম্মৱিনযং ৱিকোপেত্ৱা যথিচ্ছিত ৱসেনেৱ চৰিংসু. অযং পন মহাসঙ্গীতিনাম একো অধম্মৱাদীগণো.

ততো পচ্ছা কালং অতিক্কন্তে ততোযেৱ অঞ্ঞমঞ্ঞং ৱাদতো ভিজ্জিত্ৱা গোকুলিকোনাম একো গণো একব্যোহাৰোনাম একোতি দ্ৱে গণা ভিজ্জিংসু. ততো পচ্ছা গোকুলিকগণগণতোযেৱ অঞ্ঞমঞ্ঞং ভিজ্জিত্ৱা বহুস্সুতিকোনাম একো গণো পঞ্ঞত্তিৱাদোনাম একোতি দ্ৱে গণা ভিজ্জিংসু. পুনপি তেহিযেৱ গণেহি চেতিযৱাদোনাম একো গণো ভিজ্জি.

ততো পচ্ছা চিৰকালং অতিক্কন্তে ধম্মৱাদীগণেহি ৱিসভাগগণং পৱিসিত্ৱা মহিংসাসকোনাম একোগণো ৱজ্জিপুত্তকোনাম একোতি দ্ৱে গণা ভিজ্জিংসু. ততো পচ্ছাপি ৱজ্জিপুত্তকগণতোযেৱ অঞ্ঞমঞ্ঞং ভিজ্জিত্ৱা ধম্মুত্তৰিকোনাম একো গণো, ভদ্দযানিকোনাম একো, ছন্নাগাৰিকোনাম একো, সমুতিকোনাম একোতি চত্তাৰো গণা ভিজ্জিংসু.

পুনপি মহিংসাসকগণতো অঞ্ঞমঞ্ঞং ভিজ্জিত্ৱা সব্বত্থিৱাদোনাম একো গণো, ধম্মগুত্তিকোনাম একো, কস্সপিযোনাম একো, সঙ্কন্তিকোনাম একো, সুত্তৱাদো নাম একোতি পঞ্চ গণা ভিজ্জিংসু.

এৱং মজ্ঝিমদেসে দুতিযসঙ্গীতিং সঙ্গাযন্তানং মহাথেৰানং ধম্মৱাদীথেৰৱাদগণতো ৱিসুং ৱিসুং ভিজ্জমানা অধম্মৱাদীগণা সত্তৰস অহেসুং. তে চ অধম্মৱাদীগণা সাসনে থেৰপৰম্পৰায অনন্তো গধা. তে হি সাসনে উপকাৰা ন হোন্তি, থেৰপৰম্পৰায চ পৱেসেত্ৱা গণ্হিতুং ন সক্কা, যথা হংসগণে বকো, যথা চ গো গণে গৱজো, যথা চ সুৱণ্ণগণে হাৰকুটোতি.

মহাকস্সপত্থেৰাদিতো পন আগতা থেৰপৰম্পৰা উপালি দাসকো চেৱাতিআদিনা পৰিৱাৰখন্ধকে সমন্তপাসাদিকট্ঠকথাযঞ্চ আগতনযেনেৱ ৱেদিতব্বা.

উপালিত্থেৰাদীনং পৰিসুদ্ধাচাৰাদীনি অনুমানেত্ৱা যাৱ মোগ্গলিপুত্ততিস্সত্থেৰা, তাৱ তেসং থেৰানং পৰিসুদ্ধা চাৰাদীনীতি সক্কা ঞাতুং, সেয্যথাপি নদিযা উপৰিসোতে মেঘৱস্সানি অনুমানেত্ৱা অধোসোতে নদিযা উদকস্স বাহুল্লভাৱো ৱিঞ্ঞাতুং সক্কাতি অযং কাৰণানুমাননযো নাম.

যাৱ পন মোগ্গলিপুত্ততিস্সত্থেৰা, তাৱ থেৰানং পৰিসুদ্ধাচাৰাদীনি অনুমানেত্ৱা উপালিত্থেৰস্স পৰিসুদ্ধাচাৰাদীনীতি সক্কা ঞাতুং, সেয্যথাপি নাম উপৰিধূমং পস্সিত্ৱা অনুমানেত্ৱা অগ্গি অত্থীতি সক্কা ঞাতুন্তি অযং ফলানুমানন যো নাম.

অদিভূতস্স পন উপালিত্থেৰস্স অৱসানভূতস্স চ মোগ্গলিপুত্ততিস্সত্থেৰস্স পৰিসুদ্ধাচাৰাদীনি অনুমানেত্ৱা মজ্ঝে দাসকসোণসিগ্গৱাদীনং থেৰানং পৰিসুদ্ধাচাৰাদীনিতি সক্কা ঞাতুং, সেয্যথাপি নাম সিলাপট্টস্স ওৰভাগে পাৰভাগে চ মিগপদৱড়ঞ্জনং দিস্ৱা অনুমানেত্ৱা মজ্ঝে অপাকটং পদৱড়ঞ্চনং অত্থীতি সক্কা ঞাতুন্তি অযং মিগপদৱড়ঞ্জন নযো নাম.

এৱং তীহি নযেহি অযং থেৰৱাদগণো ধম্মৱাদীলজ্জিপেসলোতি ৱেদিতব্বো. এৱমুপৰিপি নযো নেতব্বো. থেৰপৰম্পৰা চ যাৱ পোত্থকাৰুড়া পৰিৱাৰখন্ধকে সমন্ত পাসাদিকাযঞ্চ ততো মহিন্দো ইট্টিযোতিআদিনা ৱুত্ত নযেন ৱেদিতব্বাতি.

ইতি সাসনৱংসে নৱট্ঠানাগতসাসনৱংসকথামগ্গো

নাম পঠমো পৰিচ্ছেদো.

২. সীহড়দীপিকসাসনৱংসকথামগ্গো

২. ইদানি সীহড়দীপসাসনকথামগ্গং ৱত্তুং ওকাসো অনুপ্পত্তো, তস্মা তং ৱক্খামি.

সীহড়দীপঞ্হি সাসনস্স পতিট্ঠানভূতত্তা চেতিযগব্ভসদিসং হোতি. সম্মাসম্বুদ্ধো কিৰ সীহড়দীপং ধৰমানকালেপি তিক্খত্তুং অগমাসি. পঠমং যক্খানং দমনত্থং এককোৱ গন্ত্ৱা যক্খে দমেত্ৱা মযি পৰিনিব্বুতে সীহড়দীপে সাসনং পতিট্ঠহিস্সতীতি তম্বপণ্ণিদীপে আৰক্খং কৰোন্তো তিক্খত্তুং দীপং আৱিঞ্ছি. দুতিযং মাতুলভাগিনেয্যানং নাগৰা জূনং দমনত্থায এককোৱ গন্ত্ৱা তে দমেত্ৱা অগমাসি. ততিযং পঞ্চভিক্খুসতপৰিৱাৰো গন্ত্ৱা মহাচেতিযট্ঠানে চ থূপাৰামচেতিযট্ঠানে চ মহাবোধিপতিট্ঠিতট্ঠানে চ মহিযঙ্গণচেতিযট্ঠানে চ মুদিঙ্গণচেতিযট্ঠানে চ দীঘৱাপি চেতিযট্ঠানে চ কল্যাণিযচেতিযট্ঠানে চ নিৰোধসমাপত্তিং সমাপজ্জিত্ৱা নিসীদি.

তদা চ পন সাসনং ওগাহেত্ৱান তাৱ তিট্ঠতি. পচ্ছা পন যথাৱুত্তত্থেৰপৰম্পৰায সমভিনিৱিট্ঠেন মহামোগ্গলিপুত্ততিস্সত্থেৰেন পেসিতো মহিন্দত্থেৰো জিনচক্কে পঞ্চতিংসাধিকে দ্ৱিসতে সম্পত্তে দুতিযকত্তিকমাসে ইট্টিযেন উত্তিযেন সম্বুলেন ভদ্দসালেন চাতি এতেহি থেৰেহি সদ্ধিং সীহড়দীপং অগমাসি. সোণুত্তৰত্থেৰাদযো জিনচক্কে পঞ্চতিংসাধিকে দ্ৱিসতে সম্পত্তে দুতিযকত্তিকমাসেযেৱ সাসনস্স পতিট্ঠাপনত্থায অত্তনো অত্তনো সম্পত্তভাৰভূতং তং তং ঠানং অগমংসু.

মহামহিন্দত্থেৰো পন সত্তমাসানি আগমেত্ৱা জিনচক্কে ছত্তিংসাধিকে দ্ৱিসতে সম্পত্তে জেট্ঠমাসস্স পুণ্ণমিযং সীহড়দীপং সাসনস্স পতিট্ঠাপনত্থায অগমাসি. তেনেৱ তেসু নৱসু ঠানেসু সীহড়দীপং ছত্তিংসাধিকে দ্ৱিস তে অগমাসি. অঞ্ঞানি পন অট্ঠ ঠানানি পঞ্চতিংসাধিকদ্ৱিসতেযেৱ অগমাসীতি ৱিসুংৱ ৱত্থপেতব্বো.

কস্মা পন মহামহিন্দত্থেৰো সত্তমাসানি আগমেত্ৱা সব্বপচ্ছা সীহড়দীপং গচ্ছতীতি. সীহড়দীপে মুটভিৱো নাম ৰাজা জৰাদুব্বলো অহোতি, সাসনং পগ্গহেতুং অসমত্থো, তস্স পন পুত্তো দেৱানং পিয তিস্সো নাম ৰাজকুমাৰো দহৰো সাসনং পগ্গহেতুং সমত্থো ভৱিস্সতি, সো চ দেৱানং ৱিযতিস্সো ৰজ্জং তাৱ লভতু ৱেদিস্সকগিৰিনগৰে মাতুযা সদ্ধিং ঞাতকে তাৱ পস্সামীতি অপেক্খিত্ৱা সত্তমাসানি আগমেত্ৱা ছত্তিংসাধিকদ্ৱিসতেযেৱ জিনচক্কে মহামহিন্দত্থেৰো সীহড়দীপং গচ্ছতীতি ৱেদিতব্বং.

মহামহিন্দত্থেৰো চ ইট্টিযাদীহি থেৰেহি চতূহি ভাগিনেয্যেন সুমনসামণেৰেন ভণ্ডুকেন নাম উপাসকে ন চাতি এতেহি সদ্ধিং ছত্তিংসাধিকে দ্ৱিসতে জিনচক্কে জেট্ঠমাসপুণ্ণমিযং সুৱণ্ণহংসা ৱিয জেট্ঠমাসে নভং উগ্গন্ত্ৱা আকাসমগ্গেন অনুৰাধপুৰস্স পুৰত্থিমদিসাভাগে মিস্স কপব্বতকূটে পতিট্ঠাসি.

জেট্ঠমাসস্স চ পুণ্ণমিযং লঙ্কাদীপে জেট্ঠমূলনক্খত্তসভা হুত্ৱা মনুস্সা ছণং অকংসু. তেনেৱাহ সাৰত্থদীপনিযং নাম ৱিনযডীকাযং, জেট্ঠমাসস্স পুণ্ণমিযং জেট্ঠনক্খত্তং মূলনক্খত্তং ৱা হোতীতি. তত্থ চ পুণ্ণমিনক্খত্তং ৰাজমত্তন্তে পুণ্ণমিনক্খত্তৱিচাৰণনযেন ৱুত্তন্তি দট্ঠব্বং.

দেৱানং পিয তিস্সো চ ৰাজা নক্খত্তং নাম ঘোসাপেত্ৱা ছণং কাৰেথাতি অমচ্চে আণাপেত্ৱা চত্তালী সপুৰিসসহস্সপৰিৱাৰো নগৰম্হা নিক্খমিত্ৱা যেন মিস্স কপব্বতো, তেন পাযাসি মিগৱং কীড়িতুকামো. অথ তস্মিং পব্বতে অধিৱত্থা একা দেৱতা মিগৰূপেন ৰাজানং ফলোভেত্ৱা পক্কোসিত্ৱা থেৰস্স অভিমুখং অকাসি.

থেৰো ৰাজানং আগচ্ছন্তং দিস্ৱা মমংযেৱ ৰাজা পস্সতু মা ইতৰেতি অধিট্ঠহিত্ৱা তিস্স তিস্স ইতো এহীতি আহ. ৰাজা তং সুত্ৱা চিন্তেসি, ইমস্মিং দীপে জাতো সকলোপি মনুস্সো মং তিস্সোতি নামং গহেত্ৱা আলপিতুং সমত্থো নাম নত্থি, অযং পন ভিন্নভিন্নপটধৰো ভণ্ডুকাসাৱ ৱসনো মং নামেন আলপতি, কো নুখো অযং ভৱিস্সতি, মনুস্সো ৱা অমনুস্সো ৱাতি. থেৰো আহ,–

সমণা মযং মহাৰাজ, ধম্মৰাজস্স সাৱকা;

তৱেৱ অনুকম্পায, জম্বুদীপা ইধাগতাতি.

তদা চ দেৱানং পিযতিস্সো ৰাজা অসোকৰঞ্ঞা পেসিতেন অভিসেকেন একমাসাভিসিত্তো অহোসি. ৱিসাখপুণ্ণমাযং হিস্স অভিসেকমকংসু. সো চ অসোকৰঞ্ঞা পেসিতে ধম্মপণ্ণাকাৰে ৰতনত্তযগুণপ্পটিসংযুত্তং সাসনপ্পৱত্তিং অচিৰসুতং অনুস্সৰমানো তং থেৰস্স সমণা মযং মহাৰাজ, ধম্মৰাজস্স সাৱকাতি ৱচনং সুত্ৱা অয্যা নুখো আগতাতি তাৱদেৱ আৱুধং নিক্খিপিত্ৱা একমন্তং নিসীদি সম্মোদনীযং কথং কথযমানো. যথাহ,–

আৱুধং নিক্খিপিত্ৱান, একমন্তং উপাৱিসি;

নিসজ্জ ৰাজা সম্মোদি, বহুং অত্থূপসঞ্হিতন্তি.

সম্মোদনীযং কথঞ্চ কুৰুমানেযেৱ তস্মিং তানিপি চত্তালীসপুৰিসসহস্সানি আগন্ত্ৱা সম্পৰিৱাৰেসুং. তদাথেৰো ইতৰেপি ছ জনে দস্সেসি. ৰাজা দিস্ৱা ইমে কদা আগতাতি আহ. মযা সদ্ধিংযেৱ মহাৰাজাতি. ইদানি পন জম্বুদীপে অঞ্ঞেপি এৱৰূপা সমণা সন্তীতি. সন্তি মহাৰাজ এতৰহিজম্বুদীপো কালাৱপজ্জোতো ইসিৱাতপটিৱাতো, তস্মিং–

তেৱিজ্জা ইদ্ধিপত্তা চ, চেতোপৰিযকোৱিদা;

খীণাসৱা অৰহন্তো, বহূ বুদ্ধস্স সাৱকাতি.

ভন্তে কেন আগতত্থাতি. নেৱ মহাৰাজ উদকেন, ন থলেনাতি. ৰাজা আকাসেন আগতাতি অঞ্ঞাসি. থেৰো অত্থি নুখো ৰঞ্ঞো পস্সাৱেয্যত্তিকন্তি ৱীমংসনত্থায আসন্নং অম্বৰুক্খং আৰব্ভ পঞ্হং পুচ্ছি, –

কিন্নামো মহাৰাজ অযং ৰুক্খোতি. অম্বৰুক্খো নাম ভন্তেতি. ইমং পন মহাৰাজ অম্বং মুঞ্চিত্ৱা অঞ্ঞো অম্বো অত্থি ৱা নত্থি ৱাতি. অত্থি ভন্তে অঞ্ঞেপি বহূ অম্বৰুক্খাতি. ইমঞ্চ অম্বং তে চ অম্বে মুঞ্চিত্ৱা অত্থি নুখো মহাৰাজ অঞ্ঞে ৰুক্খাতি. অত্থি ভন্তে, তে পন ন অম্বৰুক্খাতি. অঞ্ঞে চ অম্বে অনম্বে চ মুঞ্চিত্ৱা অত্থি পন অঞ্ঞো ৰুক্খোতি. অযমেৱ ভন্তে অম্ব ৰুক্খোতি. সাধু মহাৰাজ পণ্ডিতোসীতি.

অত্থি পন মহাৰাজ তে ঞাতকাতি. অত্থি ভন্তে বহূজনাতি. তে মুঞ্চিত্ৱা কেচি অঞ্ঞাতকাপি অত্থি মহাৰাজাতি. অঞ্ঞাতকা ভন্তে ঞাতকেহি বহুতৰাতি. তৱঞাতকে চ অঞ্ঞাতকে চ মুঞ্চিত্ৱা অত্থঞ্ঞো কোচি মহাৰাজাতি. অহমেৱ ভন্তেতি. সাধু মহাৰাজ অত্তা নাম অত্তনো নেৱ ঞাতকো ন অঞ্ঞাতকোতি.

অথ থেৰো পণ্ডিতো ৰাজা সক্খিস্সতি ধম্মং অঞ্ঞাতুন্তি চূড়হত্থিপদোপমসুত্তং কথেসি. কথাপৰিযোসানে ৰাজা তীসু সৰণেসু পতিট্ঠহি সদ্ধিং চত্তালীসায পাণসহস্সেহীতি. ততো পৰং যং যং ৱত্তব্বং, তং তং সমন্তপাসাদিকাদীসু ৱুত্তনযেন ৱেদিতব্বং.