৫. নৱৱাসীৰট্ঠসাসনৱংসকথামগ্গো

৫. ইদানি ৱনৱাসীৰট্ঠে সিৰিখেত্তনগৰসাসনৱংসং ৱক্খামি. জিনচক্কে হি একাধিকে ৱস্সসতে সম্পত্তে জটিলো সক্কো নাগো গৰুড়ো কুম্ভণ্ডো চন্দী পৰমীস্ৱৰোচাতি ইমে সত্ত সিৰিখেত্তং নাম নগৰং মাপেসুং. তত্থ দ্ৱত্তপোঙ্কো নাম ৰাজা ৰজ্জং কাৰেসি. তস্স কিৰ তীণি অক্খীনি সন্তীতি. তদা ভগৱতো সাৱকা অৰহন্তা তিসহস্সমত্তা তত্থ ৱসিংসু. সো ৰাজা তেসং অৰহন্তানং দেৱসিকং চতূহি পচ্চযেহি উপত্থম্ভি. ছ সৰীৰধাতুযো চ একেকং একেকস্মিং নিদহিত্ৱা ছ চেতিইযানি কাৰাপেসি. দক্খিণবাহুং পন নিদহিত্ৱা একম্পি চেতিযং কাৰাপেসি.

উণ্হীসধাতুং পন কঙ্গৰন্নগৰতো আনেত্ৱা একম্পি চেতিযং কাৰাপেসি. তং পন তাৱ ন নিট্ঠিতং. পচ্ছা অনুৰুদ্ধৰাজা গহেত্ৱা অৰিমদ্দননগৰং আনেত্ৱা চঞ্ঞিঙ্খু নাম চেতিযে নিধানং অকাসি. তস্মা ৰক্খিতত্থেৰস্স আগমনতো পুব্বেপি সাসনং পতিট্ঠাসীতি দট্ঠব্বং. ততো পচ্ছা সাসনং দুব্বলং হুত্ৱা অট্ঠাসি.

ইদং ৱনৱাসীৰট্ঠে পঠমং সাসনস্স পতিট্ঠানং.

মহামোগ্গলিপুত্ততিস্সত্থেৰেন পন পেসিতো ৰক্খিতত্থেৰো ৱনৱাসীৰট্ঠং গন্ত্ৱা আকাসে ঠত্ৱা অনমতগ্গপৰিযাযকথায ৱনৱাসিকে পসাদেসি. কথাপৰিযোসানে পনস্স সট্ঠিসহস্সানং ধম্মাভিসমযো অহোসি. সত্ততিসহস্সমত্তা পব্বজিংসু. পঞ্চৱিহাৰসতানি পতিট্ঠাপেসুং. এৱং সো তত্থ সাসনং পতিট্ঠাপেসি. তেনেৱ অট্ঠ কথাযং –

গন্ত্ৱান ৰক্খিতত্থেৰো,

ৱনৱাসিং মহিদ্ধিকো;

অন্তলিক্খে ঠিতো তত্থ,

দেসেসি অনমতগ্গিযন্তি ৱুত্তং.

এৱং ৱনৱাসীৰট্ঠে পুব্বেযেৱ সাসনং ওগাহেত্ৱা পতিট্ঠহি. ন পন তাৱ সকলং ব্যাপেত্ৱা পতিট্ঠহি.

ইদং তাৱ ৱনৱাসীৰট্ঠে সিৰিখেত্তনগৰে দুতিযং

সাসনস্স পতিট্ঠানং.

জিনচক্কে পন তেত্তিংসাধিকে চতুৱস্সসতে কুক্কুট সীসো নাম একো ৰাজা ৰজ্জং কাৰেসি. তস্স ৰঞ্ঞো কালে ভগৱতো সাৱকা অৰহন্তা পঞ্চসতমত্তা অহেসুং. তেসম্পি সো ৰাজা দেৱসিকং চতূহি পচ্চযেহি উপত্থম্ভেসি. সোতাপন্নসকদাগামিঅনাগামিনো পন গণনপথং ৱীতিৱত্তা অহেসুং.

ইদং ৱনৱাসীৰট্ঠে সিৰিখেত্তনগৰে পৰম্পৰাভতৱসেন

ততিযং সাসনস্স পতিট্ঠানং.

ইচ্চেৱং ৱনৱাসীৰট্ঠে অনেকসতেহি অৰহন্তত্থেৰেহি সাসনং পুণ্ণিন্দুসঙ্কাসং হুত্ৱা অতিৱিয ৱিজ্জোতেসি. সাসনিক গন্থকাৰা পন মহাথেৰা তত্থ ন সন্দিস্সন্তি. অৰহন্তত্থেৰা পন ৰাজূনং আযাচনং আৰব্ভ ধম্মসত্থং একং ৱিৰচযিংসূতি পোৰাণা ৱদন্তীতি. ইচ্চেৱং–

তেচ থেৰা মহাপঞ্ঞা,

পগ্গহেত্ৱান সাসনং;

সূৰিযো ৱিয অত্থঙ্গো,

উপগা মচ্চুসন্তিকং.

তস্মা হি পণ্ডিতো পোসো,

যাৱ মচ্চু নচাগতো;

তাৱ পুঞ্ঞং কৰে নিচ্চং,

মা পমজ্জেয্য সব্বদাতি.

ইতি সাসনৱংসে ৱনৱাসীৰট্ঠসাসনৱংসকথামগ্গো

নাম পঞ্চমো পৰিচ্ছেদো.