৪. যোনকৰট্ঠসাসনৱংসকথামগ্গো

৪. ইদানি পন যোনকৰট্ঠে সাসনস্সুপ্পত্তিং কথেস্সামি. ভগৱা হি ৱেনেয্যহিতাৱহো যোনকৰট্ঠে মমসাসনং চিৰকালং পভিট্ঠহিস্সতীতি আপেক্খিত্ৱা সদ্ধিং ভিক্খু সঙ্ঘেন দেসচাৰিকং আহিণ্ডন্তো লভুঞ্জং নাম নগৰং অগমাসি. তদা একো নেসাদো হৰিফলং দত্ৱা তং পৰিভুঞ্জিত্ৱা হৰিবীজে খিপিতে পথৱিযং অপতিত্ৱা আকাসেযেৱ পতিট্ঠাসি. তং দিস্ৱা সিতং পত্ৱাকাসি. তমত্থং দিস্ৱা আনন্দত্থেৰো পুচ্ছি. অনাগতে খো আনন্দ ইমস্মিং ঠানে মম ধাতুচেতিযং পতিট্ঠহিস্সতি, সাসনং ৱিৰূড়মাপজ্জিস্সতীতি ব্যাকাসি. ভগৱতা পন হৰিফলস্স ভুঞ্জিতট্ঠানত্তাহৰিভুঞ্জোতি তস্স ৰট্ঠস্স নামং অহোসি. দ্ৱিন্নং তাপসানং ঠপিতং জলসুত্তিকং পটিচ্চ যোনকানং ভাসায লভুঞ্জোতি নামং অহোসি.

তদা তত্থ মপিন্নায নাম একিস্সা মাতিকায সমীপে নিসিন্নো একো লৱকুলিকজেট্ঠকো অত্তনো পুত্তং সত্তৱস্সিকং ভগৱতো নিয্যাদেত্ৱা পব্বাজেসি. কম্মট্ঠানানুযোগৱসেন অচিৰেনেৱ অৰহত্তং পাপুণি. সত্তৱস্সি কস্সচ সামণেৰস্স অৰহত্তং সচ্ছিকতট্ঠানতং পটিচ্চ যোনকভাসায এতং ঠানং চঙ্গমঙ্ঘ ইতি ৱুচ্চতি. চিৰকাল ৱসেন জঙ্গমঙ্ঘ ইতি ৱুচ্চতি. ততো পট্ঠাযযেৱ যোনকৰট্ঠে সাসনং পতিট্ঠাতীতি.

ইদং যোনকৰট্ঠে পঠমং সাসনস্স পতিট্ঠানং.

সাসনে পন পঞ্চতিংসাধিকে দ্ৱিৱস্সসতে সম্পত্তে মহাৰক্খিতত্থেৰো যোনকৰট্ঠং গন্ত্ৱা কম্বোজখেমাৱৰ হৰিভুঞ্জাযুদ্ধযাদীসু অনেকেসু ৰট্ঠেসু সাসনং পতিট্ঠাপেতি. তানি হি সব্বানি ৰট্ঠানি সঙ্গহেত্ৱা দস্সেন্তেহি অট্ঠকথাচৰিযেহি যোনকলোকন্তি ওকাসকালোকৱাচকেন সামঞ্ঞসদ্দেন ৱুত্তং. পকতি হেসা গন্থকাৰানং যেন কেনচাকাৰেন অত্থন্তৰস্স ৱিঞ্ঞাপনাতি.

মহাৰক্খিতত্থেৰো চ সদ্ধিং পঞ্চহি ভিক্খূহি পাটলিপুত্ততো অনিলপথমগ্গেন যোনকলোকং আগন্ত্ৱা কাড়কাৰামসুত্তেন যোনকে পসাদেসি. সত্ততিসহস্সাধিকপাণসতসহস্সং মগ্গফলালঙ্কাৰং অদাসি. সন্তিকে চস্স দসসহস্সানি পব্বজিংসু. এৱং সো তত্থসাসনং পতিট্ঠাপেসি. তথা চ ৱুত্তং অট্ঠকথাযং,–

যোনকৰট্ঠং তদা গন্ত্ৱা, সো মহাৰক্খিতো ইসি;

কাড়কাৰামসুত্তেন, তে পসাদেসি যোনকেতি.

ততো পট্ঠায তেসং সিস্সপৰম্পৰা বহূ হোন্তি, গণনপথং ৱীতিৱত্তা.

ইদং যোনকৰট্ঠে মহাৰক্খিতত্থেৰাদযো পটিচ্চ

দুতিযং সাসনস্স পতিট্ঠানং.

যোনকৰট্ঠে লকুন্ননগৰে জিনচক্কে পঞ্চৱস্সসতে মণিমযং বুদ্ধপ্পটিমং মাপেত্ৱা ৱিসুকম্মদেৱপুত্তো নাগসেনত্থেৰস্স অদাসি. নাগেসেনত্থেৰো চ তস্মিং পটিমম্হি ধাতু আগন্ত্ৱা পতিট্ঠাতূতি অধিট্ঠাসি. অধিট্ঠানৱসেনেৱ সত্তধাতুযো আগন্ত্ৱা তত্থ পতিট্ঠহিত্ৱা পাটিহাৰিযং দস্সেসুন্তি ৰাজৱংসে ৱুত্তং.

তঞ্চ ৱচনং মম পৰিনিব্বানতো পঞ্চৱস্সসতে অতিক্কন্তে এতে উপ্পজ্জিস্সন্তীতি মিলিন্দপঞ্হাযং ৱুত্তৱচনেন কালপৰিমাণৱসেন চ সমেতি. যোনকৰট্ঠে মিলিন্দৰঞ্ঞো কালে জিনচক্কে পঞ্চৱস্সসতেযেৱ নাগসেনত্থেৰং পটিস্স জিনচক্কং ৱিৰূড়ং হুত্ৱা পতিট্ঠাসি.

ইদং যোনকৰট্ঠে নাগসেনত্থেৰং পটিচ্চ ততিযং

সাসনস্স পতিট্ঠানং.

কলিযুগে পঞ্চসট্ঠিৱস্সেলভুঞ্জনগৰতো সঙ্কমিত্ৱা ক্যুঙ্গৰনগৰে মাপিকস্স বঞ্ঞাচোমঙ্গৰ নামকস্স ৰঞ্ঞো কালে মজ্ঝিমদেসতো কস্সপত্থেৰো পঞ্চহি থেৰেহি সদ্ধিং আগচ্ছি.

তদা সো ৰাজা ৱিহাৰং কত্ৱা তেসং অদাসি. সীহড়দীপতো চ ধাতুযো আনেত্ৱা একো থেৰো আগচ্ছি. ধাতুতো পাটিহাৰিযং দিস্ৱা পসীদিত্ৱা লভুঞ্জচেতিয নিধানং অকাসি. তে চ থেৰে পটিচ্চ যোনকৰট্ঠে সাসন ৱংসো আগতো.

ইদং যোনকৰট্ঠে চতুত্থং সাসনস্স পতিট্ঠানং.

কলিযুগে দ্ৱাসট্ঠাধিকে সত্তসতে সম্পত্থে চিনৰট্ঠিন্দো ৰাজা অভিভৱিত্ৱা সকলম্পি যোনকৰট্ঠং সঙ্খুব্ভিতং হোতি. তদা মহাধম্মগম্ভীৰত্থেৰো মহামেধঙ্কৰত্থে ৰোচাতি দ্ৱে থেৰো যোনকৰট্ঠতো সদ্ধিং বহূহি ভিক্খূহি সীহড়দীপং অগমংসু. তদা চ সীহড়দীপে দুব্ভিক্খভযেন অভিভূতো হুত্ৱা ততো স্যামৰট্ঠে সোক্কতযনগৰং পুন অগমংসু.

ততো পচ্ছা লকুন্ননগৰং গন্ত্ৱা সাসনং পগ্গণ্হন্তানং লজ্জিপেসলানং ভিক্খূনং সন্তিকে পুন সিক্খং গণ্হিংসু. তে চ থেৰো স্যামৰট্ঠে যোনকৰট্ঠে চ সব্বত্থ সাসনং পতিট্ঠাপেসুন্তি.

ইদং যোনকৰট্ঠে পত্তলঙ্কে দ্ৱে থেৰে পটিচ্চ পঞ্চমং

সাসনস্স পতিট্ঠানং.

কলিযুগে পঞ্চৱীসাধিকে অট্ঠৱস্সসতে সম্পত্তে সিৰিসদ্ধম্মলোকপতিচক্কৱত্তিৰাজা লভুঞ্জচেতিযং পুন মহন্তং কত্ৱা তস্স চেতিযস্স সমীপে চত্তাৰো ৱিহাৰে কাৰাপেত্ৱা মহামেধঙ্কৰত্থেৰস্স সাৰিপুত্তত্থেৰস্স চ অদাসি. তদাপি তে দ্ৱে থেৰা সাসনং পৰিসুদ্ধং কত্ৱা পতিট্ঠাপেসুন্তি.

ইদং যোনকৰট্ঠে মহামেধঙ্কৰসাৰিপুত্তত্থেৰে

পটিচ্চ ছট্ঠং সাসনস্স পতিট্ঠানং.

কলিযুগে তেচত্তালীসাধিকে নৱৱস্সসতে সম্পত্তে হংসাৱতীনগৰে অনেকসেতিভিন্দো নাম ৰাজা যোনকৰট্ঠং অভিভৱিত্ৱা অত্তনো হত্থগতং কত্ৱা বলি ভুঞ্জনত্থায জেট্ঠপুত্তস্স অনুৰুদ্ধস্স নাম ৰাজকুমাৰস্স দত্ৱা বহূহি অমচ্চেহি সদ্ধিং তত্থ গন্ত্ৱা অনুৰাজতাৱেন ৰজ্জং কাৰাপেসি. সাসনঞ্চ ৱিসোধাপেতুং সদ্ধম্মচক্কসামিত্থেৰং তেন সদ্ধিং পহিণি.

অনেকসেতিভিন্নো কিৰ ৰাজা যোনকৰট্ঠং ৱিজযকালে পঠমং সাসনস্স পতিট্ঠানভূতমিদন্তি কত্ৱা তংৰট্ঠৱাসিনো কৰমৰানীতভাৱেন ন অগ্গহেসীতি.

যথাৱুত্তত্থেৰৱংসেসু চ একো লকুন্ননগৰে অৰঞ্ঞৱাসী থেৰো তত্থ নগৰে অজ্জ অসুকস্মিং ঠানে একো মতোতি গিহীনং কথেত্ৱা যথাকথিতং ভূতং হুত্ৱা অযং অভিঞ্ঞালাভীতি পাকটো অহোসি.

তস্মিংযেৱ চ নগৰে মহামঙ্গলো নাম থেৰো অনেকসেতিভিন্দস্স ৰঞ্ঞো যুজ্ঝিতুং আগতকালে অনেকসেতিভিন্দো ৰাজা মং পক্কোসিস্সতি, সমানজাতিকং দূতং পেস্সেস্সতীতি পক্কোসিতকালতো পঠমমেৱৱদি. যথাৱুত্তনিযামেনেৱ পক্কোসনতো অযং অভিঞ্ঞা লাভীতি কিত্তি ঘোসো অহোসি.

তত্থ নগৰে ঞাণৱিলাসত্থেৰো সঙ্খ্যাপকাসকং নাম পকৰণং অকাসি. তংড়ীকং পন পত্তলঙ্কত্থেৰস্স ৱিহাৰে ৱসন্তো সিৰিমঙ্গলোনাম থেৰো অকাসি.

ৱিসুদ্ধিমগ্গদীপনিং পন সংঞ্ঞ্ৱত্তঅৰঞ্ঞৱাসী উত্তৰাৰামো নাম একো থেৰো. মঙ্গলদীপনিং সিৰিমঙ্গলত্থেৰো. উপ্পাতসন্তিং অঞ্ঞতৰো থেৰো. তং কিৰ উপ্পাতসন্তিং সজ্ঝাযিত্ৱা চীনৰঞ্ঞো সেনং অজিনীতি. ইচ্চেৱং যোনকৰট্ঠে অভিঞ্ঞালাভীনং গন্থকাৰানঞ্চ থেৰানং আনুভাৱেন জিনসাসনং পৰিসুদ্ধং হুত্ৱা পতিট্ঠাতি. এৱং হেতুফলসম্বন্ধৱসেন আদি অন্ত সম্বন্ধৱসেন চ যথাৱুত্তেহি তীহি নযেহি থেৰপৰম্পৰা ঘট্টেত্ৱা গহেতব্বা.

ইতি সাসনৱংসে যোনকৰট্ঠসাসনৱংসকথা

মগ্গো নাম চতুত্থো পৰিচ্ছেদো.