৩. সুৱণ্ণভূমিসাসনৱংসকথামগ্গো

৩. ইদানি যথাঠপিতমাতিকাৱসেন সুৱণ্ণভূমি ৰট্ঠে সাসনৱংসকথামগ্গস্স ৱত্থুং ওকাসো অনুপ্পত্থো, তস্মা সুৱণ্ণভূমিৰট্ঠসাসনৱংসকথামগ্গং আৰভিস্সামি.

তত্থ সুৱণ্ণভূমীতি তীসু ৰামঞ্ঞৰট্ঠেসু একস্স নামং. তীণিহি ৰামঞ্ঞৰট্ঠানি হোন্তি হংসাৱতীমুত্তিমসুৱণ্ণভূমিৱসেন একদেসেন সব্বম্পি ৰামঞ্ঞৰট্ঠং গহেতব্বং. তত্থ পন উক্কলাপজনপদে তপুস্সভল্লিকে আদিং কত্ৱা ভগৱতো অভিসম্বুজ্ঝিত্ৱা সত্তসত্তাহেসু অতিক্কন্তেসুযেৱ আসাড়্হিমাসস্স জুণ্হপক্খপঞ্চমদিৱসতো পট্ঠায ৰামঞ্ঞৰট্ঠে সাসনং পতিট্ঠতি.

ইদং ৰামঞ্ঞৰট্ঠে পঠমং সাসনস্স পতিট্ঠানং.

ভগৱতো অভিসম্বুদ্ধকালতো পুব্বেযেৱ অপৰণ্ণকৰট্ঠে সুভিন্ননগৰে তিস্সৰঞ্ঞো কালে একস্স অমচ্চস্স তিস্সো জযো চাতি দ্ৱেপুত্তা অহেসুং. তে গিহিভাৱে সংৱেগং লভিত্ৱা মহাসমুদ্দস্স সমীপে গজ্জগিৰিম্হি নাম পব্বতে ইত্থুসিপব্বং পব্বজিত্ৱা নিসীদিসুং. তদা নাগিযা ৱিজ্জাধৰো সন্তৱং কত্ৱা দ্ৱে অণ্ডানি ৱিজাযিত্ৱা সা নাগী লজ্জায তানি ৱিজহিত্ৱা গচ্ছি.

তদা জেট্ঠো তিস্সকুমাৰো তানি লভিত্ৱা কনিট্ঠেন সদ্ধিং ৱিভজিত্ৱা একং একস্স সন্তিকে ঠপেসি. কালে অতিক্কন্তে তেহি অণ্ডেহি দ্ৱে মনুস্সা ৱিজাযিংসু. তে দস ৱস্সৱযে সম্পত্তে কনিট্ঠস্স অণ্ডতো ৱিজাযনদহৰো কালং কত্ৱা মজ্ঝিমদেসে মিথিলনগৰে গৱংপতি নাম কুমাৰো উপজ্জি. সো সত্তৱস্সিককালে বুদ্ধস্স ভগৱতো সন্তিকে নিয্যাদেত্ৱা পব্বাজেত্ৱা অচিৰেনেৱ অৰহা অহোসি.

জেট্ঠস্স পন অণ্ডতো ৱিজাযনদহৰো দ্ৱাদসৱস্সিককালে সক্কো দেৱানমিন্দো আগন্ত্ৱা ৰামঞ্ঞৰট্ঠে সুধম্মপুৰং নাম নগৰং মাপেত্ৱা সীহৰাজাতি নামেন তত্থ ৰজ্জং কাৰাপেসি. সিলালোনে পন সিৰিমাসোকোতি নামেনাতি ৱুত্তং. গৱংপতিত্থেৰো চ অত্তনা মাতৰং দট্ঠুকামো মিথিলনগৰতো আগন্তুং আৰভি. তদা দিব্বচক্খুনা মাতুযা কালঙ্কতভাৱং ঞত্ৱা ইদানি মে মাতা কুহিং উপ্পজ্জতীতি আৱজ্জন্তো বাহুল্লেন নেসাদকেৱট্টানং নিৱাসনট্ঠানভূতে দেসে উপ্পজ্জতীতি ঞত্ৱা সচাহং গন্ত্ৱা ন ওৱাদেয্যং, মাতা মে অপাযগমনিযং অপুঞ্ঞং ৱিচিনিত্ৱা চতূসু অপাযেসু উপ্পজ্জেয্যাতি চিন্তেত্ৱা ভগৱন্তং যাচিত্ৱা ৰামঞ্ঞৰট্ঠং ৱেহাসমগ্গেন আগচ্ছি. ৰামঞ্ঞৰট্ঠে সুধম্মপৰং পত্ৱা অত্তনো ভাতুনা সীহৰাজেন সদ্ধিং ৰট্ঠৱাসীনং ধম্মং দেসেত্ৱা পঞ্চসু সীলেসু পতিট্ঠাপেসি.

অথ সীহৰাজা আহ, লোকেসু ভন্তে ত্ৱমসি অগ্গতৰো পুগ্গলোতি. ন মহাৰাজ অহং অগ্গতৰো, তীসু পন ভৱেসু সব্বেসং সত্তানং মকুটসঙ্কাসো গোতমো নাম ময্হং সত্থা অত্থি, ইদানি মজ্ঝিমদেসং ৰাজগহং পটিৱসতীতি. এৱং পন ভন্তে সতি তুম্হাকং আচৰিযং মযং দট্ঠুং অৰহাম ৱা নো ৱাতি পুচ্ছি. গৱংপতিত্থেৰোচ আম মহাৰাজ অৰহথ ভগৱন্তং দট্ঠুং, অহং যাচিত্ৱা আগচ্ছামীতি ৱত্ৱা ভগৱন্তং যাচি. ভগৱা চ অভিসম্বুজ্ঝিত্ৱা অট্ঠমে ৱস্সে সদ্ধিং অনেকসতভিক্খূহি ৰামঞ্ঞৰট্ঠে সুখম্মপুৰং আকাসেন আগমাসি. ৰাজৱংসে পঞ্চহি ভিক্খুসতেহি আগমাসীতি ৱুত্তং. সিলালেখনে পন ৱীসতিসহস্সমত্তেহি ভিক্খূহীতি ৱুত্তং. এত্থ চ যস্মা ভগৱা সপৰিসোযেৱ আগচ্ছি, ন এককোতি এত্তকমেৱ ইচ্ছিতব্বং, তস্মা নানা ৱাদতং পটিচ্চ চিত্তস্সাকুলিতা ন উপ্পাদেতব্বাতি.

অথ আগন্ত্ৱা ৰতনমণ্ডপে নিসীদিত্ৱা সৰাজিকানং ৰট্ঠৱাসীনং অমতৰসং অদাসি. তীসু সৰণেসু পঞ্চসু চ সীলেসু পতিট্ঠাপেসি. অথ ভগৱা দস্সনত্থায আগতানং ছন্নং তাপসানং ছ কেসধাতুযো পূজনত্থায অদাসি. ততো পচ্ছাসত্ততিংসৱস্সানি পূৰেত্ৱা পৰিনিব্বানকালেপি ভগৱতো অধিট্ঠানানুৰূপেন চিতকট্ঠানতো তেত্তিংস দন্তে গহেত্ৱা গৱংপতিত্থেৰো সুধম্মপুৰং আনেত্ৱা সীহৰঞ্ঞো দত্ৱা তেত্তিংসচেতিযানি পতিট্ঠাপেসি. এৱং ভগৱতো পৰিনিব্বানতো অট্ঠমেযেৱ ৱস্সে গৱংপতিত্থেৰো ৰামঞ্ঞ ৰট্ঠে সুধম্মপুৰে সাসনং পতিট্ঠাপেসি.

ইদং ৰামঞ্ঞৰট্ঠে দুতিযং সাসনস্স পতিট্ঠানং.

ভগৱতো পৰিনিব্বুতপঞ্চতিংসাধিকানং দ্ৱিন্নং সতানং উপৰিসুৱণ্ণভূমিং নাম ৰামঞ্ঞৰট্ঠং আগন্ত্ৱা সোণত্থেৰো উত্তৰত্থেৰোচাতি দ্ৱে থেৰা পঞ্চৱগ্গকম্মাৰহেহি ভিক্খূহি সদ্ধিং সাসনং পতিট্ঠাপেসুং. তে চ থেৰা মহামোগ্গলিপুত্ততিস্সত্থেৰস্স সদ্ধিৱিহাৰিকাতি অট্ঠকথাযং আগতা.

তপুস্সভল্লিকে গৱংপতিত্থেৰঞ্চ পটিচ্চ সাসনং তাৱ পতিট্ঠহি. তঞ্চ ন সব্বেন সব্বং ওগাহেত্ৱা যে যে পন সদ্ধা পসন্না, তে তে অত্তনো ইচ্ছাৱসেনেৱ সাসনং পসীদিংসু. পচ্ছা পন সোণুত্তৰত্থেৰা মহুস্সাহেন আচৰিয আণত্তিযা সাসনস্স পতিট্ঠাপনত্থায উস্সুক্কং আপন্না পতিট্ঠাপেসুং. তেন অট্ঠকথাযং এতং ৰট্ঠং গন্ত্ৱা এত্থ সাসনং পতিট্ঠাপেহীতি কাৰিতপচ্চযৱসেন আণত্তিৱিভত্তিৱসেনচ ৱুত্তং.

তদা পন সুৱণ্ণভূমিৰট্ঠে সুধম্মপুৰে সিৰিমাসোকো নাম ৰাজা ৰজ্জং কাৰেসি. তঞ্চ সুধম্মপুৰং নাম কেলাসপব্বতমুদ্ধনি দক্খিণায অনুদিসায পুব্বড্ঢভাগেন পব্বতমুদ্ধনি অপৰড্ঢভাগেন ভূমিতলে তিট্ঠতি. তংযেৱ গুড়পাচকানং মস্সানং গেহসদিসানি গেহানি যেভুয্যেন, তেনেৱ গোড়মিত্তিক নামেনাপি ৱোহাৰিযতি. তস্স পন নগৰস্স মহাসমুদ্দসমীপে ঠিতত্তা দকযক্খিনী সব্বদা আগন্ত্ৱা ৰাজগেহে জাতে জাতে কুমাৰে খাদি.

সোণুত্তৰত্থেৰানং সম্পত্তদিৱসযেৱ ৰাজগেহে একং পুত্তং ৱিজাযি. দকযক্খিনীচ খাদিস্সামীতি সহ পঞ্চহি যক্খিনিসতেহি আগতা. তং দিস্ৱা মনুস্সা ভাযিত্ৱা মহাৱিৰৱং ৰৱন্তি. তদা থেৰা ভযানকং সীহসীসৱসেন একসীসসৰীৰদ্ৱযসম্বন্ধসণ্ঠানং মনুসীহৰূপং মাপেত্ৱা দস্সেত্ৱা তং যক্খিনিং সপৰিসং পলাপেসুং.

থেৰা চ পুন যক্খিনিযা অনাগমনত্থায পৰিত্তং অকংসুতস্মিঞ্চ সমাগমে আগতানং মনুস্সানং ব্ৰহ্মজালসুত্তং অদেসয্যুং. সট্ঠিমত্তসহস্সা সোতাপন্নাদিপৰাযনা অহেসুং. কুলদাৰকানং অড্ঢুড্ঢানি সহস্সানি পব্বজিংসু. কুলধীতানং পন দিঘড্ঢসহস্সং. ৰাজকুমাৰানং পঞ্চসতাধিকসহস্সমত্তং পব্বজিংসু. অৱসেসাপি মনুস্সা সৰণে পতিট্ঠহিংসু. এৱং সো তত্থ সাসনং পতিট্ঠাপেসীতি. ৱুত্তঞ্চ অট্ঠকথাযং,–

সুৱণ্ণভূমিং গন্ত্ৱান, সোণুত্তৰা মহিদ্ধিকা;

পিসাচে নিদ্ধমিত্ৱান, ব্ৰহ্মজালে মদেসিসুন্তি.

ততো পট্ঠায ৰাজকুমাৰানং সোণুত্তৰনামেহিযেৱ নামং অকংসু. অৱসেসদ্ৱাৰকানম্পি ৰক্খসভযতো ৱিমোচনত্থং তালপত্তভুজপত্তেসু থেৰেহি মাপিতং মনুসীহৰূপং দস্সেত্ৱা মত্থকে ঠপেসুং. মনুস্সাচ সিলামযং মনুসীহৰূপং কত্ৱা সুধম্মপুৰস্স এসন্নে পদেসে ঠপেসুং. তং যাৱজ্জতনা অত্থীতি. ইচ্চেৱং ভগৱতো পৰিনিব্বানতো পঞ্চতিংসাধিকে দ্ৱিৱস্সসতে সম্পত্তে সোণুত্তৰত্থেৰা আগন্ত্ৱা সাসনং পতিট্ঠাপেত্ৱা সাসনং পতিট্ঠাপেত্ৱা অনুগ্গহং অকংসূতি.

ইদং ৰামঞ্ঞৰট্ঠে ততিযং সাসনস্স পতিট্ঠানং.

ততো পচ্ছা ছসতাধিকে সহস্সে সম্পত্তে পুব্বে ৱুত্তেহি তীহি কাৰণেহি সাসনস্স উপ্পত্তিট্ঠানভূতং ৰামঞ্ঞৰট্ঠং দামৰিকচোৰভযেন পজ্জৰৰোগভযেন সাসনপচ্চত্থিকভযেনচাতি তীহি ভযেহি আকুলিতং অহোসি. তদা চ তত্থ সাসনং দুব্বলং অহোসি, যথা উদকে মন্দে তত্ৰজাতং উপ্পলং উপ্পলং দুব্বলন্তি. তত্থ ভিক্খূপি সাসনং যথা কামং পূৰেতুং ন সক্কা.

সূৰিযকুমাৰস্স নাম মনোহৰিৰঞ্ঞো পন কালে সাসনং অতিৱিয দুব্বলং অহোসি. জিনচক্কে একছসতাধিকে ৱস্সসহস্সে সম্পত্তে কলিযুগেচ একূনৱীসতাধিকে চতুৱস্সসতে সম্পত্তে অৰিমদ্দননগৰে অনুৰুদ্ধা নাম ৰাজা ততো সহ পিটকেন ভিক্খুসঙ্ঘং আনেসি.

ততো পচ্ছা জিনচক্কে নৱাধিকে সত্তসতে সহস্সে চ সম্পত্তে লঙ্কাদীপে সিৰিসঙ্ঘবোধিপৰক্কমবাহুমহাৰাজা সাসনং সোধেসি.

ততো ছন্নং ৱস্সানং উপৰি কলিযুগে দ্ৱত্তিংসাধিকে পঞ্চসতে সম্পত্তে উত্তৰাজীৱো নাম থেৰো সাসনে পাকটো অহোসি.

সো পন ৰামঞ্ঞৰট্ঠৱাসিনো অৰিযাৱংসত্থেৰস্স সদ্ধিৱিহাৰিকো. অৰিযাৱংসত্থেৰো পন কপ্পুঙ্গনগৰৱাসিনো মহাকাড়ত্থেৰস্স সদ্ধিৱিহাৰিকো. মহাকাড়ত্থেৰো পন সুধম্মপুৰৱাসিনো প্ৰানদস্সিত্থেৰস্স সদ্ধিৱিহাৰিকো. অযং পন উত্তৰাজীৱছপ্পদত্থেৰানং ৱংসদীপনত্থং ৱুত্তা.

সো পন প্ৰানদস্সিত্থেৰো লোকিযাভিঞ্ঞাযো লভিত্ৱা নিচ্চং অভিণ্হং পাতোৱ মগধৰট্ঠে উৰুৱেলনিগমে মহাবোধিং গন্ত্ৱা মহাবোধিযঙ্গণং সম্মজ্জিত্ৱা পুন আগন্ত্ৱা সুধম্মপুৰে পিণ্ডায চৰি. ইদং থেৰস্স নিবদ্ধৱত্তুং. অযঞ্চ অত্থো সুধম্মপুৰতো মগধৰট্ঠং গন্ত্ৱা উৰুৱেলনিগমে ৱাণিজকম্মং কৰোন্তা তদাকাৰং পস্সিত্ৱা পচ্চাগমনকালে সুধম্মপুৰ ৱাসীনং কথেসুং, তস্মা ৱিঞ্ঞাযতি.

তস্মিঞ্চ কালে উত্তৰাজীৱত্থেৰো পৰিপুণ্ণৱীসতিৱস্সেন ছপ্পদেন নাম সামণেৰেন সদ্ধিং সীহড়দীপং গচ্ছি. সীহড়দীপৱাসিনো চ ভিক্খূ মযং মহামহিন্দত্থেৰস্স ৱংসিকা ভৱাম, তুম্হেপি সোণুত্তৰত্থেৰানং ৱংসিকা ভৱথ, তস্মা মযং একৱংসিকা ভৱাম সমান ৱাদিকাতি ৱত্ৱা ছপ্পদসামণেৰস্স উপসম্পদকম্মং অকংসু. ততো পচ্ছা চেতিয ৱন্দনাদীনি কম্মানি নিট্ঠাপেত্ৱা উত্তৰাজীৱত্থেৰো সদ্ধিং ভিক্খুসঙ্খেন অৰিমদ্দননগৰং পচ্চাগমাহি.

ছপ্পদস্স পন এতদহোসি,- সচাহং আচৰিযেন সহ জম্বুদীপং গচ্ছেয্যং, বহূহি ঞাতিবলিবোধেহি পৰিযত্তুগ্গহণে অন্তৰাযো ভৱেয্য, তেন হি সীহড়দীপেযেৱ ৱসিত্ৱা পৰিযত্তিমুগ্গহেত্ৱা পচ্চাগমিস্সামীতি.

ততো আচৰিযস্স ওকাসং যাচিত্ৱা সীহড়দীপেযেৱ পটিৱসি. সীহড়দীপে ৱসিত্ৱা যাৱ লদ্ধত্থেৰসম্মুতিকা পৰিযত্তিং পৰিযাপুণিত্ৱা পুন জম্বুদীপং পচ্চাগন্তুকামো অহোসি. অথ তস্স এতদহোসি,– অহং এককোৱ গচ্ছন্তো সচে মম আচৰিযো নত্থি, সচেপি জম্বুদীপৱাসিনা ভিক্খুসঙ্ঘেন সদ্ধিং ৱিনযকম্মং কাতুং ন ইচ্ছেয্যং, এৱং সতি ৱিসুং কম্মং কাতুং ন সক্কূণেয্যং, তস্মা পিটকধৰেহি চতূহি থেৰেহি সদ্ধিং গচ্চেয্যং, ইচ্চেতং কুসলন্তি.

এৱং পন চিন্তেত্ৱা তামলিত্তিগামৱাসিনা সিৱলিত্থেৰেন কম্বোজৰঞ্ঞো পুত্তভূতেন তামলিন্দত্থেৰেন কিঞ্চিপুৰৱাসিনা আনন্দত্থেৰেন ৰাহুলত্থেৰেনচাতি ইমেহি চতূহি থেৰেহি সদ্ধিং নাৱায পচ্চাগচ্ছি. তে চ থেৰা পিটকধৰা অহেসুং দক্খা থামসম্পন্না চ. তেসু ৱিসেসতো ৰাহুলত্থেৰো থামসম্পন্নো. কুসিমনগৰং সম্পত্তকালে উপকট্ঠৱস্সূপগমনকালো হুত্ৱা অৰিমদ্দননগৰে আচৰিযস্স সন্তিকং অসম্পাপুণিত্ৱা কুসিমনগৰযেৱ ৱস্সং উপগমিংসু. তেসং ৱস্সূপগমনৱিহাৰৱত্থু আৰামপাকাৰো চ কুসিমনগৰস্স দক্খিণদিসাসাগে যাৱজ্জতনা অত্থি.

ৱস্সংৱুট্ঠকালে পন মহাপৱাৰণায পৱাৰেত্ৱা তে পঞ্চ থেৰা অৰিমদ্দননগৰং অগমংসু. উত্তৰাজীৱত্থেৰোচ অৰিমদ্দননগৰ ৱাসীহি ভিক্খূহি ৱিসুং হুত্ৱা সঙ্ঘকম্মানি অকাসি. কিঞ্চাপি চেত্থ উত্তৰাজীৱত্থেৰাদযো সীহড়দীপতো পচ্চাগন্ত্ৱা অৰিমদ্দননগৰে ৱসিত্ৱা সাসনং অনুগ্গহেসুং, ৰামঞ্ঞৰট্ঠে পন জাতত্তা পুব্বে চ তত্থ নিৱাসত্তা ইধ দস্সিতাতি দট্ঠব্বা.

তস্মিঞ্চ কালে দলনগৰে পদীপজেয্যগামে জাতো সাৰিপুত্তো নাম মহল্লকস্সমণেৰো একো অৰিমদ্দননগৰং গন্ত্ৱা আনন্দত্থেৰস্স সন্তিকে উপসম্পজ্জিত্ৱা পৰিযত্তি পৰিযপুণি. সো বহুস্সুতো অহোসি দক্খো থামসম্পন্নো চ. তমত্থং সুত্ৱা নৰপতিচঞ্ঞিসূৰাজা চিন্তেসি,- সচেসো অঙ্গপচ্চঙ্গসম্পন্নো ভৱেয্য, আচৰিযং কত্ৱা ঠপেস্সামি অনুগ্গহেস্সামীতি. ৰাজা এৱং চিন্তেত্ৱা ৰাজপুৰিসে পেসেত্ৱা ৱীমংসাপেসি. ৰাজপুৰিসা চ তস্স ছিন্নপাদঙ্গুট্ঠগ্গতং পস্সিত্ৱা তমত্থং ৰঞ্ঞো আৰোচেসুং. ৰাজা তং সুত্ৱা এৱং ৱিকলঙ্গপচ্চঙ্গো ভৱেয্য, পধানাচৰিযট্ঠানে ঠপেতুং ন যুত্তোতি কত্ৱা পধানাচৰিযভাৱং ন অকাসি. পূজাসক্কা ৰমত্তেনেৱ অনুগ্গহং অকাসি. একস্মিঞ্চ কালে ধম্মৱিলাসোতি লঞ্ছং দত্ৱা ৰামঞ্ঞৰট্ঠে সাসনং সোধেত্ৱা পৰিসুদ্ধং কৰোহীতি ৰামঞ্ঞৰট্ঠং পেসেসি.

সোচ ৰামঞ্ঞৰট্ঠং গন্ত্ৱা দলনগৰে বহুনং ভিক্খূনং ধম্ম ৱিনযং ৱাচেত্ৱা সাসনং পগ্গহেসি. তত্থ চ ৰামঞ্ঞমনুস্সা তস্স ধম্মৱিলাসত্থেৰস্স সিস্সানুসিস্সা সীহড়ভিক্খু গণাতি ৱোহাৰন্তি. ইচ্চেৱং সীহড়দীপিকস্স আনন্দত্থেৰস্স সিস্সং ধম্মৱিলাসং পটিচ্চ ৰামঞ্ঞৰট্ঠে সীহড়দীপতো সাসনস্স আগতমগ্গোতি.

ইদং ৰামঞ্ঞৰট্ঠে চতুত্থং সাসনস্স পতিট্ঠানং.

তস্মিঞ্চ কালে মুত্তিমনগৰে অগ্গমহেসিযা আচৰিযা বুদ্ধৱংসত্থেৰমহানাগত্থেৰা সীহড়দীপং গন্ত্ৱা মহাহাৰৱাসিগণৱংসভূতানং ভিক্খূনং সন্তিকে পুন সিক্খং গণ্হিত্ৱা মুত্তিমনগৰং পচ্চাগন্ত্ৱা মুত্তিমনগৰৱাসীতি ভিক্খূহি ৱিসুং হুত্ৱা সঙ্ঘকম্মানি কত্ৱা সাসনং পগ্গহেসুং. তেচ থেৰে পটিচ্চ ৰামঞ্ঞৰট্ঠে পুন সীহড়দীপতো সাসনং আগতন্তি.

ইদং ৰামঞ্ঞৰট্ঠে পঞ্চমং সাসনস্স পতিট্ঠানং.

ততো পচ্ছাচ মুত্তিমনগৰে সেতিভিন্দস্স ৰঞ্ঞো মাতুযা আচৰিযো মেধঙ্কৰো নাম থেৰো সীহড়দীপং গন্ত্ৱা সীহড়দীপে অৰঞ্ঞৱাসীনং মহাথেৰানং সন্তিকে পুন সিক্খং গহেত্ৱা পৰিযত্তিং পৰিযাপুণিত্ৱা সুৱণ্ণৰজতমযে তিপুসীসচ্ছন্নে সেতিভিন্দস্স ৰঞ্ঞো মাতুযা কাৰাৱিতে ৱিহাৰে নিসিদিত্ৱা সাসনং অনুগ্গহেসি. লোকদীপকসাৰঞ্চ নাম গন্থং অকাসি. অথাপৰিম্পি মুত্তিমনগৰেযেৱ সুৱণ্ণসোভণো নাম থেৰো সীহড়দীপং গন্ত্ৱা মহাৱিহাৰৱাসিগণৱংসভূতানং থেৰানং সন্তিকে পুন সিক্খং গহেত্ৱা মুত্তিমনগৰমেৱ পচ্চাগচ্ছি.

সো পন থেৰো অৰঞ্ঞেযেৱ ৱসি. ধুতঙ্গধৰো চ অহোসি অপ্পিচ্ছো সন্তুট্ঠো লজ্জী কুক্কুচ্চকো সিক্খা কামো দক্খো থামসম্পন্নো চ. সীহড়দীপে কলম্বুম্হি নাম জাতস্সৰে উদকুক্খেপসীমাযং অতিৰেকপঞ্চৱগ্গেন ৱনৰতনং নাম সঙ্ঘৰাজং উপজ্ঝাযং কত্ৱা ৰাহুলভদ্দং নাম ৱিজযবাহুৰঞ্ঞো আচৰিযভূতং থেৰং কম্মৱাচাচৰিযং কত্ৱা উপসম্পজ্জি. সোচ থেৰো পুনাগন্ত্ৱা মুত্তিমনগৰেযেৱ ৱসিত্ৱা গণং ৱড্ঢেত্ৱা সাসনং অনুগ্গহেসি. এতে চ দ্ৱে থেৰে পটিচ্চ ৰামঞ্ঞৰট্ঠে সীহড়দীপতো সাসনং আগতং.

ইদং ৰামঞ্ঞৰট্ঠে ছট্ঠং সাসনস্স পতিট্ঠানং.

ততো পচ্ছা সাসনৱসেন দ্ৱিৱস্সাধিকে দ্ৱিসহস্সে কলিযুগতো একাসীতিকে সম্পত্তে হংসাৱতীনগৰে সিৰিপৰমমহাধম্মৰাজাতি লদ্ধনামো ধম্মচেতিযৰাজা কুসিমমণ্ডলে হংসাৱতীমণ্ডলে মুত্তিমমণ্ডলে চ ৰট্ঠৱাসিনো সপজংৱিয ধম্মেন সমেন ৰক্খিত্ৱা ৰজ্জং কাৰেসি. সো চ ৰাজা তীসু পিটকেসু চতূসু চ ৱেদেসু ব্যাকৰণচ্ছন্দালঙ্কাৰাদীসু চ ছেকো সিক্খিতনানাসিপ্পো নানাভাসাসু চ পসুতো সদ্ধাসীলাদিগুণোপেতো কুমুদকুন্দসৰদচন্দিকাসমানসিতপজপতিভূতো চ সাসনে চ অতিপ্পসন্নো অহোসি.

একস্মিং কালে সো চিন্তেসি, ভগৱতো সাসনং নাম পব্বজ্জউপসম্পদতাৱেন সম্বন্ধং, উপসম্পদভাৱো চ সীমপৰিসৱত্থু ঞত্তিকম্মৱাচাসম্পত্তীহি সম্বন্ধোতি. এৱঞ্চ পন চিন্তেত্ৱা সীমৱিনিচ্ছযং তস্সং ৱণ্ণনং ৱিনযসঙ্গহং তস্সংৱণ্ণনং সীমালঙ্কাৰ সীমসঙ্গহঞ্চ সদ্দতো অত্থতো চ পুনপ্পুনং উপপৰিক্খিত্ৱা অঞ্ঞমঞ্ঞং সংসন্দিত্ৱা পুব্বাপৰং তুলযিত্ৱা ভগৱতো অধিপ্পাযো ঈদিসো গন্থকাৰানং অধিপ্পাযো ঈদিসোতি পস্সিত্ৱা অম্হাকং ৰামঞ্ঞৰট্ঠে বদ্ধনদীসমুদ্দজাতেস্সৰাদযো সীমাযো বহুকাপি সমানা অযং পৰিসুদ্ধাতি ৱৱত্থপেতুং দুক্কৰং, এৱং সতি সীমপৰিসাপৰিসুদ্ধা ভৱিতুং দুক্কৰাতি পটিভাতি.

ততো পচ্ছা ৰামঞ্ঞৰট্ঠে তিপিটকধৰব্যত্তপ্পটিবলত্থেৰেহি মন্তেত্ৱা ৰঞ্ঞো পটিভানানুৰূপং সীমপৰিসা পৰিসুদ্ধা ভৱিতুং দুক্কৰাতি থেৰা ৱিনিচ্ছনিংসু.

অথ ৰাজা এৱম্পি চিন্তেসি,– অহোৱত সম্মাসম্বুদ্ধস্স সাসনং পঞ্চৱস্সসহস্সানি পতিট্ঠতিস্সতীতি গন্থেসু ৱুত্তোপি সমানো অভিসম্বুদ্ধতো চতুসট্ঠাধিকদ্ৱিসহস্সমত্তেনেৱ কালেন সাসনে মলং হুত্ৱা উপসম্পদকম্মে কঙ্খাট্ঠানং তাৱ উপ্পজ্জি, কথং পন পঞ্চৱস্সসহস্সানি সাসনস্স পতিট্ঠানং ভৱিস্সতীতি. এৱং ধম্মসংৱেগং উপ্পাদেত্ৱা পুনাপি এৱং চিন্তেসি,- এৱং এত্তকং সাসনে মলং দিস্সমানোপি সমানো উপসম্পদকম্মে কঙ্খাট্ঠানং দিস্সমানোপি সমানো পৰিসুদ্ধত্থায অনাৰভিত্ৱা মাদিসো অপ্পোস্সুক্কো মজ্ঝত্তো নিসীদিতুং অযুত্তো, এৱঞ্হি সতি ভগৱতি সদ্ধো পসন্নোম্হীতি ৱত্তব্বতং অনাপজ্জেয্যং, তস্মা সাসনং নিম্মলং কাতুং আৰভিস্সামীতি.

কুতো নুখো দানি সাসনং আহৰিত্ৱা থিৰং পতিট্ঠা পেয্যন্তি আৱজ্জন্তো এৱং চিন্তেসি,- ভগৱতো কিৰ পৰিনিব্বানতো ছত্তিংসাধিকে দ্ৱিসতে সম্পত্তে মহামোগ্গলি পুত্ততিস্সত্থেৰো মহামহিন্দত্থেৰং পেসেত্ৱা সীহড়দীপে সাসনং পতিট্ঠাপেসি, তদা দেৱানং পিযতিস্সৰাজা মহাৱিহাৰং কাৰাপেত্ৱা অদাসি, সাসনৱৰঞ্চ একাসিতাধিকানি দ্ৱিৱস্সসতানি ৱিমলং হুত্ৱা পতিট্ঠহি, ভিক্খুসঙ্ঘোপি মহাৱিহাৰ ৱাসিগণৱসেন একতোৱ অট্ঠাসি, ততো পচ্ছা অভযগিৰিৱাসিজে তৱনৱাসিৱসেন দ্ৱেধা হুত্ৱা ভিজ্জি, জিনচক্কে অট্ঠসত্তসতাধিকে সহস্সে সম্পত্তে সিৰিসঙ্ঘবোধিপৰক্কমবাহুমহাৰাজা উদুম্বৰগিৰিৱাসি মহাকস্সপত্থেৰপ্পমুখং মহাৱিহাৰ ৱাসিগণং অনুগ্গহেত্ৱা যথাৱুত্তে দ্ৱেগণে ৱিসোধেসি, সাসনং নিম্মলং অকাসি, ততো পচ্ছা ৱিজযবাহুপৰক্কমবাহুৰাজূনং দ্ৱিন্নং কালেপি সাসনং নিম্মলং হুত্ৱাযেৱ অট্ঠাসি, তেনেৱ ব্যত্তপ্পটিবলভিক্খূ আযাচিত্ৱা সীহড়দীপং গন্ত্ৱা পুন সিক্খং গণ্হা পেস্সামি, তেসং পন পৰম্পৰৱসেন পৱত্তানং ভিক্খূনং ৱসেন অম্হাকং ৰামঞ্ঞৰট্ঠে সাসনং নিম্মলং হুত্ৱা পতিট্ঠহিস্সতীতি. এৱং পন চিন্তেত্ৱা মোগ্গলানত্থেৰং সোমত্থেৰঞ্চ সীহড়দীপং গমনত্থায যাচি. থেৰাচ সাসনপ্পটিযত্তকম্মমিদন্তি মনসিকৰিত্ৱা পটিঞ্ঞং অকংসু.

ৰাজা চ দাঠাধাতুপূজনত্থায ভিক্খুসঙ্ঘস্স পূজনত্থায ভূৱনেকবাহুৰঞ্ঞো পণ্ণাকাৰত্থায দেয্যধম্মপণ্ণাকাৰৱত্থূনি পটিযাদেত্ৱা চিত্ৰদূতং ৰামদূতন্তি ইমে দ্ৱে অমচ্চে দ্ৱীসু নাৱাসু নাযকট্ঠানে ঠপেত্ৱা কলিযুগে সত্ততিংসাধিকে অট্ঠৱস্সসতে সম্পত্তে মাঘমাসস্স পুণ্ণমিতো একাদসমিযং সূৰৱাৰে চিত্ৰদূতং সদ্ধিং মোগ্গলানত্থেৰপ্পমুখেহি ভিক্খূহি একায নাৱায গমাপেসি. ফগ্গুণমাসস্স অট্ঠমিযং সীহড়দীপে কলম্বুতিত্থং পাযাসি.

ৰামদূতং পন তস্মিংযেৱ ৱস্সে মাঘমাসস্স পুণ্ণমিতো দ্ৱাদসমিযং চন্দৱাৰে সদ্ধিং সোমত্থেৰপ্পমুখেহি ভিক্খূহি একায নাৱায গমাপেসি. উজুকং পন ৱাতং অলভিত্ৱা চিত্ৰমাসস্স জুণ্হপক্খনৱমিযং সীহড়দীপে ৱল্লিগামং পাযাসি.

ততো পচ্ছা তেপি দ্ৱে অমচ্চা দ্ৱীসু নাৱাসু আভতানি দাতব্বপণ্ণাকাৰৱত্থূনি সন্দেসপণ্ণানি চ ভূৱনেকবাহুৰঞ্ঞো ভিক্খূসঙ্ঘস্স চ অদাসি. ৰঞ্ঞা পেসিতভিক্খূনঞ্চ সন্দেসপণ্ণে কথিতনিযামেনেৱ কল্যাণিযং নাম নদিযং উদকুক্খেপসীমাযং সামণেৰভূমিযং পতিট্ঠাপেত্ৱা পুন উপসম্পদকম্মং অকংসু.

উপসম্পজ্জিত্ৱা চ ভূৱনেকবাহুৰাজা নানাপ্পকাৰে ভিক্খূনং সাৰুপ্পে পৰিক্খাৰে দত্ৱা ইদং পন আমিসদানং যাৱ জীৱিতপৰিযোসানাযেৱ পৰিভুঞ্জিতব্বং ভৱিস্সতি, নামলঞ্ছং পন ন জীৰিস্সতীতি কত্ৱা ৰামদূতস্স নাৱায পখানভূতস্স সোমত্থেৰস্স সিৰিসঙ্ঘবোধিসামীতি নামং অদাসি. অৱসেসানং পন দসন্নং থেৰানং কিত্তিসিৰিমেঘসামি পৰক্কমবাহুসামি বুদ্ধঘোসসামি সীহড়দীপৱিসুদ্ধসামি গুণৰতনধৰসামী জিনালঙ্কাৰসামি ৰতনমালিসামি সদ্ধম্মতেজসামি ধম্মৰামসামি ভূৱনেকবাহুসামীতি নামানি অদাসি.

চিত্ৰদূতস্স নাৱায পখানভূতস্স মোগ্গলানত্থেৰস্স ধম্মকিত্তিলোকগৰুসামীতি নামং অদাসি. অৱসেসানং পন সিৰিৱনৰতনসামি মঙ্গলত্থেৰস্সামি কল্যাণতিস্সস্সামি চন্দগিৰিসামি সিৰিদন্তধাতুসামি ৱনৱাসিতিস্সসামি ৰতনলঙ্কাৰসামি মহাদেৱসামি উদুম্বৰগিৰিসামি চূড়াভযতিস্সসামীতি নামানি অদাসি. বাৱীসতিযা পন পচ্ছা সমণানং নামং ন অদাসি. অভিনৱসিক্খং পন সব্বেসংযেৱ অদাসি.

ততো পচ্ছা চেতিযপূজনাদীনি কত্ৱা তংতংকিচ্চং নিপ্ফাদেত্ৱা পুন আগমংসু. ভূৱনেকবাহুৰাজা চিত্ৰদূতং এৱমাহ, ৰামাধিপতিৰঞ্ঞো পণ্ণাকাৰং পটিদাতুং ইচ্ছামি, পটিদূতঞ্চ পেসেতুং তাৱ ত্ৱং আগমেহীতি. এৱং পন ৱত্ৱা পচ্ছা আগমনকালে চণ্ডৱাতভযেন মহাসমুদ্দমজ্ঝে নাৱা অৱগচ্ছতি. তেন সীহড়ৰঞ্ঞা পেসিতনাৱায সব্বে সন্নিপতিত্ৱা আৰুহিত্ৱা আগচ্ছন্তা তীণি দিৱসানি অতিক্কমিত্ৱা পুন চণ্ডৱাতভযেন অগম্ভীৰট্ঠানে সিলায ঘট্টেত্ৱা লগ্গিত্ৱা গন্তুং অসক্কুণিত্ৱা একং উড়ুম্পং বন্ধিত্ৱা জঙ্ঘেনেৱ অগমংসু. সীহড়ৰঞ্ঞো চ দূতো পণ্ণাকাৰং দত্ৱা পচ্চাগমাসি. ভিক্খূসু চ ভিক্খূ অন্তৰামগ্গেযেৱ মচ্চু আদায গচ্ছতি. অহো অনিচ্চা ৱত সঙ্খাৰাতি. হোন্তি চেত্থ,–

ইমেসং পন আৰদ্ধং, ন কিচ্চং যাৱ নিট্ঠিতং;

ন তাৱ আদিযিস্সন্তি, মচ্চু নত্থি আপেক্খনা.

নিক্কাৰুণিকো হি এস, বলক্কাৰেন আদিয;

ৰোদমানংৱ ঞাতীনং অনিচ্ছন্তংৱ গচ্ছতীতি.

ৰামাধিপতিৰাজাচ তেসং ভিক্খূনং পত্তকালে হংসাৱতীনগৰস্স পচ্ছিমস্মিং দিসাভাগে নৰসূৰেন নাম অমচ্চেন পৰিভুত্তে গামখেত্তে পাড়িঅট্ঠকথাড়ীকাদযো পুনপ্পুনং পস্সিত্ৱা উপপৰিক্খিত্ৱা সীমসমূহনসীমসম্মুতিকম্মানি কাৰপেসি. সীহড়দীপে ভগৱতা ন্হাযিতপুব্বায কল্যাণিযা নাম নদিযং উদকুক্খেপসীমং কত্ৱা তত্থ মহাৱিহাৰৱাসীনং ভিক্খূনং সন্তিকে উপলদ্ধউপসম্পদভাৱেহি ভিক্খূহি কতত্তা কল্যাণীসীমাতি সমঞ্ঞং অকাসি. ইচ্চেৱং ৰামাধিপতিৰাজা পত্তলঙ্কে ভিক্খূ নিস্সায সাসনং সুট্ঠু পতিট্ঠিতং অকাসি. কলিযুগস্স অট্ঠতিংসাধিকঅট্ঠৱস্সসতকালতো যাৱ একচত্তালীসাধিকঅট্ঠৱস্সসতা তেসং ভিক্খূনং ৱংসে অসীতিমত্তা গণপামোক্খত্থেৰা অহেসুং. তেসং সিস্সজাতানি পন ছব্বিসাধিকানি দ্ৱিসতানি চতুসহস্সানি দসসহস্সানি অহেসুং. এৱং ভগৱতো সাসনং ৰামঞ্ঞৰট্ঠে ৱুড্ঢিং ৰামঞ্ঞৰট্ঠে ৱুড্ঢিং ৱিৰূড়িং ৱেপুল্লমাপজ্জিতি.

ইদং ৰামঞ্ঞৰট্ঠে সত্তমং সাসনস্স পতিট্ঠানং.

যদা পন অৰিমদ্দননগৰে অনুৰুদ্ধো নাম ৰাজা সুধম্মপুৰং সৰাজিকং অভিভৱিত্ৱা ৱিদ্ধংসি, তদা ৰামঞ্ঞৰট্ঠং ৰাজসুঞ্ঞং হুত্ৱা পতিট্ঠহি. ৰামঞ্ঞৰট্ঠে মুত্তিমনগৰে সোণুত্তৰৱংসো একো গণো, সিৱলিৱংসো একো, তামলিন্দৱংসো একো, আনন্দৱংসো একো, বুদ্ধৱংসো একো, মহানাগৱংসো একোতি ছগ্গণা ৱিসুং ৱিসুং হুত্ৱা অট্ঠংসু নানাসংৱাসকা নানানিকাযা.

ধম্মচেতিযৰঞ্ঞা পন কাৰাপিতসাসনম্পি অভিজ্জমানং হুত্ৱা অট্ঠাসি. সমানসংৱাসো একনিকাযোযেৱ অহোসি. হংসাৱতীমুত্তিমসুৱসেন তীণিপি ৰামঞ্ঞৰট্ঠানি সুনাপৰন্ত সঙ্খাতেন একাবদ্ধানি হুত্ৱা তিট্ঠন্তি. পুব্বেচ মৰম্মৰট্ঠিন্দৰাজূনং আণাপৱত্তনট্ঠানানি অহেসুং. তস্মা মৰম্মৰট্ঠতো একচ্চে ভিক্খূ ৰামঞ্ঞৰট্ঠং গন্ত্ৱা কল্যাণীসীমাযং পুন সিক্খং গণ্হিংসু. ধম্মচেতিযৰঞ্ঞাকাৰাৱিতসাসনং সকলং মৰম্মৰট্ঠম্পি ব্যাপেত্ৱা ওগাহেত্ৱা তিট্ঠতি.

ৰামঞ্ঞৰট্ঠে সোণুত্তৰত্থেৰানং সাসনং পতিট্ঠাপিতকালতো পট্ঠায যাৱ সুধম্মপুৰে মনোহৰিৰঞ্ঞা অৰহন্তানং সংৱিজ্জমানতা ৱেদিতব্বা. ততো পচ্ছা পন উত্তৰা জীৱাৰিযাৱংসমহাকাড়প্ৰানদস্সিত্থেৰানং কালে লোকিযজ্ঝানাভিঞ্ঞালাভিযোযেৱ সংৱিজ্জংসূতি. অধুনা পন তীসুপি ৰামঞ্ঞৰট্ঠেসু ধম্মচেতিযৰঞ্ঞা কাৰাৱিতসাসনংযেৱ তিট্ঠতি. এত্থচ হেতুফলসম্বন্ধৱসেন আদিঅন্তৱসেনে চ সাসনৱংসং পঞ্ঞায তুলযিত্ৱা আদিতোৱ দস্সিতেহি তীহি নযেহি যথাপৱেণী ঘট্টিযতি, তথা গণ্হেয্যাতি. অযঞ্চ সাসনৱংসো লজ্জিপেসলসিক্খাকামানংযেৱ ৱসেন ৱুত্তো, নালজ্জীনং ৱসেনাতি দট্ঠব্বো.

তায চ থেৰপৰম্পৰায মুত্তিমনগৰৱাসিমেধঙ্কৰত্থেৰো লোকদীপকসাৰং নাম গন্থং অকাসি. হংসাৱতীনগৰৱাসী পন আনন্দত্থেৰো মধুসাৰত্থদীপনিং নাম অভিধম্মটীকায সংৱণ্ণনং, হংসাৱতীনগৰৱাসীযেৱ ধম্মবুদ্ধত্থেৰো কৱিস্সাৰং নাম ছন্দোৱণ্ণনং, হংসাৱতীনগৰৱাসীযেৱ সদ্ধম্মালঙ্কাৰত্থেৰো পট্ঠানসাৰদীপনিং নাম পকৰণং, তথেৱ অঞ্ঞতৰো থেৰো অফেগ্গুসাৰং নাম গন্থং অকাসি. এৱং অনেকপ্পকাৰানং গন্থকাৰানং মহাথেৰানং ৱসনট্ঠানং হুত্ৱা সাসনং ওগাহেত্ৱা ৱিৰূড়ট্ঠানংঅহোসীতি.

ইতি সাসনৱংসে সুৱণ্ণভূমিসাসনৱংসকথামগ্গা নাম

ততিযো পৰিচ্ছেদো.