১৯. পানীযদিন্নস্স ৱত্থুম্হি অযমানুপুব্বীকথা

জম্বুদীপে অঞ্ঞতৰস্মিং জনপদে কিৰে কো মনুস্সো ৰট্ঠতো ৰট্ঠং জনপদতো জনপদং ৱিচৰন্তো অনুক্কমেন চন্দভাগানদীতীৰং পত্ৱা নাৱং অভিৰুহিত্ৱা পৰতীৰং গচ্ছতি. অথাপৰা গব্ভিনিত্থী তায এৱ নাৱায গচ্ছতি, অথ নাৱা গঙ্গামজ্ঝপ্পত্তকালে তস্সা কম্মজৱাতা চলিংসু. ততো সা ৱিজাযিতুমসক্কোন্তী কিলন্তা পানীযং মে দেথ, পিপাসিতাম্হিতি মনুস্সে যাচি. তে তস্সা ৱচনং অসুণন্তা ৱিয পানীযং নাদংসু, অথ সো জানপদিকো তস্সা কৰুণাযন্তো [কৰুণাযপানীযং, কৰুণাযন্তোপানীযং, কৰুণাযতোযং ইতিচকত্থচি] তোযং গহেত্ৱা মুখে আসিঞ্চি, তস্মিং খণে সা লদ্ধস্সাসা সুখেন দাৰকং ৱিজাযি, অথ তে তীৰং পত্ৱা কতিপযদিৱসেন অত্তনো অত্তনো ঠানং পাপুণিংসু. অথাপৰভাগে সো জানপদিকো অঞ্ঞতৰকিচ্চং পটিচ্চ তস্সা ইত্থিযা ৱসননগৰং পত্ৱা তত্থ তত্থ আহিণ্ডন্তো নিৱাসনট্ঠানং অলভিত্ৱা নগৰদ্ৱাৰে সালং গন্ত্ৱা তত্থ নিপজ্জি. তস্মিংযেৱ দিৱসে চোৰা নগৰং পৱিসিত্ৱা ৰাজগেহে সন্ধিং ছিন্দিত্ৱা ধনসাৰং গহেত্ৱা গচ্ছন্তা ৰাজপুৰিসেহি অনুবন্ধা গন্ত্ৱা তাযেৱ সালায ছড্ডেত্ৱা পলাযিংসু. অথ ৰাজপুৰিসা আগন্ত্ৱা চোৰে অপস্সন্তা তং জানপদিকং দিস্ৱা অযং চোৰোতি গহেত্ৱা পচ্ছাবাহং গাড়্হং বন্ধিত্ৱা পুন দিৱসে ৰঞ্ঞো দস্সেসুং. ৰঞ্ঞা কস্মা ভণে চোৰকম্ম মকাসীতি পুচ্ছিতো নাহং দেৱ চোৰো, আগন্তুকোম্হীতি ৱুত্তে ৰাজা চোৰে পৰিযেসিত্ৱা অলভন্তো অযমেৱ চোৰো, ইমং মাৰেথাতি আণাপেসি. ৰাজপুৰিসেহি তং গাড়্হং বন্ধিত্ৱা আঘাতনং নীতে সা ইত্থী তং তথা নীযমানং দিস্ৱা সঞ্জানিত্ৱা কম্পমানহদযা মুহুত্তেন ৰঞ্ঞো সন্তিকং গন্ত্ৱা ৱন্দিত্ৱা দেৱ এসো ন চোৰো আগন্তুকো মুঞ্চথেতং দেৱাতি আহ. ৰাজা তস্সা কথং অসদ্দহন্তো যজ্জেতং মোচেতু মিচ্ছসি. তস্সগ্ঘনকং ধনং দত্ৱা মুঞ্চাপেহীতি, সা সামি মম গেহে ধনং নত্থি. অপিচ মম সত্তপুত্তেহি সদ্ধিং মং দাসিং কৰোহি, এতং মুঞ্চ দেৱাতি আহ, অথ ৰাজা ত্ৱং এতং অধুনাগতোতি ৱদসি. এতং নিস্সায পুত্তেহি সদ্ধিং অত্তানং দাসত্তং সাৱেসি. কিমেসো তে ঞাতি ৱা, উদাহু উপকাৰকোতি পুচ্ছন্তো আহ.

১. কিংতে ভোতি অযং পোসো, তুৱং পুচ্ছামি সংসযং;

ভাতা ৱা তে পিতা হোতি, পতি ৱা দেৱৰো তৱ.

২. ঞাতি সালোহিতো কিন্নু, উদাহু ইণদাযকো;

অথোপকাৰকো কিন্নু, কস্মাস্স দেসি জীৱিতংতি.

ততো সা আহ.

৩. এসো মে পুৰিসো দেৱ, কতপুব্বোপকাৰকো;

অতাণমেকিকং [অত্তানমেকিকং ইতিকত্থচি] চেসো, দুক্খিতং মৰণে ঠিতং.

৪. ৱিজাযিতু মসক্কোন্তিং, গব্ভিনিং দুক্খৱেদিনিং;

তোযেন মং উপট্ঠাসি, তেনাহং সুখিতা তদা.

৫. ভঙ্গকল্লোলমালায, উত্তৰন্তং মহণ্ণৱং;

পহায পাতুং কূপস্স, যাতি লোকো পিপাসিতো.

৬. তথেৱ ৱিজ্জমানেসু, জনেসু মনুজাধিপ,

একস্সেৱ মনস্মিংহি, গুণং তিট্ঠতি সাধুকং.

৭. পহত্ৱান মতং হত্থিং, মংসত্থী কেচি জন্তুনো;

অনুবন্ধন্তি মংসত্থং, সসং ধাৱন্ত মেককং.

৮. তথেৱ ৱিজ্জমানেসু, জনেসু মনুজাধিপ;

গুণৱন্ত মনুবন্ধন্তি, সপ্পুৰিসং কতৱেদিকং.

৯. তস্মা সপ্পুৰিসে ধম্মে, পতিট্ঠাস্মি নৰাধিপ;

অনুস্সৰন্তি এতেন, কতপুব্বূ পকাৰকং.

১০. অহঞ্চ মম পুত্তা চ, এতেনম্হ সুখাপিতা;

জীৱিতম্পি পৰিচ্চজ্জ, মুচ্চনীযো অযং মযাতি.

ততো ৰাজা দোৱাৰিকং পক্কোসিত্ৱা তম্পি পুচ্ছিত্ৱা অধুনাগতভাৱং ঞত্ৱা তস্সা সপ্পুৰিসধম্মে সন্তুট্ঠো তেসং উভিন্নম্পি মহন্তং যসং অনুপ্পদাসি. তে লদ্ধযসা ত তো পট্ঠায দানাদীনি পুঞ্ঞকম্মানি কত্ৱা সগ্গপৰাযণা অহেসুন্তি.

১১. ধম্মে পতিট্ঠিতমনা অপি মাতুগামা,

এৱং লভন্তি ৱিভৱঞ্চ পসংসনঞ্চ;

ধম্মঞ্চ সাধুচৰিতং মনসীকৰোন্তো,

ধম্মেসু ৱত্তথ সদা সুচিসজ্জনাতি.

পানীযদিন্নস্স ৱত্থুং নৱমং.