২০. সহাযস্স পৰিচ্চত্তজীৱিতকস্স ৱত্থুম্হি অযমানুপুব্বীকথা

ভগৱতি পৰিনিব্বুতে সাৱত্থিযং সোমব্ৰাহ্মণো সোমদত্তব্ৰাহ্মণোতি দ্ৱে ব্ৰাহ্মণা ৱসন্তি. তত্থ সোমদত্তব্ৰাহ্মণেন সদ্ধিং সোমব্ৰাহ্মণো যেভুয্যেন দূতং কীড়তি. অথেকদিৱসং সোমদত্তো সোমব্ৰাহ্মণং তেন পৰাজেত্ৱা তস্স উত্তৰাসঙ্গঞ্চ লঞ্ছনমুদ্দিকঞ্চ গহেত্ৱা অত্তনো গেহং গচ্ছন্তো সোমব্ৰাহ্মণস্স এহি গেহং গচ্ছা- মাতি আহ. ততো সোমো নাহং সম্ম একসাটকো হুত্ৱা অন্তৰৱীথিং ওতৰিতুং সক্কোমি. গমনতো এত্থেৱ মে ঠানং ৱৰতৰন্তি আহ, সোমদত্তেন এৱং সতি সম্ম ইমং উত্তৰাসঙ্গং গণ্হাতি তস্স তং দত্ৱা ইদানি সম্ম এহীতি ৱুত্তোপি নাগচ্ছতি. পুন তেন ভো কস্মা নাগচ্ছসীতি পুট্ঠো সম্ম মম হত্থে মুদ্দিকং অপস্সন্তা মে পুত্তদাৰাদযো মযা সদ্ধিং কলহং কৰোন্তীতি আহ, অথ সো এৱং সন্তে যদা তে পহোতি. তদা ময্হং দেহীতি মুদ্দিকম্পি দত্ৱা তং গহেত্ৱা গেহং অগমাসি. অথ তে এত্তকেন সহাযা অহেসুং. অপৰভাগে সোমদত্তব্ৰাহ্মণং অযং পৰদাৰকম্মং অকাসীতি মনুস্সা গহেত্ৱা ৰঞ্ঞো দস্সেসুং. ৰাজা তস্স ৰূপসম্পত্তিং দিস্ৱা ৰাজাণং অকত্ৱা মা ভো পুন এৱমকাসীতি ওৱদিত্ৱা ৱিস্সজ্জেসি. ৰাজা নং যাৱততিযৱাৰং ওৱদন্তো ৱিস্সজ্জেত্ৱা চতুত্থেৱাৰে গচ্ছথেতং আঘাতনং নেত্ৱা মাৰেথাতি আণাপেসি. এৱং পাপকম্মে নিৰতা অনেকাকাৰেন ওৱদন্তাপি ন সক্কা নিৱাৰেতুং. তথাহি.

১. সোণা চেৱ সিগালা চ, ৱাযসা নীলমক্খিকা;

ইচ্চেতে কুণপে সত্তা, ন সক্কা তে নিসেধিতুং.

২. তথা পাণাতিপাতেসু, পৰদাৰে সুৰায চ;

মুসাৱাদেসু থেয্যেসু, সত্তসত্তা ন ৱাৰিযাতি.

ততো ৰাজপুৰিসা তং বন্ধিত্ৱা পক্কমিংসু. তদা সোমব্ৰাহ্মণো সোমদত্তং তথা নীযমানং দিস্ৱা কম্পমানহদযো ৰাজপুৰিসানং সন্তিকং গন্ত্ৱা ইমং ভো মুহুত্তং মা মাৰেথ. যাৱ ৰাজানং জানাপেস্সামীতি ৱত্ৱা ৰঞ্ঞো সন্তিকং গন্ত্ৱা ৱন্দিত্ৱা ঠিতো দেৱ মম জীৱিতং সোমদত্তস্স ব্ৰাহ্মণস্স দস্সামি. এতং মুঞ্চথ. যদি মাৰেতুকামা, মং মাৰেথাতি আহ. ৰাজা তুণ্হী [তুট্ঠো ইতিকত্থচি] অহোসি, ৰাজপুৰিসা সোমদত্তং মুঞ্চিত্ৱা সোমব্ৰাহ্মণং আঘাতনং নেত্ৱা মাৰেসুং, অহো কতঞ্ঞুনো কতৱেদিতা.

হোতি চেত্থ.

৩. ককূপকাৰ মত্তানং, সৰন্তা কেচি মানুসা;

জীৱিতং দেন্তি সোমোৱ, সোমদত্তস্স অত্তনোতি.

সো তেন জীৱিতদানেন দেৱলোকে নিব্বত্তিত্ৱা মহন্তে কনকৱিমানে দেৱচ্ছৰাসহস্সপৰিৱুতো দিব্বসম্পত্তিমনুভোন্তো পটিৱসতি. তদা সোমদত্তব্ৰাহ্মণো এসো মং মৰণপ্পত্তং মোচেসীতি ৱত্ৱা তস্সত্থায দানং দত্ৱা পত্তিং অদাসি. তাৱদেৱস্স ততো বহুতৰং দেৱিস্সৰিযং অহোসি দেৱানুভাৱঞ্চ. ততো সো সোমদেৱো অত্তনো দেৱিস্সৰিযং ওলোকেন্তো সহাযস্স অত্তনো জীৱিতদানং অদ্দস. দিস্ৱা অত্তভাৱং ৱিজহিত্ৱা মাণৱকৱণ্ণেন সোমদত্তব্ৰাহ্মণং উপসঙ্কমিত্ৱা পটিসন্থাৰং কত্ৱা অত্তানং দেৱলোকে নিব্বত্তভাৱং পকাসেত্ৱা তং গহেত্ৱা অত্তনো আনুভাৱেন দেৱলোকং নেত্ৱা যথাকামং সম্পত্তি মনুভৱাতি ৱত্ৱা সত্তাহং দেৱস্সৰিযং দত্ৱা সত্তমে দিৱসে নেত্ৱা তস্স গেহেযেৱ পতিট্ঠাপেসি. তত্থ হি দিব্বসম্পত্তি মনুভূতস্স মনুস্সসম্পত্তি পটিক্কুলা হোতি. ততো সো দিব্বসম্পত্তিমনুস্সৰন্তো কিসো দুব্বলো উপ্পণ্ডুপ্পণ্ডুকজাতো অহোসি. অথেকদিৱসং দেৱপুত্তো তং ওলোকেন্তো তথা দুক্খপ্পত্তং দিস্ৱা ন সক্কা মনুস্সেন দিব্বসম্পত্তিমনুভৱিতুন্তি ইচ্ছিতিচ্ছিতসম্পত্তিদাযকং একং চিন্তামণিং দত্ৱা তস্স ভৰিযম্পি অত্তনো আনুভাৱেন ৰূপৱন্থং যসৱন্তং ৱণ্ণৱন্তং অতিক্কন্তমনুস্সিত্থিৱণ্ণং অকাসি, অপৰভাগে তে জযম্পতিকা পচ্চক্খতো দিট্ঠদিব্বসম্পত্তিৱিভৱা দানং দত্ৱা সীলং ৰক্খিত্ৱা সহাযদেৱপুত্তস্স সন্তিকেযেৱ নিব্বত্তিংসূতি.

৪. মন্দেন নন্দিতমনা উপকাৰকেন,

পাণম্পি দেন্তি সুজনা ইতি চিন্তযিত্ৱা;

মিত্তদ্দু মা ভৱথ ভো উপকাৰকস্স;

পাসংসিযা ভৱথ সাধুজনেহি নিচ্চংতি.

সহাযস্স পৰিচ্চত্তজীৱিতকস্স ৱত্থুং দসমং.

নন্দিযৰাজৱগ্গো দুতিযো.