নন্দিযৰাজৱগ্গো

১১. নন্দিযৰাজস্স ৱত্থুম্হি অযমানুপুব্বীকথা

ইতো কিৰ কপ্পসতসহস্সমত্থকে পদুমুত্তৰো নাম সত্থা লোকে উদপাদি সদেৱকং লোকং সংসাৰকন্তাৰা উত্তাৰেন্তো. তস্মিং কিৰ সমযে একো কুটুম্বিকো সত্থু ধম্মদেসনং সুত্ৱা পসন্নমানসো বুদ্ধপমুখং ভিক্খুসঙ্ঘং নিমন্তেত্ৱা মহাদানং সজ্জেত্ৱা অত্তনো ভৱনং দেৱভৱনমিৱ অলঙ্কৰিত্ৱা বুদ্ধাৰহং মহাসনং পঞ্ঞাপেত্ৱা গন্ত্ৱা ভগৱন্তং যাচি কালোযং ভন্তে ভগৱতো ভত্তগ্গস্স উপসঙ্কমনাযাতি. অথ ভগৱা ভিক্খুসঙ্ঘপৰিৱুতো মহতা বুদ্ধানুভাৱেন গন্ত্ৱা নিসীদি পঞ্ঞত্তৱৰবুদ্ধাসনে, ততো কুটুম্বিকো হট্ঠো উদগ্গো সপৰিসো ভগৱন্তং পৰিৱিসতি অনেকেহি মধুৰন্নপানাদীহি. তদা তস্স ভগৱতো সাসনে ধুতঙ্গধৰানং অগ্গো ৱসভত্থেৰোনাম মহাসাৱকো সপদানৱত্তেন পিণ্ডায চৰমানো তস্স কুটুম্বিকস্স গেহদ্ৱাৰে অট্ঠাসি, অথ সো থেৰং দিস্ৱা ভন্তে সত্থা অন্তোগেহে নিসিন্নো, তুম্হেপি পৱিসথাতি যাচি, থেৰো অপৱিসিত্ৱাৱ অগমাসি, কুটুম্বিকো ভগৱন্তং উপসঙ্কমিত্ৱা তমত্তং ৱত্ৱা কিং ভন্তে সদেৱকে লোকে ভগৱতাপি উত্তৰিতৰো গুণেন সংৱিজ্জতীতি আহ. অথস্স সত্থা পুত্তোপমং দস্সেত্ৱা থেৰস্স গুণে ৱণ্ণেন্তো এৱমাহ.

১. পালেন্তি নিম্মলং কত্ৱা, পাতিমোক্খাদিসংৱৰং;

সমাদিন্নধুতঙ্গাচ, অপ্পিচ্ছা মুনিসূনৱো.

২. নিচ্চ মন্তকযুদ্ধম্হি, নদ্ধা যোধাৱ দপ্পিতা;

পুঞ্ঞানং ৱত্থুভূতা তে, দেৱমানুসকা দিনং.

৩. ধাৰেমহং ৱণ্ণৱন্তং, সীৱেয্যম্পিচ চীৱৰং;

বুদ্ধপুত্তা মহানাগা ন ধাৰেন্তি তথাৱিধং.

৪. ধাৰেন্তি তে পংসুকূলং, সঙ্ঘাটেত্ৱা পিলোতিকে;

ৱণচ্ছাদনচোলংৱ, ইচ্ছালোভ ৱিৱজ্জিতা.

৫. সাদিযামি সদা হম্ভো, উপাসকনিমন্তনং;

নেৱ সাদেন্তি সম্বুদ্ধ, পুত্তো পাসকযাচনং.

৬. সপদানেন যং লদ্ধং, লূখংৱাপি পণীতকং;

তেন তুস্সন্তি মে পুত্তা, ৰসগেধৱিৱজ্জিতা.

৭. নিপজ্জামি অহং সাধু, সন্থতে সযনে সুভে;

ন তে সেয্যং পকপ্পেন্তি, সংসাৰভযভীৰুকা.

৮. ঠানা সনগমনেন, কপ্পেন্তি ইৰিযাপথং;

নেকভূমিসমাকিণ্ণ, পাসাদেসু ৱসামহং.

৯. বুদ্ধপুত্তা তথাচ্ছন্নং, ন কদা পৱিসন্তি তে;

ৰুক্খমূলে সুসানস্মিং, অব্ভোকাসে ৰমন্তি তে.

১০. ভাৱেত্ৱা ভৱনাসায, হেতুং ভাৱনমুত্তমং;

অহং গামে ৱসিস্সামি, পাপেন্তো জনতং সিৱং.

১১. ৰমন্তি মম পুত্তা তে, পন্তসেনাসনে ককা;

তেসং মহত্তৰো সন্তো, থেৰোযং ৱসভো মহা;

ধুতপাপো ধুতঙ্গগ্গো, ঞাতোযং মম সাসনেতি.

এৱং ভগৱা হত্থং উক্খিপিত্ৱা চন্দমণ্ডলে পহৰন্তো ৱিয থেৰস্স গুণে পকাসেসি, ততো সো তস্স গুণকথং সুত্ৱা সযম্পিতং ঠানন্তৰং কামযমানো যন্নূনাহং অনাগতে অঞ্ঞতৰস্স সম্মাসম্বুদ্ধস্স সাসনে ধুতঙ্গধৰানং অগ্গো ভৱিস্সামীতি তং ঠানন্তৰং পত্থেন্তো ভগৱতো পাদমূলে নিপজ্জি, সত্থা তং কাৰণং উপপৰিক্খিত্ৱা ইতো কপ্পসতসহস্সমত্থকে গোতমো নাম সত্থা উপ্পজ্জিস্সতি. ত্ৱং তদা ধুতঙ্গধৰানং অগ্গো হুত্ৱা কস্স পোতি পঞ্ঞাযিস্সতীতি ব্যাকৰণ মদাসি. ততো পট্ঠায সো সোমনস্সো পুঞ্ঞকম্মং কত্ৱা ততো চুতো দেৱমনুস্সেসু দেৱিস্সৰিযং অনুভৱন্তো ৱিপস্সীসম্মাসম্বুদ্ধকালে একসাটকো নাম ব্ৰাহ্মণো হুত্ৱা মহাদানং অদাসি. ততো চুতো কস্সপসম্মাসম্বুদ্ধে পৰিনিব্বুতে বাৰাণসীনগৰে বাৰাণসীসেট্ঠি হুত্ৱা নিব্বত্তো দানাদীনি পুঞ্ঞানি কত্ৱা ততো চৱিত্ৱা সংসাৰে সংসৰন্তো দসৱস্সসহস্সা যুকেসু মনুস্সেসু বাৰাণসিযং একো কুটুম্বিকো হুত্ৱা নিব্বত্তি. সো পনাযং কুটুম্বিকো অৰঞ্ঞে জঙ্ঘাৱিহাৰং অনুৱিচৰন্তো পচ্চন্তিমে জনপদে অৰঞ্ঞাযতনে অঞ্ঞতৰং পচ্চেকবুদ্ধং অদ্দস. সো চ পচ্চেকবুদ্ধো তত্থ চীৱৰকম্মং কৰোন্তো অনুৱাতে অপ্পহোন্তে সংহৰিত্ৱা ঠপেতুং আৰদ্ধো. কুটুম্বিকো তং দিস্ৱা ভন্তে কিং কৰোথাতি পুচ্ছি. সো পচ্চেকবুদ্ধো অপ্পিচ্ছতায তেন পুট্ঠো ন কিঞ্চি ৱুত্তো হোতি. সো চীৱৰদুস্সং নপ্পহোতীতি ঞত্ৱা অত্তনো উত্তৰসাটকং পচ্চেকবুদ্ধস্স পাদমূলে ঠপেত্ৱা অগমাসি. পচ্চেকবুদ্ধো তং গহেত্ৱা অনুৱাতকং আৰোপেন্তো চীৱৰং কত্ৱা পাৰুপি. কুটুম্বিকো জীৱিতপৰিযোসানে কালং কত্ৱা তাৱতিংসভৱনে নিব্বত্তিত্ৱা তত্থ যাৱতাযুকং দিব্বসম্পত্তিং অনুভৱিত্ৱা ততো চৱিত্ৱা বাৰাণসিতো তিযোজনমত্তকে ঠানে অঞ্ঞতৰস্মিং নগৰে নিব্বত্তি, তস্স মাতাপিতৰো নন্দিযোতি [নন্দীতিনামং ইতিসব্বত্থ] নামং অকংসু, তস্স সত্ত ভাতৰো অহেসুং, সেসা ছ ভাতৰো নানাকম্মন্তেসু ব্যাৱটা মাতাপিতুন্নং পোসেন্তি. নন্দিযো পন অকম্মসীলো গেহেযেৱ ৱসতি. তস্মা তস্স সেসা কুজ্ঝন্তি. মাতাপিতৰোপি নন্দিযং আমন্তেত্ৱা ওৱদন্তি. সো তুণ্হী হোতেৱ. অথাপৰস্মিং সমযে গামে নক্খত্তং সঙ্ঘুট্ঠং, তদা সো মাতৰং আহ. অম্ম সাটকং দেহি, নক্খত্তং কীড়িস্সামীতি, সা ধোত- ৱত্থং নীহৰিত্ৱা অদাসি, অম্ম থূলং ইদন্তি, সা অঞ্ঞং নীহৰিত্ৱা অদাসি, তম্পি পটিক্খিপি. অথ নং মাতা আহ. তাত যাদিসে মযং গেহে জাতা, নত্থি ইতো সুখুমতৰস্স পটিলাভায পুঞ্ঞন্তি, লভনট্ঠানং গমিস্সামি অম্মাতি. পুত্ত অহং অজ্জেৱ তৱ বাৰাণসীনগৰে ৰজ্জপটিলাভং ইচ্ছামীতি আহ. সো সাধু অম্মাতি মাতৰং ৱন্দিত্ৱা পদক্খিণং কত্ৱা পক্কামি. মাতুযা পনস্স এৱং অহোসি. কহং সো গমিস্সতি, পুব্বেৱিয ইধৱা এত্থৱা গেহে নিসীদিত্ৱা আগচ্ছতীতি, সো পন পুঞ্ঞনিযামেন চোদিযমানো গামতো নিক্খমিত্ৱা বাৰাণসিং গন্ত্ৱা সেনগুত্তস্স গেহে পটিৱসতি, অথেকদিৱসং সো তস্স কম্মকাৰেহি সদ্ধিং সল্লপন্তো নিসীদিত্ৱা পচলাযন্তো সুপিনং অদ্দস. মুখেন অন্তং নিক্খমিত্ৱা সকলজম্বুদীপে পত্থৰিত্ৱা অন্তোকুচ্ছিমেৱ পাৱিসি. পবুদ্ধো সো ভীতো মহাসদ্দমকাসি. অথ নং মহাসেনগুত্তো পুচ্ছি. নন্দিযো সুপিনং অদ্দসন্তি আহ. অথ তেন কীদিসন্তি পুট্ঠো কথেসি, ততো সেনগুত্তো তং অত্তনো কুলূপগং পৰিব্বাজিকং পুচ্ছি কো তস্স ৱিপাকোতি. পৰিব্বাজিকা যদি ভো ইত্থী পস্সতি. সত্তদিৱসব্ভন্তৰেযেৱ অভিসেকং লভতি, যদি পুৰিসো পস্সতি, তথেৱ ৰাজা হোতীতি কথেসি. সেনগুত্তো তস্সা তং কথং সুত্ৱা ইমং মম ঞাতিং কৰোমীতি অত্তনো সত্ত ধীতৰে পক্কোসিত্ৱা পটিপাটিযা পুচ্ছি. নন্দিযস্স সন্তিকে ৱসথাতি, সেসা সব্বা ন ইচ্ছিংসু, ন মযং জানাম এতং অধুনাগতং কুলৱন্তং ৱা দুক্কুলৱন্তংৱাতি. অথ কণিট্ঠিকং পুচ্ছি. সা যস্স মং মাতাপিতৰো দস্সন্তি. তেসং ৱচনং ন ভিন্দিস্সামীতি সম্পটিচ্ছি, অথ সেনগুত্তো নন্দিযং পক্কোসিত্ৱা অত্তনো ধীতৰং দত্ৱা তস্স মহাসম্পত্তি মদাসি. ততো সত্তমে দিৱসে নন্দিযো তত্থ তত্থ আহিণ্ডন্তো ৰঞ্ঞো মঙ্গলুয্যানং পস্সিস্সামীতি গন্ত্ৱা ধঙ্গলসিলাপট্টেসসীসং পাৰুপিত্ৱা নিপজ্জি, সো চ বাৰাণসীৰঞ্ঞো কালঙ্কতস্স সত্তমো দিৱসো হোতি. অমচ্চাচ পুৰোহিতোচ ৰঞ্ঞো সৰীৰকিচ্চং কাৰেত্ৱা ৰাজঙ্গণে নিসীদিত্ৱা মন্তযিংসু. ৰঞ্ঞো একাৱ ধীতা অত্থি, পুত্তো পনস্স নত্থি. অৰাজিকং ৰজ্জং ন তিট্ঠতি. ফুস্সৰথং ৱিস্সজ্জেস্সামাতি. তে কুমুদপত্তৱণ্ণে চত্তাৰো সিন্ধৱে যোজেত্ৱা সেতচ্ছত্তপমুখংপঞ্চৱিধৰাজককুধভণ্ডং ৰথস্মিংযেৱ ঠপেত্ৱা ৰথং ৱিস্সজ্জেত্ৱা পচ্ছতো তুৰিযানি পগ্গণ্হাপেসুং. ৰথো পাচীদ্ৱাৰেন নিক্খমিত্ৱা উয্যানাভিমুখো অহোসি. পৰিচযেন উয্যানাভিমুখো গচ্ছতি. নিৱত্তেমাতি কেচি আহংসু. পুৰোহিতো মা নিৱাৰযিত্থাতি আহ. ৰথো কুমাৰকং পদক্খিণং কত্ৱা আৰোহণসজ্জো হুত্ৱা অট্ঠাসি. পুৰোহিতো পাৰুপণকণ্ণং অপনেত্ৱা পাদতলানি ওলোকেন্তো তিট্ঠতু অযং দীপো. দ্ৱিসহস্সদীপ পৰিৱাৰেসু চতূসু মহাদীপেসু একৰজ্জং কাতুং সমত্থোতিৱত্ৱা তস্স ধিতিং উপধাৰেতুং তিক্খত্তুং তুৰিযানি পগ্গণ্হাপেসি. অথ কুমাৰো মুখং ৱিৱৰিত্ৱা ওলোকেত্ৱা কেন কাৰণেন আগতত্থাতি আহ, দেৱ তুম্হাকং ৰজ্জং পাপুণাতীতি, ৰাজা কহন্তি, দেৱত্তং গতো সামীতি, কতি দিৱসা অতিক্কন্তাতি, অজ্জ সত্তমো দিৱসোতি. পুত্তো ৱা ধীতা ৱা নত্থীতি, ধীতা অত্থি দেৱ. পুত্তো ন ৱিজ্জতীতি, তেনহি কৰিস্সামি ৰজ্জন্তি, তে তাৱদেৱ অভিসেকমণ্ডপং কাৰেত্ৱা ৰাজধীতৰং সব্বালঙ্কাৰেহি অলঙ্কাৰিত্ৱা উয্যানং নেত্ৱা কুমাৰস্স অভিসেকং অকংসু, অথস্স কতাভিসেকস্স সতসহস্সগ্ঘনকং ৱত্থং আনেসুং, সো কিমিদং তাতাতি আহ, নিৱাসনৱত্থং দেৱাতি, ননু তাতা থূলংতি, মনুস্সানং পৰিভোগৱত্থেসু ইতো সুখুমতৰং নত্থি দেৱাতি, তুম্হাকং ৰাজা এৱৰূপং নিৱাসেসীতি, আম দেৱাতি. ন মঞ্ঞে পুঞ্ঞৱা তুম্হাকং ৰাজাতি ৱত্ৱা হন্দ সুৱণ্ণভিঙ্কাৰং আহৰথ, লভিস্সাম ৱত্থন্তি, তে সুৱণ্ণভিঙ্কাৰং আহৰিংসু, সো উট্ঠায হত্থে ধোৱিত্ৱা মুখং ৱিক্খালেত্ৱা হত্থেন উদকং আদায পুৰত্থিমদিসায অব্ভুক্কিৰি, তাৱদেৱ ঘনপথৱিং ভিন্দিত্ৱা সোড়সকপ্পৰুক্খা উট্ঠহিংসু, পুন উদকং হত্থেন গহেত্ৱা দক্খিণং পচ্ছিমং উত্তৰন্তি এৱং চতস্সোপি দিসা অব্ভুক্কিৰি, সব্বদিসাসু সোড়স সোড়স হুত্ৱা চতুসট্ঠিকপ্পৰুক্খা উট্ঠহিংসু, সো একং দিব্বদুস্সং নিৱাসেত্ৱা একং পাৰুপিত্ৱা নন্দিযৰঞ্ঞো ৱিজিতে সুত্তকন্তিকা ইত্থিযো মা সুত্তং কন্তন্তূতি ভেৰিং চৰাপেথাতি ৱত্ৱা ছত্তং উস্সাপেত্ৱা অলঙ্কতপটিযত্তো হত্থিক্খন্ধৱৰগতো নগৰং পৱিসিত্ৱা পাসাদমভিৰুয্হ মহাসম্পত্তিং অনুভৱি. অহো তদা পচ্চেকবুদ্ধস্স দিন্নানুৱাতকস্স ৱিপাকো. তেনাহু পোৰাণা.

১২. যথা সাসপমত্তম্হা, বীজা নিগ্ৰোধপাদপো;

জাযতে সতসাখড্ঢো, মহানীলম্বুদোপমো.

১৩. তথেৱ পুঞ্ঞকম্মম্হা, অণুম্হা ৱিপুলং ফলং;

হোতীতি অপ্পপুঞ্ঞন্তি, নাৱমঞ্ঞেয্য পণ্ডিতোতি.

এৱং গচ্ছন্তে কালে একদিৱসং দেৱী ৰঞ্ঞো সম্পত্তিং দিস্ৱা অহো তপস্সীতি কাৰুঞ্ঞাকাৰং দস্সেসি. কিমিদং দেৱীতি চ পুট্ঠা অতিমহতী তে দেৱ সম্পত্তি. অতীতমদ্ধানং কল্যাণং কতত্তা. ইদানি অনাগতস্সত্থায কুসলং কৰোথাতি আহ. কস্স দস্সাম. সীলৱন্তা নত্থীতি. অসুঞ্ঞো দেৱ জম্বুদীপো অৰহন্তেহি, তুম্হে দানং সজ্জেথ, অহং অৰহন্তে লচ্ছামীতি আহ. পুনদিৱসে ৰাজা মহাৰহং দানং সজ্জাপেসি. দেৱী সচে ইমিস্সা দিসায অৰহন্তো অত্থি, ইধা গন্ত্ৱা অম্হাকং ভিক্খং গণ্হন্তূতি উত্তৰহিমৱন্তাভিমুখী পুপ্ফানি উদ্ধং খিপিত্ৱা উৰেন নিপজ্জি. অথ তানি পুপ্ফানি আকাসতো গন্ত্ৱা হিমৱন্তপদেসে ৱসন্তানং পদুমৱতিযা পুত্তানং পঞ্চসতানংপচ্চেকবুদ্ধানং জেট্ঠকমহাপদুমপচ্চেকবুদ্ধস্স পাদমূলে পতিংসু. তথাহি.

১৪. অহো পস্সথ ভো দানি, ৱিম্হযং পুঞ্ঞকম্মুনো;

অচেতনাপি পুপ্ফানি, দূতকিচ্চেসু ব্যাৱটা.

১৫. কত্তুকামেন লোকস্মিং, সকলং অত্তনো ৱসং;

সব্বত্থামেন কত্তব্বং, পুঞ্ঞং পঞ্ঞৱতা সদাতি.

ততো মহাপদুমপচ্চেকবুদ্ধো তং ঞত্ৱা সেসভাতৰে আমন্তেসি. মাৰিসা নন্দিযৰাজা তুম্হে নিমন্তেসি. অধিৱাসেথ তস্স নিমন্তনন্তি. তে অধিৱাসেত্ৱা তাৱদেৱ আকাসেনা গন্ত্ৱা উত্তৰদ্ৱাৰে ওতৰিংসু. মনুস্সা পঞ্চসতা দেৱ পচ্চেকবুদ্ধা আগতাতি ৰঞ্ঞো আৰোচেসুং, ৰাজা সদ্ধিং দেৱিযা গন্ত্ৱা ৱন্দিত্ৱা পত্তে গহেত্ৱা পচ্চেকবুদ্ধে পাসাদং আৰোপেত্ৱা তত্থ তেসং দানং দত্ৱা ভত্তকিচ্চাৱসানে ৰাজা সঙ্ঘত্থেৰস্স দেৱী সঙ্ঘনৱকস্স চ পাদমূলে নিপজ্জিত্ৱা অয্যা পচ্চযেহি ন কিলমিস্সন্তু, মযং পুঞ্ঞেন ন হাযিস্সাম, অম্হাকং ইধ ৱাসায পটিঞ্ঞং দেথাতি পটিঞ্ঞং কাৰেত্ৱা উয্যানে নিৱাসট্ঠানাদযো কাৰেত্ৱা যাৱজীৱং পচ্চকবুদ্ধে উপট্ঠহিত্ৱা তেসু পৰিনিব্বুতেসু সাধুকীড়নং কাৰেত্ৱা চন্দনা গৰুআদীহি সৰীৰকিচ্চং কাৰেত্ৱা ধাতুযো গহেত্ৱা চেতিযং পতিট্ঠাপেত্ৱা এৱৰূপানম্পি মহানুভাৱানং মহেসীনং মৰণং ভৱিস্সতি, কিমঙ্গং পন মাদিসানন্তি সংৱেগজাতো জেট্ঠপুত্তং ৰজ্জে পতিট্ঠাপেত্ৱা সযং পব্বজং পব্বজি, দেৱীপি ৰঞ্ঞে পব্বজিতে অহং কিংকৰিস্সামীতি পব্বজিত্ৱা দ্ৱেপি উয্যানে ৱসন্তা ঝানাভিঞ্ঞং নিব্বত্তেত্ৱা ঝানসুখেন ৱীতিনামেন্তা আযুপৰিযোসানে ব্ৰহ্মলোকে নিব্বত্তিংসু. তে অম্হাকং ভগৱতো কালে ব্ৰাহ্মণকুলে নিব্বত্তিত্ৱা বুদ্ধসাসনে পব্বজিংসু, তদা নন্দিযৰাজা ধুতঙ্গধৰানং অগ্গো মহাকস্সপত্থেৰোনাম হুত্ৱা চন্দো ৱিয সুৰিযো ৱিযচ লোকে পাকটো হুত্ৱা ভগৱতি পৰি- নিব্বুতে বুদ্ধসাসনং অতিৱিয সোভেতি. ভৰিযাপিস্স ভদ্দকাপিড়ানী নাম অহোসীতি.

১৬. দত্ৱা পুৰেকো ৱিপিনে চৰন্তো,

পচ্চেকবুদ্ধস্সনুৱাতমত্তং;

কত্ৱা সৰট্ঠং কুৰুদীপসোভং,

মহানুভাৱো ৱসুধা ধিপোসি.

১৭. তুম্হেচ ভোন্তো খলু সীলৱন্তে,

দদাথ দানানি অনপ্পকানি;

তং ৱো পতিট্ঠাচ ভৱন্তৰস্মিং,

চিন্তামণিং কপ্পতৰুংৱ সাৰন্তি.

নন্দিযৰাজস্স ৱত্থুং পথমং.

১২. অঞ্ঞতৰমনুস্সস্স ৱত্থুম্হি অযমানুপুব্বীকথা

অম্হাকং ভগৱতি পৰিনিব্বুতে পাটলিপুত্তসমীপে অঞ্ঞতৰস্মিং গামে অঞ্ঞতৰো দুগ্গতমনুস্সো ৱসতি, সো পনেকদিৱসং অঞ্ঞতৰং গামং গচ্ছন্তো দ্ৱে সাটকে নিৱাসেত্ৱা মহন্তং অটৱিংপাপুণি, তদেৱং গচ্ছন্তং দিস্ৱা এতস্স ৱত্থং গণ্হিস্সামীতি একো চোৰো অনুবন্ধি, সো দূৰতোৱ আগচ্ছন্তং চোৰং দিস্ৱা চিন্তেসি, অহমেতস্মা পলাযিতুং ৱা তেন সদ্ধিংযুজ্ঝিতুং ৱা ন সক্কোমি, অযমাগন্ত্ৱা অৱস্সং অনিচ্ছন্তস্সাপি মে ৱত্থং গণ্হিস্সতি. মযাপিস্স নিৰত্থকেন হৰিতুং ন সক্কা, দানৱসেনস্স দস্সামীতি সন্নিট্ঠান মকাসি, অথ চোৰো আগন্ত্ৱা ৱত্থকং পৰামসি, অথ সো পুৰিসো চিত্তং পসাদেত্ৱা ইমং মম ৱত্থদানং ভৱভোগসুখত্থায পচ্চযো হোতূতি ৱত্থং দত্ৱা দুচ্ছাদিতত্তা মহামগ্গং পহায অঞ্ঞেন জঙ্ঘামগ্গেন গচ্ছন্তো আসিৱিসেন দট্ঠো কালং কত্ৱা হিমৱন্তপ্পদেসে দ্ৱাদসযোজনিকে কনকৱিমানে নেকচ্ছৰাসহস্সপৰিৱুতো নিব্বত্তি. ৱিমানং পনস্স পৰিৱাৰেত্ৱা তিযোজনিকে ঠানে কপ্পৰুক্খা নিব্বত্তিংসু, সো মহন্তং দিব্বসম্পত্তিং দিস্ৱা সোমনস্সং পৱেদেন্তো আহ.

১. পৰিণামিতমত্তেন, দানস্স সকসন্তকং;

দদাতি ৱিপুলং ভোগং, দিব্বমিস্সৰিযং ৱৰং.

২. দ্ৱাদসযোজনুব্বেধং, দুদ্দিক্খং চক্খুমূসনং;

কূটা গাৰৱৰুপেতং, সব্বসোৱণ্ণযং সুভং.

৩. মম পুঞ্ঞেন নিব্বত্তং, নেকৰাগদ্ধজাকুলং,

তথেৱ পৰিসুদ্ধেহি, ৱিতানেহি চ লঙ্কতং.

৪. পাসাদপৰিযন্তম্হি, দিব্বৱত্থানি লম্বৰে;

ৱাতেৰিতা তে সোভন্তি, অৱ্হেন্তাৱ সুধাসিনো.

৫. পাসাদস্স সমন্তা মে, ভূমিভাগে তিযোজনে;

ইচ্ছিতিচ্ছিতদাতাৰো, জাতাসুং সুৰপাদপা.

৬. তত্থ নচ্চেহি গীতেহি, ৱাদেহি তুৰিযেহি চ;

নে কচ্ছৰাসহস্সেহি, মোদামি ভৱনে মম.

৭. ন সম্মা দিন্নৱত্থস্স, অক্খেত্তে ফলমী দিসং;

খেত্তে সম্মা দদন্তস্স, কো ফলং ৱণ্ণযিস্সতীতি.

৮. এৱং ৱিধম্পি কুসলং মনুজো কৰিত্ৱা,

পপ্পোতি দিব্বৱিভৱং মুনিৱণ্ণনীযং;

মন্ত্ৱান ভো দদথ দানৱৰং সুসীলে,

সদ্ধায সুদ্ধমনসাস্স ৱিসেসভাগীতি.

অঞ্ঞতৰমনুস্সস্স ৱত্থুং দুতিযং.

১৩. ৱিসমলোমকুমাৰস্স ৱত্থুম্হি অযমানুপুব্বীকথা

অতীতে কিৰ ইমস্মিং জম্বুদীপে কস্সপো নাম সম্মাসম্বুদ্ধো পাৰমিযো পূৰেত্ৱা সব্বঞ্ঞুতং পত্তো লোকস্স দুক্খাপনুদো সুখাৱহো পটিৱসতি লোকং নিব্বাণমহানগৰৱৰে পৰিপূৰেন্তো. তস্মিং সমযে অঞ্ঞতৰো পুৰিসো সত্থু ধম্মদেসনং সুত্ৱা পসন্নো ভিক্খুসঙ্ঘস্স দানং দেন্তো সীলং ৰক্খন্তো উপোসথকম্মং কৰোন্তো নানাৱিধানি পুঞ্ঞকম্মানি কত্ৱা সুত্তপ্পবুদ্ধোৱিয গন্ত্ৱা দেৱলোকে নিব্বত্তি সব্বৰতনমযে দিব্বৱিধানে দেৱচ্ছৰাসহস্সপৰিৱুতো. তত্থ যাৱতাযুকং ঠত্ৱা ততো চুতো অম্হাকং ভগৱতি পৰিনিব্বুতে জম্বুদীপে পাটলিপুত্তনগৰে আণাচক্কৱত্তিধম্মাসোকমহানৰিন্দস্স অগ্গমহেসিযা কুচ্ছিম্হি নিব্বত্তি. তস্স নামং কৰোন্তো সীসে লোমং ৱিসমং হুত্ৱা জাতত্থা ৱিসমলোমকুমাৰোতি সঞ্জানিংসু. সো কমেন ৱিঞ্ঞুতং পত্তো বলসম্পন্নো অহোসি. মহাথামো অভিৰূপোচ অহোসি. দস্সনীযো পাসাদিকো যসপৰিৱাৰসম্পন্নো পটিৱসতি. ততো অপৰেন সমযেন ধম্মাসোকমহানৰিন্দো চতুৰাসীতিসহস্সৰাজপৰিৱুতো অনন্তবলৱাহনো কী ড়া প ৰো হিমৱন্তং গন্ত্ৱা যথাভিৰন্তং কীড়িত্ৱা আগচ্ছন্তো চন্দভাগং নাম গঙ্গং সম্পাপুণি. সা পন যোজনৱিত্থতা তিগাৱুতগম্ভীৰা অহোসি. তদা সা অধুনাগতেহি ওঘেহি মহাফেণসমাকুলা বহূমিযো উভোকূলে উত্তৰন্তী মহাৱেগা [মহাৱেগাগচ্ছন্তী ইতিসব্বত্থ] গচ্ছন্তি. তদা ৰাজা গঙ্গং দিস্ৱা কো নামেত্থ পুৰিসো এৱংৱিধং মহাগঙ্গং তৰিতুং সমত্থো ভৱিস্সতীতি আহ. তং সুত্ৱা ৱিসমলোম কুমাৰো আগন্ত্ৱা ৱন্দিত্ৱা অহং দেৱ গঙ্গং তৰিত্ৱা গন্তুঞ্চ আগন্তুঞ্চ সক্কোমীতি আহ. ৰাজা সাধূতি সম্পটিচ্ছি. অথ কুমাৰো গাড়্হং নিৱাসেত্ৱা মকৰদন্তিযা কেসে বন্ধিত্ৱা গঙ্গাকূলে ঠিতো অট্ঠাৰসহত্থং অব্ভুগ্গন্ত্ৱা উসভমত্তট্ঠানে পতিত্ৱা তৰিতু মাৰভি. ততো চণ্ডসোতং ছিন্দিত্ৱা তৰন্তো গমনা গমনকালে গণ্হনত্থায আগতে চণ্ডসুংসুমাৰে পাণিনা পহৰিত্ৱা চুণ্ণৱিচুণ্ণং কৰোন্তো ৱীসসতং মাৰেত্ৱা উত্তাৰেত্ৱা তলমুগ্গম্ম ৰাজানং ৱন্দিত্ৱা অট্ঠাসি. ৰাজা তং কাৰণং দিস্ৱা ভযপ্পত্তো এসো খো মং মাৰেত্ৱা ৰজ্জম্পি গহিতুং সমত্থো. এতং মাৰেতুং ৱট্টতীতি চিন্তেত্ৱা নগৰং সম্পত্তো কুমাৰং পক্কোসাপেত্ৱা অমচ্চে আহ. ইমং ভণে বন্ধনাগাৰে কৰোথাতি. তে তথা কৰিংসু, অথস্স বন্ধনাগাৰে ৱসন্তস্স চত্তাৰো মাসা অতিক্কন্তা. ততো ৰাজা চতুমাসচ্চযেন দীঘতো সট্ঠিহত্থপ্পমাণে সট্ঠিৱেড়ুকলাপে আহৰাপেত্ৱা গণ্ঠিযো সোধাপেত্ৱা অন্তো অযোসাৰং পূৰেত্ৱা ৰাজঙ্গণে ঠপাপেত্ৱা ৱিসমলোমকুমাৰং বন্ধনাগাৰতো আহাৰাপেত্ৱা [আণাপেত্ৱা ইতিসব্বত্থ] অমচ্চে এৱমাহ. ভণে স্ৱাযং কুমাৰো ইমিনা খগ্গেন ইমে ৱেড়ুকলাপে চতুৰঙ্গুলং কত্ৱা ছিন্দতু. নো চে ছিন্দিতুং সক্কোতি. তং মাৰেথাতি আহ, তং সুত্ৱা কুমাৰো অহং বন্ধনাগাৰে চি ৰ ৱু ত্থো জিঘচ্ছাপীড়িতো আহাৰেন কিলমিং, যন্নূনাহং আহাৰং ভুঞ্চিত্ৱা ছিন্দেয্যন্তি. তে নত্থি দানি তুয্হং আহাৰন্তি আহংসু. তেনহি পোক্খৰণিযা পানীযং পিৱিস্সামীতি আহ. তে সাধূতি পোক্খৰণিং নেসুং. কুমাৰো পোক্খৰণিং ওতৰিত্ৱা নহাযিত্ৱা নিমুগ্গো যাৱদত্থং কললং ভুঞ্চিত্ৱা পানীযং পিৱিত্ৱা উট্ঠায অসিপত্তং গহেত্ৱা মহাজনানং [মহাজনানংপস্সন্তমেৱ ইতিসব্বত্থ] পস্সন্তানমেৱ অট্ঠাসীতিহত্থট্ঠানং আকাসং উল্লঙ্ঘিত্ৱা সব্বৱেড়ুকলাপে চতুৰঙ্গুলমত্তেন খণ্ডাখণ্ডং কুৰুমানো ওতৰিত্ৱা মূলে থূলঅযসলাকং পত্ৱা কিণীতি সদ্দং সুত্ৱা অসিপত্তং ৱিস্সজ্জেত্ৱা ৰোদমানো অট্ঠাসি. ততো ৰাজপুৰিসেহি কিমত্তং ৰোদসীতি ৱুত্তে এত্তকানং পুৰিসানমন্তৰে ময্হং একোপি সুহদো নত্তি. সচে ভৱেয্য, ইমেসং ৱেড়ুকলাপানমন্তৰে অযো সাৰং অত্থিভাৱং কথেয্য, অহং পন জানমানো ইমে ৱেড়ু কলাপে অঙ্গুলঙ্গুলেসু ছিন্দেয্যন্তি আহ. ততো ৰাজা কুমাৰেন কতকম্মং ওলোকেত্ৱা পসন্নো উপৰাজট্ঠানং বহুঞ্চ ৱিভৱং দাপেসি, এৱমস্স বলসম্পত্তিলাভো নাম ন জাতিগোত্তকুলপদেসাদীনং বলং. ন পাণাতিপাতাদিদুচ্চৰিতানং বলং. কস্সেতং বলন্তি. কস্সপসম্মাসম্বুদ্ধকালে ভিক্খুসঙ্ঘস্স দিন্নদানাদিসুচৰিতকম্মৱিপাকং. তেন ৱুত্তং.

১. কস্সপস্স মুনিন্দস্স, কালে অঞ্ঞতৰো নৰো;

সম্বুদ্ধমুপসংকম্ম, সুত্ৱা ধম্মং সুদেসিতং.

২. পটিলদ্ধসদ্ধো হুত্ৱা, সীলৱন্তান ভিক্খুনং;

মধুৰন্নপানে পচুৰে, অদাসি সুমনো তদা.

৩. অদাসি চীৱৰে পত্তে, তথেৱ কাযবন্ধনে;

অদা খীৰসলাকঞ্চ, বহূ কত্তৰযট্ঠিযো.

৪. অদা সুপস্সযং দানং, মঞ্চপীঠাদিকং তথা;

পাৱাৰ কম্বলাদীনি, অদা সীতনিৱাৰণে.

৫. অদা ভেসজ্জদানানি, আৰোগ্যত্থায ভিক্খুনং;

এৱং নানাৱিধং পুঞ্ঞং, কত্ৱান তিদিৱং গতো.

৬. তত্থ দিব্বৱিমানম্হি, উপ্পন্নো সো মহিদ্ধিকো;

দেৱচ্ছৰাপৰিৱুতো, দেৱসেনাপুৰক্খতো.

৭. দিব্বেহি নচ্চগীতেহি, দিব্বৱাদিততন্তিহি;

মোদমানো অনেকেহি, দিব্বসম্পত্তিযা সহ.

৮. যাৱতাযুং তহিং ঠত্ৱা, জম্বুদীপে মনোৰমে;

পুৰে পাটলিপুত্তম্হি, ধম্মাসোকস্স ৰাজিনো.

৯. পুত্তো হুত্ৱান নিব্বত্তি, মহাথামো মহাবলো;

মহাযসো মহাভোগো, আসি বুদ্ধাদিমামকো.

১০. কাতব্বং কুসলং তস্মা, ভৱসম্পত্তি মিচ্ছতা;

পালেতব্ব মথো সীলং, ভাৱেতব্বঞ্চ ভাৱনন্তি.

ততো কুমাৰো উপৰাজট্ঠানং লভিত্ৱা সম্পত্তিংঅনুভৱমানো মোগ্গলিপুত্ততিস্সত্থেৰমাদিং কত্ৱা মহাভিক্খুসঙ্ঘস্স চীৱৰপিণ্ডপাতসেনাসনগিলানপচ্চযদানা দিৱসেন সক্কাৰং কত্ৱা সীলং ৰক্খিত্ৱা উপোসথকম্মং কত্ৱা আযুপৰিযোসানে যথাকম্মং গতোতি.

১১. এৱংৱিধং সুচৰিতং সুমনো কৰিত্ৱা,

ভাগিস্স নেকৱিভৱস্স ভৱাভৱেসু;

তুম্হেপি ভো সুচৰিতং ৱিভৱানুৰূপং,

কত্ৱান নিব্বুতিপদং কৰগং কৰোথাতি.

ৱিসমলোমকুমাৰস্স ৱত্থুং ততিযং.

১৪. কঞ্চনদেৱিযা ৱত্থুম্হি অযমানুপুব্বীকথা

জম্বুদীপে কিৰ দেৱপুত্তনগৰং নাম দস্সনীযং একং নগৰং অহোসি. তস্মিং সমযে মনুস্সা যেভুয্যেন পত্তমহং নাম পূজং কৰোন্তি, ভগৱতা পৰিভুত্তপত্তং গহেত্ৱা কতানেকপূজাৱিধানা উস্সৱং কৰোন্তি. তং পত্তমহন্তি ৱুচ্চতি. তস্মিং সমযে দেৱপুত্তনগৰে ৰাজা সব্বৰতনমযং ৰথং সব্বালঙ্কাৰেহি অলঙ্কাৰাপেত্ৱা কুমুদপত্তৱণ্ণে চত্তাৰো সিন্ধৱে যোজেত্ৱা সুসিক্খিতসিপ্পাচৰিযেহি সত্তৰতনপৰিনিট্ঠিতে অসীতিহত্থৱেড়গ্গে সত্থুনা পৰিভুত্তং সেলমযপত্তং মুত্তাজালাদীহি অলঙ্কৰিত্ৱা ৱেড়গ্গং আৰোপেত্ৱা ৱেড়ুং ৰথে ঠপাপেত্ৱা নগৰং দেৱনগৰং ৱিয অলঙ্কৰিত্ৱা ধজপতাকাদযো উস্সাপেত্ৱা তোৰণগ্ঘ কপন্তিযোচ পুণ্ণঘটদীপমালাদযোচ পতিট্ঠাপেত্ৱা অনেকেহি পূজাৱিধানেহি নগৰং পদক্খিণং কাৰেত্ৱা নগৰমজ্ঝে সুসজ্জিতৰতনমণ্ডপে পত্তধাতুং ঠপেত্ৱা সত্তমে দিৱসে মহাধম্মসৱণং কাৰাপেসি. তদা তস্মিং জনপদে বহূ মনুস্সাচ দেৱতাচ যক্খৰক্খসনাগসুপণ্ণাদযোচ মনুস্সৱেসেন যেভুয্যেন তং সমাগমং ওতৰন্তি, এৱমচ্ছৰিযং তং পূজাৱিধানং অহোসি.

তদা একো নাগৰাজা উত্তমৰূপধৰং অগতপুব্বপুৰিসং একং কুমাৰিকং ধম্মপৰিসন্তৰে নিসিন্নং দিস্ৱা তস্সা পটিবদ্ধচিত্তো অনেকাকাৰেহি তং যা চি ত্ৱা তস্সা অলদ্ধমানো কুজ্ঝিত্ৱা নাসাৱাতং ৱিস্সজ্জেসি ইমং মাৰেস্সামীতি. তং তস্সা সদ্ধাবলেন কিঞ্চি উপদ্দৱং কাতুং সমত্থো নাহোসি. অথস্সা নাগো পাদতো পট্ঠায যাৱসকলসৰীৰং ভোগেন ৱেঠেত্ৱা সীসে ফণং কত্ৱা ভাযাপেন্তো অট্ঠাসি. অনঞ্ঞৱিহিতায তায ধম্মসৱণবলেন অণুমত্তম্পি দুক্খং নাহোসি. পভাতায ৰত্তিযা তং দিস্ৱা মনুস্সা কিমেতন্তি কাৰণং পুচ্ছিংসু, সাপি তেসং কথেত্ৱা এৱং সচ্চকিৰিযমকাসি. তথাহি.

১. ব্ৰহ্মচাৰী অহোসাহং, সঞ্জাতা ইধ মানুসে;

তেন সচ্চেন মং নাগো, খিপ্পমেৱ পমুঞ্চতু.

২. কামাতুৰস্স নাগস্স, নোকাসমকৰিংযতো;

তেন সচ্চেন মং নাগো, খিপ্পমেৱ মুঞ্চতু.

৩. ৱিসৱাতেন খিত্তস্স, কুপিতস্সোৰগস্সহং;

অকুদ্ধা তেন সচ্চেন, সো মং খিপ্পং পমুঞ্চতু.

৪. সদ্ধম্মং সুণমানাহং, গৰুগাৰৱভত্তিযা;

অস্সোসিং তেন সচ্চেন, খিপ্পং নাগো পমুঞ্চতু.

৫. অক্খৰংৱা পদংৱাপি, অৱিনাসেত্ৱাৱ আদিতো;

অস্সোসিং তেন সচ্চেন, খিপ্পং নাগো পমুঞ্চতূতি.

সচ্চকিৰিযাৱসানে নাগৰাজা তস্সা অতীৱ পসন্নো ভোগং ৱিনিৱেঠেত্ৱা ফণসতং মাপেত্ৱা তং ফণগব্ভে নিসীদাপেত্ৱা বহূহি নাগমানৱকেহি সদ্ধিং উদকপূজং নাম পূজ মকাসি, তং দিস্ৱা বহূ নগৰৱাসিনো অচ্ছৰিযব্ভুতজাতা অট্ঠাৰসকোটিধনেন পূজ মকংসু. তথাহি.

৬. নত্থি সদ্ধাসমো লোকে, সুহদো সব্বকামদো;

পস্সথস্সা বলং সদ্ধা, পূজেন্তেৱং নৰো ৰগা.

৭. ইধ লোকেৱ সালত্থ, ভৱভোগ মনপ্পকং;

তস্মা সদ্ধেন কাতব্বং, ৰতনত্তযগাৰৱন্তি.

অথেৱং সা পটিলদ্ধমহাৱিভৱা যাৱজীৱং কোমাৰিয ব্ৰহ্মচাৰিণী হুত্ৱা আযুপৰিযোসানে কালং কত্ৱা তস্মিংযেৱ নগৰে ৰঞ্ঞো অগ্গমহেসিযা কুচ্ছিম্হি পটিসন্ধিং গণ্হিত্ৱা দসমাসচ্চযেন মাতুকুচ্ছিতো নিক্খমি. নিক্খন্তদিৱসে পনস্সা সকলদেৱপুত্তনগৰে ৰতনৱস্সং ৱস্সি. তেনস্সা কঞ্জনদেৱীতি নামং কৰিংসু. সমন্তপাসাদিকা অহোসি. অভিৰূপা দেৱচ্ছৰপটিভাগা. মুখতো উপ্পলগন্ধো ৱাযতি. সৰীৰতো চন্দনগন্ধো ৱাযতি. সকলসৰীৰতো বালসুৰিযো ৱিয ৰংসিযো নিচ্ছাৰেন্তী চতুৰতনগব্ভে পদীপকিচ্চং নাম নত্থি. সব্বো গব্ভো সৰীৰা লোকেন একো ভাসো হোতি, তস্সা ৰূপসম্পত্তি সকলজম্বুদীপে পাকটা অহোসি. ততো সকলজম্বুদীপৱাসী ৰাজানো তস্সা অত্থায পিতুৰঞ্ঞো পণ্ণাকাৰানি পহিণিংসু. সা পন পঞ্চকামে অননুলিত্তা পিতৰং অনুজানাপেত্ৱা ভিক্খুনূ পস্সযং গন্ত্ৱা পব্বজিত্ৱা ৱিপস্সনং ৱড্ঢেত্ৱা সহ পটিসম্ভিদাহি অৰহত্তং পাপুণীতি.

৮. সুত্ৱান সাদৰৱসেন কুমাৰিকেৱং;

ধম্মঞ্হি সীলমমলং পৰিপালযন্তী;

লদ্ধান নেকৱিভৱং ৱিভৱং পযাতা,

মা ভো পমজ্জথ সদা কুসলপ্পযোগেতি.

কঞ্চনদেৱিযা ৱত্থুং চতুত্থং.

১৫. ব্যগ্ঘস্স ৱত্থুম্হি অযমানুপুব্বীকথা

জম্বুদীপে চূলৰট্ঠা সন্নে বাৰাণসীনগৰে একং পংসুপব্বতং ৱিনিৱিজ্ঝিত্ৱা মহামগ্গো হোতি, তত্থ ৱেমজ্ঝে একো ব্যগ্ঘো অত্তনো অন্ধপিতৰং পব্বতগুহাযং কত্ৱা পোসেন্তো ৱসতি. তস্সেৱ পব্বতস্স ৱনদ্ৱাৰে তুণ্ডিলো নাম একো সুৱপোতকো ৰুক্খস্মিং ৱসতি. তে উভোপি অঞ্ঞমঞ্ঞং পিযসহাযা অহেসুং, তস্মিং সমযে পচ্চন্তগামৱাসী একো মনুস্সো অত্তনো মাতুগামেন সদ্ধিং কলহং কত্ৱা বাৰাণসিং গচ্ছন্তো তং ৱনদ্ৱাৰং সম্পাপুণি. অথ সুৱপোতকো পৰিহীনত্তভাৱং দুক্খিতং তং দিস্ৱা কম্পমানহদযো তং পক্কোসিত্ৱা ভো কুহিং গচ্ছসীতি আহ, তেন পৰখণ্ডং গচ্ছামীতি ৱুত্তে তুণ্ডিলো ভো ইমস্মিং ৱনখণ্ডমজ্ঝে একো ব্যগ্ঘো ৱসতি. কক্খলো ফৰুসো সম্পত্তসম্পত্তে মাৰেত্ৱা খাদতি. মা ত্ৱং তেন গচ্ছাতি আহ. স্ৱাযং দুব্ভগো মনুস্সো হিতকামস্স তস্স ৱচনং অনাদিযিত্ৱা গচ্ছামেৱাতি আহ. তুণ্ডিলো তেনহি সম্ম যদি অনিৱত্তমানো গচ্ছসি. এসো ব্যগ্ঘো মম সহাযো. মে ৱচনং তৱ সন্তিকা সুত্ৱা ন গণ্হাতীতি. তস্স তং অনাদিযন্তো সো সুৱৰাজে পদুট্ঠচিত্তো মুগ্গৰেন পহৰিত্ৱা মাৰেত্ৱা অৰণিং অগ্গিং কত্ৱা মংসং খাদি. অসপ্পুৰিসসংসগ্গো নামে স ইধ লোকপৰলোকেসু দুক্খাৱহোযেৱ. তথাহি.

১. মযা কতং ময্হমিদং, ইতি ৱেস্সানৰং নৰো;

সমালিঙ্গতি সপ্পেমো, দহতেৱস্স ৱিগ্গহং.

২. মধুখীৰাদিদানেন, পেমসা পৰিপালিতো;

সোৰগো কুপিতোৱস্স, ডসতেৱস্স ৱিগ্গহং.

৩. এৱং নিহীনজচ্চেন, পাপেন অকতঞ্ঞুনা;

নৰা ধমেন দীনেন, কতোপি খণসঙ্গমো.

৪. অসাধুকো অযংতেৱং, জানমানেন জন্তুনা;

মুহুত্তম্পি ন কাতব্বো, সঙ্গমো সো অনত্থদোতি.

ততো সো অসপ্পুৰিসো মংসং খাদিত্ৱা গচ্ছন্তো ৱনখণ্ডমজ্ঝং সম্পাপুণি. অথ ব্যগ্ঘো তং দিস্ৱা মহানাদং কৰোন্তো গহণত্থায উট্ঠাসি. সো ব্যগ্ঘং দিস্ৱা ভযপ্পত্তো তুণ্ডিলস্স ৱচনং সৰিত্ৱা অহং ভো তৱ সহাযতুণ্ডিলস্স সন্তিকা আগতোম্হীতি আহ, তং সুত্ৱা ব্যগ্ঘো অত্তমনো এহি সম্মাতি তং পক্কোসিত্ৱা অত্তনো ৱসনট্ঠানং নেত্ৱা খাদিতব্বাহাৰেন তং সন্তপ্পেত্ৱা পিতুসন্তিকে নিসীদাপেত্ৱা পুন ৱনখণ্ড মগমাসি. অথস্স পিতা পুত্তস্স গতকালে তেন সদ্ধিং সল্লপন্তো তস্স ৱচনানুসাৰেন তুণ্ডিলং মাৰেত্ৱা খাদিতভাৱং অঞ্ঞাসি. ততো সো পুত্তস্স আগতকালে তৱ সহাযো তেন মাৰিতোতি আহ. তং সুত্ৱা ব্যগ্ঘো অনত্তমনো ৱেগেন তস্স ৱসনট্ঠানং গন্ত্ৱা সম্ম তুণ্ডিলাতি সদ্দং কত্ৱা অপস্সন্তো লুঞ্চিতপত্তংচস্স দিস্ৱা নিস্সংসযং তেন মাৰিতো মে সহাযোতি সোচন্তো পৰিদেৱন্তো আগঞ্ছি. অথ সো অসপ্পুৰিসো তস্মিং তত্থ গতে তস্স পিতৰং পাসাণেন পহৰিত্ৱা মাৰেত্ৱা ব্যগ্ঘংচ দানি মাৰেস্সামীতি ব্যগ্ঘাগমনমগ্গং ওলোকেন্তো নিলীনো অট্ঠাসি. তস্মিং খণে ব্যগ্ঘোপি আগঞ্ছি. সো তস্সা গতকালে তস্স তেজেন ভীতো গন্ত্ৱা জীৱিতং মে সামি দেহীতি পাদমূলে উৰেন নিপজ্জি, ব্যগ্ঘো পন তেন কতকম্মং দিস্ৱা তস্মিং চিত্তং নিব্বাপেত্ৱা মম সহাযস্স সাসনমাদাযাগতস্স দুব্ভিতুং ন যুত্তন্তি চিন্তেন্তো তং সমস্সাসেত্ৱা গচ্ছ সম্মাতি সুখং পেসেসি. এৱঞ্হি সপ্পুৰিসসমাগমো নাম ইধ লোকপৰলোকেসু সুখাৱহোযেৱ, ৱুত্তংহি.

৫. সব্ভিৰেৱ সমাসেথ, সব্ভি কুব্বেথ সন্থৱং;

সব্বত্থ সন্থৱো তেন, সেয্যো হোতি ন পাপিযো.

৬. সুখাৱহো দুক্খনুদো, সদা সব্ভি সমাগমো;

তস্মা সপ্পুৰিসেহেৱ, সঙ্গমো হোতু জন্তুনং.

ততো সো ব্যগ্ঘো তেন মেত্তচিত্তানুভাৱেন কালং কত্ৱা সগ্গে নিব্বত্তোতি.

৭. এৱংৱিধোপি ফৰুসো পৰমংসভোজী;

ব্যগ্ঘো দযাযুপগতো সুগতিং সুমেধো;

তস্মা কৰোথ কৰুণং সততং জনানং,

তং ৱো দদাতি ৱিভৱঞ্চ ভৱেসু ভোগন্তি.

ব্যগ্ঘস্স ৱত্থুং পঞ্চমং.

১৬. ফলকখণ্ডদিন্নস্স ৱত্থুম্হি অযমানুপুব্বীকথা

সাৱত্থিযং কিৰেকো মনুস্সো উত্তৰাপথং গচ্ছামীতি অদ্ধানমগ্গপটিপন্নো গিম্হানমাসে মজ্ঝণ্হে বহলাতপেন কিলন্তো হুত্ৱা ৰুক্খচ্ছাযং পৱিসিত্ৱা তম্বুলং খাদন্তো ফলকে নিসীদি. অথ উত্তৰাপথেনাগচ্ছান্তো একো তথেৱ আতপেন কিলন্তো আগন্ত্ৱা পুৰিমস্স সন্তিকে নিসীদিত্ৱা ভো পানীযং অত্থীতি পুচ্ছি. ইতৰো পানীযং নত্থীতি আহ. অথস্স সো ময্হম্পি ভো তম্বুলং দেহি পিপাসিতোম্হিতি ৱত্ৱাপি ন লভি. চতুকহাপণেন একং তম্বুলপণ্ণং কিণিত্ৱা লদ্ধো তত্থেৱ নিসীদিত্ৱা খাদিত্ৱা পিপাসং ৱিনোদেত্ৱা তেন উপকাৰেন তস্স সিনেহং কত্ৱা অত্তনো গমনট্ঠান মগমাসি, অথা পৰভাগে সো পট্টনং গন্ত্ৱা নাৱায ৱণিজ্জত্থায গচ্ছন্তো সমুদ্দমজ্ঝং পাপুণি. ততো সত্তমে দিৱসে নাৱা ভিজ্জি. মনুস্সা মচ্ছকচ্ছপানং ভক্খা জাতা. সো এৱ পুৰিসো অৰোগো হুত্ৱা একং ফলকখণ্ডং উৰে কত্ৱা সমুদ্দং তৰতি. অথে তৰোপি তথেৱ নাৱায ভিন্নায সেসো হুত্ৱা সমুদ্দং তৰন্তো পুৰিমেন সমাগমি. অথ তে সত্তদিৱসং সমুদ্দে তৰন্তা অঞ্ঞমঞ্ঞং সঞ্জানিংসু. তেসু কহাপণে দত্ৱা তম্বুলং গহিতো একং ফলকখণ্ডং উৰে কত্ৱা তৰতি. ইতৰস্সেতং নত্থি. অথ সো কহাপণে গহেত্ৱা দিন্নতম্বুলমত্তস্সো পকাৰং সৰিত্ৱা অত্তনো ফলকখণ্ডং তস্স অদাসি. সো তস্মিং সযিত্ৱা তৰন্তো তং পহায অগমাসি, অপৰো অনাধাৰকেন তৰন্তো ওস্সট্ঠৱিৰিযো উদকে ওসীদিতুমাৰতি. তস্মিং খণে সমুদ্দে অধিৱত্থা মণিমেখলা নাম দেৱধীতা ওসীদন্তং তং দিস্ৱা সপ্পুৰিসোতি তস্স গুণানুস্সৰন্তী ৱেগেনা গন্ত্ৱা তং অত্তনো আনুভাৱেন সমুদ্দতীৰং পাপেসি. ইতৰংপি সা এতস্সেৱ গুণানুভাৱেন তীৰং পাপেসি. অথ ফলকেনোতিণ্ণপুৰিসো তং দিস্ৱা ৱিম্হিতো কথং পুৰতো অহোসি সম্মাতি পুচ্ছি. সো ন জানামি. অপিচ খো সুখেনেৱ তীৰং পত্তোস্মীতি আহ. অথ দেৱধীতা দিস্সমানকসৰীৰেনেৱ অত্তনা আনীতভাৱং আৰোচেন্তী আহ.

১. যো মাতৰং পিতৰংৱা, ধম্মেন ইধ পোসতি;

ৰক্খন্তি তং সদা দেৱা, সমুদ্দে ৱা থলেপি ৱা.

২. যো চে বুদ্ধঞ্চ ধম্মঞ্চ, সংঘঞ্চ সৰণং গতো;

ৰক্খন্তি তং সদা দেৱা, সমুদ্দে ৱা থলেপি ৱা.

৩. পঞ্চৱিধং অট্ঠৱিধং, পাতিমোক্খঞ্চ সংৱৰং;

পালেতি যো তং পালেন্তি, দেৱা সব্বত্থ সব্বদা.

৪. কাযেন ৱাচা মনসা, সুচৰিত্তং চৰতী ধ যো;

পালেন্তি তং সদা দেৱা, সমুদ্দে ৱা থলেপি ৱা.