১৮. মৰুত্তব্ৰাহ্মণস্স ৱত্থুম্হি অযমানুপুব্বীকথা

জম্বুদীপে চন্দভাগা নাম গঙ্গাতীৰে হোমগামং নাম অত্থি. তস্মিং একো মৰুত্তো নাম ব্ৰাহ্মণো পটিৱসতি. তদা সো ৱোহাৰত্থায তক্কসীলং গন্ত্ৱা গেহং আগচ্ছন্তো অন্তৰামগ্গে একায সালায কুট্ঠৰোগা তুৰং সুনখং দিস্ৱা তস্মিং কাৰুঞ্ঞেন নীলৱল্লিতক্কম্বিলেন মদ্দিত্ৱা পাযেসি. সুনখো ৱূপসন্তৰোগো পাকতিকো হুত্ৱা ব্ৰাহ্মণেন অত্তনো কতূপকাৰং সল্লক্খেন্তো তেনেৱ সদ্ধিং অগমাসি. অপৰভাগে ব্ৰাহ্মণস্স ভৰিযা গব্ভং পটিলভি, পৰিপুণ্ণগব্ভায তায ৱিজাযনকালে দাৰকো তিৰিযম্পতিত্ৱা অন্তোগব্ভেযেৱ মতো. তদা তং সত্থেন খণ্ডাখণ্ডিকং ছিন্দিত্ৱা নীহৰিংসু, অথ ব্ৰাহ্মণো তং দিস্ৱা নিব্বিন্দহদযো ঘৰাৱাসং পহায ইসিপব্বজ্জং পব্বজিত্ৱা অৰঞ্ঞে ৱিহৰতি. অথস্স ভৰিযা অঞ্ঞেন সদ্ধিং সংৱসন্তী অযং মং পহায পব্বজিতোতি ব্ৰাহ্মণে পদুট্ঠচিত্তা ভো ব্ৰাহ্মণং মাৰেহীতি সামিকেন সদ্ধিং মন্তেসি. তেসং মন্তনং সুনখো সুত্ৱা ব্ৰাহ্মণেনেৱ সদ্ধিং চৰতি. অথেকদিৱসং তস্সা সামিকো তা প সং মাৰেস্সামীতি ধনু কলাপং গহেত্ৱা নিক্খমি, তদা তাপসো ফলাফলত্থায অৰঞ্ঞং গতো. সু ন খো অস্সমেযেৱ ও হী যি. পুৰিসো তাপসস্সাগমনমগ্গং ওলোকেন্তো গচ্ছন্তৰে নিলীনো অচ্ছি. সুনখো তস্স পমাদং ওলোকেত্ৱা ধনুনো গুণং খাদিত্ৱা ছিন্দি. সো পুন গুণং পাকতিকং কত্ৱা আৰোপেসি. এৱং সো আৰোপিতং আৰোপিতং খাদতেৱ, অথ সো পাপপুৰিসো তাপসস্সাগমনং ঞত্ৱা তং মাৰেস্সামীতি ধনুনা সদ্ধিং অগমাসি. অথস্স সুনখো পাদে ডসিত্ৱা পাতেত্ৱা তস্স মুখং খাদিত্ৱা দুব্বলং কত্ৱা ভুঙ্কাৰমকাসি, এৱঞ্হি সপ্পুৰিসা অত্তনো উপকাৰকানং পচ্চুপকাৰং কৰোন্তি. ৱুত্তঞ্হি.

১. উপকাৰং কৰোন্তো সো, সুনখো কতৱেদিকো;

সত্তূপঘাতকং কত্ৱা, ইসিনো দাসি জীৱিতং.

২. তিৰচ্ছানাপি জানন্তি, গুণমত্তনি কতং সদা;

ইতি উত্ৱান মেধাৱী, কতঞ্ঞূ হোন্তু পাণিনোতি.

ততো তাপসো সুনখস্স সদ্দেনা গন্ত্ৱা তস্স তং ৱিপ্পকাৰং দিস্ৱা কাৰুঞ্ঞেন পটিজিগ্গিত্ৱা ৱূপসন্তৱণং বলপ্পত্তং পোসেত্ৱা তত্থেৱ ৱসন্তো ঝানাভিঞ্ঞং নিব্বত্তেত্ৱা আযুপৰিযোসানে ব্ৰাহ্মলোকপৰাযণো অহোসীতি.

৩. সুত্ৱান সাধু সুনখেন কতূপকাৰং,

মেত্তিংদিসস্স পকতং ইসিনা চ সুত্ৱা;

সম্মা কৰোথ কৰুণঞ্চ পৰূপকাৰং,

তং সব্বদা ভৱতি ৱো ভৱভোগহেতূতি.

মৰুত্তব্ৰাহ্মণস্স ৱত্থুং অট্ঠমং.