১৭. চোৰসহাযস্স ৱত্থুম্হি অযমানুপুব্বীকথা

অম্হাকং ভগৱতি পৰিনিব্বুতে জম্বুদীপে দেৱদহনগৰে একো মনুস্সো দুক্খিতো তত্থ তত্থ ৱিচৰন্তো পচ্চন্তে অঞ্ঞতৰং গামং গন্ত্ৱা তত্থ একস্মিং কুলগেহে নিৱাসং কপ্পেসি. তত্থ মনুস্সা তস্স যাগুভত্তং দত্ৱা পোসেসুং, ততো সো তত্থ মনুস্সেহি মিত্তসন্থৱং কত্ৱা কতিপাহং তত্থ ৱসিত্ৱা অঞ্ঞট্ঠানং গন্ত্ৱা অপৰভাগে চোৰকম্মং কৰোন্তো জীৱিকং কপ্পেতি. অথেকদিৱসং চোৰেন্তং তং ৰাজপুৰিসা গহেত্ৱা ৰঞ্ঞো দস্সেসুং. ৰাজা তং বন্ধনাগাৰে কৰোথাতি আণাপেসি, তে তং বন্ধনাগাৰং নেত্ৱা সঙ্খলিকাহি বন্ধিত্ৱা আৰক্খকানং পটিপাদেত্ৱা অগমংসু, বন্ধনাগাৰে ৱসন্তস্স তস্স দ্ৱাদসসংৱচ্ছৰানি অতিক্কন্তানি. ততো অপৰভাগে তস্স পুব্বসহাযো পচ্চন্তগামৱাসী মনুস্সো কেনচি কম্মেন দেৱদহ মাগতো তত্থ তত্থ আহিণ্ডন্তো বন্ধনাগাৰে বদ্ধং তং অদ্দস. দিস্ৱা তস্স হদযং কম্পি, সো ৰোদিত্ৱা পৰিদেৱিত্ৱা কিং তে মযা কত্তব্বং সম্মাতি পুচ্ছি. ততো তেন সম্ম বন্ধনাগাৰে ৱসন্তস্স মে ইদানি দ্ৱাদসসংৱচ্ছৰানি অতিক্কন্তানি, এত্তকং কালং দুব্ভোজনাদিনা মহাদুক্খং অনুভোমি. যাৱাহং আহাৰং পৰিযেসিত্ৱা ভুঞ্জিত্ৱা আগমিস্সামি. তাৱ মং ইতো মুঞ্চনুপাযং জানাহীতি ৱুত্তে সো সপ্পুৰিসো.

১. ৰূপেন কিন্তু গুণসীলৱিৱজ্জিতেন,

মিচ্ছালযস্স কিতৱস্স ধিযা কিমত্থং;

দানা দিচাগৱিগতেন ধনেন কিং ৱা;

মিত্তেন কিং ব্যসনকালপৰম্মুখেনাতি.

এৱঞ্চ পন ৱত্ৱা সাধু সম্ম কৰোমি তে ৱচনন্তি আৰক্খকানং সন্তিকং গন্ত্ৱা ভোন্তো যাৱেসো ভত্তং ভুঞ্জিত্ৱা আগচ্ছতি. তাৱাহং তস্স পাটিভোগো ভৱিস্সামি. ৱিস্সজ্জেথ নন্তি আহ, তেহি ন সক্কা ভো এতং ৱিস্সজ্জেতুং, অপি চ খো যাৱাযং আগচ্ছতি. তাৱ ত্ৱং অযসঙ্খলিকায বদ্ধো নিসীদিস্সসি, এৱং তং ৱিস্সজ্জেস্সাম, নো চে ন সক্কাতি আহংসু, সো এৱম্পি হোতু সম্মাতি ৱত্ৱা তস্স পাদতো সঙ্খলিকং মুঞ্চিত্ৱা অত্তনো পাদে কত্ৱা বন্ধনাগাৰং পৱিসিত্ৱা ইতৰং মুঞ্চাপেসি. সোপি অসপ্পুৰিসো বন্ধনা মুত্তো ন পুন তং ঠান মগমাসি, অহো অকতঞ্ঞুনো পকতিং ঞাতুং ভাৰিযং. যথাহ.

২. ৱাৰিপূৰে যথা সোব্ভে, নেৱন্তো ৱিসমং সমং;

পঞ্ঞাযতেৱংসাধুস্স, ভাৱং মনসি সম্ভৱং.

৩. ভাসন্তি মুখতো একং, চিন্তেন্তি মনসা পৰং;

কাযেনেকং কৰোন্তেৱং, পকতাযমসাধুনং.

৪. তেসং যো ভাৱমঞ্ঞাসি, সোৱ পণ্ডিতজাতিকো;

বহুস্সুতোপি সোযেৱ, পৰচিত্তৱিদূপি সো.

অথস্স বন্ধনাগাৰে ৱসন্তস্স দ্ৱাদসসংৱচ্ছৰানি অতিক্কন্তানি. এত্তকং কালং জিঘচ্ছাপীড়িতেন তেন আহাৰত্তায পৰো ন যাচিতপুব্বো, অনুচ্ছিট্ঠাহাৰং লভনদিৱসতো অলভনদিৱসাযেৱ বহুতৰা হোন্তি, অথ দ্ৱাদসসংৱচ্ছৰাতিক্কমে ৰঞ্ঞো পুত্তো নিব্বত্তি. তদা ৰাজা অত্তনো ৱিজিতে সব্ববন্ধনাগাৰানি ৱিৱৰাপেসি. অন্তমসো মিগপক্খিনোপি বন্ধনা মুঞ্চাপেসি. দ্ৱাৰে ৱিৱটমত্তেযেৱ বন্ধনাগাৰে মনুস্সা ইচ্ছিতিচ্ছিতট্ঠানং অগমংসু. সো পনেকোৱ তেহি সদ্ধিং অগন্ত্ৱা ওহীযি. আৰক্খকেহি ত্ৱং ভো কস্মা ন গচ্ছসীতি ৱুত্তে অহং ভো পঞ্ঞাতভাৱেন ইদানি ন গমিস্সামি. অতীৱ পৰিহীনগত্তোস্মি. অন্ধকাৰে গমিস্সামীতি ৱত্ৱা অন্ধকাৰে আগতে নিক্খম্ম অন্তোনগৰে ৱিস্সাসিকানং অভাৱেন কুতো আহাৰং লভিস্সামীতি চিন্তেন্তো নিক্খম্ম ৰত্তন্ধকাৰে আমকসুসান মগমাসি. এত্থাহাৰং লভিস্সামীতি. তত্থ সো অধুনা নিক্খিত্তমতমনুস্সং দিস্ৱা মনুস্সট্ঠিনা মংসং ছিন্দিত্ৱা সীসকপালে পক্খিপিত্ৱা তীহি মনুস্সসীসেহি কতউদ্ধনে ঠপেত্ৱা চিতকতো ওমুক্কঅলাতেহি অগ্গিং কত্ৱা সুসানং নিব্বাপনত্থাযা ভতউদকেন মনুস্সট্ঠিনা আলোলেন্তো মংসং পচিত্ৱা ওতাৰেত্ৱা সাখাভঙ্গেন হিৰিকোপীণং পটিচ্ছাদেত্ৱা নিৱত্থপিলোকিকং ৱাতাৱৰণং কত্ৱানিসীদি. তস্মিং খণে তত্থ পিপ্পলীৰুক্খে অধিৱত্থা দেৱতা তস্স তং কিৰিযং দিস্ৱা পুচ্ছিস্সামি তাৱ নন্তি তং উপসঙ্কমিত্ৱা এৱমাহ. ভো ত্ৱং ঘনতৰতিমিৰাকুলে মহাৰত্তিযং তত্থ তত্থ ৱিকিণ্ণনৰট্ঠিসমাকিণ্ণে সোণসিগালাদিকুণপাদকাকুলে মনুস্সমংসভক্খযক্খৰক্খসাকুলে তত্থ তত্থ পজ্জলন্তানেকচিতকভযানকে সুসানে মনুস্সমংসং পচিত্ৱা কিংকৰোসীতি পুচ্ছন্তী আহ.

৫. ৰত্তন্ধকাৰে কুণপাদকেহি,

সমাকুলে সীৱথিকায মজ্ঝে;

মনুস্সমংসং পচসী ধ সীসে,

ৱদেহি কিং তেন পযোজনং তেতি.

অথ সো আহ.

৬. ন যাগহেতু ন চ দানহেতু,

সুসানমজ্ঝম্হি পচামি মংসং;

খুদাসমং নত্থি নৰস্স অঞ্ঞং,

খুদাৱিনাসায পচামিমম্ভোতি.

ততো দেৱতা তং তথা হোতু, ইমিনা পিলোতিকেন ৱাতাৱৰণং কৰোসি. কিমত্থমেতন্তি পুচ্ছন্তী.

৭. নিৱত্থসাখো হিৰিসংৱৰায,

পিলোতিকং তত্থ পসাৰযন্তো;

কৰোসি ৱাতাৱৰণঞ্চ সম্ম,

কিমত্থমেতং ৱদ পুচ্ছিতো মেতি.

সো তস্সা চিক্খন্তো আহ.

৮. সুভা সুভামিস্সিতসীতৱাতো,

সযং অচিত্তোৱ অচিত্তভাৱা;

দেহং ফুসিত্ৱান অসাধুকস্স,

অকতঞ্ঞুনো মিত্তপধংসকস্স.

৯. সমাৱহন্তো যদি মে সৰীৰে,

ফুসাতি [ফুসাতিসাসঙ্গতিমজ্জদানি ইতিকত্তচি] তং ৱাযু মমা ৱিসিত্ৱা;

দুক্খং দদাতীতি ৱিসংৱ তং ভো,

পৰিৱজ্জিতুং বদ্ধমিমং কুচেলন্তি.

দেৱতা আহ.

১০. কি মকাসি ভো সো কতনাসকো তে,

ধনঞ্চ ধঞ্ঞং তৱ নাসযী চ;

মাতা পিতা বন্ধৱো খেত্ত ৱত্থূ,

ৱিনাসিতা তেন ৱদেহি কিং তেতি.

ততো সো আহ.

১১. যং ৰাজতো হোতি ভযং মহন্তং,

সব্বস্স হৰণাদিৱধাদিকঞ্চ;

অকতঞ্ঞুনা সপ্পুৰিসেন হোতি,

আৰাৱ সো ভো পৰিৱজ্জনীযো.

১২. যমত্থি চোৰাৰিভযঞ্হি লোকে,

অথো দকেনাপি চ পাৱকেন;

অকতঞ্ঞুনা তং সকলম্পি হোতি,

আৰাৱ সো ভো পৰিৱজ্জনীযো.

১৩. পাণাতিপাতম্পি অদিন্নদানং,

পৰস্স দাৰূপগমং মুসা চ;

মজ্জস্স পানং কলহঞ্চ পেসুনং,

সম্ফং গিৰং ধুত্তজনেহি [অক্খধুত্তাদিযোগং ইতিকত্থচি] যোগং.

১৪. সব্বং অনত্থং অসিৱং অনিট্ঠং,

অপাযিকং [অপাযিকং ইতিকত্থচি] দুক্খমনন্ত মঞ্ঞং;

অকতঞ্ঞুনা সপ্পুৰিসেন হোতি;

আৰাৱ সো ভো পৰিৱজ্জনীযোতি.

ৱত্ৱা অত্তনা অসপ্পুৰিসসংসগ্গেনানুভূতং সব্বং দুক্খং কথেসি, ততো দেৱতা অহম্পি ভো সত্থুনো মঙ্গলসুত্তদেসনাদিৱসে ইমস্মিংযেৱ ৰুক্খে নিসিন্নো.

অসেৱনা চ বালানং, পণ্ডিতানঞ্চ সেৱনা;

পূজা চ পূজনীয্যানং, এতং মঙ্গল মুত্তমন্তি.

গাথায বালস্স দোসে অস্সোসিংতি ৱত্ৱা তস্স পসন্নো তং অত্তনো ৱিমানং নেত্ৱা নহাপেত্ৱা দিব্বৱত্থালঙ্কাৰেহি অলঙ্কৰিত্ৱা দিব্বন্নপানং দত্ৱা মহন্তং সক্কাৰসম্মানং কত্ৱা অত্তনো আনুভাৱেন তস্মিং নগৰে ৰজ্জে অভিসিঞ্চাপেসি. সো তত্থ ৰজ্জং কৰোন্তো দানাদীনি পুঞ্ঞানি কত্ৱা আযুপৰিযোসানে যথাকম্মং গতোতি.

১৫. এৱং অসাধুজনসঙ্গমসন্নিৱাসং,

সঞ্চজ্জ সাধুসুচিসজ্জনসঙ্গমেন;

দানাদি নেককুসলং পৰিপূৰযন্তা,

সগ্গা পৱগ্গৱিভৱং অভিসম্ভুনাথাতি.

চোৰসহাযস্স ৱত্থুং সত্তমং.