১৪. কঞ্চনদেৱিযা ৱত্থুম্হি অযমানুপুব্বীকথা

জম্বুদীপে কিৰ দেৱপুত্তনগৰং নাম দস্সনীযং একং নগৰং অহোসি. তস্মিং সমযে মনুস্সা যেভুয্যেন পত্তমহং নাম পূজং কৰোন্তি, ভগৱতা পৰিভুত্তপত্তং গহেত্ৱা কতানেকপূজাৱিধানা উস্সৱং কৰোন্তি. তং পত্তমহন্তি ৱুচ্চতি. তস্মিং সমযে দেৱপুত্তনগৰে ৰাজা সব্বৰতনমযং ৰথং সব্বালঙ্কাৰেহি অলঙ্কাৰাপেত্ৱা কুমুদপত্তৱণ্ণে চত্তাৰো সিন্ধৱে যোজেত্ৱা সুসিক্খিতসিপ্পাচৰিযেহি সত্তৰতনপৰিনিট্ঠিতে অসীতিহত্থৱেড়গ্গে সত্থুনা পৰিভুত্তং সেলমযপত্তং মুত্তাজালাদীহি অলঙ্কৰিত্ৱা ৱেড়গ্গং আৰোপেত্ৱা ৱেড়ুং ৰথে ঠপাপেত্ৱা নগৰং দেৱনগৰং ৱিয অলঙ্কৰিত্ৱা ধজপতাকাদযো উস্সাপেত্ৱা তোৰণগ্ঘ কপন্তিযোচ পুণ্ণঘটদীপমালাদযোচ পতিট্ঠাপেত্ৱা অনেকেহি পূজাৱিধানেহি নগৰং পদক্খিণং কাৰেত্ৱা নগৰমজ্ঝে সুসজ্জিতৰতনমণ্ডপে পত্তধাতুং ঠপেত্ৱা সত্তমে দিৱসে মহাধম্মসৱণং কাৰাপেসি. তদা তস্মিং জনপদে বহূ মনুস্সাচ দেৱতাচ যক্খৰক্খসনাগসুপণ্ণাদযোচ মনুস্সৱেসেন যেভুয্যেন তং সমাগমং ওতৰন্তি, এৱমচ্ছৰিযং তং পূজাৱিধানং অহোসি.

তদা একো নাগৰাজা উত্তমৰূপধৰং অগতপুব্বপুৰিসং একং কুমাৰিকং ধম্মপৰিসন্তৰে নিসিন্নং দিস্ৱা তস্সা পটিবদ্ধচিত্তো অনেকাকাৰেহি তং যা চি ত্ৱা তস্সা অলদ্ধমানো কুজ্ঝিত্ৱা নাসাৱাতং ৱিস্সজ্জেসি ইমং মাৰেস্সামীতি. তং তস্সা সদ্ধাবলেন কিঞ্চি উপদ্দৱং কাতুং সমত্থো নাহোসি. অথস্সা নাগো পাদতো পট্ঠায যাৱসকলসৰীৰং ভোগেন ৱেঠেত্ৱা সীসে ফণং কত্ৱা ভাযাপেন্তো অট্ঠাসি. অনঞ্ঞৱিহিতায তায ধম্মসৱণবলেন অণুমত্তম্পি দুক্খং নাহোসি. পভাতায ৰত্তিযা তং দিস্ৱা মনুস্সা কিমেতন্তি কাৰণং পুচ্ছিংসু, সাপি তেসং কথেত্ৱা এৱং সচ্চকিৰিযমকাসি. তথাহি.

১. ব্ৰহ্মচাৰী অহোসাহং, সঞ্জাতা ইধ মানুসে;

তেন সচ্চেন মং নাগো, খিপ্পমেৱ পমুঞ্চতু.

২. কামাতুৰস্স নাগস্স, নোকাসমকৰিংযতো;

তেন সচ্চেন মং নাগো, খিপ্পমেৱ মুঞ্চতু.

৩. ৱিসৱাতেন খিত্তস্স, কুপিতস্সোৰগস্সহং;

অকুদ্ধা তেন সচ্চেন, সো মং খিপ্পং পমুঞ্চতু.

৪. সদ্ধম্মং সুণমানাহং, গৰুগাৰৱভত্তিযা;

অস্সোসিং তেন সচ্চেন, খিপ্পং নাগো পমুঞ্চতু.

৫. অক্খৰংৱা পদংৱাপি, অৱিনাসেত্ৱাৱ আদিতো;

অস্সোসিং তেন সচ্চেন, খিপ্পং নাগো পমুঞ্চতূতি.

সচ্চকিৰিযাৱসানে নাগৰাজা তস্সা অতীৱ পসন্নো ভোগং ৱিনিৱেঠেত্ৱা ফণসতং মাপেত্ৱা তং ফণগব্ভে নিসীদাপেত্ৱা বহূহি নাগমানৱকেহি সদ্ধিং উদকপূজং নাম পূজ মকাসি, তং দিস্ৱা বহূ নগৰৱাসিনো অচ্ছৰিযব্ভুতজাতা অট্ঠাৰসকোটিধনেন পূজ মকংসু. তথাহি.

৬. নত্থি সদ্ধাসমো লোকে, সুহদো সব্বকামদো;

পস্সথস্সা বলং সদ্ধা, পূজেন্তেৱং নৰো ৰগা.

৭. ইধ লোকেৱ সালত্থ, ভৱভোগ মনপ্পকং;

তস্মা সদ্ধেন কাতব্বং, ৰতনত্তযগাৰৱন্তি.

অথেৱং সা পটিলদ্ধমহাৱিভৱা যাৱজীৱং কোমাৰিয ব্ৰহ্মচাৰিণী হুত্ৱা আযুপৰিযোসানে কালং কত্ৱা তস্মিংযেৱ নগৰে ৰঞ্ঞো অগ্গমহেসিযা কুচ্ছিম্হি পটিসন্ধিং গণ্হিত্ৱা দসমাসচ্চযেন মাতুকুচ্ছিতো নিক্খমি. নিক্খন্তদিৱসে পনস্সা সকলদেৱপুত্তনগৰে ৰতনৱস্সং ৱস্সি. তেনস্সা কঞ্জনদেৱীতি নামং কৰিংসু. সমন্তপাসাদিকা অহোসি. অভিৰূপা দেৱচ্ছৰপটিভাগা. মুখতো উপ্পলগন্ধো ৱাযতি. সৰীৰতো চন্দনগন্ধো ৱাযতি. সকলসৰীৰতো বালসুৰিযো ৱিয ৰংসিযো নিচ্ছাৰেন্তী চতুৰতনগব্ভে পদীপকিচ্চং নাম নত্থি. সব্বো গব্ভো সৰীৰা লোকেন একো ভাসো হোতি, তস্সা ৰূপসম্পত্তি সকলজম্বুদীপে পাকটা অহোসি. ততো সকলজম্বুদীপৱাসী ৰাজানো তস্সা অত্থায পিতুৰঞ্ঞো পণ্ণাকাৰানি পহিণিংসু. সা পন পঞ্চকামে অননুলিত্তা পিতৰং অনুজানাপেত্ৱা ভিক্খুনূ পস্সযং গন্ত্ৱা পব্বজিত্ৱা ৱিপস্সনং ৱড্ঢেত্ৱা সহ পটিসম্ভিদাহি অৰহত্তং পাপুণীতি.

৮. সুত্ৱান সাদৰৱসেন কুমাৰিকেৱং;

ধম্মঞ্হি সীলমমলং পৰিপালযন্তী;

লদ্ধান নেকৱিভৱং ৱিভৱং পযাতা,

মা ভো পমজ্জথ সদা কুসলপ্পযোগেতি.

কঞ্চনদেৱিযা ৱত্থুং চতুত্থং.