১৫. ব্যগ্ঘস্স ৱত্থুম্হি অযমানুপুব্বীকথা

জম্বুদীপে চূলৰট্ঠা সন্নে বাৰাণসীনগৰে একং পংসুপব্বতং ৱিনিৱিজ্ঝিত্ৱা মহামগ্গো হোতি, তত্থ ৱেমজ্ঝে একো ব্যগ্ঘো অত্তনো অন্ধপিতৰং পব্বতগুহাযং কত্ৱা পোসেন্তো ৱসতি. তস্সেৱ পব্বতস্স ৱনদ্ৱাৰে তুণ্ডিলো নাম একো সুৱপোতকো ৰুক্খস্মিং ৱসতি. তে উভোপি অঞ্ঞমঞ্ঞং পিযসহাযা অহেসুং, তস্মিং সমযে পচ্চন্তগামৱাসী একো মনুস্সো অত্তনো মাতুগামেন সদ্ধিং কলহং কত্ৱা বাৰাণসিং গচ্ছন্তো তং ৱনদ্ৱাৰং সম্পাপুণি. অথ সুৱপোতকো পৰিহীনত্তভাৱং দুক্খিতং তং দিস্ৱা কম্পমানহদযো তং পক্কোসিত্ৱা ভো কুহিং গচ্ছসীতি আহ, তেন পৰখণ্ডং গচ্ছামীতি ৱুত্তে তুণ্ডিলো ভো ইমস্মিং ৱনখণ্ডমজ্ঝে একো ব্যগ্ঘো ৱসতি. কক্খলো ফৰুসো সম্পত্তসম্পত্তে মাৰেত্ৱা খাদতি. মা ত্ৱং তেন গচ্ছাতি আহ. স্ৱাযং দুব্ভগো মনুস্সো হিতকামস্স তস্স ৱচনং অনাদিযিত্ৱা গচ্ছামেৱাতি আহ. তুণ্ডিলো তেনহি সম্ম যদি অনিৱত্তমানো গচ্ছসি. এসো ব্যগ্ঘো মম সহাযো. মে ৱচনং তৱ সন্তিকা সুত্ৱা ন গণ্হাতীতি. তস্স তং অনাদিযন্তো সো সুৱৰাজে পদুট্ঠচিত্তো মুগ্গৰেন পহৰিত্ৱা মাৰেত্ৱা অৰণিং অগ্গিং কত্ৱা মংসং খাদি. অসপ্পুৰিসসংসগ্গো নামে স ইধ লোকপৰলোকেসু দুক্খাৱহোযেৱ. তথাহি.

১. মযা কতং ময্হমিদং, ইতি ৱেস্সানৰং নৰো;

সমালিঙ্গতি সপ্পেমো, দহতেৱস্স ৱিগ্গহং.

২. মধুখীৰাদিদানেন, পেমসা পৰিপালিতো;

সোৰগো কুপিতোৱস্স, ডসতেৱস্স ৱিগ্গহং.

৩. এৱং নিহীনজচ্চেন, পাপেন অকতঞ্ঞুনা;

নৰা ধমেন দীনেন, কতোপি খণসঙ্গমো.

৪. অসাধুকো অযংতেৱং, জানমানেন জন্তুনা;

মুহুত্তম্পি ন কাতব্বো, সঙ্গমো সো অনত্থদোতি.

ততো সো অসপ্পুৰিসো মংসং খাদিত্ৱা গচ্ছন্তো ৱনখণ্ডমজ্ঝং সম্পাপুণি. অথ ব্যগ্ঘো তং দিস্ৱা মহানাদং কৰোন্তো গহণত্থায উট্ঠাসি. সো ব্যগ্ঘং দিস্ৱা ভযপ্পত্তো তুণ্ডিলস্স ৱচনং সৰিত্ৱা অহং ভো তৱ সহাযতুণ্ডিলস্স সন্তিকা আগতোম্হীতি আহ, তং সুত্ৱা ব্যগ্ঘো অত্তমনো এহি সম্মাতি তং পক্কোসিত্ৱা অত্তনো ৱসনট্ঠানং নেত্ৱা খাদিতব্বাহাৰেন তং সন্তপ্পেত্ৱা পিতুসন্তিকে নিসীদাপেত্ৱা পুন ৱনখণ্ড মগমাসি. অথস্স পিতা পুত্তস্স গতকালে তেন সদ্ধিং সল্লপন্তো তস্স ৱচনানুসাৰেন তুণ্ডিলং মাৰেত্ৱা খাদিতভাৱং অঞ্ঞাসি. ততো সো পুত্তস্স আগতকালে তৱ সহাযো তেন মাৰিতোতি আহ. তং সুত্ৱা ব্যগ্ঘো অনত্তমনো ৱেগেন তস্স ৱসনট্ঠানং গন্ত্ৱা সম্ম তুণ্ডিলাতি সদ্দং কত্ৱা অপস্সন্তো লুঞ্চিতপত্তংচস্স দিস্ৱা নিস্সংসযং তেন মাৰিতো মে সহাযোতি সোচন্তো পৰিদেৱন্তো আগঞ্ছি. অথ সো অসপ্পুৰিসো তস্মিং তত্থ গতে তস্স পিতৰং পাসাণেন পহৰিত্ৱা মাৰেত্ৱা ব্যগ্ঘংচ দানি মাৰেস্সামীতি ব্যগ্ঘাগমনমগ্গং ওলোকেন্তো নিলীনো অট্ঠাসি. তস্মিং খণে ব্যগ্ঘোপি আগঞ্ছি. সো তস্সা গতকালে তস্স তেজেন ভীতো গন্ত্ৱা জীৱিতং মে সামি দেহীতি পাদমূলে উৰেন নিপজ্জি, ব্যগ্ঘো পন তেন কতকম্মং দিস্ৱা তস্মিং চিত্তং নিব্বাপেত্ৱা মম সহাযস্স সাসনমাদাযাগতস্স দুব্ভিতুং ন যুত্তন্তি চিন্তেন্তো তং সমস্সাসেত্ৱা গচ্ছ সম্মাতি সুখং পেসেসি. এৱঞ্হি সপ্পুৰিসসমাগমো নাম ইধ লোকপৰলোকেসু সুখাৱহোযেৱ, ৱুত্তংহি.

৫. সব্ভিৰেৱ সমাসেথ, সব্ভি কুব্বেথ সন্থৱং;

সব্বত্থ সন্থৱো তেন, সেয্যো হোতি ন পাপিযো.

৬. সুখাৱহো দুক্খনুদো, সদা সব্ভি সমাগমো;

তস্মা সপ্পুৰিসেহেৱ, সঙ্গমো হোতু জন্তুনং.

ততো সো ব্যগ্ঘো তেন মেত্তচিত্তানুভাৱেন কালং কত্ৱা সগ্গে নিব্বত্তোতি.

৭. এৱংৱিধোপি ফৰুসো পৰমংসভোজী;

ব্যগ্ঘো দযাযুপগতো সুগতিং সুমেধো;

তস্মা কৰোথ কৰুণং সততং জনানং,

তং ৱো দদাতি ৱিভৱঞ্চ ভৱেসু ভোগন্তি.

ব্যগ্ঘস্স ৱত্থুং পঞ্চমং.