৫. অহিতুণ্ডিকস্স ৱত্থুম্হি অযমানুপুব্বীকথা

ইমস্মিং কিৰ ভদ্দকপ্পম্হি অম্হাকং কিৰ ভগৱতো পুব্বে কস্সপোনাম সত্থা লোকে উপ্পজ্জিত্ৱা সদেৱকং লোকং সংসাৰসাগৰা তাৰেত্ৱা সব্ববুদ্ধকিচ্চানি নিট্ঠপেত্ৱা অত্থং গতো দিৱসকৰোৱিয সেতব্যম্হি অনুপাদিসেসায নিব্বাণধাতুযা পৰিনিব্বাযি, তদা সকলজম্বুদীপৱাসিনো মনুস্সা সন্নিপতিত্ৱা একেকং সুৱণ্ণিট্ঠকং কোটিঅগ্ঘনকং ৰতনৱিচিত্তং বহিচিননত্থায একেকং অড্ঢকোটিঅগ্ঘনকং অব্ভন্তৰূপপূৰণত্থং মনোসিলায মত্তিকাকিচ্চং কৰোন্তা যোজনব্বেধং থূপং কত্ৱা মহন্তং সক্কাৰং কৰোন্তি. তদা একো অহিতুণ্ডিকো গামনিগমৰাজধানীসু সপ্পে কীড়াপেত্ৱা জীৱিকং কপ্পেন্তো একং গামকং পত্ৱা তত্থ সপ্পে কীড়াপেত্ৱা সন্তুট্ঠেহি গামৱাসীহি দিন্নৱিৱিধোপাযনো খাদনীযভোজনীযং খা দি ত্ৱা ভুঞ্জিত্ৱা তত্থেৱ নিৱাসং গহেত্ৱা নিসীদি. তস্মিং কিৰ গামকে মনুস্সা যেভুয্যেন ৰতনত্তযমামকা. তস্মা তে ৰত্তিভাগে সযন্তা ‘‘নমো বুদ্ধাযাতি’’ এৱমাদিং ৱদন্তি. সো পন অহিতুণ্ডিকো মিচ্ছাদিট্ঠিকো তিণ্ণং ৰতনানং গুণং ন জানাতি. তস্মা তেসং তং ৱচনং সুত্ৱা সযম্পি কে ড়িং কুৰুমানো পৰিহাসৱসেন ‘‘নমো বুদ্ধাযাতি’’ ৱদতি, অথেকদিৱসং সো অত্তনো কীড়াপনসমত্থং একং সপ্পং ভত্থ তত্থ পৰিযেসমানো আহিণ্ডতি. তদা একো নাগৰাজা কস্সপদসবলস্স থূ পং গ ন্ত্ৱা ৱন্দিত্ৱা একং ৱম্মিকং পৱিসতি. তং দি স্ৱা অহিতুণ্ডিকো ৱেগেনা গন্ত্ৱা নাগৰাজং গণ্হিতুং মন্তং পৰিজপি, সো মন্তং সুত্ৱা কুজ্ঝিত্ৱা তং মাৰেতুকামো অনুবন্ধি, তং দি স্ৱা অহিতুণ্ডিকো ৱে গে ন পলাযন্তো একস্মিং পাসাণে পক্খলিত্ৱা পতমানো পুব্বেৱুত্তপৰিহাস ৱচনপৰিচযেন ‘‘নমো বুদ্ধাযাতি’’ ৱদন্তো পতি. তস্স তং ৱচনং অনুবন্ধন্তস্স নাগৰঞ্ঞো সোতপথে অমতংৱিয পতি. অথ সো ৰতনত্তযগাৰৱেন তস্মিং কোধং নিব্বাপেত্ৱা সম্ম মা ভাযি. অহং ৰতনত্তযমন্তানুভাৱপাসেন বদ্ধো. তস্মা তু ৱং ডসিতুং ময্হং অননুৰূপং. অজ্জ ত যি পসন্নোম্হি, পণ্ণাকাৰং তেদম্মি, গণ্হাতি তীণি সুৱণ্ণপুপ্ফানি অদাসি. এৱং ৰতনত্তযং নাম ঘোৰাসিৱিসানম্পি সপ্পানং মনং পীণেতি. হোন্তি চেত্থ.

১. বুদ্ধোতি ৱচনং সেট্ঠং, বুদ্ধোতি পদ মুত্তমং;

নত্থি তেন সমং লোকে, অঞ্ঞং সোতৰসাযনং.

২. ধম্মোতিৱচনং সেট্ঠং, ধম্মোতি পদমুত্তমং;

নত্থি তেন সমং লোকে, অঞ্ঞং সোতৰসাযনং.

৩. সঙ্ঘোতি ৱচনং সেট্ঠং, সঙ্ঘোতি পদমুত্তমং;

নত্থি তেন সমং লোকে, অঞ্ঞং সোতৰসাযনং.

৪. তস্স মুখং মুখং নাম, যং ৱত্ততি মুখে সদা;

দুল্লভং বুদ্ধৱচনং, সব্বসম্পত্তিদাযকং.

৫. তস্স মনো মনো নাম, যং চে মনসি ৱত্ততি;

দুল্লভং বুদ্ধৱচনং, সব্বসম্পত্তিদাযকং.

৬. তমেৱ কৱচং দেহে, তমেৱ মণি কামদো;

তমেৱ সুৰভী ধেনু, তমেৱ সুৰপাদপো.

৭. তস্সেৱ সোতং সোতংৱ, যং সুণাতি জনো অযং

দুল্লভং বুদ্ধৱচনং, সব্বসম্পত্তিদাযকং.

৮. এৱং ৱিধো ৰগো ঘোৰো, হড়াহড়ৱিসো সদা;

বুদ্ধোতি ৱচনং সুত্ৱা, সন্তুট্ঠো দাসি জীৱিতং.

৯. সোণ্ণপুপ্ফত্তযংচাপি, মহগ্ঘং বহলং অদা;

পস্স বুদ্ধোতি ৱাচায, আনুভাৱমহন্ততন্তি.

অথ নাগৰাজা তস্স তানি সুৱণ্ণপুপ্ফানি দত্ৱা এৱমাহ. সম্ম এতেসু একং তৱ পুঞ্ঞত্তায একং মম পুঞ্ঞত্থায পূজেহি. ইতৰেন যাৱজীৱং সুখেন জীৱন্তো পুত্তদাৰে পোসেন্তো দানাদীসু অপ্পমজ্জন্তো জীৱিকং কপ্পেহি. মা হীনকম্মে ব্যৱটো হোহি, মিচ্ছাদিট্ঠিঞ্চ পজহাতি ওৱদিত্ৱা পক্কামি. অহিতুণ্ডিকোপি সোমনস্সপ্পত্তো তেন ৱুত্তনযেনেৱ দ্ৱিহি পুপ্ফেহি চেতিযং পূজেত্ৱা একেন স হ স্সং লভিত্ৱা তে ন পুত্তদাৰে পোসেন্তো কপণদ্ধিকৱণিব্বকাদীনং দানং দেন্তো অহিতুণ্ডিককম্মং পহাহ কুসলমেৱ উপচিনন্তো আযুপৰিযোসানে সগ্গপৰাযনো অহোসি.

১০. ইতি অৱিদিতসত্তো কিঞ্চি বুদ্ধানুভাৱং,

লভতি ধনৱিসেসং যস্স নামপ্পকাসা;

ৱিদিতজননিকাযো কিন্নু তস্সানুভাৱং,

ন লপতি জিননামং কিচ্চ মঞ্ঞপ্পহাযাতি.

অহিতুণ্ডিকস্স ৱত্থুং পঞ্চমং.