ধম্মসোণ্ডকৱগ্গো

১. ধম্মসোণ্ডকস্স ৱত্থুম্হি অযমানুপুব্বীকথা

তত্থ তেসং ৱত্থূন মুপ্পত্তিযো দ্ৱিধা ভৱন্তি জম্বুদীপে সীহড়দীপেচাতি, তত্থ জম্বুদীপে তাড়ীস, সীহড়দীপে তেসট্ঠি, তেসু তাৱ জম্বুদীপুপ্পত্তিৱত্থূনি আৱি ভৱিস্সন্তি, ততোপি ধম্মসোণ্ডকস্স ৱত্থু আদি, কথং, অম্হাকং কিৰ ভগৱতো পুব্বে ইমস্মিংযেৱ ভদ্দকপ্পে কস্সপোনাম সত্থা লোকে উদপাদি, তস্স খো পন ভগৱতো সাসনন্তৰধানতো ন চিৰেনেৱ কালেন অম্হাকং বোধিসত্তো বাৰাণসীৰঞ্ঞো অগ্গমহেসিযা কুচ্ছিস্মিং নিব্বত্তি, তস্সু প্পত্তি কালসমনন্তৰমেৱ সব্বসত্তানং মনসি ধম্মসঞ্ঞা উদপাদি, তস্মাস্স ধম্মসোণ্ডোতিনাম মকংসু, সো পনেসো কুমাৰো মহন্তেন পৰিৱাৰেন ৱড্ঢেন্তো সব্বসিপ্পেসু নিপ্ফত্তিং পত্ৱা পিতৰা উপৰজ্জেন পূজিতো হুত্ৱা দানাদযো দসকুসলকম্মপথে পূৰেন্তো পিতুঅচ্চযেনামচ্চেহি ৰজ্জেনাভিসিঞ্চিতো অহোসি, সো পনেস ধম্মসোণ্ডকমহাৰাজা দেৱনগৰসদিসে বাৰাণসীনগৰে চক্কৱত্তিসদিসং বাৰাণসীৰজ্জং কাৰেন্তো মাসদ্ধমাসচ্চযেন সিৰিসযনগতো এৱং চিন্তেসি, মমেৱং ৰজ্জসিৰিমনুভৱনং ন সোভতি ধম্মৱিযোগেন, দিৱাকৰ ৱিৰহিতো নভো ৱিযাতিআদিনা নানাকাৰণং চিন্তেসি, তেনেত্থ.

১. পুঞ্ঞেন সীলাদিমযেন পুব্বে,

কতেন পত্তোস্মি অতন্দিতেন,

মসক্কসাৰে ৱিয দেৱৰাজা;

ৰাজত্তমিদ্ধে পুৰমুত্তমম্হি.

২. ৰূপেন হাৰীনযনুস্সৱেন,

সদ্দেন সম্মা সৱণামতেন,

গন্ধেন ঘানুস্সৱসোভনেন,

ৰসঞ্ঞপুঞ্ঞেন ৰসেনচাপি.

৩. ফস্সেন গত্তস্স সুফস্সদেন,

সমিদ্ধিপত্তোস্মি মহিদ্ধিকোহং,

নেৱেত্তকেনেৱ পমাদভাৱ,

মা পজ্জিতুং যুত্তৰূপন্তি ঞত্ৱা.

৪. দস্সামি অঙ্গঅপি জীৱিতঞ্চ,

ধঞ্ঞং ধনং চাপি পসন্নচিত্তো,

সোস্সামি ধম্মং সিৱমাদধানং,

জিনেৰিতং জাতিজৰাপহাণং.

৫. ন সোভতি যথাকাসং, জলং ধামপতিংৱিনা,

ৰজ্জকৰণং তথা ময্হং, ৱিনা ধম্মা ন সোভতি.

৬. ন সোভতি হথা ৰত্তি, নিসানাথং ৱিনা সদা,

ৰজ্জকৰণং তথা ময্হং, ৱিনা ধম্মা ন সোভতি.

৭. অলঙ্কতোপি চে হত্থী, ৱিনা দাঠা ন সোভতি,

ৰজ্জকৰণং তথা ময্হং, ৱিনা ধম্মা ন সোভতি.

৮. যথা কল্লোলমালীযং,

ৱিনা ৱেলা ন সোভতি,

ৰজ্জকৰণং তথা ময্হং,

ৱিনা ধম্মা ন সোভতি.

৯. যথা সুমণ্ডিতো ৰাজা,

কুপটো নেৱ সোভতি,

ৰজ্জকৰণং তথা ময্হং,

ৱিনা ধম্মা ন সোভতি.

১০. ধম্মমেৱ সুণিস্সামি, ধম্মে মে ৰমতী মনো,

ন হি ধম্মা পৰং অত্থি, ধম্মমূলং তিসম্পদন্তি.

এৱং চিন্তেত্ৱা পাতোৱ সিৰিগব্ভা নিক্খম্ম সুসজ্জিতে সমুস্সিতসেতচ্ছত্তে ৰাজপল্লেঙ্কে অমচ্চগণ পৰিৱুতো নিসীদি দেৱৰাজাৱিয ৱিৰোচমানো, নিসিন্নো পন ৰাজা অমচ্চে এৱমাহ, যো পনেত্থ ভোন্তো বুদ্ধভাসিতেসু ধম্মেসু কিঞ্চিধম্মং জানাতি, সো ভাসতু, সোতুমিচ্ছামিধম্মন্তি, তে সব্বেপি মযং দেৱ ন জানামাতি আহংসু, তং সুত্ৱা অ ন ত্ত ম নো ৰাজা এৱং চিন্তেসি, যন্নূনাহং হত্থিক্খন্ধে সহস্সং ঠপেত্ৱা নগৰে ভেৰিংচৰাপেয্যং, যং অপ্পেৱনাম কোচি ধনলোভেন চাতুপ্পদিকাযপি গাথায ধম্মং দেসেয্য. তং মে দীঘৰত্তং হিতায সুখায ভৱিস্সতীতি, ততো সো তথা কত্ৱাপি ধম্মদেসকং অলভন্তো পুন দ্ৱিসহস্সং তিচতুপঞ্চসহস্সন্তিযাৱকোটিপ্পকোটিংদম্মীতি, ততো গাম নিগম জনপদে, ততো সেট্ঠিট্ঠানং সেনাপতি উপৰাজট্ঠানা দযোপি, পুন সেতচ্ছত্তং দম্মি, ৰাজৱেসং পহায অত্তানং দাসং সাৱেত্ৱা ধম্মদেসেন্তস্স দম্মিতি ৱত্ৱা ভেৰি চৰাপেত্ৱাপি ধম্ম দেসকমলভিত্ৱা সংৱিগ্গো কিম্মে ধম্মৱিযোগেন ৰজ্জেনাতি অমচ্চানং ৰজ্জং নীয্যাতেত্ৱা সদ্ধম্মগৱেসকো ধম্মসোণ্ডকমহাৰাজা মহাৱনং পাৱিসি গাম নিগম ৰাজধানি পৰম্পৰায, তেনেত্থ.

১১. পুৰে ভেৰিং চৰাপেত্ৱা,

ধম্মসোণ্ডো নৰাধিপো;

সদ্ধম্মজ্ঝেসকং সত্থু,

অলদ্ধা ধনকোটিহি.

১২. দাসো হোমি পহাযাহং,

ৰাজত্তং দেসকস্স মে;

ইচ্চাহ সো মহীপালো,

অহো ধম্মেসু লোলতা.

১৩. ৰজ্জং নীয্যাতযিত্ৱান, অমচ্চানং মনোৰমং,

ৱনং পাৱিসি সো ৰাজা, গৱেসং ধম্মমুত্তমন্তি.

মহাৱনং পৱিট্ঠক্খণে পন মহাসত্তস্স পুঞ্ঞতেজেন সক্কস্সাসনং উণ্হাকাৰং দস্সেসি, অথ দেৱৰাজা চিন্তেসি অকামং মে পণ্ডুকম্বল সিলাসনং উণ্হমহোসি, কিন্নুখো কাৰণন্তি লোকং ওলোকেন্তো সক্কো দেৱৰাজা ধম্মসোণ্ডক মহাৰাজানং সকলজম্বুদীপং ৱিচিনিত্ৱা সদ্ধম্মজ্ঝেসকং অলভিত্ৱা ৱনং পৱিট্ঠভাৱং অদ্দস, ধম্মসোণ্ডকমহাৰাজা সদ্ধম্মত্থায ৰজ্জ ধন বন্ধু জীৱিতম্পি পহায অৰঞ্ঞং পৱিট্ঠো, ন সো ৱতাযং যোৱা সোৱা সত্তো, ইমস্মিংযেৱ কপ্পে বুদ্ধো ভৱিস্সতি, বুদ্ধবোধিসত্তো চাযং অজ্জেৱ মহাৰঞ্ঞং পৱিট্ঠো সদ্ধম্মং অলদ্ধা মহাদুক্খং পাপুণেয্য, ন চেতং যুত্তং, অজ্জ মযা তত্থ গন্থব্বং ধম্মামতৰসেন তমভিসিঞ্চিত্ৱা ৰজ্জে পহিট্ঠাপেতুন্তি চিন্তেত্ৱা অত্তভাৱং ৱিজহিত্ৱা ভযানকং মহন্তং ৰক্খসৱেসং নিম্মিণিত্ৱা মহাসত্তাভিমুখো অৱিদূৰে অত্তানং দস্সেসি, তেনেত্থ.

১৪. ব্যগ্ঘচ্ছসীহমহিসো ৰগহত্থিদীপি,

মিগাকুলং কণ্টকসেলৰুক্খং;

নৰানমিন্দো পৱিসিত্ৱকাননং,

ইতোচিতো ৱিব্ভমি ধম্মকামো.

১৫. তস্সানুভাৱেন পুৰিন্দদস্স,

সিলাসনং উণ্হমহোসি কামং;

তেনেৱ সো লোকমুদিক্খমানো,

অদ্দক্খি ধীৰং ৱিপিনে চৰন্তং.

১৬. মযজ্জ তং ধম্মৰসেন সম্মা,

সন্তপ্পযিত্ৱা গমনং ৱৰন্তি;

মন্ত্ৱা সুভীমঞ্জনকূটৱণ্ণং,

মহামুখং নিগ্গত ভীমদাঠং.

১৭. দিত্তগ্গিসঙ্কাস ৱিসালনেত্তং,

মজ্ঝেন ভগ্গং চিপিটগ্গনাসং;

খৰতম্বদাঠিং ঘনমস্সুৱন্তং,

নীলোদৰং গজ্জিতভীমঘোসং.

১৮. কৰোৰুহং তিক্খসলোহিতাযতং,

ৱিসালধোতাযতখগ্গহত্থং;

গদাযুধেনঙ্কিতমঞ্ঞবাহুং,

দট্ঠোট্ঠভীমং সৱলীললাটং.

১৯. মনুস্সমংসাদনৰত্তপানং,

ভযানকং কক্খলযক্খৱণ্ণং;

সুমাপযিত্ৱান ৱনন্তৰস্মিং,

দস্সেসি অত্তং স নৰাধিপস্সাতি.

অথ মহাসত্তো অত্তনো অৱিদূৰে ঠিতং ৰক্খসং অদ্দক্খি, তং দিস্ৱানাস্স ভযংৱা ছম্ভিতত্তংৱা চিত্থুত্ৰাসমত্তংৱা নাহোসি, কিমত্ৰ চিন্তেসি, অপিনাম এৱৰূপো পিৰক্খসো ধম্মং জানেয্য, যন্নূনাহং তস্স সন্তিকে ধম্মং সুণিস্সামি, তম্মে দীঘৰত্তং হিতায সুখায ভৱিস্সতীতি চিন্তেসি. চিন্তেত্ৱা চপন অজ্জ মযা তমুপসঙ্কম্ম পুচ্ছিতং ৱট্টতীতি গন্ত্ৱা ৰক্খসেন সদ্ধিং সল্লপন্তো আহ.

২০. অস্মিং ৱনস্মিং তৰুসণ্ড মণ্ডিতে;

সুফুল্লিতানেকলতাকুলাকুলে;

অধিগ্গহীতো সি মহানুভাৱ,

পুচ্ছামি তং দেৱ ৱদেহি কঙ্খং.

২১. ধম্মং গৱেসং ৱনমাগতোম্হি,

পহায ৰজ্জং অপি ঞাতিসঙ্ঘং;

জানাসি চে সম্ম ৱদেহি ময্হং,

একম্পি গাথং সুগতেন দেসিতং.

ততো যক্খো আহ.

২২. ধম্মং পজানামহমেকদেসং,

জিনেৰিতং সাধুতৰং ৰসানং,

দেসেমি চেহং তৱ ধম্ম মগ্গং,

তুৱঞ্হি কিং কাহসি দেসকস্সাতি.

অথ মহাসত্তো আহ.

২৩. ৰজ্জে ঠিতো অস্সমহং সচে ভো,

অনপ্পৰূপং পকৰোমি পূজং;

ইদানি একো ৱনমজ্ঝপত্তো,

কৰোমি কিং দেহমিমং ঠপেত্ৱা.

২৪. যদিচ্ছসি ত্ৱং মম মংসলোহিতং,

কৰোমহং সঙ্গহমজ্জ তেন,

ন চত্থি অঞ্ঞং তৱ অচ্চনীযং,

দেসেহি ধম্মং সুগত প্পসত্থন্তি.

ততো যক্খো আহ.

২৫. ভুত্ৱান মংসং সুহিতোৱ সন্তো,

হন্ত্ৱা পিপাসং ৰুধিৰং পিৱিত্ৱা;

ধম্মং কথেতুং পভৱামি তুয্হং,

ৱত্তুং ন সক্কোমি খুদাপৰেতোতি.

অথ মহাসত্তো আহ.

২৬. ভুত্ৱা তুৱং মং পথমঞ্হি যক্খ,

পচ্ছা তু দেসেস্সসি কস্স ধম্মং;

ধম্মস্স ময্হং তৱ মংসলাভং,

ত্ৱমেৱ জানাহি যথা ভৱেয্যাতি.

এৱং ৱুত্তে সক্কো দেৱানমিন্দো সাধু মহাৰাজ অহমেৱ যুত্তং জানামীতি ৱত্ৱা তস্সাৱিদূৰে তিগাৱুতুব্বেধং অঞ্জনৱণ্ণং মহন্তং পব্বতং মাপেত্ৱা মহাৰাজ ইমমাৰুয্হ পব্বতমুদ্ধনিট্ঠিতো মম মুখে পততু, অহং পতন্থস্স তে ধম্মং দেসেস্সামি, এৱং সন্তে তুয্হং ধম্মপটিলাভো, ময্হংচ মংসপটিলাভো ভৱিস্সতীতি. তং সুত্ৱা মহাসত্তো অনমতগ্গে সংসাৰে সংসৰতো মে সীহব্যগ্ঘচ্ছমচ্ছকচ্ছপৱিহঙ্গাদীনং ভক্খভূতস্স জাতীসু পমাণং নত্তি, অজ্জ মযা সম্বুদ্ধস্স ধম্মত্থায জীৱিতং পৰিচ্চজিতুং ৱট্টতীতি চিন্তেত্ৱা এৱমাহ.

২৭. সংসাৰৱট্টেসু ৱিৱট্টমানা,

পপ্পোন্তি দুক্খং জনতা অনেকা;

এতঞ্হি ভো অত্তনো ৱা পৰস্স,

অত্থায নাহোসি অহোসি তুচ্ছং.

২৮. ত্ৱমদিন্নহাৰী তিচ পাৰদাৰিকো,

পাণাতিপাতীসি মুসা অভাসি;

ত্ৱ মজ্জপাযীতি অকাসি দোসং,

পগ্গয্হ দুক্খং বহুসো দদন্তি.

২৯. এতঞ্হি ভো অত্তনো ৱা পৰস্স,

অত্থায নাহোসি অহোসি তুচ্ছং;

ৰুক্খা পপাতা পপতিত্ৱকেচি,

দুব্বন্ধিযা দুগ্গৱিসাদনেন.

৩০. ব্যাধীহি নানাখৰৱেদনাহি,

মৰন্তি সত্তা উতুৱেদনাহি;

এতঞ্হি ভো অত্তনো ৱা পৰস্স,

অত্থায নাহোসি অহোসি তুচ্ছং.

৩১. ব্যগ্ঘচ্ছমচ্ছো ৰগকুচ্ছিযঞ্হি,

মতস্স মে নত্থি পমাণসঙ্খা;

এতঞ্হি ভো অত্তনো ৱা পৰস্স,

অত্থায নাহোসি অহোসি তুচ্ছং.

৩২. এতজ্জ মে দুচ্চ জ মত্তদানং,

ন হোতি দেৱিস্সৰিযাদিকায;

সব্বঞ্ঞুভাৱং পন পাপুণিত্ৱা,

সংসাৰতো নিত্তৰণায সত্তে.

৩৩. ত্ৱং সম্ম ময্হং বহুসো পকাৰী,

তস্মা তৱেতং ৱচনং কৰোমি;

অসংকিতো দেসয ময্হধম্মং,

সমিজ্ঝতে দানি মনোৰথো তেতি.

এৱঞ্চ পন ৱত্ৱা মহাসত্তো পব্বতমাৰুয্হ ঠিতো আহ, অহমজ্জ ৰজ্জেন সদ্ধিং জীৱিতঞ্চ সৰীৰমংসঞ্চ সদ্ধম্মত্থায দম্মীতি সোমনস্সপ্পত্তো হুত্ৱা সম্ম ধম্মং দেসেহীতি ৱত্ৱা তস্মিং মহাদাঠং মহামুখং ৱিৱৰিত্ৱা ঠিতে তস্সাভিমুখো উপপতি. অথ সক্কো দেৱানমিন্দো সোমনস্সো অচ্ছৰিযপ্পত্তো অত্তভাৱং ৱিজহিত্ৱা অলঙ্কতদিব্বত্তভাৱং মাপেত্ৱা আকাসে তৰুণসুৰিযো ৱিয ওভাসমানো আকাসতো পতন্তং মহাসত্তং উভোহি হত্থেহি দড়্হং পতিগণ্হিত্ৱা দেৱলোকং নেত্ৱা পণ্ডুকম্বল সিলাসনে নিসীদাপেত্ৱা দিব্বমযেহি গন্ধমালাদীহি পূজেত্ৱা সযং ধম্মং সুত্ৱা পসন্নো পসন্নাকাৰং কত্ৱা কস্সপদসবলেন দেসিতায অনিচ্চাদিপৰিদীপিকায.

৩৪. অনিচ্চাৱ ত সঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখোতি.

গাথায ধম্মদেসনেন তস্স মনোৰথং মত্থকং পাপেত্ৱা দেৱলোকে মহন্তং সিৰিৱিভৱং দস্সেত্ৱা আনেত্ৱা সকৰজ্জেযেৱ পতিট্ঠাপেত্ৱা অপ্পমত্তো হোতি মহাৰাজাতি ওৱদিত্ৱা দেৱলোকমেৱ অগমাসীতি.

৩৫. ইতি অমিতসিৰিং ৱা জীৱিতং ৱাপি সন্তো,

ন সুমৰিয পসত্থং ধম্মমেৱা চৰন্তি;

তনুতৰ ৱিভৱানং অপ্পমাযূনমম্ভো,

ইহ কুসলপমাদো কো নু তুম্হাদিসানন্তি.

ধম্মসোণ্ডকৱত্থুং পঠমং.

২. মিগলুদ্দকস্স ৱত্থুম্হি অযমানুপুব্বিকথা

ইতো কিৰ এক তিংসতিমে কপ্পে সিখীনাম সম্মাসম্বুদ্ধো সমতিংস পাৰমিযো পূৰেত্ৱা পৰমাতিসম্বোধিং পত্ৱা সদেৱকং লোকং সংসাৰকন্তাৰা উত্তাৰেন্তো ধম্মৰতনৱস্সং ৱস্সাপেন্তো ধম্মভেৰিংপহৰন্তো ধম্মকেতুং উস্সাপেন্তো একস্মিং সমযে ৱিৱেক মনুব্ৰূহন্তো অৰঞ্ঞাযতনং পাৱিসি, পৱিসিত্ৱা চপন সুপুপ্ফিতনাগপুন্নাগাদিনানাতৰুসণ্ডমণ্ডিতে সুফুল্লসুমনমালতিপ্পভুতিনানালতাকুলে অনেকৱিধদিপদচতুপ্পদসঙ্ঘনিসেৱিতে ৰমণীযে সীতলসিলাতলে চতুগ্গুণং সঙ্ঘাটিংপঞ্ঞপেত্ৱা নিসীদি ছব্বণ্ণৰংসীহি দিসং পূৰযন্তো, তদা তত্থ দেৱব্ৰহ্মনাগসুপণ্ণাদযো সন্নিপতিত্ৱা দিব্বমযেহি গন্ধমালাদীহি ভগৱন্তং পূজযমানা থোমযমানা নমস্সমানা অট্ঠংসু, তস্মিং পনসমাগমে ভগৱা মধুৰস্সৰং নিচ্ছাৰেন্তো ব্ৰহ্মঘোসেন চতুসচ্চপটিসংযুত্তং ধম্মং দেসেতি অমতৱস্সং ৱস্সাপেন্তোৱিয. তদা একো মিগলুদ্দকো ৱনং পৱিট্ঠো মিগসূকৰে হন্ত্ৱা মংসং খাদন্তো তং ঠানং পত্ৱা অদ্দস ভগৱন্তং ধম্মং দেসেন্তং. দিস্ৱা একমন্তং ঠিতো ধম্মং সুত্ৱা চিত্তং পসাদেত্ৱা ততো চুতো দেৱলোকে নিব্বত্তিত্ৱা ছসু কামসগ্গেসু মনুস্সেসুচ অপৰাপৰং ইস্সৰিযং অনুভৱন্তো ইমস্মিং বুদ্ধুপ্পাদে সাৱত্থিযং কুলগেহে নিব্বত্তিত্ৱা ৱিঞ্ঞুতং পত্তো ভগৱতো সাসনে পব্বজিত্ৱা একদিৱসং ধম্মং দেসেন্তস্স ভগৱতো চতুসচ্চপতি সংযুত্তং ধম্মকথং সুত্ৱা চতুপটিসম্ভিদাহি অৰহত্তং পত্ৱা একদিৱসং ভিক্খুসঙ্ঘমজ্ঝগতো অত্তনো কতকম্মপ্পকাসনেন পীতিৱাচমুদাহৰি.

১. এ ক তিং সে ইতো কপ্পে,

লোকে উপ্পজ্জি নাযকো;

পত্তিংস লক্খণাতিণ্ণো,

সম্বুদ্ধো স সিখীৱ্হযো.

২. জলন্তো দীপৰুক্খোৱ, সূৰিযোৱ নভ মুগ্গতো;

মেৰুৰাজাৱ সম্বুদ্ধো, জনেসগ্গো পতাপৱা.