৬. সৰণত্থেৰস্স ৱত্থুম্হি অযমানুপুব্বীকথা

সাৱত্থিযং কিৰ সুমনো নামে কো গহপতি অহোসি. তস্স ভৰিযা সুজম্পতিকা নাম. তে অগাৰং অজ্ঝাৱসন্তা অপৰভাগে পুত্তংচ ধীতৰংচ লভিংসু. অথ তেসং দহৰকালেযেৱ মাতাপিতৰো কালং কৰোন্তা জেট্ঠকংপক্কোসিত্ৱা মযং পুত্ত তুৱং পতিৰূপে ঠানে নিৱেসিতুং নাসক্খিম্হ, যং নো ঘৰে ৱিভৱং, সব্বং তং গণ্হ. ইমাযচ তে কণিট্ঠিকায ৱুদ্ধিংত্ৱমেৱ জানাহীতি ৱত্ৱা জেট্ঠকস্স হত্থে কণিট্ঠিকায হত্থং ঠপেত্ৱা কালমকংসু. অথ সো মাতাপিতুন্নং অচ্চযেন আড়াহনকিচ্চং কত্ৱা ৱসন্তো কালন্তৰেন কণিট্ঠিকং পতিৰূপেন কুলেন সম্বন্ধিত্ৱা সযম্পি দাৰপৰিগ্গহমকাসি. অথাপৰভাগে তস্স কণিট্ঠিকা গব্ভিনী হুত্ৱা একদিৱসং সামিকং আহ, সামি মম ভাতৰং দট্ঠুকামাম্হীতি. সোপি সাধু ভদ্দেতি অনুৰূপেন পণ্ণাকাৰেন তায সদ্ধিং নিক্খমি. তদা পন ভগৱা সুনিৱত্থো সুপাৰুতো ভিক্খুসঙ্ঘপৰিৱুসো পিণ্ডায নগৰং পাৱিসি ছব্বণ্ণঘনবুদ্ধৰংসিযো ৱিস্সজ্জেন্তো, ত তো তে ভগৱন্তং দিস্ৱা পসন্নচিত্তা পঞ্চপতিট্ঠিতেন ৱন্দিত্ৱা অট্ঠংসু, অথ সত্তা তেসং জযম্পতিকানং উপনিস্সযসম্পত্তিংদিস্ৱা তে সৰণেসুচ সীলেসুচ পতিট্ঠাপেত্ৱা এৱমাহ, কদাচি ৱো দুক্খে উপ্পন্নে তথাগতো অনুস্সৰিতব্বোতি. তথাহি.

১. যংকিঞ্চি ভযমুপ্পন্নং, ৰাজচোৰাদিসম্ভৱং;

তদা সৰেয্য সম্বুদ্ধং, নিচ্ছন্তোত দুপদ্দৱং.

২. যং ৱে উপদ্দৱং হোতি, যক্খপেতা দিসম্ভৱং;

তদা সৰেয্য সম্বুদ্ধং, নিচ্ছন্তো তদুপদ্দৱং.

৩. সীহব্যগ্ঘতৰচ্ছাদি, পুণ্ডৰীকাদিসম্ভৱং;

তদা সৰেয্য সম্বুদ্ধং, নিচ্ছন্তো তদুপদ্দৱং.

৪. যমাতপগ্গি ৱাতাদি, উদকাসনিসম্ভৱং;

তদা সৰেয্য সম্বুদ্ধং, নিচ্ছন্তো তদুপদ্দৱং.

৫. পজ্জৰাদীহি ৰোগেহি, ৱিসমো তুহিসম্ভৱং;

তদা সৰেয্য সম্বুদ্ধং, নিচ্ছন্তো তদুপদ্দৱং.

৬. মচ্চুনা চে যদা যুদ্ধং, কৰে তেনাপি জন্তুনা;

সৰিতব্বো তদা বুদ্ধো, পত্থেন্তেনত্তনো জযন্তি.

ততো তে ভগৱতো ৱচনং পটিনন্দিত্ৱা ৱন্দিত্ৱা অগমংসু. অথ জেট্ঠকো আগতে তে দিস্ৱা যথানুৰূপং সক্কাৰ মকাসি. তস্সা সামিকো কতিপাহং তত্থ ৱসিত্ৱা ভৰিযং জেট্ঠকস্স পটিপাদেত্ৱা মম গামে কিচ্চং অত্থীতি ৱত্ৱা পক্কামি. অথস্সা ভাতা ভৰিযং পক্কোসিত্ৱা আহ ভদ্দে ইমিস্সা সব্বং কত্তব্বং কৰোহীতি. সা ততো পট্ঠায তস্সা উদকন্ন পানা দিনা ৱেয্যাৱচ্চং কুৰুমানা এতিস্সা হত্থপাদগীৱূপগেসু আভৰণেসু লোভং উপ্পাদেত্ৱা তং ৱূপসমেতুং অসক্কোন্তী আহাৰূ পচ্ছেদং কত্ৱা গিলানাৱিয মঞ্চকং উপগূহিত্ৱা নিপতি. অথ সো গেহং গন্ত্ৱা তং তথা সযিতং দিস্ৱা মঞ্চকে নিসিন্নো কিং ভদ্দে অফাসুকন্তি পুচ্ছি, সা তুণ্হী হুত্ৱা কতিপযৱাৰে পুচ্ছিতা ন সক্কা কথেতুন্তি আহ. পুন সামিকেন গাড়্হং নিবন্ধিতে সা চিন্তেসি, উজুকং মযা তস্সা পিড়ন্ধনং পত্থেমীতি ৱুত্তে ন প্পতিৰুপং, তস্সা পঞ্চমধুৰ মংসং পত্থেমীতি ৱুত্তে তং মাৰেস্সতি, তদা পিড়ন্ধনানি ময্হমেৱাতি, ততো সামি তৱ কণিট্ঠিকায পঞ্চমধুৰমংসং পত্থেমি, অলভমানায মে জীৱিতং নত্থীতি আহ, তং সুত্ৱা সো অনেকপৰিযাযেন মনুস্সমাৰণং নাম ভাৰিযন্তি ৱত্ৱা নিৱাৰেন্তোপি নিৱাৰেতুং নাসক্খি, অথ তায পটিবদ্ধচিত্তো কামমুচ্ছিতো মোহমূড়্হো হুত্ৱা সাধু লভিস্সসীতি তস্সা ৱচনং সম্পটিচ্ছি. তথাহি.

৭. হাযন্তি ইধলোকত্থা, হাযন্তি পাৰলোকিকা;

হাযন্তি মহতা অত্থা, যে ইত্থীনং ৱসঙ্গতা.

৮. এসা মাতা পিতা এসো, ভগিনী ভাতৰো ইমে;

গৰুতব্বে ন জানন্তি, যে ইত্থীনং ৱসঙ্গতা.

৯. কাৰণাকাৰণন্তেতং, কত্তব্বংৱা ন ৱা ইদং;

কামন্ধত্তা ন জানন্তি, যে ইত্থীনং ৱসঙ্গতা.

১০. পাণং ৱা অতিপাতেন্তি, হোন্তি ৱা পাৰদাৰিকা;

ভাসন্তি অলিকং ৱাচং, যে ইত্থীনং ৱসঙ্গতা.

১১. সন্ধিচ্ছেদাদিকং থেয্যং, মজ্জপানংচ পেসুনং;

কৰোন্তি সাহসং সব্বং, যে ইত্থীনং ৱসঙ্গতা.

১২. অহো অচ্ছৰিযং লোকে, সৰন্তানং ভযা ৱহং;

ভৰিযায ৱসং গন্ত্ৱা, সোদৰিংহন্তুমিচ্ছতীতি.

অথ সো সাহসিকো পুৰিসো ভগিনি এৱ মাহ, এহি অম্ম অম্হাকং মাতাপিতুন্নং ইণং সাধেস্সাম, অপ্পেৱনাম নো দিস্ৱা ইণাযিকা ইণং দস্সন্তীতি, তং সুত্ৱা তায সম্পটিচ্ছিতে সুখযানকে নিসীদাপেত্ৱা ইণাযিকানং গামং গচ্ছন্তো ৱিয মহাঅটৱিংপত্ৱা যানং মগ্গা ওক্কম্ম ঠপেত্ৱা ৱিৰৱন্তিমেৱ নং হত্থে গহেত্ৱা ছিন্দিস্সামীতি চিন্তেত্ৱা কেসে গহেত্ৱা ভূমিযং পাতেসি, তস্মিং খণে তস্সা কম্মজৱাতা চলিংসু. সা ভাতুলজ্জায সামি কম্মজৱাতা মে চলিংসু, যা ৱা হং ৱিজাযামি, তাৱ উপধাৰেহীতি ৱদন্তীপি অপনেতুং অসক্কোন্তী পুত্তং ৱিজাযি, অথ সো তং সমীপে ৱটৰুক্খমূলে মাৰেস্সামীতি চিকুৰে গহেত্ৱা আকড্ঢি, তস্মিং কালে সা সামি তৱ ভাগিনেয্যস্স মুখং ওলোকেত্ৱা তস্স সিনেহেনাপি মং ন মাৰেহীতি ৱদন্তী যাচি, অথ সো কক্খড়ো তস্সা তং কাৰুণিকৱচনং অসুণন্তো ৱিয মাৰেতুং উস্সহতেৱ, ততো সা কুমাৰিকা অত্তনো অসৰণা চিন্তেসি, মম সদ্দেনা গন্ত্ৱা যো কোচি মম ভাতু অনযং কৰেয্য, তং ন প্পতিৰূপন্তি ভাতুসিনেহেন নিস্সদ্দা অত্তনা গতিতসৰণং আৱজ্জমানা নিপজ্জি, অথস্সা ভা ত ৰি মেত্তানুভাৱেনচ অনুস্সৰিতসৰণানুভাৱেনচ তস্মিং নিগ্ৰোধে অধিৱত্থা দেৱতা এৱৰূপো মাতুগামো এত্থ মাৰিতা অভৱিস্সা, অদ্ধাহং দেৱসমাগমং পৱিসিতুং ন লভিস্সামীতি চিন্তেত্ৱা এতিস্সা সা মি কো ৱিয তং ত জ্জে ত্ৱা পলাপেত্ৱা ত্ৱং মা ভাযীতি সমস্সাসেত্ৱা যা ন কে স পু ত্তং কুমাৰিং নিসীদাপেত্ৱা তং দিৱসমেৱ সাৱত্থিমাগম্ম অন্তোনগৰে সা লা য নং নিপজ্জাপেত্ৱা অন্তৰধাযি. তথাহি.

১৩. সব্বসম্পত্তিদাতাৰং, সব্বলোকেকনাযকং;

মনসাপি যো ৱিভাৱেতি, তং ৱে পালেন্তি দেৱতা.

১৪. মুহুত্তম্পিচ যো মেত্তং, ভাৱেতি যদি সাধুকং;

তং ৱে পালেন্তি দেৱাপি, তোসযন্তি উপাযনাতি.

ততো তস্সা পন সামিকো নগৰা নিক্খম্ম গচ্ছন্তো অত্তনো ভৰিযং দিস্ৱা ত্ৱং কদা আগতা, কেনানীতাসীতি পুচ্ছি. সা দেৱতায আনীতভাৱং অজানন্তী কিং ত্ৱং ভণসি, ননু তযা আনীতাম্হীতি, সোপি কিংভোতি ভণসি, তৱ ভাতুগামে দিট্ঠকালতো প্পতুতি অজ্জ চত্তাৰো মাসা জাতা, এত্তকং কালং ত্ৱং ন দিট্ঠপুব্বা, কথং ত্ৱং মযা সদ্ধিংআগতাতি পুচ্ছি. সা তং সুত্ৱা তেনহি মাঞ্ঞস্স ইমং ৰহস্সং কথেহি সামীতি ৱত্ৱা ভা ত ৰা অত্তনো কতং সব্বং ৱিত্থাৰেন কথেসি. তং সুত্ৱা তস্স সামিকো সংৱিগ্গো ভযপ্পত্তো হুত্ৱা তং অত্তনো গেহং পাপেসি, ততো কতিপাহং তায ৱিস্সমিতে তে উভোপি সত্থাৰং নিমন্তেত্ৱা মহাদানং দত্ৱা ৱন্দিত্ৱা একমন্তে নিসীদিংসু, অথ সা ভগৱতো সৰণসীলানুভাৱেন অত্তনো জীৱিতপটিলাভং পকাসেত্ৱা অত্তনো পুত্তং ভগৱন্তং ৱন্দাপেত্ৱা সৰণোতিনামমকংসু, সত্থা তে সং অজ্ঝাসযং ঞত্ৱা তদনুৰূপং ধম্মং দেসেসি, দেসনাৱসানে উভোপি সোতাপন্না অহেসুং, অথস্সা পুত্তো সৰণকুমাৰো ৱীসতিমে ৱস্সে বুদ্ধসাসনে পব্বজিত্ৱা ৱিপস্সনং ৱড্ঢেত্ৱা অৰহত্তং পত্তো সৰণত্থেৰোনাম পঞ্ঞাযীতি.

১৫. খণমপি মনসেৱং দেৱদেৱং সৰন্তা,

পৰমতৰপতিট্ঠং পাপুণন্তীতি মন্ত্ৱা;

ভৱগতি গুণৰাসিং জানমানা জনা ভো;

ভজথ সৰণসীলং সব্বথা সব্বকালন্তি.

সৰণত্থেৰস্স ৱত্থুং ছট্ঠমং.