৪. বুদ্ধেনিযা ৱত্থুম্হি অযমানুপুব্বীকথা

জম্বুদীপে কিৰ পুব্বে পাটলিপুত্তনগৰে সত্তাসীতীকোটিনিহিতধনং একং সেট্ঠিকুলং অহোসি, তস্স পন সেট্ঠিনো একাযেৱ ধীতা অহোসি নামেন বুদ্ধেনিনাম, তস্সা সত্তৱস্সিককালে মাতাপিতৰো কালমকংসু, তস্মিং কুলে সব্বং সাপতেয্যং তস্সাযেৱ অহোসি, সা কিৰ অভিৰূপা পাসাদিকা পৰমায ৱণ্ণপোক্খৰতায সমন্নাগতা দেৱচ্ছৰপটিভাগা পিযাচ অহোসি মনাপা, সদ্ধা পসন্না ৰতনত্তযমামিকা পটিৱসতি, তস্মিং পন নগৰে সেট্ঠিসেনাপতিউপৰাজাদযো তং অত্তনো পাদপৰিচাৰিকং কামযমানা মনুস্সে পেসেসুং পণ্ণাকাৰেহি সদ্ধিং, সা তং সুত্ৱা চিন্তেসি, ময্হং মাতাপিতৰো সব্বং ৱিভৱং পহায মতা, মযা পন তথা অগন্তব্বং, কিং মে পতিকুলেন, কেৱলং ৱিত্তৱিনাসায ভৱতি, মযা পনি মং ধনং বুদ্ধসাসনেযেৱ নিদহিতুং ৱট্টতীতি চিন্তেসি, চিন্তেত্ৱা চ পন তেসং ন ময্হং পতিকুলেনত্থোতি পটিক্খিপি, সা ততো পট্ঠায মহাদানং পৱত্তেন্তী সমণব্ৰহ্মণে সন্তপ্পেসি, তেনেত্থ.

১. চতুদ্দিসাযাতজিনত্ৰজানং,

আপানভূতং ঘৰমাসি তস্সা;

যদিচ্ছিত প্পচ্চযলাভ হেতু,

দেৱদ্দুমোৱাসি মহানুভাৱো.

২. পুপ্ফূপহাৰাদি ৱিতানলঙ্কতা,

পদীপ পঞ্ঞত্ত সুভাসনাৱলী;

সুখাসনাসীন ৱসীহিলঙ্কতা,

তস্সাসি তস্মিং ৱৰদানসালা.

৩. সুধোতহত্থা সুচিপুঞ্ঞচিত্তা,

সদাদৰা ৰক্খিতপঞ্চসীলা;

বুদ্ধেনিনামা কৰুণা গুণগ্গা,

অদা মহাদানৱৰং পসত্থন্তি.

অথাপৰভাগে একো অস্সৱাণিজকো অস্স-ৱাণিজ্জায পুব্বন্তাপৰন্তং গচ্ছন্তো আগম্ম ইমিস্সা গেহে নিৱাসং গণ্হি, অথ সো ৱাণিজো তং দিস্ৱা ধীতুসিনেহং পতি ট্ঠা পে ত্ৱা গন্ধমালৱত্থালঙ্কাৰাদীহি তস্সা উপকাৰকো হুত্ৱা গমনকালে অম্ম এতেসু অস্সেসু তৱ ৰুচ্চনকং অস্সং গণ্হাহীতি আহ, সাপি অস্সে ওলোকেত্ৱা একং সিন্ধৱপোতকং দিস্ৱা এতং মে দেহীতি আহ, ৱাণিজো অম্ম এসো সিন্ধৱপোতকো, অপ্পমত্তা হুত্ৱা পটিজগ্গাহীতি ৱত্ৱা তং পটিপাদেত্ৱা অগমাসি. সাপি তং পটিজগ্গমানা আকাসগামিভাৱং ঞত্ৱা সম্মা পটিজগ্গন্তী এৱং চিন্তেসি, পুঞ্ঞকৰণস্স মে সহাযো লদ্ধোতি, অগতপুব্বাচ মে ভগৱতো সমাৰং মাৰবলং ৱিধমেত্ৱা বুদ্ধভূতস্স জযমহাবোধিভূমি, যন্নূনাহং তত্থ গন্ত্ৱা ভগৱতো জযমহাবোধিং ৱন্দেয্যন্তি চিন্তেত্ৱা ব হূ ৰজতসুৱণ্ণমালাদযো কাৰাপেত্ৱা একদিৱসং অস্স মভিৰুয্হ আকাসেন গন্ত্ৱা বোধিমালকে ঠত্ৱা আগচ্ছন্তুঅয্যা সুৱণ্ণমালা পূজেতুংতি উগ্ঘোসেসি. তেনেত্থ.

৪. যতো পট্ঠাযহং বুদ্ধ, সাসনে সুদ্ধমানসা;

পসন্না তেন সচ্চেন, মমানুগ্গহবুদ্ধিযা.

৫. আগচ্ছন্তু নমস্সন্তু, বোধিং পূজেন্তু সাধুকং;

সোণ্ণমালাহি সম্বুদ্ধ, পুত্তা অৰিযসাৱকা.

৬. সুত্ৱা তং ৱচনং অয্যা, বহূ সীহড়ৱাসিনো;

আগম্ম নভসা তত্থ, ৱন্দিং সুচ মহিংসুচাতি.

ততো প্পতুতি সা কুমাৰিকা বুদ্ধসাসনে অতীৱ পসন্না নিচ্চমেৱ অস্স মভিৰুয্হ আগন্ত্ৱা অৰিযেহি সদ্ধিং মহাবোধিং সুৱণ্ণমালাহি পূজেত্ৱা গচ্ছতি, অথ পাটলিপুত্তনগৰোপৱনে ৱনচৰা তস্সা অভিণ্হং গচ্ছন্তিযা চ আগচ্ছন্তিযা চ ৰূপসম্পত্তিং দিস্ৱা ৰঞ্ঞো কথেসুং. মহাৰাজ এৱৰূপা কুমাৰিকা অস্স মভিৰুয্হ আগন্ত্ৱা নিবদ্ধং ৱন্দিত্ৱা গচ্ছতি. দেৱস্সানুৰূপা অগ্গমহেসী ভৱিতুন্তি, ৰা জা তং সুত্ৱা তেনহি ভণে গণ্হথ নং কুমাৰিং, মম অগ্গমহেসিং কৰোমীতি পুৰিসে পযোজেসি, তেন পযুত্তপুৰিসা বোধিপূজং কত্ৱা আগচ্ছন্তিং গণ্হামাতি তত্থ নিলীনা গহণসজ্জা অট্ঠংসু, তদা সা কুমাৰিকা অস্স মভিৰুয্হ মহাবোধিমণ্ডং গন্ত্ৱা ৱীতৰোগেহি সদ্ধিং পুপ্ফপূজং কত্ৱা ৱন্দিত্ৱা নিৱত্তি, অথ তেসু একো ধম্মৰক্খিত ত্থেৰোনাম তস্সা এৱ মাহ, ভগিনি তং অন্তৰামগ্গে চোৰা গণ্হিতুকামা ঠিতা, অসুকট্ঠানং পত্ৱা অপ্পমত্তা সীঘং গচ্ছাতি, সাপি গচ্ছন্তী তং ঠানং পত্ৱা চোৰেহি অনুবন্ধিতা অস্সস্স পণ্হিযা সঞ্ঞং দত্ৱা পক্কামি, চোৰা পচ্ছতো পচ্ছতো অনুবন্ধিংসু. অস্সো ৱেগং জ নে ত্ৱা আকাস মুল্লঙ্ঘি, কুমাৰিকা ৱেগং সন্ধাৰেতুং অসক্কোন্তী অস্সস্স পিট্ঠিতো পৰিগলিত্ৱা পতন্তী মযা কতূপকাৰং সৰ পুত্তাতি আহ, সো পতন্তিং দিস্ৱা ৱেগেনা গন্ত্ৱা পিট্ঠিযং নিসীদাপেত্ৱা আকাসতো নেত্ৱা স ক ট্ঠা নে যেৱ পতিট্ঠাপেসি. তস্মা.

৭. তিৰচ্ছানগতাপেৱং, সৰন্তা উপকাৰকং;

ন জহন্তীতি মন্ত্ৱান, কতঞ্ঞূ হোন্তু পাণিনোতি.

ততো সা কুমাৰিকা সত্তা সীতিকোটিধনং বুদ্ধসাসনেযেৱ চজিত্ৱা যাৱজীৱং সীলং ৰক্খিত্ৱা উপোসথকম্মং ক ত্ৱা ত তো চুতা সুত্ত প্পবুদ্ধো ৱিয দেৱলোকে নিব্বত্তীতি.

৮. অতিতৰুণৱযা ভো মাতুগামাপি এৱং,

ৱিৱিধকুসলকম্মং কত্ৱ সগ্গং ৱজন্তি;

কুসলফলমহন্তং মঞ্ঞমানা ভৱন্তা,

ভৱথ কথ মুপেক্খা দানমানাদিকম্মে.

বুদ্ধেনিযা ৱত্থুং চতুত্থং.