৩. তিণ্ণংজনানং ৱত্থুম্হি অযমানুপুব্বীকথা

জম্বুদীপস্মিং কিৰ পুব্বে মহানিদাঘো অহোসি, তদা নিদাঘসুৰিযেন সকিৰণকৰা ৱাপি পোক্খৰণি নদী গিৰিকন্দৰনিজ্ঝৰাদীসু উদকং নিস্সেসং কত্ৱা পীতমিৱ উদকে পৰিক্খীণে মচ্ছকচ্ছপাদযো যেভুয্যেন ৱিনাসং পত্তা. অথ মহাৰঞ্ঞভূমিযং ৰুক্খতিণলভাদযো অতীৱ মিলাতা অহেসুং. মিগপক্খিনোপিঘম্মাভিতত্তা পিপাসিতো মৰীচিং তোযন্তিমঞ্ঞমানা ইতোচিতোচ ধাৱন্তা মহাদুক্খপ্পত্তা অহেসুং. তদা একো সুৱপোতকো পিপাসিতো তত্থ তত্থ পানীযং পৰিযেসন্তো মহাৰঞ্ঞে একস্মিং পূতিপাদপে সট্ঠিৰতনে নৰকাৱাটে পানীযগন্ধং ঘাযিত্ৱা লোভেন পাতুং ওতিণ্ণো অতিপানেন ভাৰো তত্থেৱ পতিত্ৱা উগ্গন্তুং নাসক্খি. অথাপৰোপি সপ্পোচ মনুস্সোচাতি দ্ৱে জনা তত্থেৱ পতিংসু, সপ্পানাম ৱিৱেকং লদ্ধাৱ অত্তং ৱিজহন্তি. তস্মাযং অলদ্ধা ৱিৱেকত্তং উগ্গন্তুং নাসক্খি. অনালম্বত্তা মনুস্সোপি. তে উগ্গন্তুং অসক্কোন্তা মৰণভযভীতা অঞ্ঞমঞ্ঞ মৱিহেঠেন্তা তত্থেৱ ৱসিংসু. অথেকো বৰাণসীৱাসিকো মনুস্সো ৱনং পৱিট্ঠো তথেৱ পানীযং পৰিযেসমানো তং ঠানং পত্ৱা তে তযোপি দিস্ৱা কম্পমানহদযো ৱল্লিযা পিটকং বন্ধিত্ৱা সিক্কায পক্খিপিত্ৱা ওতাৰেত্ৱা তে তযোপি উদ্ধৰি, অথানেন তে অম্হাকং জীৱিতং দিন্নন্তি সোমনস্সা তস্সেৱমাহংসু, সামি মযং তুম্হে নিস্সায জীৱিতং লভিম্হ, তুম্হে ইতো পট্ঠায অম্হাকং সহাযো, মযম্পি তে সহাযা, অম্হাকং ৱসনট্ঠানানি আগন্তুকামাতি ৱত্ৱা তেসু তাৱ সুৱপোতকো আহ, সামি বাৰাণসিযং দক্খিণদ্ৱাৰে মহানিগ্ৰোধো অত্থি, তত্থাহং ৱসামি, তৱ তথাৰূপে কিচ্চে সতি মম সন্তিকমাগম্ম সুৱাতি সদ্দংকৰোহীতি ৱত্ৱা মেত্তিথিৰং কত্ৱা পক্কামি, সপ্পোপি সম্মাহং তস্সেৱ নিগ্ৰোধস্সা ৱিদূৰে মহন্তং ৱম্মিকং অত্থি, তত্থ ৱসামি, তৱত্থে সতি তত্থাগন্ত্ৱা দীঘাতিসদ্দং কৰোহীতি ৱত্ৱা তথেৱপক্কামি, মনুস্সোপি বাৰাণসিযং অসুকাযনাম ৱীথিযা অসুকগেহে ৱসামি, তৱত্থে সতি মম সন্তিকং আগচ্ছাতি ৱত্ৱা পক্কামি, অথা পৰভাগে সো উপকাৰকো পুৰিসো অত্তনো কিচ্চে সঞ্জাতে মম সহাযানং সন্তিকং গমিস্সামীতি সঙ্কেতানুসাৰেন গন্ত্ৱা নিগ্ৰোধমূলে ঠিতো সুৱস্স সদ্দমকাসি, তং সুত্ৱা সুৱপোতকো ৱেগেনাগন্ত্ৱা তেন সদ্ধিং পটিসম্মোদিত্ৱাসম্ম চিৰেনা গতোসি, আগতকাৰণং মে আচিক্খাতি আহ. সোপাহ সম্মাহং জীৱিতু মসক্কোন্তো পুত্তদাৰকে ঞাতীনং পটিপাদেত্ৱা তৱ সন্তিকমাগতোম্হিতি, সুৱপোতকোপি সাধু সম্ম তযা কতং মম সন্তিকমাগচ্ছন্তেন, তযা মম জীৱিতং দিন্নং, মযাপি তৱ জীৱনুপাযং কাতুং ৱট্টতি, যাৱাহং আগচ্ছামি, তাৱেত্থ থোকং ৱিস্সমাতি ৱত্ৱা পক্কামি জীৱনুপাযং পৰিযেসমানো, তস্মিং কিৰ সমযে বাৰাণসীৰাজা নগৰতো নিক্খম্ম সুসজ্জিতুয্যানং পৱিসিত্ৱা সপৰিসো কীড়িত্ৱা মজ্ঝন্তিকসমযে সুফুল্লিতং পঞ্চপদুমসঞ্ছন্ৱং মঙ্গলপোক্খৰণিং দিস্ৱা নহাযিতুকামো সব্বাভৰণানি ওমুঞ্চিত্ৱা ৰাজপুৰিসে পটিপাদেত্ৱা নহাযিতুং ওতৰি, তদা সুৱপোতকো তং ঠানং পত্তো সাখন্তৰে নিলীনো ৰাজপুৰিসানং পমাদং দিস্ৱা ৰঞ্ঞো মুত্তাহাৰং ডসিত্ৱা আকাসং পক্খন্দিত্ৱা ৱেগেনাগন্ত্ৱা অত্তনো সহাযস্স দত্ৱা অপ্পমত্তো ইমং ৱলঞ্জেহি সম্মাতি ৱত্ৱা অদাসি, ততো সো নং গহেত্ৱা ইমং কুহিং পটিসামেস্সামীতি চিন্তোন্তো মমেকো সহাযকো অন্তোনগৰে ৱসতি, তস্মিং ঠপেস্সামীতি চিন্তেত্ৱা যথাসঙ্কেতমুপগম্ম তং দিস্ৱা পটিসন্থাৰং কত্ৱা সুৱপোতকেন কতো পকাৰং পকাসেত্ৱা ইমং মুত্তাহাৰং সাধুকং ঠপেহীতি ৱত্ৱা অদাসি, তংখণে ৰাজা নহাত্ৱানুলিত্তো আভৰণানি পিলন্ধেন্তো মুত্তাহাৰং নাদ্দস. ততো ৰাজপুৰিসা অন্তোচ বহিচ পৰিজনে উপপৰিক্খিত্ৱা মুত্তাহাৰং অপস্সন্তা নগৰে ভেৰিং চৰাপেসুং, যো মুত্তাহাৰং পস্সতি, তস্স ৰাজা মহন্তং যসং দস্সতীতি. তং সুত্ৱা সো মিত্তদূভী এৱং চিন্তেসি, অহংচম্হি দুক্খিতো, যন্নূনাহং মুত্তাহাৰং ৰঞ্ঞো দস্সেত্ৱা সুখেন ৱসেয্যং, কিম্মে এতেনাতি তেন কতং তথাৰূপং উপকাৰং অসল্লক্খেন্তো মহামিত্তদূভী পুৰিসো ৰাজপুৰিসে উপসঙ্কম্ম মুত্তহাৰং অত্তনো সন্তিকে ঠপিতভাৱং কথেসি, ভো মম সন্তিকে একো পুৰিসো মুত্তহাৰং ঠপেসীতি. এৱং অসপ্পুৰিসসংসগ্গোতি, তথাহি.

১. যথা সংৱড্ঢিতো নিম্বো, মধুখীৰো দসিঞ্চনা;

ন যাতি মধুৰং তং ৱো, পকাৰ মসতং কতং.

২. সীসেনু দক মাদায, ৱড্ঢিতোপি নুহীতৰু;

ন যাতি মধুৰং তংৱো, পকাৰমসতং কতং.

৩. নিচ্চং খীৰোদপানেন, ৱড্ঢিতো সিৱিসো যথা;

ৱিসংৱ পৰিৱত্তেতি, তথা নীচোপকাৰকং.

৪. যথাত্তনা কতো অগ্গি, সীতলং ন দদে খলু;

তথা নীচে কতং কাৰং, অগ্গীৱ দহতে তনুং.

৫. তস্মা উপপৰিক্খিত্ৱা, হাৱভাৱেন বুদ্ধিযা;

কাতব্বা মেত্তি জন্তূহি, নামিত্তো লভতেসুখন্তি.

অথস্স মিত্তদুভিনো ৱচনেন ৰাজপুৰিসা মুত্তাহাৰংচতংচ গহেত্ৱা সভণ্ডকং পুৰিসং দস্সেসুং. অথ ৰাজা সভণ্ডকং চোৰং দিস্ৱা কুদ্ধো ইমং নেত্ৱা দক্খিণদ্ৱাৰে জীৱসূলে উত্তাসেথাতি আণাপেসি, ৰাজপুৰিসা তস্স ৰাজাণং কৰোন্তো অগমংসু, তেহি নীযমানো পুৰিসো দক্খিণদ্ৱাৰা নিক্খম্ম সপ্পসহাযং সৰিত্ৱা অপ্পেৱনামে তস্স সন্তিকা কিঞ্চি সোত্থি ভৱেয্যাতি পুব্বে ৱুত্তসঙ্কেতা নুসাৰেন ৱম্মিকং দিস্ৱা সম্ম দীঘাতি সদ্দমকাসি, সো ৱম্মিকা নিক্খম্মতং তথা নিযমানং দিস্ৱা সংৱিগ্গো দুক্খপ্পত্তো সহাযস্সমে অজ্জ অৱস্সযেন উপত্থম্ভং ভৱিতুং ৱট্টতীতি তং সমস্সাসেত্ৱা অত্তভাৱং ৱিজহিত্ৱা অঞ্ঞতৰৱেসেন ৰাজপুৰিসে উপসঙ্কম্ম ইমং পুৰিসং মুহুত্তংমা মাৰেথাতি দড়্হং ৱত্ৱা মুহুত্তেন ৰঞ্ঞো অগ্গমহেসিযা ৱসনট্ঠানং গন্ত্ৱা সপ্পৱণ্ণেন দেৱিং ডসিত্ৱা তায ৱিসেন মুচ্ছিতকালে মনুস্সৱণ্ণেন ৱজ্ঝপ্পত্তো ৱিসোসধং জানাতিতী ৱত্ৱা তংখণেৱ সহাযস্স সন্তিকং গন্ত্ৱা ৰঞ্ঞা তৱ পক্কো সিতকালে গন্ত্ৱা উদকপ্পসতেন দেৱিযা সৰীৰে পহৰিত্ৱা নিব্বিসং কৰাহীতি ৱত্ৱা পক্কামি, অথ ৰাজা ৱিসৱেজ্জ পৰিযেসন্তো তং পৱত্তিং সুত্ৱা ৱজ্ঝপ্পত্তং আনেথাতি আণাপেত্ৱা দেৱিযা নিব্বিসং কৰোথাতি আহ, সো নাগৰাজেন ৱুত্তনযেন নিব্বিসমকাসি, সা সুখিতা অৰোগা অহোসি, ৰাজা তং দিস্ৱা তুট্ঠো তস্স খেত্তৱত্থুযানৱাহনাদিদানেন মহাসক্কাৰমকাসি, অথ সো ৰাজানং উপসঙ্কম্ম অত্তনা কতং সব্বং পকাসেসি. তেন ৱুত্তং.

৬. একদাহং মহাৰাজ, ৱনং কম্মেন কেনচি;

গতোদ্দসং মহাৱাটে, পতিতং সুৱপোতকং.

৭. অথো ৰগং মনুস্সংচ;

দুক্খপ্পত্তে খুদাপৰে;

উক্খিপিং কৰুণাযাহং;

তে মে ৱোচুং তদা তযো.

৮. অদাসি জীৱমম্হাকং, উপকাৰোসি নো তুৱং;

তৱ কিচ্চে সমুপ্পন্নে, অম্হাকং এহি সন্তিকং.

৯. এৱং তেহি পৱুত্তোহং, অগঞ্ছিং সুৱসন্তিকং;

তেন কতূপকাৰোহং, মনুস্সস্সাপি সন্তিকং.

১০. তেনাহং মৰণপ্পত্তো, অদ্দসং উৰগাধিপং;

সোদাসি জীৱিতং ময্হং, অলত্থং [অলদ্ধ ইতিসব্বত্থ] ৱিপুলং ধনং.

১১. সুজনো নাৱমন্তব্বো, খুদ্দকোতি নৰাধিপ;

সুৱোচ উৰগোচেতে, মিত্তধম্মে পতিট্ঠিতা.

১২. কাৰণঞ্ঞূ মনুস্সেসো,

অম্হেহি সমজাতিকো;

কতূপকাৰো এৱম্পি,

দিসো জাতো নৰাধমো.

১৩. অকস্মা দেৱ কুপ্পন্তি, পসীদন্তিনিমিত্ততো;

সীলং হেতমসাধূনং, বালানমৱিজানতং.

১৪. মনুস্সাপি মহাৰাজ, কেচি ৱিস্সাসিযা ন ৱে;

তিৰচ্ছানাপি হোন্তেৱ, অজিম্হমনসাসঠাতি.

এৱং সো অত্তনো পৱত্তিং কথেসি, ৰাজা তং সুত্ৱা পসন্নো ইমস্স পুৰিসস্স মহন্তং গেহং কত্ৱা মহাপৰিহাৰং কৰোথাতি আণাপেসি, সো পন মম গেহং নিগ্ৰোধস্স চ ৱম্মিকস্স চ অন্তৰে কৰোথাতি ৱত্ৱা তথা কাৰেত্ৱা তত্থ ৱসন্তো ৰাজূপট্ঠানং কৰোন্তো তেহি সহাযেহি সদ্ধিং সম্মোদমানো যাৱজীৱং ৱসিত্ৱা আযু পৰিযোসানে তেহি সদ্ধিং যথাকম্মং গতোতি.

১৫. ইতি পতিতসুখম্হা অঙ্গতো ৱা ধনম্হা,

পৰমতৰপতিট্ঠা হোন্তি মিত্তা সখানং;

ৱিৰহিতসখিনং ভো নত্থি যস্মাভিৱুদ্ধি,

চিণুথ কুসলধম্মং মিত্তৱন্তা মহন্তং.

তিণ্ণং জনানং ৱত্থুং ততিযং.