১০. ৰূপদেৱিযা ৱত্থুম্হি অযমানুপুব্বীকথা

অতীতে কিৰ ৱিপস্সিস্স ভগৱতো কালে তস্মিং নগৰে একা গামদাৰিকা ৱিহাৰে আহিণ্ডন্তী একং গিলানভিক্খুং দিস্ৱা কম্পমানহদযা উপসঙ্কমিত্ৱা ৱন্দিত্ৱা ভন্তে কোতে আবাধো সৰীৰং পীড়েতীতি পুচ্ছি. তেনাপি ভগিনি খৰাবাধো মে পীড়েতীতি ৱুত্তে সা তেনহি ভন্তে অহং তং ৰোগং ৱূপসমেস্সামীতি নিমন্তেত্ৱা গেহং গন্ত্ৱা তং পৱত্তিং মাতাপিতুন্নং কথেত্ৱা তেহি অনুঞ্ঞাতা পুন দিৱসে নানগ্গৰসেন ভেসজ্জাহাৰং সম্পাদেসি, ততো সো ভিক্খু পুনদিৱসে চীৱৰং পাৰুপিত্ৱা ভিক্খায চৰন্তো তস্সা গেহং গন্ত্ৱা অট্ঠাসি. সা থেৰং আগতং দিস্ৱা সোমনস্সজাতা পত্তং গহেত্ৱা আসনং পঞ্ঞাপেত্ৱা অদাসি. তত্থ নিসিন্নং তং আহাৰেন সাধুকং পৰিৱিসিত্ৱা সক্কাৰ মকাসি. অথস্সা সদ্ধাবলেন ভুত্তমত্তেযেৱ সো আবাধো ৱূপসমি. ততো সো ৱূপসন্তৰোগো দুতিযদিৱসে তস্সা গেহং না গমাসি. অথ সা ৱিহাৰং গন্ত্ৱা তং ৱন্দিত্ৱা কস্মানাগতত্থাতি পুচ্ছিত্ৱা তেন মে ভগিনি ব্যাধি ৱূপসমি, তস্মা নাগতোস্মীতি ৱুত্তে সা সাধু ভন্তেতি সোমনস্সজাতা গেহমেৱ অগমাসি. সা তেন পুঞ্ঞকম্মেন কালং কত্ৱা দেৱলোকে নিব্বত্তি. তস্সা তত্থ দ্ৱাদসযোজনিকং কনকৱিমানং নিব্বত্তি. সা তত্থ দেৱিস্সৰিযং অনুভৱন্তী ছবুদ্ধন্তৰং খেপেত্ৱা অম্হাকং ভগৱতো কালে জম্বুদীপে দেৱপুত্তনগৰে উদিচ্চব্ৰহ্মণকুলে জেট্ঠব্ৰাহ্মণস্স ভৰিযায কুচ্ছিম্হি পটিসন্ধিং গণ্হি, সা পৰিপাক মন্ৱায মাতুকুচ্ছিতো নিক্খমি. তস্সা মাতুকুচ্ছিতো নিক্খন্তকালতো পট্ঠায দিৱসে দিৱসে অট্ঠট্ঠনালিমত্তং তণ্ডুলং নিব্বত্ততি. তস্সা ৰূপসম্পত্তিং দিস্ৱা পসন্না মাতাপিতৰো ৰূপদেৱীতি নাম মকংসু. পচ্ছা তং পতিৰূপেন দাৰকেন নিযোজেসুং. অথস্সা তণ্ডুল- নালিমত্তং গহেত্ৱা পচিতুং আৰদ্ধে ইচ্ছিতিচ্ছিতমংসাদিব্যঞ্জনঞ্জ সপ্পিনৱনীতদধিখীৰাদিগোৰসঞ্চ জীৰমৰিচাদিকটুকভণ্ডঞ্চ কদলিপনসমধুগুড়াদিউপকৰণঞ্চ ভাজনানি পূৰেত্ৱা নিব্বত্ততি, তায হত্থেন গহিতং কিঞ্চি খাদনীযং ভোজনীযংৱা পূতিভাৱং ন গচ্ছতি, ভত্তুক্খলিং গহেত্ৱা সকলনগৰৱাসিনো ভোজেন্তিযাপি এককটচ্ছুমত্তং ভত্তং গহিতট্ঠানং ন পঞ্ঞাযতি. এৱং অপৰিক্খযপুঞ্ঞা অহোসি, সকলদেৱপুত্তনগৰে চন্দসুৰিযাৱ পাকটা অহোসি, অথ সা পঞ্চসতভিক্খূ নিমন্তেত্ৱা নিচ্চং সকনিৱেসনেযেৱ ভোজেতি, তদা তেসং অন্তৰে পটিসম্ভিদাপত্তো মহাসঙ্ঘৰক্খিতত্থেৰোনাম ইমিস্সা পুঞ্ঞানুভাৱং দিব্বচক্খুনা দিস্ৱা ন জানাতি এসা অত্থনা পুব্বে কতকম্মং. যন্নূনাহং অস্সা পকাসেয্যন্তি একদিৱসং তস্সা নিৱেসনে ভুঞ্জিত্ৱা অনুমোদনং কৰোন্তো জানাসি ভগিনি তযা পুব্বে কতকম্মন্তি পুচ্ছি, ন জানামি ভন্তে. সোতুমিচ্ছামীতি, অথস্সা সো পুব্বকম্মং পকাসেন্তো.

১. একনৱুতে ইতো কপ্পে,

ৱিপস্সীনাম নাযকো;

অহোসি লোকে লোকেক,

নাযকো ছিন্নবন্ধনো.

২. তদা তস্মিং পুৰে ৰম্মে, আসি ত্ৱং গামদাৰিকা;

আহিণ্ডন্তী ৱিহাৰস্মিং, অদ্দক্খি জিনসাৱকং.

৩. ৰোগাতুৰং কিসং পণ্ডুং, অস্সসন্তং মুহুং মুহুং;

দিস্ৱান কম্পিতা চিত্তা, নিমন্তেত্ৱান তং মুনিং.

৪. ভেসজ্জঞ্চেৱ ভত্তঞ্চ, অদা ত্ৱং তেন সো যতি;

অব্যাবাধো অনীঘোচ, অহোসি অনুপদ্দৱো.

৫. ততো ত্ৱং তেন কম্মেন, সুকতেন ততো চুতা;

জাতাসি দেৱলোকস্মিং, সব্বকামসমিদ্ধিনী.

৬. তত্থ তে পুঞ্ঞতেজেন, পাসাদো ৰতনামযো;

মণিথূপিসতাকিণ্ণো, কূটাগাৰেহি লঙ্কতো.

৭. নেকগব্ভসতাকিণ্ণো, সযনাসনমণ্ডিতো;

অচ্ছৰাসতসংকিণ্ণো, নচ্চগীতাদিসংকুলো.

৮. ৰম্ভাম্বজম্বুসন্নীৰ, পূগপুন্নাগপাটলী;

নাগাদিতৰুসণ্ডেহি, মণ্ডিতুয্যানপন্তিহি.

৯. পদুমুপ্পলকড়াৰ, কুন্দকাননমণ্ডিতে;

মধুমত্তালিপালীহি, সাৰসীসৰসংকুলে.

১০. দেৱপুত্তেহি নেকেহি, তথা দেৱচ্ছৰাহিচ;

নিচ্চুস্সৱে মহাভোগে, ৱিমানে মননন্দনে.

১১. ত্ৱমেৱং দেৱলোকম্হি, ৱিন্দমানা মহাযসং;

অদ্ধানং ৱীতিনামেত্ৱা, নিব্বুতে গোতমে জিনে.

১২. জম্বুদীপে ইদানি ত্ৱং, নিব্বত্তা উদিতে কুলে;

পুঞ্ঞপঞ্ঞাগুণাৱাসা, ৰূপেনগ্গা পিযংৱদা.

১৩. এতং তে দেৱলোকস্মিং, দেৱিস্সৰিযমব্ভুতং,

ইমং তে ইধ লোকস্মিং, সব্বং মানুসিকং সুখং.

১৪. ৱিপস্সিমুনিনো কালে, ত্ৱং তস্সেকস্স ভিক্খুনো;

অদা দানং গিলানস্স, তস্স তং ফলমীদিসং.

১৫. কাতব্বঞ্হি সদা পুঞ্ঞং, ইচ্ছন্তেন সুখপ্পদং;

তস্মা ত্ৱং সব্বদা ভদ্দে, উস্সুক্কা কুসলে ভৱাতি.

এৱং সো তস্স পুৰিমত্তভাৱে কতকম্মং পকাসেত্ৱা ইদানি পুঞ্ঞকম্মে অপ্পমাদা ভৱাতি অনুসাসি. সা থেৰস্স ধম্মদেসনং সুত্ৱা পৰমসোমনস্সা ততো পট্ঠায দানাদীসু নিৰতা পুঞ্ঞানি কৰোন্তী তেনেৱ সোমনস্সেন সোতাপন্না অৰিযসাৱিকা অহোসীতি.

১৬. ইতি তৰুণকুমাৰী পুঞ্ঞকম্মেসু সাৰং,

অৱিদিতগুণমত্তা দত্ৱ ভিক্খুস্স দানং;

দিৱিমনুজসুখং সালত্থ তুম্হে ভৱন্তা,

ৱিদিতকুসলপাকা কিং ন লব্ভেথ সন্তিং.

ৰূপদেৱিযা ৱত্থুং দসমং.

ধম্মসোণ্ডকৱগ্গো পথমো.