আসীৱিসৱগ্গ

পঠমদাৰুক্খন্ধোপমসুত্ত

পুচ্ছা – আসীৱিসৱগ্গে আৱুসো পোৰাণকেহি ধম্মসংগাহকমহাথেৰেহি চতুত্থং সংগীতং পঠমদাৰুক্খন্ধোপমসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – কোসম্বিযং ভন্তে গঙ্গায নদিযা তীৰে সম্বহুলে ভিক্খূ আৰব্ভ ‘‘পস্সথ নো তুম্হে ভিক্খৱে অম্হং মহন্তং দাৰুক্খন্ধং গঙ্গায নদিযা সোতেন ৱুয্হমান’’ন্তি এৱমাদিনা ভগৱতা ভাসিতা.

উপচাৰৱচনং

পুচ্ছা – কথঞ্চাৱুসো তত্থ ভগৱতা ওৰিমতীৰাদীনং উপচাৰৱচনানং অত্থো ৱিত্থাৰেন ৱিভজিত্ৱা পকাসিতো.

ৱিস্সজ্জনা – ওৰিমং তীৰন্তি খো ভিক্খু ছন্নেতং অজ্ঝত্তিকানং আযতনানং অধিৱচনং. পাৰিমং তীৰন্তি খো ভিক্খু ছন্নেতং বাহিৰানং আযতনানং অধিৱচনং. মজ্ঝে সংসীদোতি খো ভিক্খু নন্দিৰাগস্সেতং অধিৱচনং. থলে উস্সাদোতি খো ভিক্খু অস্মিমানস্সেতং অধিৱচনন্তি এৱমাদিনা ভন্তে ভগৱতা তত্থ ওৰিমতীৰাদীনং উপচাৰৱচনানং অত্থো ৱিত্থাৰেন ৱিভজিত্ৱা পকাসিতো.

পুচ্ছা – ইমস্মিং খো পন আৱুসো সুত্তে ভগৱতা ভাসিতে ৱিসেসতো কস্স কীদিসো অত্থো কথঞ্চ পটিলদ্ধো.

ৱিস্সজ্জনা – ইমস্মিং ভন্তে সুত্তে ভগৱতা ভাসিতে ৱিসেসতো নন্দস্স গোপালকস্স পব্বজ্জা চ উপসম্পদা চ যাৱ অৰহত্তাচ ৱিসেসতো অত্থো অধিগতো.

লভেয্যাহং ভন্তে ভগৱতো সন্তিকে পব্বজ্জং, লভেয্যং উপসম্পদং.

তেন হি ত্ৱং নন্দ সামিকানং গাৱো নিয্যাতেহি.

গমিস্সন্তি ভন্তে গাৱো ৱচ্ছগিদ্ধিনিযো.

কিংসুকোপমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি অট্ঠমং সংগীতং কিংসুকোপমসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সক্কেসু ভন্তে কপিলৱত্থুস্মিং নিগ্ৰোধাৰামে অঞ্ঞতৰং কাৰকং ভিক্খুং আৰব্ভ ভাসিতং. অঞ্ঞতৰো ভন্তে কাৰকো ভিক্খু চত্তাৰো খাণাসৱে ভিক্খূ ঞাণদস্সনৱিসুদ্ধং পুচ্ছিত্ৱা অসন্তুট্ঠো তেসং ভিক্খূনং পঞ্হাৱেয্যাকৰণেন যেন ভগৱা তেনুপসঙ্কমি. উপসঙ্কমিত্ৱা ভগৱন্তং এতদৱোচ ‘‘কিত্তাৱতা নু খো ভন্তে ভিক্খুনো দস্সনং সুৱিসুদ্ধং হোতী’’তি. তস্মিং ৱত্থুস্মিং ‘‘সেয্যথাপি ভিক্খু পুৰিসস্স কিংসুকো অদিট্ঠপুব্বো অস্স, সো যেনঞ্ঞতৰো পুৰিসো কিংসুকস্স দস্সাৱী তেনুপসঙ্কমেয্যা’’তি এৱমাদিনা ভন্তে ভগৱতা ভাসিতং.

ছপ্পাণকোপমসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি দসমং সংগীতং ছপ্পাণকোপমসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সক্কেসুযেৱ ভন্তে সম্বহুলে ভিক্খূ আৰব্ভ ‘‘সেয্যথাপি, ভিক্খৱে পুৰিসো অৰুগত্তো পক্কগত্তো সৰৱনং পৱিসেয্যা’তি এৱমাদিনা ভগৱতা ভাসিতং.

পুচ্ছা – কথঞ্চাৱুসো তত্থ ভগৱতা অসংৱৰো ৱিত্থাৰেন ৱিভজিত্ৱা দেসিতো.

ৱিস্সজ্জনা – কথঞ্চ ভিক্খৱে অসংৱৰো হোতি, ইধ ভিক্খৱে ভিক্খু চক্খুনা ৰূপং দিস্ৱা পিযৰূপে ৰূপে অধিমুচ্চতি, অপ্পিযৰূপে ৰূপে ব্যাপজ্জতি, অনুপট্ঠিতকাযস্সতি চ ৱিহৰতি পৰিত্তচেতসো. তঞ্চ চেতোৱিমুত্তিং পঞ্ঞাৱিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তীতি এৱমাদিনা ভন্তে ভগৱতা তত্থ অসংৱৰো ৱিত্থাৰেন ৱিভজিত্ৱা দেসিতো.

পুচ্ছা – কথঞ্চাৱুসো তত্থ ভগৱতা সংৱৰো ৱিভজিত্ৱা ৱিত্থাৰেন দেসিতো.

ৱিস্সজ্জনা – কথঞ্চ ভিক্খৱে সংৱৰো হোতি, ইধ ভিক্খৱে ভিক্খু চক্খুনা ৰূপং দিস্ৱা পিযৰূপে ৰূপে নাধিমুচ্চতি, অপ্পিযৰূপে ৰূপে ন ব্যাপজ্জতীতি, এৱমাদিনা ভন্তে ভগৱতা তত্থ সংৱৰো ৱিভজিত্ৱা ৱিত্থাৰেন দেসিতো.