ৱেদনাসংযুত্ত

দট্ঠব্বসুত্ত

পুচ্ছা – তেনাৱুসো ভগৱতা…পে… সম্মাসম্বুদ্ধেন ৱেদনাসংযুত্তে পঞ্চমং দট্ঠব্বসুত্তং কত্থ কং আৰব্ভ কথঞ্চ ভাসিতং.

ৱিস্সজ্জনা – সক্কেসু ভন্তে কপিলৱত্থুস্মিং নিগ্ৰোধাৰামে সম্বহুলে ভিক্খূ আৰব্ভ ‘‘তিস্সো ইমা ভিক্খৱে ৱেদনা. কতমা তিস্সো, সুখা ৱেদনা দুক্খাৱেদনা অদুক্খমসুখা ৱেদনা. সুখা ভিক্খৱে ৱেদনা দুক্খতো দট্ঠব্বা, দুক্খা ৱেদনা সল্লতো দট্ঠব্বা, অদুক্খমসুখা ৱেদনা অনিচ্চতো দট্ঠব্বা’’তি এৱমাদিনা ভগৱতা ভাসিতং.

সুখা ভিক্খৱে ৱেদনা দুক্খতো দট্ঠব্বা.

যো সুখং দুক্খতো অদ্দস, দুক্খমদ্দক্খি সল্লতো;

অদুক্খমসুখং সন্তং, অদ্দক্খিনং অনিচ্চতো.

স ৱে সম্মদ্দসো ভিক্খু, পৰিজানাতি ৱেদনা;

সো ৱেদনা পৰিঞ্ঞায, দিট্ঠে ধম্মে অনাসৱো;

কাযস্স ভেদা ধম্মট্ঠো, সঙ্খ্যং নোপেতি ৱেদগূ.

সল্লসুত্ত

পুচ্ছা – তত্থেৱ আৱুসো ছট্ঠং সল্লসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সক্কেসু ভন্তে কপিলৱত্থুস্মিং নিগ্ৰোধাৰামে সম্বহুলে ভিক্খূ আৰব্ভ ‘‘অস্সুতৱা ভিক্খৱে পুথুজ্জনো সুখম্পি ৱেদনং ৱেদযতি, দুক্খম্পি ৱেদনং ৱেদযতি, অদুক্খমসুখম্পি ৱেদনং ৱেদযতি. সুতৱা ভিক্খৱে অৰিযসাৱকো সুখম্পি ৱেদনং ৱেদযতি, দুক্খম্পি ৱেদনং ৱেদযতি, অদুক্খমসুখম্পি ৱেদনং ৱেদযতি. তত্ৰ ভিক্খৱে কো ৱিসেসো, কো অধিপ্পযাসো, কিং নানাকৰণং সুতৱতো অৰিযভাৱকস্স অস্সুতৱতা পুথুজ্জনেনা’’তি এৱমাদিনা ভগৱতা ভাসিতং.